1. Maski toTajtsin Dios sapanoa kipia chikaualistli, ¿tlen kinkauilia oksekimej ma kichiuakan?

JEHOVÁ okichijchi nochi tlen onka. San ye okachi ixtlamatki uan okachi chikauak. Se tonal, Job okijto okitak ken toTajtsin Dios kichiua nochi tlen kineki. Ye nochi ueli kichiua (Job 42:2). Uan amo moneki ikaj ma kipaleui. Pero ye kinkauilia oksekimej ma kipaleuikan. Ijkon kiteititia sapanoa techtlasojtla.

2. ¿Tlen tekitl okimakakej Jesús?

² ToTajtsin Dios achto okichijchi Jesús. Satepan okikauili Jesús ma kipaleui ma kichijchiua tlen onka (Juan 1:1-3, 18). Tlatitlanil Pablo okijto Jehová ika Jesús “okichijchi nochi tlan onka, iwa tla amo por Ye, amitla yetoskia” (Colosenses 1:15-17). Jehová okimakak se tekitl miak ipati uan okintlapoui oksekimej.

3. (1) ¿Tlen tekitl okimakakej Adán? (2) ¿Tleka Jehová okikauili Adán ma kipaleui?

 ³ Jehová noijki techkauilia iuan ma titekitikan. Se neskayotl, okikauili Adán ma kintokayoti yolkamej (Génesis 2:19, 20). Adán okiyolpakti kichiuas non tekitl. Pampa kintokayotis sejse yolkamej, Adán okinmitak tlen okichiuayaj uan ken okatkaj. Jehová uelis kintlaliliskia intoka pampa ye okinchijchi. Jehová okitlasojtlaya Adán, ik non, okikauili ma kichiua non tekitl. Noijki okilui ma kikuepa nochi Tlaltikpak se kualtsin xochitlali (Génesis 1:27, 28). Satepan Adán ayakmo okinek tekitis iuan Jehová. Ik non, axkan sapanoa titlajyouiaj (Génesis 3:17-19, 23).

4. ¿Akinmej okipaleuijkej Jehová?

⁴ Satepan noijki okinkauili oksekimej iuan ma tekitikan. Se neskayotl, Noé okichijchi se akali pampa ma momakixtikan ye iuan ikalchanejkauan. Moisés okinkixti israelitas itech ueyi altepetl Egipto. Josué okinyekanki israelitas pampa kiseliskiaj tlali tlen toTajtsin Dios okijto kinmakaskia. Salomón okichijchi teokali itech altepetl Jerusalén. María omochi inantsin Jesús. Ninmej itekipanojkauan yolmelajkej uan oksekimej otekitikej iuan Jehová pampa ma mochiua itlanekilis.

5. (1) ¿Tlen tekitl uelis tinochtin tikchiuaskej? (2) ¿Moneki ma tikpaleuikan Jehová? (Xikita tlaixkopinal tlen ika peua tlamachtil).

⁵ Axkan, Jehová noijki techiluia ma tikpaleuikan iTekiuajkayo. Uelis titlapaleuiskej ika miak tlamantli. Maski amo tinochtin uelis tikchiuaskej ken oksekimej, pero tinochtin uelis titetlapouiskej itech Tekiuajkayotl. ¿Moneki ma tikpaleuikan Jehová? Amo. Ye uelis kinualtlapouiskia sejse tlaltikpaktlakatl. Jesús okijto Jehová noijki uelis kichiuaskia temej ma tetlapouikan itech Tekiuajkayotl (Lucas 19:37-40). Pero toTajtsin Dios techkauilia ma tikpaleuikan (1 Corintios 3:9). Tlatitlanil Pablo okijkuilo: “Kemi titekitkeh itech nin tekitl non Dios otechmaktili, tomechtlatlaujtiah amo san xikawilmatikah iteiknomatilis Dios, non Ye yonomechnextili” (2 Corintios 6:1). Titekitiskej iuan Jehová se ueyi tlateochiualistli. Ma tikitakan tleka techyolpaktia.

6. ¿Tlen okimachiliaya Jesús ijkuak otekitiaya iuan iTajtsin?

