• ONESKI ITECH XIUITL: 1963

• UEYI ALTEPETL: GRAN BRETAÑA

• OKSEKI TLAMANTLI: AYAKMO OKITEMO KITLANIS MIAK TOMIN

TLEN ONIKCHIUAYA.

Onineski ompa Croydon ik sur itech altepetl Londres. Notatajuan oneskej itech se isla tlen itoka San Vicente tlen kajki Caribe. Achto oneskej makuili nokniuan, satepan onineski uan satepan oneskej ok eyi nokniuan. Maski nonantsin opouiaya inmiuan Metodistas, ne amo oniknekiaya nikmatis kox kajki toTajtsin Dios. Ijkuak onikatka nitakotsin onechpaktiaya nimomachtis miak tlamantli uan ijkuak amo oniaya escuela onechpaktiaya nikintlajtoltis amochmej itempa aueyatl.

Ijkuak otlanki onimomachti escuela opejki nikinpaleuia akinmej amitlaj okipiayaj. Onikinpaleuiaya akinmej amo okipiayaj kanin chantiskej, akinmej omokokouayaj uan akinmej amo ueli omomachtiayaj. Satepan ijkuak oniaya universidad onimomachti ciencias de la salud. Ijkuak otlanki onimomachti opejki nitekipanoua kanin kuali onechtlaxtlauiayaj uan amitlaj onechpolouaya. Onitekipanouaya ken gestora uan investigadora social independiente. Para uelis nitekipanoskia san omonekiaya nikpias se computadora uan internet. Ualeua omonekiaya nias itech okseki altepemej uan ompa onimokauaya seki semanas itech se hotel kanin okachi onechpaktiaya, onikchiuaya ejercicios uan onipaxialouaya kanin tlakualtsin. Onikijtouaya oniyolpakiaya, pero ok onechtekipachouaya akinmej amitlaj kipiaj.

BIBLIA OKIPATLAK NONEMILIS.

Nochipa onimotlajtlaniaya tleka tiyoltokej uan ken uelis tiyolpakiskej. Pero amo keman oniktemo itech Biblia tlen oniknekiaya nikmatis. Se tonal itech xiuitl 1999 nokni tlen itoka Margaret onechtlajpaloko iuan iyolikni. Yejuan okatkaj iTlaixpantijkauan Jehová. Iyolikni nokni okatka sapanoua yolkuali, omotekipacho nopatka uan onikilui manechmachti ika Biblia. Pero ok onitekipanouaya uan onikchiuaya miak tlamantli, ik non, amo okachi oniktekichiuiliaya toTajtsin Dios.

Itech xiuitl 2002 onichantito ik suroeste ompa altepetl Inglaterra porque oniknekiaya nimomachtis investigación social itech se universidad uan ijkon nikpias se título. Ompa opejki nimonechikoua iuan nokone inmiuan iTlaixpantijkauan Jehová. Maski kuali onimomachti itech universidad amo onikmatiaya tleka titlajyouiaj uan tlen techpaleuis para kuali tiyetoskej, hasta ijkuak opejki nimomachtia Biblia. Tlen kijtoua Mateo 6:24 noijki onechpaleui. Amo uelis nikinpias ome notekojuan: omonekiaya nikpejpenas niktekichiuilis toTajtsin Dios noso nikpias miak tomin. Tlen nikpejpenaskia kiteititiskia tlen okachi nikpatioita.

Achto nochipa onimonechikouaya inmiuan tokniuan ijkuak omomachtiayaj tlajko semana ika amochtli ¿Existe un Creador que se interese por nosotros? a Ijkon onikajsikamatki san Jehová akin otechchijchi uelis kiyektlalis nochi tlen techtlajyouiltia. Pero itech universidad otechmachtiayaj para tiyolpakiskej amo moneki tikneltokaskej kox kajki akin otechchijchi. Non sapanoua onechkualani. Ayakmo onimomachti universidad maski yikin onikpiaya ome metstli onimomachtijtoka uan ijkon okachi onimajxiliaya niktekichiuilis toTajtsin Dios.

