1. ¿Tlen tekitl okichi Jesús uan tleka?

JESUCRISTO okuajximaya uan noijki otetlapouiaya kuali tlajtolmej (Mar. 6:3; Rom. 15:8). Non ome tekitl kuali okichi. Omomachti kitekitiltis nochi tlen ika okuajximaya. Noijki Jesús okimatiaya miak tlamantli itech iTajtsin, ik non, okinpaleui oksekimej ma kajsikamatikan iTlajtol toTajtsin Dios (Mat. 7:28; Luc. 24:32, 45). Ijkuak okipiaya treinta xiuitl ayakmo okuajxinki uan opejki tetlapouia itech Tekiuajkayotl. Okimatiaya miak ipati tetlapouis, ik non, okijto toTajtsin Dios okiualtitlanki (Mat. 20:28; Luc. 3:23; 4:43). Ye sapanoa okipatioitaya tetlapouis uan okinekiaya oksekimej noijki ma kipatioitakan (Mat. 9:35-38).

2. ¿Tlen tikchiuaskej para kuali titlamachtiskej?

² Miakej amo tikmatij tikuajximaskej pero tinochtin titetlapouiaj kuali tlajtolmej. Titetlapouiskej sapanoa miak ipati porque hasta toTajtsin Dios kichiua nin tekitl. Noijki Biblia kijtoa “tejwah san titlapalewijkeh itech iteki Dios”(1 Cor. 3:9; 2 Cor. 6:4). Salmista okijto: “Nochi motlajtol melauak” (Sal. 119:159, 160). Ik non, “tikyektekitilia n kualitlájtoli” ijkuak titetlapouiaj (xiktlajtolti 2 Timoteo 2:15). Ma timochijchikauakan kuali ma tiktekitiltikan Biblia porque techpaleuia ma tikinmachtikan itech Jehová, Jesús uan itech iTekiuajkayo. Para kuali titlamachtiskej, ialtepe Jehová okitlali seki  tlamantli tlen ika titlamachtiaj. Ik non, moneki kuali ma tikixmatikan.

3. (1) ¿Tleka moneki ma titlamachtikan? (2) Ijkon ken kijtoa Hechos 13:48, ¿akinmej moneki tikintemoskej?

³ Xamo timotlajtlaniaj tleka okitlalijkej tlen ika titlamachtiskej uan amo tlen ika titetlapouiskej. Porque ijkuak titetlapouiaj san tikinmatiltiaj tlen kijtoa Biblia. Pero ijkuak titlamachtiaj tikinyekiluiaj tlen tikintlapouiaj uan ijkon kajsikamatij uan ajsi itech inyolo uan moyekana ika tlen momachtiaj. Ayakmo miak poliui uan tlamis nochi tlen amo kuali, ik non, ma titlamachtikan ika Biblia. Pero moneki tikintemoskej akinmej kinekij momachtiskej uan ma tikinpaleuikan ma kitekichiuilikan toTajtsin Dios (xiktlajtolti Hechos 13:44-48).

4. ¿Ken tikintemoskej akinmej kinekij momachtiskej Biblia?

⁴ ¿Ken tikintemoskej akinmej kinekij momachtiskej Biblia? Moneki ma titetlapouikan. Ik non, ma tikchiuakan tlen otlanauati Jesús ijkuak okijto: “Ijkuak nonkalakitiweh itech se weyi altepetl noso altepetsintli, xiktemokah aka kuali tlakatl non manomechyekseli icha” (Mat. 10:11). Tejuan moneki noijki ijkon ma tikchiuakan. Pero amo ma tikchiakan ma techkakikan akinmej moueyinekij uan amo itlaj kinekij kimatiskej itech toTajtsin Dios. Ma tikintemokan akinmej yolyamankej uan tlen kinekij kimatiskej tlen tlamachtia Biblia. Uelis tikijtoskej moneki tikchiuaskej ken ijkuak Jesús okuajximaya. Achto okitemoaya kuauitl uan tlen ika kinchijchiuaskia puertas uan yugos. Satepan okikixtiaya nochi tlen ika okuajximaya uan okinchijchiuaya miak tlamantli. Tejuan noijki ijkon ma tikchiuakan. Achto ma tikintemokan akinmej kinekij momachtiskej Biblia. Satepan kuali ma tikinmachtikan ika tlen okitlali ialtepe Jehová uan mochiuaskej imachtijkauan Jesús (Mat. 28:19, 20, TNM).

