1. ¿Ken kitekichiuiliaj Jehová miakej tokniuan siuamej uan tlen kixnamikij? (Xikita ixko revista).

TIYOLPAKIJ porque touan noijki katej miakej tokniuan siuamej tlen mochijchikauaj kitekichiuiliaj Jehová. Yejuan touan monechikouaj, tetlapouiaj uan kitaj ken kinpaleuiskej tokniuan. Sekimej tlapaleuiaj ijkuak kiyektlaliaj kali kanin timonechikouaj. Pero noijki ualeua tlajyouiaj. Sekimej kinmaluiaj intatajuan tlen yikipiaj miak xiuitl. Oksekimej maski infamilia kualanij yejuan kitekichiuiliaj Jehová. Oksekimej inselti kinmiskaltiaj inkoneuan uan tekipanouaj miak para kipiaskej tlen ika mopanoltiskej.

2. ¿Tleka moneki tikinpaleuiskej tokniuan siuamej?

² ¿Tleka moneki tikinpaleuiskej tokniuan siuamej? Porque akinmej amo kixmatij Jehová amo kintlakaitaj uan Biblia techiluia moneki tikinpaleuiskej. Ma tikitakan tlen okijto tlatitlanil Pablo. Ye okinmilui tokniuan tlen omonechikouayaj ompa Roma ma kiselikan ika pakilistli tokni Febe uan ‘makipalewikah ika tlan okipoloayaʼ (Rom. 16:1, 2). Ijkuak Pablo okatka fariseo, akinmej inmiuan omouikayaj amo okintlasojtlayaj siuamej. Pero ijkuak opejki kichiua ken Cristo, opejki kintlakaita uan okatka yolkuali (1 Cor. 11:1).

3. ¿Ken okinmitaya Jesús nochtin siuamej uan noijki akinmej okitekichiuiliayaj toTajtsin Dios?

³ Jesús okintlakaitaya nochtin siuamej (Juan 4:27). Ye amo okichiuaya ken tlayekankej judíos. Se enciclopedia tlen tlajtoua itech Biblia okijto: “Jesús amo keman okijto itlaj tlen uelis kinyolkokoskia siuamej”. Ye nochipa okintlasojtlak  nochtin siuamej tlen okitlakamatiayaj toTajtsin Dios. Jesús okinmitaya tlakamej uan siuamej ken ifamilia porque okineltokayaj toTajtsin Dios (Mat. 12:50).

4. ¿Tlen timomachtiskej?

⁴ Jesús nochipa okinpaleui siuamej tlen okitekichiuiliayaj Jehová, okintlasojtlak uan inpatka otlajto. Ma tikitakan ken uelis tikchiuaskej ijkon ken Jesús.

5. ¿Tleka tokniuan kitaj oui mouikaskej iuan oksekimej?

⁵ Maski titlakamej noso tisiuamej techpaktia timouikaskej iuan oksekimej tokniuan. Pero tokniuan siuamej ualeua oui kitaj mouikaskej iuan oksekimej. Ma tikitakan tlen kijtouaj sekimej tokniuan. Se tokni tlen itoka Jordan * okijto: “Ok nika noselti, ik non, nikmachilia amo ueli nimouika iuan oksekimej tokniuan”. Okse tokni precursora tlen itoka Kristen uan otetlapouito kanin okachi moneki, okijto: “Ijkuak yikin oniajsito onimomachiliaya noselti”. Tokniuan tlakamej ualeua noijki ijkon momachiliaj. Noijki tokniuan tlen chantij iuan infamilia tlen amo kitekichiuiliaj Jehová, xamo noijki inselti momachiliaj maski monechikouaj iuan tokniuan. Sekimej tokniuan noijki momachiliaj inselti porque amo ueli kanaj yauij porque mokokouaj noso kimaluiaj ikaj tlen mokokouaj. Se tokni tlen itoka Annette okijto: “Ne okachi onikmaluiaya nonantsin, ik non, amo kanaj oniaya maski onechyoleuayaj”.

6. Ijkon ken kijtoua Lucas 10:38-42, ¿ken okinpaleui Jesús Marta uan María?

⁶ Jesús omotlapouiaya iuan tokniuan siuamej uan inmiuan omouikak. Ma timokuayejyekokan ken omouikaya iuan María uan Marta tlen okatkaj inselti (xiktlajtolti Lucas 10:38-42). Okintlakaitaya uan kuali okintlapouiaya, ik non, kuali omomachiliayaj. María omotlali ikxitlan Jesús porque okinekiaya kikakis. * Marta amo opinauak kiluis Jesús ye okualantoka porque María amo okipaleui. Non tonal Jesús okinmachti tlen kinpaleuiskia. Okseki tonal noijki okintlajpaloto yejuan uan noijki inmikni tlen omotokayotiaya Lázaro. Ijkon Jesús okiteititi okintlasojtlaya (Juan 12:1-3). Ik non, ijkuak Lázaro sapanoua omokoko amo opinauakej uan okiluijkej Jesús ma kinpaleui (Juan 11:3, 5).

