1. ¿Ken katej axkan tonalmej?

AXKAN tonalmej sapanoa oui. Itech xiuitl 1914 opejki “iksemi tonatijmeh” itech nin Tlaltikpak. Ik non, axkan okachi onka tlajyouilistli (2 Timoteo 3:1-5). Uan tikmatij satepan okachi oui yetos, pampa itech Biblia kijtoa tlaltikpaktlakamej yetoskej “amokualteh iwa tekajkayajkeh okachi kijtlakojtiaskeh inyolo” (2 Timoteo 3:13).

2. ¿Ika tlen moyolpaktiaj axkan miakej tlaltikpaktlakamej? (Xikita tlaixkopinal tlen ika peua tlamachtil.)

² Axkan, miakej tlaltikpaktlakamej moyolpaktiaj ika tlamantli tlen Jehová kikokolia, ken ijkuak sapanoa moteuiaj, ijkuak auilnemij, ijkuak kitekitiltiaj magia noso ijkuak tekitij iuan demonios. Se neskayotl, itech Internet, televisión, tlamauisolmej, amochmej uan revistas kijtoaj amo itlaj panos tla se kinmitas. Uan itech miakej uejueyij altepemej yokinpatlakej intlanauatiluan pampa ijkon tlaltikpaktlakamej uelis kichiuaskej tlen achto okitayaj amo kuali.  Pero Jehová amo kinpatla itlanauatiluan, ye kikokolia tlen amo kuali (xiktlajtolti Romanos 1:28-32).

3. Pampa tiktlakamatij toTajtsin Dios, ¿ken techitaj miakej?

³ Itech achto siglo, miakej tlaltikpaktlakamej noijki omoyolpaktiayaj ika tlamantli tlen amo kuali. Pero akinmej okichiuayaj ken Cristo amo okichiuayaj ken nonmej tlaltikpaktlakamej, yejuan okintlakaitayaj itlanauatiluan toTajtsin Dios. Ik non, okinchikoitayaj, okinpinatiayaj uan noijki okintojtokayaj (1 Pedro 4:4). Axkan tejuan noijki tiktlakamatij itlanauatiluan toTajtsin Dios. Ik non, miakej tlaltikpaktlakamej amo kuali techitaj. Uan Biblia kijtoa kintlajyouiltiskej nochtin akinmej kichiuaskej ken Cristo (2 Timoteo 3:12).

4. ¿Tlen moneki ma tikchiuakan pampa tiktlakamatiskej toTajtsin Dios?

⁴ Tla tiknekij tiktlakamatiskej toTajtsin Dios, moneki “ayakmó [ma tik]tlasojtlakah tlan onka itech nin tlaltíkpaktli nion tlan nika mochiwa” (xiktlajtolti 1 Juan 2:15, 16). Biblia kijtoa Satanás kiyekantok Tlaltikpak. Satanás kinkajkayaua tlaltikpaktlakamej ika tlaneltokalistli, tekiuajkej, tlen monemaka uan tlen mota (2 Corintios 4:4; 1 Juan 5:19). Tla amo tiknekij ma techkajkayaua, moneki ma timomaluikan pampa amo ma timouikakan iuan akinmej kichiuaj tlen amo kuali. Ik non, Biblia kijtoa amo ma timokajkayauakan pampa ‘tla tinemiskeh iwa akimeh kichiwah tlan amokuali, [...] techijtlakoskeh’ (1 Corintios 15:33).

5, 6. 1) ¿Iuan akinmej amo moneki ma timouikakan? 2) ¿Tleka amo moneki ma timouikakan iuan akin kichiua tlen amo kuali?

⁵ Amo ma timouikakan iuan akinmej kichiuaj tlen amo kuali, pampa ijkon kuali timouikaskej iuan toTajtsin Dios. Noijki amo ma timouikakan iuan akinmej kijtoaj kitekichiuiliaj Jehová pero amo kitlakamatij. Ik non, tla ikaj tlajtlakolchiua uan amo moyolkuepa, ayakmo tiktlapouiaj uan ayakmo iuan timouikaj (Romanos 16:17, 18).