5. Xikyekijto ken uelis tiktekitiltiskej tlen ika titlamachtiaj. (Xikinmita fotos kanin peua tlamachtil).

⁵ Tlatlamantli tlapaleuia tlen ika titlamachtiaj. Ma timokuayejyekokan nochi tlen okitekitiltiaya Jesús. * Seki ika otlatamachiuaya, okseki tlamantli ika okitaya kanin kitekis kuauitl. Okseki ika okikoyoniaya kuauitl, okseki tlamantli ika omopaleuiaya para itlaj kualtsin kichijchiuaskia, okseki ika okitaya kox chiko uan okseki tlamantli ika okisasaloaya kuauitl. Noijki ijkon tlen ika titlamachtiaj tlatlamantli techpaleuia. Techpaleuiaj nochi tlen ika titlamachtiaj. Ma tikitakan ken uelis tikintekitiltiskej.

6. Xikijto ken titetlapouiaj ika tarjetas.

⁶ Tarjetas. Ninmej tarjetas sapanoa techpaleuiaj porque ika tikinmiluiaj oksekimej ken uelis kalakiskej itech página tlen tikpiaj itech Internet. Ompa uelis kajsiskej miak tlamachtilmej uan ompa uelis kitlajtlaniskej ma kinmachtikan. Axkan yikanaj cuatrocientos mil okitlajtlankej itech jw ma kinmachtikan. ¡Mojmostla kitlajtlanij ma kinmachtikan! Ik non, nochipa ma tikinuikatinemikan tarjetas. Ijkon uelis ika titetlapouiskej ijkuak monekis.

7. ¿Tlen ome tlamantli tikchiuaj ika amamej tlen ika titeyoleuaj?

⁷ Amamej tlen ika titeyoleuaj. Ika ninmej amatsitsintin tikinmiluiaj oksekimej  touan ma monechikotij. Pero noijki amatsitsintin techpaleuiaj ma tikchiuakan ome tlamantli. Ika ninmej amatsitsintin tikinmiluiaj oksekimej: “Timitsyoleuaj ximomachti Biblia iuan iTlaixpantijkauan Jehová”. Noijki itech ninmej amatsitsintin kijtoaj uelis momachtiskej ijkuak monechikotiuij noso se iTlaixpantijka Jehová uelis kinmachtis. Ika ninmej amatsitsintin tikinmiluiaj oksekimej touan ma momachtikan iTlajtol toTajtsin Dios (Mat. 5:3, TNM). Pero nochtin uelis touan monechikotiuij maski kinekiskej noso amo momachtiskej Biblia. Momachtiskej miak tlamantli itech Biblia tla touan monechikoskej.

8. ¿Tleka miak ipati touan ma monechikokan oksekimej maski se uelta?

