TLEN TECHMACHTIA BIBLIA
¿Kuali ma timotlatlanikan ika tomin?
Miakej kijtouaj moyolpaktiaj ijkuak motlatlanij ika tomin uan amitlaj panoua. Pero oksekimej kijtouaj uelis itlaj kinpanos tla motlatlanij ika tomin.
¿Tlajtlakoli tla timotlatlaniskej ika tomin?
SEKIMEJ KIJTOUAJ.
Miakej kijtouaj amitlaj panoua ijkuak motlatlanij ika tomin tla mauiltiaj ijkon ken moneki. Tekiuajkej kichiuaj ma mauiltikan ika lotería uan tomin tlen kitlanij seki ika kinpaleuiaj oksekimej.
BIBLIA KIJTOUA.
Biblia amo kijtoua kox kuali timauiltiskej ika tomin. Pero kipia seki principios bíblicos tlen techpaleuiaj ma tikajsikamatikan ken kita toTajtsin Dios ijkuak motlatlanij ika tomin.
Akinmej motlatlanij ika tomin ijkon kichiuaj porque kinekij okachi kipiaskej. Pero non amo mouika iuan tlen okijto Jesús. Ye okijto: “Amo xikmokawilikah manomechyoltilana n tomi” (Lucas 12:15). Miakej tlaixnekij ,ik non, mauiltiaj ika tomin. Yejuan kinmiluiaj uelis kitlaniskej miak tomin ,ik non, mauiltiaj maski kimatij xamo amo tlatlaniskej. Akinmej motlatlanij ika tomin tlaixnekij uan amo oui kitlanij okachi tomin.
Akinmej motlatlanij ika tomin kimokauiaj intomin akinmej amo tlatlanij. Pero Biblia kijtoua: “Amaka mamotekipacho tlan ye kineki kichiwas, yej noiwa mamotekipacho kenomi kinyolchikawas oksikimeh” (1 Corintios 10:24). Se tlanauatil tlen poui itech majtlaktli tlanauatilmej kijtoua amo ma tikixnekikan itlaj tlen iaxka se tokni (Éxodo 20:17). Akin mauiltia porque kineki kitlanis tomin kijtosneki kineki oksekimej ma tlapolokan uan ijkon kimokauis intomin.
Biblia noijki techiluia amo ma tikneltokakan tlachixkej techiluiskej tlen panos para kuali tiyetoskej. Yiuejkika sekimej israelitas amo okineltokayaj toTajtsin Dios ,ik non, opejki kiueyichiuaj “teotsin tlen kitemaka Suerte”. ¿Kox okipakti toTajtsin Dios tlen okichijkej? Ye okijto: “Noixpan onankichijkej tlen amo kuali uan opejki nankichiuaj tlen nikkokolia” (Isaías 65:11, 12).
Itech seki altepemej tomin tlen kitlanij ijkuak mauiltiaj ika tlapaleuiaj para ma momachtikan oksekimej uan para ma kipiakan tlen kinpoloua. Maski tlapaleuiaj ika non tomin pero akinmej kitlanij tlaixnekij uan amo tekipanouaj para kitlaniskej.
“Amo xikixneki [...] tlen ye iaxka” (Éxodo 20:17).
¿Tlen techpanos tla timotlatlanij ika tomin?
BIBLIA KIJTOUA.
Biblia kijtoua “akimeh kinekih motomintiskeh, wetsih imak n tlajtlákoli porke san tlan kajsih pewa kichiwah para okachi kitlaniskeh tomi. Yika nochi no kinkuatlapololtia, iwa mixpojpoloah” (1 Timoteo 6:9). Akin tlaixneki kineki mauiltis para kipias tomin, ik non, iTlajtol toTajtsin Dios kijtoua moneki timomaluiskej para amo ijkon tikchiuaskej (Efesios 5:3).
Akin mauiltia kineki san niman kipias tomin uan non kijtosneki okachi kipatioita tomin. Biblia kijtoua akinmej ijkon kichiuaj “innewiah kimotetemiliah intlaijyowilis”. Akin okachi kipatioita tomin san itech non mokuayejyekojtok ik non tlajyouia uan ayakmo kuali mouika iuan toTajtsin Dios. Biblia techiluia akinmej okachi kipatioitaj tomin uan tlaixnekij motlajyouiltiaj (1 Timoteo 6:10).
Akin tlaixneki amo yolpaki porque mokuayejyekoua moneki kipias okachi miak tomin. Eclesiastés 5:10 kijtoua: “Akin sapanoua kipaktia kipias plata amo keman yolpakis san ika plata nion akin okachi kipatioita kitlanis miak tomin amo yolpakis ika tlen kitlanis”.
Akinmej kinpaktia mauiltiskej para kipiaskej tomin ayakmo ueli kikauaj. Altepetl Estados Unidos miakej ijkon kinpanoua.
Proverbios 20:21 techmachtia akinmej tlaixnekij uelis kipiaskej miak tomin pero amo kuali mouikaskej iuan toTajtsin Dios. Akin mauiltia para kipias tomin xamo noijki kiteuikilis, noijki xamo ayakmo kinpias iyolikniuan, ifamilia uan xamo kipolos iteki. Ik non, tla tikchiuaj tlen techiluia Biblia techpaleuis para amo matitlajyouikan.
“Akimeh kinekih motomintiskeh, wetsih imak n tlajtlákoli porke san tlan kajsih pewa kichiwah para okachi kitlaniskeh tomi. Yika nochi no kinkuatlapololtia, iwa mixpojpoloah”. (1 Timoteo 6:9)