Proverbios 3:5, 6 onechpaleui ayakmo manikchiua tlen achto onikchiuaya. Ompa kijtoua: “Xitlaneltoka itech Jehová ika nochi moyolo uan amo xikchiua san tlen timokuayejyekoua. Nochi tlen tikchiua xikchiua ken ye kineki uan ye kichiuas kuali xikpia monemilis”. Onikajsikamatki okachi ipati nikixmatis toTajtsin Dios uan amo tla nikpias miak tomin, nikpias se título noso miakej manechixmatikan. Ijkuak okachi onimomachtiaya tlen kichiuas Jehová uan tleka Jesús omikik topatka, oniknekiaya nimotemaktis ixpan akin otechchijchi para niktekichiuilis. Satepan itech abril, xiuitl 2003 onimoapolakti ken iTlaixpantijka Jehová. Non onechpaleui ayakmo maniktemo miak tlamantli.

TLATEOCHIUALISTLI TLEN YONIKSELI.

Axkan okachi nikpatioita nimouikas iuan toTajtsin Dios, okachi nikixmatis, niyolpakis uan nimoyolseuijtos. Noijki niyolpaki nimouika inmiuan tokniuan.

Okachi nimomachtia miak tlamantli ijkuak niktlajtoltia Biblia uan ijkuak nimonechikoua. Noijki nechpaktia nikintlapouis oksekimej tlen nimomachtia. Desde junio, itech xiuitl 2008 opejki nitlapaleuia ken precursora. Ijkon nikinpaleuia oksekimej mayolpakikan uan satepan uelis yoltoskej itech xochitlali. Sapanoua niyolpaki porque yinikmati tleka tiyoltokej uan niktlasojkamatilia toTajtsin Dios onechpaleui ika Biblia.

• ONESKI ITECH XIUITL: 1973

• UEYI ALTEPETL: AUSTRIA

• OKSEKI TLAMANTLI: OKIPAKTIAYA MAUILTIS UAN MOTLATLANIS IKA TOMIN

TLEN ONIKCHIUAYA.

Nofamilia okatka católica uan otichantiayaj itech altepetl Braunau tlen poui itech ueyi altepetl Austria. Akinmej ompa ochantiayaj amitlaj okinpolouaya uan amitlaj okinpanouaya.

Nikilnamiki se tonal itech xiuitl 1984 ijkuak onikpiaya 11 xiuitl itlaj onechpanok. Se noyolikni akin nochipa iuan onimauiltiaya oixpoliuik non tiotlak porque itlaj okipanok itech carretera. Sapanoua onechyolkoko tlen okipanok uan onimotlajtlaniaya tlen kinpanoua akinmej ixpoliuij.

Ijkuak onikiski escuela, opejki nitekipanoua ken electricista. Satepan opejki nimauiltia uan nimotlatlani ika tomin. Maski onikpolouaya miak tomin nochipa onikpiaya tlen ika nimopanoltis. Noijki onechpaktiaya nimauiltis uan nikkakis tlakuikalmej heavy metal uan punk. Onechpaktiaya niauilnemis, nias discotecas uan kanin okichiuayaj iluitl. Onikchiuaya nochi tlen oniknekiaya pero amo oniyolpakiaya.

BIBLIA OKIPATLAK NONEMILIS.

Itech xiuitl 1995 se iTlaixpantijka Jehová tlen yikipia miak xiuitl opanok nokalijtik uan onechilui nechmakas amochtli tlen otlamachtiaya “¿Tlen panoua ijkuak ikaj ixpoliui?”. Onikseli non amochtli porque ok oniknekiaya nikmatis tleka oixpoliuik noyolikni uan oniktlajtolti nochi amochtli.

Onimomachti miak tlamantli amo san tlen kinpanoua akinmej ixpoliuij. San onikneltokaya Jesús porque achto onikatka católico. Pero ijkuak opejki nimomachtia Biblia opejki nimouika iuan itajtsin Jesús tlen itoka Jehová. Oniyolpakik ijkuak onimomachti toTajtsin Dios kitekipachoua tlen techpanoua uan kineki matikixmatikan (Mateo 7:7-11). Noijki onimomachti ye kiyolkokoua tlen kita uan nochipa kichiua tlen kijtoua. Ik non, opejki nimomachtia ken mochiuaj profecías tlen katej itech Biblia, non onechpaleui okachi manikneltoka toTajtsin Dios.