⁸ Miak ipati ma tikinmiluikan oksekimej touan ma monechikokan maski san kanaj se uelta. ¿Tleka? Porque kitaskej tejuan titlamachtiaj tlen kijtoa Biblia uan tikinpaleuiaj oksekimej ma kixmatikan toTajtsin Dios uan ma kitakan amo tikchiuaj ken okseki religiones (Is. 65:13). Ijkon okipanok Ray uan isiua tlen itoka Linda uan chantij Estados Unidos. Yejuan otlaneltokayaj itech toTajtsin Dios, ik non, okinekiayaj yaskej teopan uan ijkon momachtiskiaj Biblia. Opejki monechikoaj itech nochi teopanmej tlen okatkaj itech non altepetl. Okatkaj miakej teopanmej uan miakej religiones. Okijtojkej mokauaskiaj itech se teopan tla kitaskiaj kichiuaj ome tlamantli. Se, tla kinmachtiskiaj ken kitekichiuiliskej toTajtsin Dios. Okse, tla kitaskiaj motlakentiaj ken akinmej kitekichiuiliaj toTajtsin Dios. Miak xiuitl otlatemotinenkej pero nion se ijkon okichiuaya. Satepan Linda otekipanoto uan Ray omokuepki ikalijtik. Opanok ik kanin kajki se kali kanin monechikoaj iTlaixpantijkauan Jehová. Ijkuakon omotlajtlani: “¿Tleka amo nikalaki uan nikitas tlen kichiuaj?”. Sapanoa okipakti tlen okitak. Nochtin tlen ompa okatkaj kuali okiselijkej uan kualtsin okipiayaj intlaken. Tlayekapan omotlali uan okipakti tlen omomachti. Nin techilnamiktia ijkuak Pablo okijto tlen kipanoa akin yikin touan monechikoa. Ye okijto: “Dios milák kajki nomowah” (1 Cor. 14:23-25). Ray opejki monechikoa chichikometika uan noijki tlajko semana. Linda noijki opejki monechikoa. Maski yokipiayaj setenta xiuitl, opejki momachtiaj Biblia uan noijki omoapolaktijkej.

9. ¿Ken uelis titetlapouiskej ika amatsitsintin?

⁹ Amatsitsintin. Tikinpiaj chikueyi amatsitsintin uan ninmej techpaleuiaj ika ma titetlapouikan. Okiskej itech 2013 uan axkan yotikinkixtijkej kanaj cinco mil millones. Tla tikmatij ken titetlapouiskej ika se amatsintli, noijki uelis tikintekitiltiskej okseki amatsitsintin. ¿Ken uelis ika titetlapouiskej?

10. Xikijto ken uelis titetlapouiskej ika amatsintli ¿Tlen iTekiuajkayo toTajtsin Dios?

¹⁰ Ma tikitakan ken uelis titetlapouiskej ika amatsintli ¿Tlen iTekiuajkayo toTajtsin Dios? Ma tikititikan kanin peua uan ma tiktlajtlanikan: “¿Tikmati tlen kijtosneki iTekiuajkayo toTajtsin Dios? Nikan kipia eyi tlamantli. ¿Tejuatsin tlen titlanankiliskia?”. Maski amo kuali technankilis, ma tipanokan itech okse página uan ma tikititikan kanin kijtoa “Tlen kijtoa Biblia”. Ma tiktlajtoltilikan Daniel 2:44 uan Isaías 9:6. Tla ok majxilia iuan ma timotlapouikan. Satepan ma tikititikan kanin kijtoa “Ximotlajtlani”: “¿Ken yetos toyolilis  ijkuak ualtlanauatis iTekiuajkayo toTajtsin Dios?”. Non techpaleuis oksepa iuan timotlapouiskej. Ijkuak oksepa tiktlajpalotiuij uelis tikititiskej amatlajkuilol Kuali tlajtolmej techmaka toTajtsin Dios, itech tlamachtil 7. Ijkon peuas titlamachtiskej.

11. (1) ¿Tlen moneki tikchiuaskej ika revistas? (2) ¿Tlen moneki tikilnamikiskej ijkuak tikintemakaskej?

¹¹ Revistas. Akin Tetlapouijtok uan ¡Despertad! yokintlajtolkuepkej ika miakej tlajtolmej uan miakej kinmixmatij. Sapanoa miakej kinpaktia, ik non, kanin peua kualtsin kitokayotiaj para miakej ma kinpakti. Moneki ika ma titetlapouikan para ma kimatikan oksekimej tlen okachi ipati. Para amo san tikintemakaskej, moneki tikmatiskej tlen tlamachtil kinpaktia oksekimej.

