1. ¿Ken kiteititiaj miakej amo kinekij yetoskej ixtlamatkej? (Proverbios 1:20, 21).

 ITECH miakej altepemej tokniuan oyolpakiayaj kintemakaskej amatlajkuilolmej kanin miakej panouaj. Tejuan noijki ijkon otikchiuayaj uan timokuayejyekouaj tlen kijtoua Proverbios: “Ixtlamatilistli tlen melauak, chikauak mokaki itech ojtli” (xiktlajtolti Proverbios 1:20, 21). Jehová kichiua matiyetokan tiixtlamatkej ika Biblia uan toamatlajkuiloluan. Tla miakej momachtiaj, uelis nochipa yoltoskej. Tiyolpakij ijkuak sekimej kiseliaj toamatlajkuiloluan pero amo nochtin kinpaktia. Sekimej mokuayejyekoua yiuejkika Biblia okijkuilojkej ikinon kijtoua ayakmo kinpaleuiaj, noijki kijtouaj akinmej kitlakamatij tlen kijtoua Biblia amo moyolpaktiaj uan kinteneuaj tlen oksekimej kichiuaj. Pero Jehová kinkauilia nochtin mayetokan ixtlamatkej. ¿Ken kichiua?

2. ¿Ken techpaleuia Jehová matiyetokan tiixtlamatkej uan tlen kichiuaj miakej?

² Jehová techmakatok iTlajtol para matiyetokan tiixtlamatkej uan miakej yiuelis kipiaskej. Sapanoua tiktlasojkamatiliaj Jehová porque techteochijtok ikinon axkan katej amatlajkuilolmej ika kanaj 1,000 tlajtolmej.  Akinmej kintlajtoltiaj sapanoua kinpaleuia ijkuak kichiuaj tlen kijtoua Biblia uan amatlajkuilolmej. Pero miakej amo kinekij Jehová makinpaleui mayetokan ixtlamatkej. Ijkuak moneki itlaj kipejpenaskej san kichiuaj tlen yejuan kinekij noso kintlajtlaniaj oksekimej tlen kichiuaskej. Tejuan tiktlakamatij tlen kijtoua Biblia ikinon xamo techteneuaj. Axkan tikitaskej ken Jehová uelis techpaleuis matiyetokan tiixtlamatkej uan tleka miakej amo kinekij yetoskej ixtlamatkej.

3. ¿Ken tikteititiskej melauak tiixtlamatkej?

³ Tla tiixtlamatkej, kuali tikpejpenaskej tlen tikchiuaskej. Pero tla tiknekij Jehová matechpaleui matiyetokan tiixtlamatkej, moneki tikchiuaskej okseki tlamantli. Biblia kijtoua: “Tipeuaj timochiuaj tiixtlamatkej ijkuak tiktlakaitaj Jehová uan tla tikixmatij akin Santo, timochiuaj tiixtlamatkej” (Prov. 9:10). Ijkuak itlaj tikpejpenaskej moneki tikitaskej “tla tikixmatij akin Santo” non kijtosneki timokuayejyekoskej ken Jehová uan ijkon tikchiuaskej tla tiktlajtoltiaj Biblia uan amatlajkuilolmej. Ijkon tikteititiskej melauak tiixtlamatkej (Prov. 2:5-7).

4. ¿Tleka tikijtouaj san Jehová uelis techpaleuis matiyetokan tiixtlamatkej?

⁴ San Jehová techpaleuis matiyetokan tiixtlamatkej (Rom. 16:27). ¿Tleka ijkon tikijtoua? Se, Jehová otechchijchi uan ye kixmati nochi tlen okichijchi (Sal. 104:24). Ome, nochi tlen Jehová okichijchi kiteititia ye ixtlamatki (Rom. 11:33). Eyi, techpaleuis tla tikchiuaj tlen ye techiluia (Prov. 2:10-12). Melauak tiyetoskej tiixtlamatkej tla timoyekanaj uan tikchiuaj non eyi tlamantli.

5. ¿Tlen kinpanoua akinmej amo kineltokaj toTajtsin Dios kinpaleuis mayetokan ixtlamatkej?

