TETAJMEJ
7: Ma kinmachtikan ma tetlakaitakan
¿TLEN MONEKI KICHIUASKEJ?
Akin tetlakaita mochijchikaua kichiuas tlen kuali. ¿Mitspaktia tikinpaleuis oksekimej? Tla ijkon tikchiua, mokoneuan noijki kinekiskej ijkon kichiuaskej.
Akin tetlakaita noijki tekipanoua, amo techikoita uan kinmajsikamati oksekimej. Noijki yolkuali porque ijkon okimachtijkej ijkuak okatka telpochtli noso ichpochtli.
PRINCIPIO BÍBLICO: “Kuali xikmachti telpochtli para kuali ma uia uan maski kipias miak xiuitl kichiuas tlen kuali” (Proverbios 22:6).
¿TLEKA MIAK IPATI?
Axkan san sekimej tetlakaitaj. Se siuatl tlen itoka Karyn okijto: “Itech teléfonos noso tabletas tokoneuan uelis kitaskej tlen amo kuali. Uelis kitoskej tlen amo kuali maski touan katej”.
PRINCIPIO BÍBLICO: “Akimeh yochikawak intlaneltokalis, ya weletih [...] kiyejyekoliah tlan kuali iwa tlan amokuali” (Hebreos 5:14).
Ma kiteititikan tetlakaitaj. Konemej moneki kijtoskej “nimitstlatlaujtia” uan “tlasojkamati”, noijki moneki kinpaleuiskej oksekimej maski miakej amo ijkon kichiuaj, porque axkan nesi san kitokej incelular.
PRINCIPIO BÍBLICO: “Xikchiwakah tlan kuali, ijkó kemi nomejwah nonkinekih makichiwakah tlan kuali nomowah” (Lucas 6:31).
¿TLEN UELIS TIKCHIUAS?
Xikinmilui tlen uelis uan tlen amo uelis kichiuaskej. Sekimej ixtlamatkej kijtouaj ijkuak tetajmej kinmiluiaj inkoneuan amo kuali ma motekakan iuan oksekimej, ijkuak ok telpokamej noso ichpokamej, amo ijkon kichiuaj.
NIN UELIS TIKCHIUAS: Ijkuak nankitaskej noticias uelis tikinmititis mokoneuan tleka miak ipati ma tetlakaitakan. Ma tikijtokan nankikakij se noticia uan kijtouaj ikaj okitlajyouiltijkej, ik non, uelis tikiluis mokone: “¡Temojmoti tlen opanok! Tlen timokuayejyekoua, ¿tleka ijkon kichiuaj?”.
Se tlakatl tlen itoka Brandon okijto: “Tla tiknekij tokoneuan ma kichiuakan tlen moneki, moneki achto ma kimatikan tlen kuali uan tlen amo kuali”.
Xikinmachti ma tetlakaitakan. Maski ok konemej uelis kinpaleuiskej oksekimej, noijki uelis kijtoskej “nimitstlatlaujtia” uan “tlasojkamati”. Se amochtli tlen itoka Parenting Without Borders (Padres sin fronteras) kijtoua: “Ijkuak konemej kajsikamatij amo nochipa kichiuaskej tlen yejuan kinekij, mochijchikauaj kinpaleuiskej oksekimej”.
NIN UELIS TIKCHIUAS: Xikinnauati mokoneuan ma kichiuakan seki tlamantli, ijkon kajsikamatiskej moneki tlapaleuiskej.
Se siuatl tlen itoka Tara okijto: “Tla mokoneuan itlaj kichiuaj ompa kalijtik, amo tlajyouiskej ijkuak inselti chantiskej. Porque yikimatij tlen moneki kichiuaskej”.