12. Xikijto akinmej tikinmakaj revista ¡Despertad! uan tleka.

¹² Revista ¡Despertad! mochijchiua para akinmej amo okachi kixmatij Biblia. Xamo amo kixmatij tlen otlamachti Jesús, amo tlaneltokaj itech religiones noso amo kimatij Biblia techpaleuia. Nin revista kinpaleuia oksekimej ma kitakan toTajtsin Dios onka (Rom. 1:20; Heb. 11:6). Noijki kinpaleuia oksekimej ma kineltokakan Biblia iTlajtol toTajtsin Dios (1 Tes. 2:13). Itech 2018 okiskej eyi revistas uan ijkin intoka: “El camino de la felicidad”, “12 claves para una familia feliz” uan “Ayuda para quienes están de duelo”.

13. (1) Xikijto Akinmej tikinmakaj revista Akin Tetlapouijtok. (2) Xikijto tlen mokuayejyekoaj oksekimej ijkuak tikintlapouia ika revista Akin Tetlapouijtok.

¹³ Revista Akin Tetlapouijtok tlen ika titetlapouiaj, kisa para akinmej kitlakaitaj toTajtsin Dios uan kipatioitaj Biblia uan nin revista kiyekijtoa tlen tlamachtia Biblia. Xamo yikimatij tlen tlamachtia Biblia pero amo kuali kajsikamatij (Rom. 10:2; 1 Tim. 2:3, 4). Itech 2018 okiskej eyi revistas uan ijkin intoka “¿Ok techpaleuia tlen kijtoa Biblia?”, “¿Tlen techpanos satepan?” uan “¿Totech motekipachoa toTajtsin Dios?”.

14. (1) ¿Tleka tikintekitiltiaj videos? (2) ¿Tlen mokuayejyekoaj oksekimej ijkuak tikinmititia videos?

¹⁴ Videos. Ijkuak nikan okatka Jesús, amo okatkaj teposmej tlen tekitij ika electricidad. Pero axkan onka sierra tlen tekiti ika electricidad, tlen ika tlakoyoniaj uan tlen ika tlatsikoaj. Tejuan noijki amo san tikintekitiltiaj amatlajkuilolmej. Noijki tikinpiaj videos tlen noijki ika titlamachtiaj: ¿Tleka moneki timomachtis Biblia?, ¿Ken tikchiuaj se tlamachtil ika Biblia?, ¿Ken tikchiuaj tonechikoluan? uan ¿Tlen tikchiuaj tiiTlaixpantijkauan Jehová? Videos tlen uejkauaj ome minutos uelis tikinmititiskej ijkuak yikin tikintlapouiaj. Okseki videos uelis tikinmititiskej ijkuak tikintlajpalotiuij noso akinmej okachi majxiliaj. Ninmej videos uelis kinpaleuis akinmej tikintlapouiaj ma momachtikan uan touan ma monechikotij.

15. Xikijto ken kinpaleuia oksekimej videos.

¹⁵ Ma tikitakan tlen mokuayejyekoaj ijkuak oksekimej tikinmititiaj videos. Se tokni okitlapoui se siuatl tlen oualaya Micronesia ye tlajtoa yapés uan okititi video ¿Tleka moneki timomachtis Biblia? Ijkuak okitak video, opejki kijtoa: “¡Amo ueli nikneltoka, kajki ika notlajtol! Tlakatl tlen nesi itech video tlajtoa  ken kanin niuits. ¡Tlajtoa notlajtol!”. Satepan okijto kitas uan kitlajtoltis nochi tlen kajki itech jw ika itlajtol (xikita Hechos 2:8, 11). Noijki se tokni tlen chanti Estados Unidos, okititlanili isobrino se video ika itlajtol. Satepan okiualnankili isobrino uan okijto: “Sapanoa onechpakti kanin kiyekijtoa akin tlanauatia itech nin tlaltikpak kipia miak chikaualistli. Ik non, oniktlajtlanki ma nechmachtikan”. Nin telpochtli chanti kanin amo kinkauiliaj tokniuan ma tetlapouikan.

