¿Tlen techmachtiaj milagros tlen okichi Jesús?

XAMO mitstlajtlachialtis tikmatis ijkuak Biblia techtlapouia tlen okichi Jesús nikan tlaltikpak, amo kijtoua ika griego tlajtoli “milagro”. Ika tlajtoli griego ijkuak kijtoua “milagro” moijtoua dý·na·mis uan kijtosneki chikaualistli (Lucas 8:46). Uan noijki kijtosneki tlen kimati kichiuas noso tlen ueli kichiua ika ichikaualis (Mateo 11:20; 25:15). Se ixtlamatki kijtoua: “Nin tlajtoli kiteititia chikaualistli tlen ika omochi milagro. Ijkon mochiua porque nin chikaualistli iaxka toTajtsin Dios”.

Okse tlajtoli ika griego moijtoua ken té·ras uan kijtosneki kiteititia itlaj panos satepan noso itlaj tlen sapanoua tetlajtlachialti (Juan 4:48; Hechos 2:19). Ik non, ijkuak miakej okitayaj milagros tlen okichiuaya Jesús omotlajtlachialtiayaj (Marcos 2:​12; 4:​41; 6:​51; Lucas 9:​43).

Okse tlajtoli ika griego moijtoua sē·méi·on noso kiteititia itlaj panos satepan. Ixtlamatki Robert Deffinbaugh kijtoua: “Nin okachi kiteititia tlen kijtosneki tlajtoli milagro, porque ijkuak Jesús otlamachti okijto tlen panoskia satepan”.

¿Melauak ichikaualis toTajtsin Dios?

Milagros tlen okinchi Jesús, Biblia amo kijtoua okinchi san para kinyolpaktiskiaj akinmej okitayaj, Jesús okinchiuayaj milagros para kiteititis ichikaualis toTajtsin Dios, ijkon omotak ijkuak okikixtili se espíritu amo kuali se telpochtli (Lucas 9:37-43). ¿Tla Biblia kijtoua toTajtsin Dios “ye sapanoua chikauak uan ichikaualis tetlajtlachialtia”, tikijtoskia amo uelis kichiuas nin milagro? (Isaías 40:26). ¡Kema uelis!

Maski Evangelios techtlapouia Jesús okinchi kanaj treinta y cinco milagros, pero amo tikmati keski okinchi. Biblia kijtoua itech Mateo 14:14, Jesús “okinmitak miakeh tlakah, okimiknoma iwa okimpajti n kokoxkeh” pero amo kijtoua keski okinpajti.

Milagros tlen okinchiuaya Jesús okiteititi ye melauak okatka iKone toTajtsin Dios, Mesías akin ualaskia. Biblia kiteititia Jesús okinchiuaya milagros ika ichikaualis toTajtsin Dios. Apóstol Pedro okijto: “Dios okimák weletílistli para makinchiwa wejweyi neskayolteh nomoixpa, kemi nomejwah kuali nonkimatokeh” (Hechos 2:22). Satepan oksepa okijto: “Nomejwah nonkimatokeh kenijki Dios okimák weletílistli n Jesús de Nazaret ika n Espíritu Santo, iwa kenijki Ye okitechiwilijtinemia tlan kuali iwa okimpajtiaya nochteh akimeh otlaijyowijtinemia imak n diablo. Jesús okichi nochi noni porke Dios okipalewiaya” (Hechos 10:37, 38).

Milagros tlen Jesús okichi omouikaya ika tlen otlamachtiaya. Marcos 1:21-27 kijtoua ken omotlajtlachialtijkej nochtin akinmej okikakiayaj uan okitayaj milagros tlen okichiuaya. Versículo 22 kijtoua “tlakah omotlajtlachialtiayah ijkuak okikakiah itlamachtilis” uan versículo 27 kijtoua “nochteh omomojtijkeh” ijkuak okitakej okikixtili espíritu amo kuali non telpochtli. Tlen okichiuaya uan tlen otlamachtiaya okiteititiaya ye okatka Mesías akin ualaskia.

Jesús amo san okijto ye okatka Mesías; okiteititi ika tlen otlamachti uan ika tlen okichi, noijki ika chikaualistli tlen toTajtsin Dios okimakak para kichiuaskia milagros. Ijkuak okitlajtlanijkej akin ye uan tleka ijkon okichiuaya, okinnankili: “Pero Ne nikpia ok se tlájtoli non okachi weyi ke non de Juan: Nochi tlan Ne nikchiwa ye tlan Notajtsi onechnawati manikchiwa, iwa nochi tlan nikchiwa kiteititia nik Notajtsi onechaltítlanki” (Juan 5:36).

Tlen kiteititia melauak opanok

¿Tlen techpaleuia ma tikmatikan Jesús melauak okinchi milagros? Ma tikitakan tlen techiluia Biblia.

Ijkuak Jesús okinchi milagros amo okinchi para ye ma kitakan. Ye okinchi para oksekimej ma kiueyichiuakan toTajtsin Dios. Ijkon okijto achto kipajtiskia se tlakatl tlen amo otlachiaya “para mamota ítech, tlan Dios weletis kichiwas” (Juan 9:1-3; 11:1-4).

