ITECH se radio se tlakatl kijtoa ken tlayetos. Kimati ejekakiauis ik kanin miakej chantij. Ik non, san niman kinmatiltia akinmej ompa chantij porque amo kineki itlaj ma kinpano.

Ijkon ken nin tlakatl Jehová noijki nochtin kinnejmachtia itlaj panos nikan tlaltikpak uan sapanoa temomojti. ¿Ken technejmachtia? ¿Ken tikmatij Jehová nochipa technejmachtia? Ma tikitakan itlaj tlen yiuejkika opanok uan ijkon tikmatiskej kox nochipa achto technejmachtia Jehová.

Yiuejkika Jehová okinejmachti akinmej amo okintlakamatiayaj itlanauatiluan maski yokimatiayaj (Prov. 10:25; Jer. 30:23). Nochipa okinnejmachti tlen panoskia uan noijki okinmilui tlen omonekiaya kichiuaskej tla okinekiayaj kiyolpaktiskej (2 Rey. 17:12-15; Neh. 9:29, 30). Jehová okintekitilti itekipanojkauan para ma kitematiltikan tlen panoskia uan okinmiluiaya tlen omonekiaya totoka kichiuaskej (Amós 3:7).

Ijkon okichi se itekipanojka Jehová tlen omotokayoti Noé. Ye uejkika okijto tlaltikpak atemiskia. Ijkon okinnejmachti akinmej oauilnemiayaj uan otlateuiayaj (Gén. 6:9-13, 17). Noijki okinmilui tlen omonekiaya kichiuaskej tla amo okinekiayaj ixpoliuiskej. Sapanoa omochijchika kinnejmachtis, ik non, Noé omoixmatki ye otetlapouiaya itech melajkayotl (2 Ped. 2:5).

Pero miakej amo okikakej uan amo okineltokakej tlen okinmilui kichiuaskia toTajtsin Dios. Ik non, “okinmajsiko non kiawitl temojti iwa nochteh okinwík” noso omikej (Mat. 24:39; Heb. 11:7). Amikaj uelis kijtoskia toTajtsin Dios amo okimatilti tlen panoskia.

Ualeua ayakmo miak tonal opoliuiaya ijkuak toTajtsin Dios okinmiluiaya itlaj kichiuaskia. Pero nochipa okinnejmachti uan ijkon kimatiskiaj tlen kichiuaskej. Ijkon okichi ijkuak okiualtitlanki majtlaktli chauistli ompa Egipto. Ma tikitakan tlen opanok ijkuak tesiuiskia uan ijkon mochiuaskia chauistli chikome. Jehová okinauati Moisés uan Aarón ma kinejmachtitij faraón uan itlakeualuan. Pero ¿uelis mopaleuiskia tla mostlatika tesiuiskia? Biblia kijtoa: “Itekipanojkauan Faraón okimauilijkej tlen Jehová okijto uan san niman okinuikakej inkalijtik intekipanojkauan uan inyolkauan. Pero akinmej amo okitlakamatkej tlen okijto Jehová, okinkajtejkej intlalan intekipanojkauan uan inyolkauan” (Éx. 9:18-21). Jehová achto okinnejmachti uan ijkon kimatiskiaj tlen omonekiaya kichiuaskej tla okinekiayaj mopaleuiskej. Ik non, amo otlajyouijkej akinmej otlakakej.

ToTajtsin Dios noijki okinejmachti faraón uan itekipanojkauan ijkuak mochiuaskia chauistli majtlaktli. Pero amikaj otlakakik uan amitlaj okichijkej (Éx. 4:22, 23). Ik non, omikej intlayekankoneuan. ¡Teyolkoko tlen okinpanok! (Éx. 11:4-10; 12:29). ¿Uelis itlaj kichiuaskiaj? Kema. ¿Tleka ijkon tikijtoaj? Porque Moisés okinmilui israelitas tlen panoskia uan noijki okinmilui tlen omonekiaya kichiuaskej tla amo okinekiayaj ma mikikan  intlayekankoneuan (Éx. 12:21-28). ¿Keski otetlakamatkej? Biblia kijtoa ompa Egipto xamo okiskej kanaj tres millones. Okiskej israelitas uan noijki miakej tlen amo ompa ochantiayaj. Nochtin yejuan amitlaj okinpanok (Éx. 12:38; nota).

Nochi tlen yotikitakej kiteititia Jehová nochipa technejmachtia uan ijkon tikmatiskej tlen tikchiuaskej (Deut. 32:4). ¿Tleka technejmachtia? Tlatitlanil Pedro okiyekijto Jehová “amo kineki aka mamoixpolo, yej tinochteh matimoyolpatlakah inawak” (2 Ped. 3:9). ToTajtsin Dios amo kineki itlaj ma techpano. Ye kineki ma tikpatlakan tonemilis uan ma tiktlakamatikan ijkuak technejmachtia (Is. 48:17, 18; Rom. 2:4).

Axkan noijki toTajtsin Dios nochtin kinnejmachtijtok uan moneki totoka kimatiskej. Ijkuak Jesús okatka nikan tlaltikpak, okijto yetos se ueyi “tlaijyowílistli” uan ijkuakon nochi pojpoliuis (Mat. 24:21). Okijto tlen panoskia uan noijki okinmilui imachtijkauan tlen kichiuaskiaj. Okijto panoskia miak tlamantli itech nochi tlaltikpak uan axkan mochijtok (Mat. 24:3-12; Luc. 21:10-13).

Ik non, Jehová nochtin kinyoleua ma kitekichiuilikan uan ma kitlakamatikan. Kineki kuali ma yetokan akinmej tetlakamatij uan noijki kineki kinteochiuas itech xochitlali (2 Ped. 3:13). Jehová kitemaka “kuali tlajtolmej itech Tekiuajkayotl” para miakej ma kineltokakan tlen kichiuas uan non kinpaleuis amitlaj ma kinpano. Jesús okijto: “Motetlapouis itech nochi tlaltikpak para ma kimatikan nochi altepemej” (Mat. 24:14, TNM). ToTajtsin Dios yokinyektlali itekipanojkauan ma tetlapouikan itech kanaj 240 altepemej uan okseki altepetsitsintin. Kineki miakej ma kikakikan tlen tlanejmachtia uan amitlaj ma kinpano ijkuak kinmixkomakas (Sof. 1:14, 15; 2:2, 3).

Nochi nin techititia toTajtsin Dios nochipa technejmachtia. Pero timotlajtlaniaj kox miakej kikakiskej tlen toTajtsin Dios kinnejmachtia. Ik non, tinochtin akinmej tiktematiltiaj tlen kichiuas toTajtsin Dios ma timochijchikauakan miakej ma tikintlapouikan uan ijkon amitlaj kinpanos ijkuak tlamis tlen amo kuali.