⁵ Miakej akinmej tikintlapouiaj kijtouaj sapanoua kualtsin nochi tlen onka itech tlaltikpak pero amo kineltokaj onka akin okichijchi nochi tlen tikitaj uan kijtouaj san iselti omopatlatia. Oksekimej kineltokaj toTajtsin Dios pero kijtouaj tlen tlamachtia Biblia ayakmo kinpaleuiaj uan kichiuaj san tlen yejuan kinekij. Ikinon ¿Axkan tlen kinpanoua? ¿Okachi kuali katej ijkuak amo kikauiliaj toTajtsin Dios makinpaleui mayetokan ixtlamatkej? ¿Kimatij tlen panos satepan noso melauak yolpakij? Nochi tlen axkan panotok kiteititia: “Amo onka ixtlamatilistli nion ajsikamatilistli tlen uelis kixnamikis tlen kineki kichiuas Jehová” (Prov. 21:30). Okachi moneki tiktlajtlaniliskej Jehová matechpaleuijto matiyetokan tiixtlamatkej. Pero miakej amo kiluiaj makinpaleui ¿Tleka?

6. Ijkon ken kijtoua Proverbios 1:22-25, ¿akinmej amo kinekij yetoskej ixtlamatkej?

⁶ Miakej amo kikakij “ixtlamatilistli”. Biblia kijtoua katej eyi grupos tlen amo kinekij yetoskej ixtlamatkej: akinmej amo ixtlamatkej, akinmej tepinauiaj uan akinmej xoxojtin (xiktlajtolti Proverbios 1:22-25). Tikitaskej tleka yejuan amo kinekij toTajtsin Dios makinpaleui mayetokan ixtlamatkej uan tlen techpaleuis para amo tikchiuaskej ken yejuan.

7. ¿Tleka sekimej amo kinekij yetoskej ixtlamatkej?

⁷ Akinmej amo ixtlamatkej san niman  kinneltokiliaj oksekimej (Prov. 14:15, nota). Miakej ijkon tikinmajsi ijkuak titetlapouiaj. Akinmej kinyekana religiones uan tekiuajkej miakej yokinkajkayajkej uan sekimej moyolkokouaj ijkuak kimatij. Pero sekimej kichiuaj tlen kijtoua Proverbios 1:22 amo kinekij yetoskej ixtlamatkej (Jer. 5:31). Yejuan kichiuaj san tlen kinyolpaktiaj uan amo kinekij kichiuaskej tlen kijtoua Biblia. Miakej mokuayejyekouaj ken se siuatl tlen chanti Quebec Canadá, tlen kipia ireligión, ye okilui se tokni: “Tejuan amo totlajtlakol tla teopixki techkajkayauaj”. ¡Amo tiknekij tikchiuaskej ken akinmej amo ixtlamatkej! (Prov. 1:32; 27:12).

8. ¿Tlen techpaleuis matiyetokan tiixtlamatkej?

⁸ Biblia techmachtia matiyetokan tiixtlamatkej, ompa kijtoua: “Xiekan kej anwejweyin tlakaj ika kuale amotlayejyekolis” (1 Cor. 14:20 Itlajtol Totajtzin Dios, [NHY]). Tejuan tiixtlamatkej porque tikchiuaj tlen kijtouaj principios bíblicos uan tikitaj ken techpaleuiaj para kuali matikpejpenakan tlen tikchiuaskej uan ijkon amo titlajyouiaj, moneki tikitaskej kox melauak tikchijtokej. Matikijtokan yitikpia miak xiuitl timomachtijtok Biblia uan timonechikoua pero ayamo timotemaka ixpan Jehová uan ayamo timoapolaktia, moneki timokuayejyekos tleka ayamo ijkon tikchiua noso tla yotimoapolakti, ¿kuali titetlapouia uan titlamachtia? ¿Tikteititia timoyekana ika principios bíblicos ijkuak itlaj tikpejpena? ¿Tikteititia tikchiua ken Jesús ijkuak timouika iuan oksekimej? Tla tikitaj itlaj moneki tikpatlaskej, matiktlakamatikan tlen Jehová techilnamiktia itech itlanauatiluan porque “kichiua mayeto ixtlamatki akin amo itlaj kimati” (Sal. 19:7).

9. ¿Ken kiteititiaj akinmej tepinauiaj amo kinekij yetoskej ixtlamatkej?

⁹ Akinmej tepinauiaj noijki amo kinekij yetoskej ixtlamatkej. Noijki tikinmajsij ijkuak titetlapouiaj, yejuan kinyolpaktiaj kinpinauiskej oksekimej (Sal. 123:4). Biblia tlamachtia itlamian tonalmej okachi yetoskiaj akinmej tepinauiaj (2 Ped. 3:3, 4). Axkan sekimej amo kineltokaj toTajtsin Dios kipojpolos nochi tlen amo kuali ijkon ken imonuan Lot (Gén. 19:14). Miakej kinpinauiaj akinmej kitlakamatij principios bíblicos, yejuan kichiuaj san tlen kinekij uan kinyolpaktiaj (Jud. 7, 17, 18). Tlen yejuan kichiuaj noijki kiteititia ken akinmej kixnamikij ialtepe Jehová uan akinmej amo kinekij kixmatiskej.

