Akinmej pouij itech Naciones Unidas kijtoaj ma tikintlakaitakan oksekimej uan amo ma tikijtlakokan tlaltikpak. ¿Tleka? Porque se tlakatl itoka Maher Nasser okijkuilo itech se revista itoka Crónica ONU. Okijto: “Axkan okachi yoijtlakauik tlaltikpak, tlachtekij, techikoitaj, sapanoa moteuiaj, miakej yauij oksekan chantitiuij, san kanin onka terrorismo, onka kokolistli uan okseki tlamantli tlen nochtin kintlajyouiltia”.

Sekimej kinekij kichiuaskej okseki tlamantli uan kineki san se tekiua ma tlanauati itech nochi tlaltikpak. Ijkon okinekiaya kichiuas se tlakatl ixtlamatki tlen omotokayotiaya Dante (1265-1321) uan Albert Einstein (1879-1955). Dante okijto amo keman kuali tiyetoskej tla políticos san nochipa mokualaniskej. Noijki okijto tlen Jesús okijto: “Nochteh n tekiwajkeh tla moxexeloah, san nima pojpoliwi” (Lucas 11:17).

Satepan ijkuak okinkajkajkej ome bombas atómicas itech Segunda Guerra Mundial, Albert Einstein okintlajkuilili akinmej pouij itech Naciones Unidas. Okijkuilo: “Naciones Unidas moneki san niman itlaj ma kichiuakan uan ijkon yetos se tekiua tlen tlanauatis itech nochi tlaltikpak tlen tlapaleuis tinochtin kuali ma tiyetokan”.

Pero ¿ken tikmatij kox non tekiua amo techkajkayauas, kox techtlajyouiltis noso san technauatis? ¿Kox tlanauatis ken oksekimej tekiuajkej tlen amo kuali inyelis? Nin techilnamiktia tlen okijto se tlakatl ixtlamatki tlen omotokayotiaya Lord Acton, okijto akin peua tlanauatia tetlajyouiltia uan tla kiluiskej nochtin ma kinnauati, okachi tetlajyouiltis.

Moneki san sekan tiyetoskej tla tiknekij tiyolpakiskej. Pero ¿ken tikchiuaskej? ¿Kox uelis ijkon panos? Biblia kijtoa melauak ijkon panos. ¿Ken mochiuas? ToTajtsin Dios yokitlali se Tekiuajkayotl uan amo tlanauatiskej tekiuajkej. Nin Tekiuajkayotl kiteititis san toTajtsin Dios kinamiki tlanauatis. Biblia kijtoa nin Tekiuajkayotl itoka “iTekiuajkayo toTajtsin Dios” (Lucas 4:43, TNM).

Jesús otlajto itech nin Tekiuajkayotl ijkuak okijto padrenuestro: “Ma uiki moTekiuajkayo. Ma mochiua motlanekilis [...] nikan tlaltikpak” (Mateo 6:9, 10, TNM). Ijkuak iTekiuajkayo toTajtsin Dios ualtlanauatis tlaltikpak, mochiuas tlen ye kineki uan ayakmo tlanauatiskej tekiuajkej tlen sapanoa tlaixnekij.

ITekiuajkayo toTajtsin Dios noijki moixmati ken “Tekiuajkayotl tlen kajki iluikak” (Mateo 5:3, TNM). ¿Tleka ijkon moixmati? Porque nin Tekiuajkayotl ualtlanauatis ompa iluikak. Ximokuayejyeko ken ualtlanauatis. Nin Tekiuajkayotl amitlaj techtlajtlanilis ma tiktlaxtlauakan. ¡Melauak sapanoa techpaleuis!

Nin Tekiuajkayotl kipia se tekiua itoka Jesucristo. ToTajtsin Dios okitlali ma tlanauati. Nin tlen kijtoa Biblia:

• “Se konetl oneski, se konetl otechmakakej uan itech iajkoluan kipias tekiuajkayotl. [...] Moskaltis itekiuajkayo uan yolseuilistli amo keman tlamis” (Isaías 9:6, 7).

• “Okimakakej tlanauatijkayotl uan ueyitilistli uan tekiuajkayotl para uejueyij altepemej  uan nochtin akinmej tlajtoaj nochi tlatlamantli tlajtolmej ma kitekichiuilikan” (Daniel 7:14).

• “Axa nochteh n altepetlakameh non okinnawatijtokah n tekiwajkeh, yopanokeh imak Toteko Dios iwa Cristo Jesús; iwa Ye Akin tlanawatijtos axa iwa nochipa” (Apocalipsis 11:15).

Nin Tekiuajkayotl tlapaleuis ma mochiua tlen kineki toTajtsin Dios itech tlaltikpak uan ijkon mochiuas tlen kijtoa padrenuestro. Techmachtiskej ken tikmaluiskej tlaltikpak uan ijkon kuali tiyetoskej.

Nin Tekiuajkayotl noijki kinmachtis akinmej chantiskej tlaltikpak. Nochtin kintlakamatiskej tlanauatilmej tlen kintlaliskej. Amikaj mokualanis nion ikaj moteuis. Isaías 11:9 kijtoa: “Amikaj kichiuas tlen amo kuali nion tlaijtlakos [...] porque tlaltikpak tentos ika itlamatilis Jehová ijkon ken tentok ueyi atl”.

Akinmej chantiskej tlaltikpak san sekan yetoskej uan kipiaskej yolseuilistli. Nin tlamantli amo uelis kichiuaskej akinmej pouij itech Naciones Unidas. Salmo 37:11 kijtoa: “Melauak yolpakiskej porque yetos miak yolseuilistli”. Satepan ayakmo ikaj kichiuas tlen amo kuali, amikaj tlachtekis, amikaj kisokiotis tlaltikpak, amikaj moteuis uan amikaj apismikis. Pero ¿keman ijkon panos? ¿Keman ualtlanauatis iTekiuajkayo toTajtsin Dios? ¿Ken kichiuas? ¿Ken techpaleuis nin Tekiuajkayotl? Tikitaskej itech okse tlamachtil.