⁶ Tla timouikaj iuan akin kichiua tlen amo kuali, tejuan noijki uelis titlajtlakolchiuaskej. ¿Tleka? Pampa nochtin kinekij kichiuaskej ken inyolikniuan uan kuali inmiuan mouikaskej. Se neskayotl, tla timouikaj iuan akin auilnemi, tejuan noijki uelis tiauilnemiskej. Non tlen okinpanok sekimej iTlaixpantijkauan Jehová. Sekimej omoyolkuepkej, pero oksekimej amo, ik non, okinkixtijkej itech tlanechikol (1 Corintios 5:11-13). Tla amo moyolkuepaj, kinpanos tlen kijtoa 2 Pedro 2:20-22 (xiktlajtolti).

7. ¿Iuan akinmej moneki ma timouikakan?

⁷ Maski moneki tikintlasojtlaskej nochtin. Amo moneki ma timouikakan iuan akinmej amo kitlakamatij toTajtsin Dios. Se neskayotl, se iTlaixpantijka Jehová amo moneki mochiuas inovio noso inovia se akin ayamo moapolaktia. Okachi ipati kuali ma timouikakan iuan Jehová, uan amo kuali ma timouikakan iuan akin amo kitlakamati Jehová. San moneki ma timouikakan iuan akinmej kichiuaj tlen toTajtsin Dios kipaktia. Jesús okijto: “Nochteh akimeh kichiwah tlan Dios kimonekiltia, ye nokni, nowelti iwa nomamá” (Marcos 3:35).

8. ¿Tlen okinpanok israelitas pampa amo otetlakamatkej?

⁸ Sapanoa tlajyouiskej akinmej mouikaj iuan akinmej amo yolkualmej. Se neskayotl, ijkuak israelitas yiajsiskiaj itech Tlali tlen Jehová okijto Kinmakaskia, Jehová okinnauati amo ma mouikakan iuan akinmej ompa ochantiayaj. Jehová okinmilui: “Amo moneki timotlankuaketsas inmixpan inteotsitsiuan nion ma mitschiualtikan xikinueyichiua, uan amo xikchiua ken yejuan. Okachi kuali, moneki tikinpojpolos uan tikintlajtlapanas intlaketsaluan kanin tlaueyichiuaj. Moneki xiktekichiuili Jehová moDios” (Éxodo 23:24, 25). Pero miakej israelitas amo otetlakamatkej uan satepan otlajtlakolchijkej (Salmo 106:35-39). ¿Tlen opanok? Jehová ayakmo okiseli altepetl Israel uan okipejpenki okse altepetl, akinmej melauak kichiuaj ken Cristo (Mateo 23:38; Hechos 2:1-4).

9. ¿Tleka películas, amochmej, tlakuikalmej uan Internet uelis techijtlakoskej?

⁹ Miakej películas, amochmej, tlen panoa itech televisión, tlakuikalmej uan páginas itech Internet uelis kichiuas ayakmo kuali ma timouikakan iuan Jehová. Nin ken amo kuali toyolikniuan tlen uelis kichiuaskej ma titlaneltokakan itech Satanás uan amo itech Jehová uan tlen kichiuas satepan. Ik non, moneki ma timomaluikan. Amo ma tikitakan, amo ma tiktlajtoltikan nion ma tikkakikan nochi tlamantli amo kuali tlen mochiua itech Tlaltikpak (Tito 2:12).

10. ¿Tlen panos ika nochi tlamantli amo kuali?

¹⁰ Ayakmo miak poliui uan nochi tlen kiyekana Satanás ayakmo tikitaskej, ayakmo yetoskej películas, amochmej, tlakuikalmej uan páginas itech Internet tlen kiteititiskej tlen amo kuali. Biblia kijtoa: “Nochi tlan onka itech nin tlaltíkpaktli ya tlanti, iwa nochi tlan pitsotik, pero akin kichiwah tlan Dios kineki nochipa yolitos” (1 Juan 2:17). Uan salmista noijki okijto: “Akinmej amo yolkualmej kinmixpoloskej”. “Pero akinmej yolkualmej yetoskej itech Tlaltikpak, uan melauak yolpakiskej pampa yetos miak yolseuilistli.” ¿Keski kauitl? Salmista noijki okijto: “Yolmelauakej yetoskej itech Tlaltikpak, uan itech chantiskej nochipa” (Salmo 37:9, 11, 29).