⁶ Tiitekipanojkauan Jehová sapanoa tiyolpakij iuan titekitiskej. Ijkuak Jesús okatka iluikak otekitik iuan Jehová ken “se kuali tekipanojki”. Ye okimatiaya Jehová sapanoa kitlasojtla uan okijto: “nochipa oniyolpaktoka iixpan ye” (Proverbios 8:22, 30). Oyolpakiaya tekitis iuan iTajtsin pampa okichi miak tlamantli uan okimatiaya iTajtsin okitlasojtlaya. ¿Uan tejuan? ¿Noijki tiyolpakij titekitiskej iuan Jehová?

7. ¿Tleka tetlapouilistli kichiua ma tiyolpakikan uan kichiua kuali ma timomachilikan?

⁷ Jesús okijto tiyolpakij ijkuak itlaj tiktemakaj uan noijki ijkuak itlaj techmakaj (Hechos 20:35). Ijkuak otechmachtijkej tlen melauak sapanoa otiyolpakej. Pero ijkuak oksekimej tikinmachtiaj  tlen melauak noijki tiyolpakij uan kuali timomachiliaj. ¿Tleka? Pampa tikitaj sapanoa yolpakij ijkuak kimatij tlen melauak. Techyolpaktia ijkuak tikitaj ken kipatlaj inyelis uan innemilis. Tikmatij tla mouikaskej iuan toTajtsin Dios uelis kipiaskej yolilistli tlen amo keman tlamis (2 Corintios 5:20). Ik non, titetlapouiskej okachi ipati uan kichiua ma tiyolpakikan.

8. ¿Tlen kimachiliaj sekimej tokniuan ijkuak tekitij iuan Jehová?

⁸ Ijkuak tikinpaleuiaj oksekimej tlaltikpaktlakamej ma kixmatikan toTajtsin Dios, Jehová yolpaki uan kipatioita tlen tikchiuaj. Nin noijki techyolpaktia uan kichiua kuali ma timomachilikan (xiktlajtolti 1 Corintios 15:58). Se tokni tlen itoka Marco uan tlen chanti itech ueyi altepetl Italia kijtoa: “Amo ueli nikyekijtoa ken sapanoa niyolpaki pampa niktekichiuilia Jehová ika nochi noyolilis uan amo okse akin uelis kilkauas noteki”. Okse tokni tlen itoka Franco uan tlen noijki chanti itech ueyi altepetl Italia kijtoa: “Mojmostla Jehová techilnamiktia ken sapanoa techtlasojtla uan kichiua ika Biblia, amatlajkuilolmej uan nechikolmej. Maski tlen tikchiuaj mota amo miak, ye melauak kipatioita. Ik non, nitekitis iuan Jehová sapanoa nechyolpaktia uan kichiua ma nikneki niyoltos”.

9. (1) ¿Ken omouikayaj Jehová uan Jesús? (2) ¿Tleka kuali omouikayaj?

⁹ Ijkuak titekitij iuan ikaj akin tiktlasojtlaj, okachi itech timotokiaj. Okachi kuali tikmatij ken iyelis uan tlen kichiua. Tikmatij tlen kineki kichiuas uan tlen kichijtok pampa mochiuas tlen  kineki. Miak xiuitl achto ualaskia Jesús itech Tlaltikpak uelis otekitik iuan Jehová. Sapanoa omotlasojtlayaj, ik non, amo itlaj okinxelo. Ik non, Jesús okijto: “Ne iwa Notajtsi tiseititokeh” (Juan 10:30). Kuali omouikayaj pampa oyolpakiayaj tekitiskej san sekan uan mopaleuiskej.

10. ¿Tleka tetlapouilistli kichiua kuali ma timouikakan iuan Jehová uan noijki iuan tokniuan?