7. ¿Ken uelis tikinyolchikauaskej tokniuan siuamej?

⁷ Xamo sekimej tokniuan siuamej san ueli katej iuan tokniuan ijkuak monechikouaj. Ik non, moneki kuali tikinseliskej, inmiuan timotlapouiskej uan tikteititiskej tiknekij tikinpaleuiskej. Tokni Jordan okijto: “Nimotlasojkamati ijkuak tokniuan nechiluiaj kuali onitlanankili, ijkuak kijtouaj inmiuan ma nitetlapouiti noso ijkuak kinekij nechpaleuiskej”. Ma tikteititikan tikintlasojtlaj tokniuan siuamej. Se tokni tlen itoka Kia okijto: “Tla se tonal amo nimonechikoua iuan tokniuan, yinikmati nechtlajtlaniskej kox kuali nika. Ijkon nikita yejuan nechtlasojtla”.

8. ¿Ken uelis tikchiuaskej ken Jesús?

⁸ Ma tikchiuakan ken Jesús uan ma timotlapouikan iuan tokniuan siuamej. Xamo  uelis tikinmiluiskej touan ma tlakuatij tokalijtik noso touan ma tetlapouikan. Ijkuak ijkon tikchiuaskej, ma tikinyolchikauakan (Rom. 1:11, TNM, 12). Tlayekankej noijki moneki kichiuaskej ken Jesús. Ye okimatiaya akin iselti ualeua oui kita seki tlamantli. Pero okiteititi amo moneki timonamiktiskej noso tikinpiaskej tokoneuan tla tiknekij tiyolpakiskej (Luc. 11:27, 28). Okijto tiyolpakiskej tla tikpatioitaj tiktekichiuiliskej Jehová (Mat. 19:12).

9. ¿Ken uelis kinpaleuiskej tlayekankej tokniuan siuamej?

⁹ Tlayekankej moneki kintlakaitaskej tokniuan siuamej ken yetoskia innantsin noso inmikniuan (1 Tim. 5:1, 2). Ik non, moneki motlapouiskej inmiuan ijkuak monechikouaj. Tokni Kristen okijto: “Se tlayekanki okitak nochipa nikchiua miak tlamantli, ik non, onechilui ma niktlapoui ken nikchiua. Oniktlasojkamatili ijkon ma nechtlajtlani”. Ijkuak tlayekankej mochijchikauaj kintlapouiskej tokniuan siuamej, kiteititiaj kintlasojtlaj. * Tokni Annette kijtoua ken kipaleuia ijkuak tlayekankej iuan motlapouiaj.  Ye okijto: “Okachi kuali timoixmatij. Ik non, ijkuak nikpia se ouijkayotl amo nipinaua nikinmiluis ma nechpaleuikan”.

10. ¿Tlen uelis tikchiuaskej para kuali ma momachilikan tokniuan?

¹⁰ Kuali timomachiliaj ijkuak oksekimej techiluiaj tlen kuali tikchiuaj uan kipatioitaj tiktekichiuiliaj Jehová. Timoyolkokouaj tla amikaj ijkon kichiua. Se tokni tlen iselti uan itoka Abigaíl ualeua kimachilia amo kitlasojtlaj: “San kinmixmatij nokniuan noso notatajuan. Ualeua nimokuayejyekoua amikaj nechtlasojtla”. Ma tikitakan tlen okipanok se tokni tlen itoka Pam. Ye miak xiuitl okatka misionera pero satepan omokopki ikalijtik okinmaluito itatajuan. Axkan yikipia kanaj 70 xiuitl uan ok precursora. Tokni okijto: “Nimoyolchikaua ijkuak tokniuan nechiluiaj nechtlasojtlaj”.

11. ¿Ken okiteititi Jesús okintlasojkamatili siuamej tlen okipaleuiayaj?

¹¹ Sekimej siuamej “okipalewiayah n Jesús ika tlan okipiayah” uan ye okintlasojkamatili (Luc. 8:1-3). Pero amo san okinkauili ma kipaleuikan, ye noijki okinmatilti seki tlamantli miak ipati. Ye okinmilui ixpoliuiskia uan toTajtsin Dios kiyolitiskia (Luc. 24:5-8). Ijkon ken okinpaleui itlatitlaniluan, noijki okinpaleui siuamej para tlaxikoskiaj ijkuak ye tlajyouiskia uan kimiktiskiaj (Mar. 9:30-32; 10:32-34). Itlatitlaniluan Jesús ocholojkej ijkuak okikitskitoj pero sekimej siuamej iuan omokajkej hasta ijkuak okimiktijkej (Mat. 26:56; Mar. 15:40, 41).