10. Ijkon ken kijtoua Salmo 1:1, ¿tlen uelis tikchiuaskej para amo tiyetoskej ken akinmej tepinauiaj?

¹⁰ ¿Tlen uelis tikchiuaskej para amo tiyetoskej ken akinmej tepinauiaj? Amo matimouikakan iuan akinmej san tlateneuaj (xiktlajtolti Salmo 1:1). Amo matikkakikan nion matiktlajtoltikan tlen kichiuaj akinmej kixnamikij ialtepe toTajtsin Dios. Tla amo timomaluiaj xamo peuas titlateneuaskej uan ayakmo tikneltokiliskej Jehová uan ialtepe. Ikinon matimokuayejyekokan: “Ijkuak itlaj technauatia ialtepe toTajtsin Dios, ¿san niman tiktlakamatij noso tikijtouaj amo techpaleuis? ¿San tikitaj tlen amo kuali kichiuaj tokniuan akinmej techyekanaj?”. Tla tikitaj itlaj amo kuali tikchijtokej, san niman matikchiuakan tlen Jehová technauatia uan ye yolpakis (Prov. 3:34, 35).

11. ¿Tlen kichiuaj akinmej xoxojtin?

 ¹¹ Noijki akinmej xoxojtin amo kinekij yetoskej ixtlamatkej, yejuan kineltokaj kichiuaj tlen kuali pero amo kitlakamatij itlanauatiluan toTajtsin Dios (Prov. 12:15). Amo kinekij Jehová makinpaleui mayetokan ixtlamatkej (Sal. 53:1). Ijkuak tikintlapouiaj ualeua techteneuaj porque tiktlakamatij principios bíblicos, ijkon kichiuaj porque amo ixtlamatkej. Biblia kijtoua: “Akin xoxo amo uelis yetos ixtlamatki; amitlaj uelis kijtos ikaltempa altepetl” (Prov. 24:7). Amo kijtouaj itlaj tlen techpaleuis akinmej xoxojtin ikinon Jehová techiluia “Amo ximouika iuan akin xoxo” (Prov. 14:7).

12. ¿Tlen uelis tikchiuaskej para amo tiyetoskej ken akinmej xoxojtin?

¹² Tejuan tikpatioitaj uan tiktlakamatij tlen toTajtsin Dios technauatia uan amo tikchiuaj ken akinmej amo kitlakamatij. Okachi tikpatioitaskej itlanauatiluan tla tikitaj ken techpaleuiaj. Matikitakan tlen kinpanoua akinmej amo kitlakamatij Jehová uan matimokuayejyekokan ken tiyolpakij ijkuak tejuan tiktlakamatij (Sal. 32:8, 10).

13. ¿Techchiualtia Jehová matikintlakamatikan itlanauatiluan?

¹³ Jehová kineki nochtin kinpaleuis pero ye amikaj kichiualtia mayeto ixtlamatki. Pero kinmiluia tlen kinpanos akinmej amo kinekij yetoskej ixtlamatkej (Prov. 1:29-32). Akinmej amo kinekij Jehová makinpaleui amo moyolseuijtoskej, tlajyouiskej uan saiktlami ixpoliuiskej. Jehová kijtoua: “Akin nechkakis kuali yetos uan amo kitekipachos ouijkayotl” (Prov. 1:33). Ijkon kinpanos akinmej kichiuaj uan kikakij tlen Jehová kinmiluia.

14, 15. ¿Tlen techmachtia Proverbios 4:23?

¹⁴ Techpaleuis tlen techiluia toTajtsin Dios tla nochipa tikchiuaj tlen technauatia, yotikitakej ye techpaleuia matikmatikan tlen kineki matikchiuakan. Tlen kijtoua amochtli Proverbios nochtin techpaleuis ikinon moneki tikchiuaskej tlen ompa kijtoua. Matikitakan naui tlamantli tlen techpaleuis.