¹⁰ Jesús okilui Jehová ma kinmalui imachtijkauan. ¿Tleka? Jesús okijto: “Para mayekseititokah kemi Tejwatsi iwa Ne tiseititokeh” (Juan 17:11). Ijkuak tiktlakamatij tlen Jehová techiluia itech iTlajtol uan titetlapouiaj, okachi kuali tikajsikamatij ken iyelis. Tikitaj okachi moneki itech ma titlaneltokakan uan nochipa ma tikchiuakan tlen kijtoa. Uan tla timochijchikauaj iuan timouikaskej, ye touan mouikas (xiktlajtolti Santiago 4:8). Tetlapouilistli noijki okachi techtokia iuan tokniuan, pampa tikitaj ken mochijchikauaj pampa kuali ma kinmita Jehová. Uan noijki tikitaj ken noijki tlajyouiaj, yolpakij uan kinekij kichiuaskej ken tejuan. Ijkuakon san sekan tiyolpakij, titekitij uan titlaxikoaj. Se tokni tlen itoka Octavia tlen chanti itech ueyi altepetl Gran Bretaña kijtoa: “Nitekitis iuan Jehová kichiua itech ma nimotoki uan noijki nechtokia iuan tokniuan”. ¿Tleka? Ye kijtoa pampa akinmej iuan mouikaj noijki kinekij kichiuaskej ken ye. ¿Noijki ijkon tikmachilia?

11. ¿Tleka itech Xochitlali okachi kuali timouikaskej iuan Jehová uan noijki iuan tokniuan?

¹¹ Axkan sapanoa tiktlasojtlaj Jehová uan noijki tokniuan. Pero itech Xochitlali okachi tikintlasojtlaskej. Ximokuayejyeko ken tiyolpakiskej pampa san sekan titekitiskej. Tikinseliskej akinmej kinyolitiskej uan tikinmachtiskej itech Jehová. Nochi Tlaltikpak tikkuepaskej se kualtsin Xochitlali. Melauak techyolpaktis san sekan titekitiskej uan yolik ayakmo tikpiaskej tlajtlakoli ijkuak Jesús peuas tlanauatis. Sejse tonal tlen panos okachi kuali timouikaskej iuan tokniuan uan noijki iuan Jehová. Jehová techmakas nochi tlen tiknekiskej (Salmo 145:16).

12. ¿Tleka tetlapouilistli techmaluia?

¹² Axkan tlayekantok Satanás uan noijki titlajtlakolejkej. Tla amo timomaluiaj, peuas timokuayejyekoskej uan tikchiuaskej ken oksekimej tlaltikpaktlakamej. Ik non, moneki ma tikmaluikan ken timouikaj iuan Jehová. Ik non, moneki sapanoa ma timochijchikauakan. Nin ken ikaj ajkuiskia itech se aueyatl  tlen motlalojtok pampa amo melsimas moneki mochijchikauas ajkuis. Tetlapouilistli kimaluia ken timouikaj iuan Jehová. ¿Tleka? Pampa ijkuak titetlapouiaj itech toTajtsin Dios uan Biblia, tikitaj tlamantli kuali tlen okachi ipati. Amo timokuayejyekoaj itech tlamantli tlen amo kichikauas totlaneltokilis (Filipenses 4:8). Tetlapouilistli kichikaua totlaneltokilis, pampa techilnamiktia nochi tlen kichiuas toTajtsin Dios uan nochtin itlanauatiluan. Uan noijki, techpaleuia pampa ma tikpiakan kuali toyelis tlen techmaluia pampa amo ma techkajkayaua Satanás uan tlen onka itech Tlaltikpak (xiktlajtolti Efesios 6:14-17).

13. ¿Tleka Joel kipatioita tetlapouis?

¹³ Titetlapouiskej, timomachtiskej uan tikinpaleuiskej tokniuan techpaleuia amo okachi ma timotekipachokan itech tlen techtlajyouiltia. Se tokni tlen itoka Joel tlen chanti itech ueyi altepetl Australia kijtoa tleka kipatioita tetlapouis. Kijtoa kipaleuia amo ma kilkaua nochi tlen kintlajyouiltia tlaltikpaktlakamej. Noijki tetlapouilistli nechilnamiktia itlanauatiluan Biblia. Ye kijtoa: “Tetlapouilistli kichiua ma niyeto yolyamanki uan okachi ma nitlaneltoka itech Jehová uan itech nokniuan”.

14. ¿Tleka tikmatokej toTajtsin Dios techpaleuia ika iespíritu santo?