16. Xikijto ken tlapaleuiaj ninmej amatlajkuilolmej: (1) Xikaki toTajtsin Dios uan tiyoltos nochipa. (2) Kuali tlajtolmej techmaka toTajtsin Dios. (3) ¿Akinmej kichiuaj itlanekilis Jehová itech ninmej tonalmej?

¹⁶ Amatlajkuilolmej. ¿Ken tikmachtiskej akin amo ueli kitlajtoltia se amatl noso amo onka amatlajkuilolmej ika itlajtol? Ma tikmachtikan ika amatlajkuilol Xikaki toTajtsin Dios uan tiyoltos nochipa. * Noijki uelis titlamachtiskej ika amatlajkuilol Kuali tlajtolmej techmaka toTajtsin Dios. Akin tiktlapouiaj uelis tikititiskej 14 tlamachtilmej tlen katej kanin tlami amatlajkuilol uan ma tiktlajtlanikan tlen okachi kipaktiskia momachtis. ¿Ijkon tikchijtokej? Noijki titlamachtiaj ika amatlajkuilol ¿Akinmej kichiuaj itlanekilis Jehová itech ninmej tonalmej? Nin amatlajkuilol kinpaleuia akinmej momachtiaj ma kixmatikan ialtepe Jehová. Tla tiknekij tikmatiskej ken tiktekitiltiskej, xikita Toteki akinmej tikchiuaj ken Cristo Tlen tiktekitiltiskej itech nechikol tlen okiski marzo 2017.

17. (1) ¿Ken tlapaleuia amochmej? (2) ¿Tlen moneki kichiuaskej akinmej moapolaktiaj uan tleka?

¹⁷ Amochmej. Tla titlamachtiaj ika se amatlajkuilol uelis tikpatlaskej ika amochtli ¿Tlen melauak tlamachtia Biblia? Ika nin amochtli okachi kimatis miak tlamantli akin tikmachtijtokej. Tla akin tikmachtijtokej okachi yikipia chikauak itlaneltokilis, ma tikmachtikan ika amochtli “Xiyetokan itech itlasojtlalis toTajtsin Dios”. Nin amochtli kipaleuis akin tikmachtiaj ma moyekana ika principios bíblicos. Noijki ma tikilnamiktokan akin tikmachtiaj moneki momachtis ika ninmej ome amochmej maski yomoapolakti. Nin kipaleuis ma kipia chikauak itlaneltokilis (xiktlajtolti Colosenses 2:6, 7).

18. (1) Ijkon ken kijtoa 1 Timoteo 4:16, ¿tlen moneki tikchiuaskej uan tleka? (2) ¿Tleka moneki ma tiktekitiltikan tlen ika titlamachtiaj?

¹⁸ TiiTlaixpantijkauan Jehová moneki titetlapouiskej uan ijkon miakej uelis kipiaskej yolilistli tlen amo keman tlamis (Col. 1:5; xiktlajtolti 1 Timoteo 4:16). Tla tiknekij tikinpaleuiskej, moneki tiktekitiltiskej nochi tlen ika titlamachtiaj (xikita recuadro “ Tlen ika titlamachtiaj”). Kuali ma tiktekitiltikan tlen ika titlamachtiaj. Noijki moneki tikpejpenaskej tlen ika titlamachtiskej uan ken tikchiuaskej. Pero ma tikilnamiktokan amo tiknekij san tikinxexeloskej amatlajkuilolmej. Noijki amo ma tikinmakakan akinmej amo kinekij itlaj kimatiskej. San ma tikinmakakan akinmej melauak kinekij kipiaskej yolilistli tlen amo keman tlamis. Ma tikinmakakan akinmej amo moueyinekij, akinmej kinekij kimatiskej tlen tlamachtia Biblia uan kinekij kichiuaskej ken Cristo (Hech. 13:48; Mat. 28:19, 20, TNM).