Jesús amo okichi ken akinmej tlakajkayauaj ika magia, tetlajchiuia, akinmej kichiuaj hipnotismo, trucos, conjuros uan uejueyij iluitl nion amo okichi ken akinmej otlaneltokayaj itech suerte uan reliquias. Xikita ken okinpajti ome tlakamej tlen amo otlachiayaj: “Okinmiknoma, iwa okintelkoli inmixtololowah. San nima owaltlachixkeh, iwa okitokakeh n Jesús” (Mateo 20:29-34). Ken tikita amo okichi se ueyi iluitl nion otlamajmanki para kinpajtiskia. Miak uelta miakej okitakej ijkuak okichiuayaj ninmej milagros uan amo okitekitilti miak tlamantli. Axkan sekimej kijtouaj tepajtiaj noso kichiua seki tlamantli tetlajtlachialti. Pero tlen yejuan kichiuaj amo momati kox melauak (Marcos 5:24-29; Lucas 7:11-15).

Ualeua Jesús okitaya akinmej okiluiayaj ma kinpajti, okichiuayaj porque itech otlaneltokayaj. Uan maski amo itech otlaneltokayaj noijki okinpajtiayaj. Ijkon opanok ijkuak okatka altepetl galilea de Capernaum “okwalinwikilijkeh n Jesús miakeh non okimpiayah espíritus amokualteh. Iwa ika itlajtol okinkixti n espíritus amokualteh iwa okimpajti nochteh non omokokoayah” (Mateo 8:16).

Ijkon okichiuayaj porque melauak okinekiayaj kinpaleuis, amo san para ma kitakan (Marcos 10:46-52; Lucas 23:8). Noijki amo okinchi milagros para itlaj ma kimakakan (Mateo 4:2-4; 10:8).

¿Melauak opanok tlen kijtoua Evangelios?

Tikmatij Jesús okinchi milagros porque ijkon ijkuilitok itech naui Evangelios. ¿Uelis tikneltokaskej? Kema.

Ken yotimomachtijkej miakej okitakej ijkuak okinchi milagros uan miakej ok oyoltokaj ijkuak opejki kijkuilouaj Evangelios. Amochtli The Miracles and the Resurrection (Los milagros y la resurrección) techmachtia akinmej okijkuilojkej naui Evangelios amo otlakajkayajkej uan kijtoua: “Amo kuali tla tikijtoskej amo melauak tlen okijkuilojkej itech Evangelios uan san okinekiayaj techtlajtlachialtiskej ika tlen okichi Jesús. [...] Yejuan okijkuilojkej tlen melauak okitakej”.

Akinmej okixnamikiayaj Jesús, okitakej melauak okinchiuaya milagros. Pero amo okineltokayaj kox toTajtsin Dios okipaleuiaya Jesús (Marcos 3:22-26). Noijki akinmej satepan oteixnamikiayaj okimatiayaj melauak tlen okichi Jesús ika milagros. Itech achto 200 xiuitl, sekimej otlajtojkej itech milagros tlen Jesús okinchi. Ik non, tikpiaj tlen ika tikteititiskej melauak tlen kijtouaj Evangelios.

Okichiuaya milagros porque otetlasojtlaya

Tla san tiktlajtoltis milagros tlen okinchi Jesús uan san tiktemos kox melauak opanokej, amo tikitas tlen okiyoliniaya ijkon ma kinchiua. Ijkuak Evangelios tlajtoua itech milagros tlen okinchi Jesús, ueli tikita ye okatka se tlakatl tlen sapanoua otetlasojtlaya, oteiknomatiaya, okitekipachouaya tlen okinpanouaya oksekimej uan okitemouaya ken kinpaleuis.

Ma tikitakan tlen opanok ijkuak se tlakatl tlen okipiaya lepra inauak omotoki uan san niman “omotlankuáketski iwa okili: Tla tikmonekiltia weletis techchipawas de nokokolis. Jesús okiknoma n kókoxki, okitelko iwa okili: Ne nikmonekiltia. ¡Ximochipawa!” Uan san niman oualpajtik (Marcos 1:40-42). Ijkon Jesús okiteititi okinchiuaya milagros porque okinmiknomatiaya akinmej otlajyouiayaj.

¿Tlen okichi ijkuak okinmitak miakej oualaya itech altepetl Nain uan okiualikayaj se mikatl? Akin oixpoliuik okatka se telpochtli, inantsin amo okipiaya inamik uan san ye ikone okipiaya. Jesús “okitak n iknosiwatl” uan “okiknoma” omotoki inauak uan “okili: Ayakmó xichoka” uan san niman okiyoliti ikone (Lucas 7:11-15).

Nochi nin techmachtia uan techyolseuia porque tikita Jesús okinchiuaya milagros porque “okinmiknomatiaya” uan okinekiaya kinpaleuis oksekimej. Nochi nin amo san kiteititia tlen yiuejkika okichi Jesús, porque itech Hebreos 13:8 kijtoua: “Cristo Ye inewia, yala, axa iwa nochipa”. Axkan ye kajki ken Tekiua uan tlanauatia iluikak. Uan kimati ken okachi kinchiuas milagros, okachi ken ijkuak okatka nikan tlaltikpak. Ijkon kichiuas para kinpajtis akinmej kitlakamatij toTajtsin Dios. ITlaixpantijkauan Jehová mitspaleuiskej para okachi ximomachti tlen kichiuas Jesús satepan.

[Fotos]

Milagros tlen okichi Jesús okiteititi ichikaualis toTajtsin Dios

[Foto]

Jesús okatka se tlakatl tlen sapanoua otetlasojtlaya