11. ¿Ken techpaleuia Jehová ma tiyetokan tiyolmelajkej?

¹¹ Tla tiknekij tiyoltoskej nochipa moneki tikchiuaskej ken okijto Jesús  ijkuak omotlatlaujti: “Tla mitsixmatiskeh sanwel Tejwatsi n de milajka Dios, iwa Cristo Jesús, Akin Tejwatsi otikwaltítlanki, kipiaskeh n yolílistli tlan ayik tlamis” (Juan 17:3). Jehová techpaleuia ma tikixmatikan uan ma tiyetokan tiyolmelajkej. ¿Ken kichiua? Ika ialtepe. Ialtepe Jehová amo kichiua ken tlaltikpaktlakamej, pampa nin altepetl kinchijchiua amochmej, videos uan páginas itech Internet tlen techmachtiaj tlen uelis tikchiuaskej pampa ma tiyoltokan nochipa. Uan noijki nin altepetl itech kanaj 110,000 tlanechikolmej tlen onka itech nochi Tlaltikpak techmachtia itech Biblia. Tlen timomachtiaj itech nechikolmej uan uejueyij nechikolmej techpaleuiaj ma titlaneltokakan itech Jehová uan tlen kichiuas (Hebreos 10:24, 25).

12. ¿Tlen kijtosneki se monamiktis iuan akin “kineltoka Toteko Dios”?

¹² Tla tiknekij timonamiktiskej moneki ma timomaluikan. Biblia techiluia amo ma tinemikan iuan akin amo kitekichiuilia Jehová, pampa tikatej ken “tláwili iwa n tleyuálistli” (2 Corintios 6:14). Biblia noijki kijtoa san moneki ma timonamiktikan iuan akin “kineltoka Toteko Dios” (1 Corintios 7:39). Nin kijtosneki san moneki timonamiktiskej iuan se iTlaixpantijka Jehová tlen yomoapolakti uan kitlakamati itlanauatiluan toTajtsin Dios. Tla timonamiktiaj iuan akin kitlasojtla Jehová, uelis techpaleuis ma tiyetokan tiyolmelajkej iixpan Jehová.

13. ¿Tlen okinnauati Jehová amo ma kichiuakan israelitas?

¹³ Jehová kimati tlen uelis techpaleuis. Uan yiuejkika otlanauati itekipanojkauan ma monamiktikan san iuan akinmej kitekichiuiliaj. Se neskayotl, Jehová okinnauati israelitas amo ma monamiktikan iuan akinmej okinueyichiuayaj teotsitsintin. ¿Tleka? Pampa ninmej tlaltikpaktlakamej uelis kichiuaskiaj israelitas ma kinueyichiuakan teotsitsintin. Noijki Jehová okinmilui tla amo kitlakamatiskiaj ye kualaniskia uan kinmixpoloskia (Deuteronomio 7:3, 4).

14, 15. ¿Tlen okipanok Salomón pampa amo okitlakamatki Jehová?

¹⁴ Ijkuak Salomón omochi ueyi tekiua itech altepetl Israel, ye okitlajtlani Jehová ma kimaka ixtlamatilistli. Jehová okinankili Salomón, uan miakej okixmatkej pampa okipiaya ixtlamatilistli uan pampa israelitas kuali okatkaj. Biblia kijtoa ijkuak se siuatl ueyi tekiua okitlajpaloto Salomón, omotlajtlachialti pampa sapanoa ixtlamatki okatka uan okipiaya miak tomin, amo ijkon ken okiluijkej (1 Reyes 10:7). Pero satepan Salomón  okichi itlaj tlen techmachtia tlen uelis techpanos tla amo tiktlakamatij Jehová uan tla timonamiktiaj iuan akin amo kitekichiuilia Jehová (Eclesiastés 4:13).

¹⁵ Maski Jehová okimakak miak tlamantli kuali, Salomón amo okitlakamatki Jehová uan omonamikti iuan miakej siuamej tlen ochantiayaj itech okseki uejueyij altepemej. ¡Okipixki mil siuamej! ¿Tlen okipanok pampa amo okitlakamatki Jehová? Ijkuak oueuejtik noso okokoxkatik isiuauan okichijkej Salomón ayakmo ma kitekichiuili Jehová ika yolmelajkayotl (1 Reyes 11:1-6). Tla ijkon okipanok akin sapanoa oixtlamatiaya, tejuan noijki ijkon uelis techpanos. Ik non, nion ma timokuayejyekokan timonamiktiskej iuan akin amo kitekichiuilia Jehová.