12. ¿Tlen okinkauili Jesús ma kichiuakan sekimej siuamej?

¹² Jesús okinkauili sekimej siuamej ma kichiuakan seki tlamantli miak ipati. Ijkuak Jehová okiyoliti Jesús, achto okinmonextili sekimej siuamej tlen amo okikajtejkej uan okinmilui ma kinmatiltitij itlatitlaniluan (Mat. 28:5, 9, 10). Itech Pentecostés xiuitl 33 ijkuak sekimej okiselijkej espíritu santo, xamo noijki ompa okatkaj sekimej siuamej. Tla ijkon opanok, nonmej tokniuan siuamej tlen okinpejpenkej okijtojkej “miekej tlamantin wejweyin de tlan Dios kichiwa” ika miakej tlajtolmej (Hech. 1:14; 2:2-4, 11, Itlajtol totajtzin Dios [NHY]).

13. (1) ¿Ken kitekichiuiliaj Jehová tokniuan siuamej? (2) ¿Ken uelis tikteititiskej tikintlasojkamatiliaj?

¹³ Moneki tikintlasojkamatiliskej tokniuan siuamej porque kitekichiuiliaj Jehová. Sekimej kinchijchiuaj noso kinyektlaliaj kalmej kanin timonechikouaj, oksekimej tetlapouiaj ika okse tlajtoli uan oksekimej tlapaleuiaj Betel. Sekimej tlapaleuiaj kanin tlaxixini uan oksekimej kintlajtolkopaj amatlajkuilolmej. Sekimej precursoras uan oksekimej misioneras. Sekimej noijki kiseliaj tlamachtil para precursores, tlamachtil para akinmej tetlapouiaj tekiuajkayotl uan ijkuak kinmachtiaj ompa Patterson. Noijki katej tokniuan siuamej tlen kinpaleuiaj innamik ma tlapaleuikan itech tlanechikol uan itech ialtepe Jehová. Nonmej tokniuan ken “tlatliokólili”, kitaskiaj oui tlapaleuiskiaj tla insiua amo kinpaleuiskia (Efes. 4:8). Ma timokuayejyekokan ken uelis tikinpaleuiskej tokniuan siuamej porque mochijchikauaj kitekichiuiliskej Jehová.

14. Ijkon ken kijtoua Salmo 68:11, ¿tlen moneki kichiuaskej tlayekankej?

 ¹⁴ Tlayekankej kimatij katej “sapanoua miakej” tokniuan siuamej tlen mochijchikauaj kitekichiuiliskej Jehová uan kuali tetlapouiaj (xiktlajtolti Salmo 68:11). Ik non, tlayekankej kitaj ken uelis kichiuaskej ken yejuan. Tokni Abigaíl kipaktia ma kitlajtlanikan ken peua tetlapouia. Ye kijtoua: “Non nechititia Jehová onechkauili ma nikchiua itlaj miak ipati”. Tlayekankej noijki kajsikamatij tokniuan siuamej tlen kipiaj chikauak intlaneltokilis uelis kinpaleuiskej tokniuan ichpokamej ijkuak kipiaj ouijkayotl (Tito 2:3-5). Ken tikitaj, moneki tikintlasojtlaskej tokniuan siuamej uan tikintlasojkamatiliskej.

15. ¿Keman moneki tikinpaleuiskej tokniuan siuamej uan keman moneki inpatka titlajtoskej?

¹⁵ Ualeua sekimej tokniuan kipiaj se ouijkayotl uan moneki tikinpaleuiskej (Is. 1:17). Ma tikijtokan se tokni tlen oixpoliuik inamik noso se tokni tlen okikajte inamik ixpan tekiuajkej moneki ipatka ma titlajtokan. Xamo moneki tikchiuaskej itlaj tlen okichiuaya inamik. Xamo se tokni tlen yikipia miak xiuitl mopajtiti uan moneki tejuan timotlapouiskej iuan akinmej tlapajtiaj. Xamo monekis titlajtoskej ipatka se precursora tla oksekimej kiteneuaj porque amo okachi tetlapouia ken oksekimej precursores. ¿Ken uelis tikinpaleuiskej? Oksepa ma tikitakan tlen okichi Jesús.