¹⁵ Matikmaluikan toyolo. Biblia kijtoua: “Onka miak tlamantli tlen moneki tikmaluis pero okachi xikmalui moyolo porque ompa kisa yolilistli” (Prov. 4:23). Tejuan tikmaluiaj toyolo ijkuak tikchiuaj ejercicio uan ijkuak amo tikkuaj tlen kipia miak chiauak. Noijki ijkon uelis tikmaluiskej tlen timokuayejyekoua. Moneki mojmostla tiktlajtoltiskej Biblia, titlanankiliskej ijkuak timonechikouaj uan titetlapouiskej. Noijki amo tikchiuaskej tlen Jehová amo kipaktia, amo timouikaskej iuan akinmej  amo kitekichiuilia porque amo kuali mokuayejyekoua nion timoyolpaktiskej ika tlen kikokolia.

16. ¿Tleka techpaleuia tlen kijtoua Proverbios 23:4, 5?

¹⁶ Matiyolpakikan ika tlen tikpiaj. Biblia kijtoua: “Amo san ximochijchikaua tikpias miak tomin. […] poliui uan san niman kipias iajasuan ken se águila uan patlanis” (Prov. 23:4, 5). Nochi tlamantli tlen tikpiaj uelis san niman tikpoloskej. Axkan miakej kitemouaj tomin maski kipiaj noso amo uan kinekij kipiaskej okachi miak tlamantli pero ijkuak ijkon kichiuaj amo kuali katej, amo kuali mouikaj iuan oksekimej uan hasta mokokouaj (Prov. 28:20; 1 Tim. 6:9, 10). Tejuan Jehová techmachtia ken moneki tikitaskej tomin. Ikinon tiyolpakij ika tlen tikpiaj uan amo tiktemouaj tikpiaskej miak tlamantli (Ecl. 7:12).

17. ¿Ken tikchiuaskej tlen kijtoua Proverbios 12:18?

¹⁷ Matimokuayejyekokan ijkuak titlajtouaj. Tla amo ijkon tikchiuaj, xamo tikinyolkokoskej oksekimej. Biblia kijtoua: “Akin amo mokuayejyekoua ijkuak tlajtoua tetsopitia ken se espada pero innenepil ixtlamatkej tepajtia” (Prov. 12:18). Kuali timouikaskej iuan oksekimej tla amo san tikijtojtinemij tlen kichiuaj oksekimej (Prov. 20:19). Tla tiknekij makinpaleui oksekimej tlen tikijtoskej, moneki matiktlajtoltikan Biblia (Luc. 6:45). Uelis kinpaleuis oksekimej tlen tikijtoskej tla timokuayejyekouaj tlen kijtouaj Biblia uan noijki uelis kinyolseuis (Prov. 18:4).

18. ¿Ken uelis tikchiuaskej tlen kijtoua Proverbios 24:6 ijkuak titetlapouiaj?

¹⁸ Matiktlakamatikan tlen technauatia ialtepe toTajtsin Dios. Biblia kijtoua: “Amo ximouika iuan akin xoxo, porque ye amo mitsiluis itlaj tlen mitspaleuis” (Prov. 24:6, notas). Tla tikchiuaj tlen kijtoua non principio bíblico, techpaleuis ijkuak titetlapouiskej uan titlamachtiskej uan amo titetlapouiskej ken tejuan  tiknekij. Ijkuak timonechikouaj tikitaj ken tlamachtiaj tokniuan uan non techpaleuia matikmatikan ken uelis titetlapouiskej. Noijki ialtepe Jehová techmakatok amatlajkuilolmej uan videos tlen techpaleuiaj para matikinmachtikan oksekimej uan ijkon makajsikamatikan tlen kijtoua Biblia. ¿Techpaleuijtok tlen yotechmakak Jehová?

19. ¿Tikpatioita ijkuak Jehová mitspaleuia xiyeto ixtlamatki? (Proverbios 3:13-18).

¹⁹ (Xiktlajtolti Proverbios 3:13-18). Tiktlasojkamatiliaj tlen Jehová techiluia itech iTlajtol. ¡Porque sapanoua techpaleuia! Axkan otikitakej ken techpaleuia matiyetokan tiixtlamatkej tlen kijtoua Proverbios pero Jehová noijki kijtoua itech nochi iTlajtol matiyetokan tiixtlamatkej. Ikinon moneki matikchiuakan tlen ompa kijtoua. Amo matikchiuakan ken akinmej amo kitekichiuiliaj Jehová, yejuan mokuayejyekouaj amo ipati matiyetokan tiixtlamatkej. Matikneltokakan akinmej mochijchikauaj yetoskej ixtlamatkej yolpakiskej.