16. ¿Tlen moneki ma kichiua akin peua momachtia uan inamik amo kitekichiuilia Jehová?

¹⁶ ¿Uan tla ikaj mochiua iTlaixpantijka Jehová pero inamik amo kitekichiuilia Jehová? Biblia kijtoa: “Nomejwah siwameh, xiktlakitakah nomookich. Ijkó, non amo tlaneltokakeh, tlaneltokaskeh ijkuak nomechitaskeh kenijki nontetlakitah, iwa mach ok monekis xiktetlapowikah itlajtol Dios” (1 Pedro 3:1). ¿Tlen kijtosneki? Tla siuatl mochijchikaua pampa kuali kichiuas iteki uan kichiuas nochi tlen kijtoa Biblia, inamik kitas se kuali siuatl uan uelis kinekis noijki mochiuas iTlaixpantijka Jehová. Ijkon okinpanok miakej  tokniuan. Uan nin tlanauatil noijki kinpaleuia tokniuan tlakamej akinmej insiua amo kitekichiuilia Jehová.

17, 18. 1) ¿Tlen okipaleui Noé ma momakixti ijkuak omochi apachiuilistli? 2) ¿Tlen okinpaleui akinmej achto okichiuayaj ken Cristo ma momakixtikan ijkuak okipojpolojkej Jerusalén?

¹⁷ Akinmej kichiuaj tlen amo kuali uelis kichiuaskej amo ma tiktlakamatikan Jehová. Pero akinmej yolkualmej uelis techpaleuiskej ma tiyetokan tiyolmelajkej. Ma timokuayejyekokan itech Noé. Ijkuak ye okatka itech Tlaltikpak miakej okichiuayaj tlen amo kuali (Génesis 6:5). Sapanoa okichiuayaj tlen amo kuali, ik non, Jehová okijto kinmixpoloskia nochtin akinmej amo yolkualmej. Pero Biblia techiluia Noé nochipa okitlakamatki Jehová uan okichi tlen kuali (Génesis 6:7-9). ¿Tleka okatka yolmelajki?

¹⁸ Noé amo keman omouikak iuan akinmej amo okitlasojtlayaj Jehová. Ye nochipa omouikak iuan isiua, ikoneuan uan isiuamouan, nochtin san sekan okichijchijkej akali uan otetlapouijkej (2 Pedro 2:5). Nin okinpaleui ma momakixtikan ijkuak omochi apachiuilistli. Axkan tiixuiuan Noé uan ikalchanejkauan. Ik non, moneki ma titetlasojkamatikan pampa otetlakamatkej uan nochipa omouikakej iuan akinmej yolkualmej. Noijki akinmej opejkej kichiuaj ken Cristo itech achto siglo otetlakamatkej uan amo omouikakej iuan akinmej amo okitlasojtlayaj Jehová. Nin okinpaleui ma momakixtikan ijkuak okipojpolojkej Jerusalén itech xiuitl 70 (Lucas 21:20-22).

19. ¿Tlen moneki ma tikchiuakan pampa ma tiyetokan tiyolmelajkej?

¹⁹ ¿Tlen uelis tikchiuaskej tla tiknekij tiyetoskej tiyolmelajkej iixpan Jehová? (1 Corintios 16:13; Proverbios 13:20). Moneki ma tikchiuakan ken Noé, ikalchanejkauan uan akinmej okichijkej ken Cristo itech achto siglo. Amo keman ma timouikakan iuan akinmej amo kitlasojtlaj Jehová. Ma tikilnamikikan tikinpiaj miakej tokniuan yolmelajkej tlen uelis mochiuaskej toyolikniuan. Uelis techpaleuiskej ma tiyetokan tiyolmelajkej uan ma timomakixtikan ijkuak tlamis nochi tlen amo kuali uan noijki pampa ma tikselikan yolilistli tlen amo keman tlamis. Ik non, kuali ma tikinpejpenakan akinmej iuan timouikaskej.