16. Ijkon ken kijtoua Marcos 14:3-9, ¿tlen okijto Jesús ijkuak otlajto ipatka María?

¹⁶ Jesús otlajto inpatka tokniuan siuamej tlen okinteneuayaj. Ma tikitakan ken otlajto ipatka María ijkuak Marta okualanki (Luc. 10:38-42). Noijki otlajto ipatka María ijkuak oksekimej okijtojkej okichi tlen amo omonekiaya (xiktlajtolti Marcos 14:3-9). Jesús okimatiaya tleka ijkon okichi, ik non, okijto: “Tlan onechchiwili satlawel kuali”. Noijki okijto: “Itech nin tlaltíkpaktli kan motetlapowis n kualitlájtoli de Dios, noiwa sentetl motetlapowis tlan okichi nin siwatl”. Axkan timotlapouijtokej tlen okichi. Tlen Jesús okijto xamo okiyolseui María. Kualtsin tlen Jesús okichi porque okijto ijkuak motetlapouiskia noijki kijtoskiaj tlen okichi María.

17. Xikijto keman monekis titlajtoskej inpatka tokniuan siuamej.

¹⁷ ¿Titlajtouaj inpatka tokniuan siuamej ijkuak moneki? Ma tikijtokan se tokni siuatl kipia inamik tlen amo kitekichiuilia Jehová. Tokniuan san kitaj tlajka ajsi ijkuak monechikoua uan san niman yaui ijkuak tlami nechikol. Noijki kitaj amo nochipa kinuika ikoneuan. Ik non, tokniuan peuaj kijtouaj amo kuali kichiua uan motlajtlaniaj tleka tokni amo kiluia inamik ma kikauili ma kitekichiuili Jehová. Pero yejuan amo kitaj tokni mochijchikajtok uan amo san iselti monauatia nion iselti kinyekana ikoneuan. ¿Ken uelis tikpaleuiskej? Tla tikyolchikauaj uan tikinmiluiaj oksekimej tlen tokni kichiua, xamo tokniuan ayakmo san tlen amo kijtojtinemiskej.

18. ¿Ken noijki uelis tikinpaleuiskej tokniuan siuamej?

¹⁸ Noijki uelis tikteititiskej tikintlasojtlaj tokniuan siuamej tla tikinpaleuiaj ika okseki tlamantli (1 Juan 3:18). Ma tikitakan ken okipaleuijkej tokni Annette, ye okimaluiaya inantsin. Tokni okijto: “Ualeua  sekimej tokniuan oualayaj uan onechpaleuiayaj, ijkon ueli onikchiuaya okseki tlamantli. Ualeua noijki okiualikayaj tlakuali. Nochi non okiteititi nokniuan nechtlasojtlaj”. Se tokni okilui Jordan ken uelis kiyektlaliskia icarro. Ye okijto: “Kuali nimomachilia nikitas tokniuan kinekij nechpaleuiskej para amitlaj ma nechpano”.

19. ¿Ken noijki uelis tlayekankej kinpaleuiskej tokniuan siuamej?

¹⁹ Tlayekankej noijki moneki kitaskej ken kinpaleuiskej tokniuan siuamej. Kimatokej Jehová kineki ma tikinpaleuikan (Santiago 1:27). Tlayekankej kichiuaj ijkon ken Jesús, ik non, kinmajsikamatij tokniuan siuamej. Ijkon kichiuaj ijkuak kiteititiaj kintlasojtlaj uan amo kitemouaj ken kinnauatiskej (Mat. 15:22-28). Ijkuak kinpaleuiaj, kichiuaj kuali ma momachilikan. Ijkon okipanok tokni Kia ijkuak oksekan ochantito. Ijkuak okimatki tokni tlen otlayekanaya itech igrupo, okinmilui oksekimej tokniuan tla uelis tlapaleuiskiaj. Tokni Kia okijto: “Ijkon amo okachi onimotekipacho. Onechyolchikajkej uan onechpaleuijkej. Tlayekankej onechiluijkej nechtlasojtlaj uan nochipa nechpaleuiskej ijkuak nikpias ouijkayotl”.

20, 21. ¿Ken tikteititiskej tikintlasojtlaj nochtin tokniuan siuamej?

²⁰ Kanin timonechikouaj katej miakej tokniuan siuamej tlen kitekichiuiliaj Jehová ika nochi inyolo, ik non, moneki ma tikinpaleuikan. Otimomachtijkej Jesús omochijchika kinmixmatis uan inmiuan motlapouis, tejuan noijki ijkon moneki tikchiuaskej. Noijki moneki ma tikintlasojkamatilikan uan ijkuak monekis inpatka ma titlajtokan.

²¹ Itech carta tlen tlatitlanil Pablo okinmijkuilili Romanos okijkuilo intoka chiknaui tokniuan siuamej (Rom. 16:1, 3, 6, 12, 13, 15). Xamo kuali omomachilijkej ijkuak okikakej intoka uan okinualtlajpalouayaj. Tla tejuan noijki tikinpaleuiaj nochtin tokniuan siuamej tlen inmiuan timonechikouaj, tikteititiskej tikintlasojtlaj uan tikinmitaj ken tofamilia.