Onikitak san iTlaixpantijkauan Jehová mochijchikauaj kinpaleuiskej oksekimej makimatikan tlen kijtoua Biblia. Onikinmijkuilouaya versículos tlen onikinmajsiaya itech amatlajkuilolmej uan satepan onikintemouaya itech noBiblia católica. Ijkuak okachi onimomachtiaya onikajsikamatki iTlaixpantijkauan Jehová kichiuaj tlen toTajtsin Dios kineki.

Biblia yonechpaleui manikajsikamati Jehová kineki manikintlakamati itlanauatiluan. Ijkuak oniktlajtolti tlen kijtoua Efesios 4:22-24 onechpaleui manikaua ‘tlan achto onikchijtinemiah, porke nochi noni onechixpoloaya iwa onechyolijtlakoaya’ uan omonekiaya ‘nimoyolpatlas, ika se yankuik nonemilis kemi Ye inewia yetoskia’. San niman ayakmo onikchi tlen amo kuali uan ayakmo okachi onikixnekiaya tomin nion oniaya kanin motlatlanij ika tomin (1 Corintios 6:9, 10). Pero omonekiaya nikintemos oksekimej noyolikniuan akinmej noijki kitlakamatij itlanauatiluan toTajtsin Dios.

Oui onikitak ijkon nikchiuas. Pero ijkuak opejki nimonechikoua inmiuan iTlaixpantijkauan Jehová opejki nimouika inmiuan oksekimej. Okachi onimomachtiaya ika Biblia uan onimokuayejyekouaya tlen ompa kijtoua. Noijki opejki nikkaki okseki tlatsotsonali, onikpatlak tlen oniknekiaya nikchiuas uan ken onimotaya. Itech xiuitl 1995 onimoapolakti ken iTlaixpantijka Jehová.

TLATEOCHIUALISTLI TLEN YONIKSELI.

Axkan kuali nikmati ken niktekitiltis tomin uan okseki tlamantli. Noijki ayakmo sapanoua nikualani ken achto uan ayakmo nechtekipachoua tlen panos satepan.

Sapanoua niyolpaki nipoui inmiuan akinmej kitekichiuiliaj Jehová. Yejuan yolmelauakej maski san tlen kixnamikij. Niyolpaki niktekichiuilis Jehová uan nikinpaleuis oksekimej, amo san nikchiuas tlen ne nikneki.

• ONESKI ITECH XIUITL: 1963

• UEYI ALTEPETL: GRAN BRETAÑA

• OKSEKI TLAMANTLI: SAPANOUA OMOYOLKOKOUAYA

TLEN ONIKCHIUAYA.

Onineski altepetl Inglaterra pero ijkuak onikpiaya chikome xiuitl otichantitoj ne uan nofamilia ompa Australia, itech se altepetsintli tlen poui Queensland, tlen itoka Gold Coast. Maski amo otikpiayaj miak tomin, amitlaj otechpolouaya.

Otikpiayaj tlen ika timopanoltiskej pero ne amo oniyolpakiaya. Amo onechpaktiaya tlen onikitaya. Amo oniktlasojtlaya notajtsin porque ye otlauanaya. Sapanoua otlauanaya uan okitlajyouiltiaya nonantsin. Onikajsikamatki tleka ijkon okichiuaya ijkuak onikmatki tlen okipanok ompa altepetl Malasia ijkuak okatka soldado.

Satepan noijki opejki nikoni alcohol. Ijkuak onikpiaya 16 xiuitl onimochi soldado uan ayakmo onia escuela. Onikmotlaliliaya drogas, onitlachichinaya uan sapanoua onitlauanaya. Ualeua san itlamian semana onitlauanaya, pero satepan opejki nitlauana nochi semana.

Ijkuak onikpiaya 20 xiuitl opejki nimotlajtlania kox melauak onka toTajtsin Dios. Onimokuayejyekouaya tla melauak kajki, ¿tleka kikaua matitlajyouikan uan matiixpoliuikan? Hasta onikijkuilo seki poesías kanin okijtouaya itlajtlakol toTajtsin Dios panoua tlen amo kuali.