¹⁴ Tetlapouilistli kiteititia Jehová techpaleuia ika iespíritu santo. Ma tikitakan se neskayotl, ximokuayejyeko ikaj mitsiluia xikintlamaka tlaltikpaktlakamej kanin tichanti. Pero amo mitstlaxtlauiskej, te moneki nochi tiktlaxtlauas. Pero tikmatok tlaltikpaktlakamej amo kinekij xikintlamaka uan sekimej kualaniskej. ¿Tikxikos tikchijtos nin tekitl? Uelis san niman tisotlauas uan ayakmo tikchiuas non tekitl. Tejuan noijki tikintlapouiaj tlaltikpaktlakamej iTlajtol toTajtsin Dios. Moneki tiktekitiltiskej totomin uan tochikaualis maski tlaltikpaktlakamej techpinatiaj uan techkokoliaj. Pero amo keman timosotlauaj. Nin kiteititia Jehová techpaleuia ika iespíritu santo.

15. ¿Tleka miak ipati ma titetlapouikan?

¹⁵ Tetlapouilistli miak ipati, pampa tlapaleuia ma mochiua tlen Jehová kineki pampa tlaltikpaktlakamej. Ye okinekiaya nochipa ma yoltokan tlaltikpaktlakamej uan maski Adán otlajtlakolchi ye ok kineki ma tiyoltokan nochipa (Isaías 55:11). Jehová okiualtitlanki iKone ma mikiki topatka, ijkon otechmakixti itech tlajtlakoli uan mikilistli. ¿Ken uelis timomakixtiskej? Tla tiktlakamatij toTajtsin Dios uelis tiyoltoskej nochipa. Jesús okinmachti tlaltikpaktlakamej tlen kineki toTajtsin  Dios ma kichiuakan uan okinmilui imachtijkauan ijkon ma tlamachtikan. Ik non, titetlapouiaj uan tikinpaleuiaj oksekimej ma mouikakan iuan toTajtsin Dios. Tla ijkon tikchiuaj, titekitij iuan Jehová uan tikinpaleuiaj ma momakixtikan tlaltikpaktlakamej itech tlajtlakoli uan mikilistli.

16. ¿Tlen tikteititiaj ijkuak titetlapouiaj?

¹⁶ Ijkuak se teopixki okitlajtlani Jesús tlen tlanauatil moneki okachi ma tiktlakamatikan, Jesús okinankili: “Xiktlasojtla Moteko Dios ika nochi moyolo, ika nochi moalma iwa ika nochi motlalnamikilis. Ye nin tlanawátili non okachi tlayakantok iwa okachi weyi kijtosneki. Iwa onka ok se tlanawátili non kimoiknitia iwa kijtoa: ‘Xiktlasojtla mokni kemi te timotlasojtla’” (Mateo 22:37-39). Ijkuak titetlapouiaj uan tikinmachtiaj tlaltikpaktlakamej ken uelis yoltoskej nochipa, tikteititiaj tiktlakamatij tlanauatil pampa tikintlasojtlaj tlaltikpaktlakamej uan Jehová (xiktlajtolti Hechos 10:42). Ye kineki “mamomakixtikah nochteh iwa makixmatikah tlan milák” (1 Timoteo 2:4).

17. ¿Ken tikita tekitl tlen tikchiua iuan Jehová?

¹⁷ Ma tiktlasojkamatilikan Jehová pampa techkauilia iuan ma titekitikan. Techyolpaktia iuan titekitiskej, kichiua okachi kuali iuan ma timouikakan noijki iuan tokniuan uan techmaluia. Noijki kichiua ma tikteititikan tiktlasojtlaj Jehová uan tokniuan. Itech nochi Tlaltikpak katej sapanoa miakej tokniuan uan tinochtin tlatlamantli titlajyouiaj. Pero tinochtin timochijchikauaj titetlapouiskej, maski yitikpiaj miak xiuitl noso amo, tikpiaj miak tlamantli noso amo. Timomachiliaj ken se tokni tlen chanti itech ueyi altepetl Australia, ye okijto: “Akin sapanoa miak ipati itech nochi semanauak, akin oKichijchi nochi, toTajtsin Dios tlen yolpaki, nechiluia: ‘Xio uan xitlajto. Notech xitlajto. Xikintlapoui ika nochi moyolo. Ne nimitsmakas chikaualistli, noTlajtol, mitspaleuiskej ángeles uan akinmej inmiuan titetlapouis. Nimitsmachtis ken tikchiuas ijkuak monekis’. Jehová techkauilia iuan ma titekitikan pampa kichiuas tlen kineki. ¡Se ueyi tlateochiualistli!