Ijkuak onikpiaya 23 xiuitl ayakmo onikatka soldado. Opejki nikchiua tlatlamantli tekitl uan oniaya itech okseki altepemej pero amo onechpaktiaya tlen onikitaya. Amo onikmatiaya tlen oniknekiaya nikchiuas. Amitlaj onechpaleuiaya maniyolpaki. Amo onikitaya kox moneki nikpias se nokalijtik noso kanin nitekipanos. San oniknekiaya nitlauanas uan nikakis tlatsotsonal.

Kuali nikilnamiki ijkuak opejki okachi nikneki nikmatis tleka tiyoltokej. Onikatka altepetl Polonia uan onia kanin otetlajyouiltiaya ompa Auschwitz. Yoniktlajtoltijka tlen amo kuali ompa okichijkej pero ijkuak ompa oniajsito, sapanoua onimoyolkoko. Amo onikajsikamatiaya tleka ijkon okichijkej. Ijkuak ompa onikatka opejki nichoka uan onimotlajtlani: “¿Tleka?”.

BIBLIA OKIPATLAK NONEMILIS.

Itech xiuitl 1993, ijkuak onimokopki nokalijtik opejki niktemoua tlen kijtoua Biblia. Satepan ome iTlaixpantijkauan Jehová onechyolejkej manimonechiko inmiuan itech se ueyi nechikol tlen mochiuaskia itech se Estadio uan inmiuan onimonechiko.

Seki metstli achto onikinmitato akinmej mauiltiaj itech non estadio, pero ijkuak onimonechiko inmiuan iTlaixpantijkauan Jehová onikitak okse tlamantli okichiuayaj. Nochtin kuali omouikayaj, kuali omotlakentijkej uan inkoneuan otetlakamatiayaj. Ijkuak oajsik tlajko tonal, maski miakej otlakuatoj san sekan kanin mauiltiaj amo okikajkej tlajsoli. Noijki onechtlajtlachialti nikitas nochtin oyolpakiayaj uan omoyolseuijtokaj, ne ijkon oniknekiaya nimomachilis. Amo nikilnamiki tlen otlamachtijkej non tonal pero nochipa nikilnamiki tlen okichijkej iTlaixpantijkauan Jehová.

Non youak onikilnamik tlen onechilui noprimo tlen okipaktiaya momachtis Biblia uan oyaya itech miakej religiones, onechilui tlen okijto Jesús, ika tlen kichiuaj uelis tikinmixmatiskej akinmej melauak kichiuaj ken Cristo (Mateo 7:15-20). Ik non, opejki nimomachtia tleka iTlaixpantijkauan Jehová amo ijkon ken okseki religiones. Opejki niyolpaki uan nikchia satepan kuali tiyetoskej.

Satepan, siuamej tlen onechyolejkej ueyi nechikol oksepa onechtlajpalotoj. Opejki nechmachtiaj, noijki opejki nimonechikoua inmiuan.

Tlen onimomachtijtoka onechpaleui maniktlasojtla toTajtsin Dios. Onimomachti ye amo itlajtlakol tlen amo kuali panoua nion techtlajyouiltia porque ye moyolkokoua ijkuak amo tiktlakamatij (Génesis 6:6; Salmo 78:40, 41). Ik non, onikijto nimochijchikauas para nikyolpaktis uan amo nikyolkokos (Proverbios 27:11). Ayakmo onitlachichinaya nion onitlauanaya uan ayakmo oniauilnemiaya. Itech xiuitl 1994 onimoapolakti ken iTlaixpantijka Jehová.

TLATEOCHIUALISTLI TLEN YONIKSELI.

Sapanoua niyolpaki uan kuali nimomachilia. Ayakmo nitlauana ijkuak nimotekipachoua, axkan nikkauilia Jehová manechyekana itech nonemilis (Salmo 55:22).

Yikipia majtlaktli xiuitl ijkuak onimonamikti iuan se tokni kuajkualtsin tlen itoka Karen uan kipia ichpoch tlen itoka Nella. Sapanoua timochijchikauaj titetlapouiskej uan tikinpaleuiskej oksekimej mamouikakan iuan toTajtsin Dios. Axkan melauak niyolpaki.