Itech Biblia, Jesús kitokayotiaj Miguel noso ken sekimej religiones kijtouaj: “san Miguel”. Biblia ijkon kitokayotia Jesús achto ualaskia nikan tlaltikpak uan noijki ijkuak omokopki iluikak. a Biblia kijtoua ijkuak Moisés oixpoliuik, Miguel omokualani iuan Satanás uan noijki okipaleui se ángel ma kimatilti profeta Daniel tlen okinekiaya toTajtsin Dios (Daniel 10:13, 21; Judas 9). Miguel kipaleuia Jehová uan moteuia iuan akinmej kikokoliaj toTajtsin Dios. Ik non, kinamiki ma kitokayotikan Miguel porque kijtosneki “¿Akin ken Dios?” (Daniel 12:1; Apocalipsis 12:7).

 Ma tikitakan tleka tikijtouaj Jesús ye arcángel Miguel.

•   Miguel “ye arcángel” (Judas 9). Tlajtoli arcángel kijtosneki “akin kinnauatia nochtin ángeles” uan itech Biblia ijkuilitok san ome uelta. Noijki ijkuilitok ken arcángel, nin kijtosneki san se ijkon itoka. Ijkuak Jesús oksepa yokatka iluikak se texto kijtoua: “Toteko waltemos de ilwikak ika chikawak tlájtoli kemi se tekiwa. Tlajtos kemi se non kinyakana n ángelteh” (1 Tesalonicenses 4:16). Nin texto kijtoua Jesús tlajtoua ken se arcángel. Nin kijtosneki arcángel Miguel ye Jesús.

•   Miguel kinyekana ángeles. “N ángel Miguel iwa iangelwah omotekilmakakeh [noso omoteuijkej] iwa n dragón”, kijtosneki iuan Satanás (Apocalipsis 12:7). Miguel tlanauatia iluikak. Biblia kitokayotia “príncipe akin ueyititok” noso “ueyi príncipe” (Daniel 10:13, 21; 12:1). Tlen nikan kijtoua kinextia Jesús “kinnauatia nochtin ángeles”. Noijki ijkon kijtoua David Aune itech Nuevo Testamento tlen ye okitlajtolkopki.

   Biblia kijtoua akin kinyekana ángeles kipia okse itoka. Kijtoua: “Itech neká tonati [...] Toteko Jesús waltemos ijtik tletl de ilwikak iwa iangelwah weletinih” (2 Tesalonicenses 1:7, 8; Mateo 16:27). Noijki 1 Pedro 3:21 uan 22 kijtoua: “Axa Cristo Jesús kajki ilwikak iyekma n Totajtsi Dios, iwa imak kateh ángeles, nochteh non kipiah tekiwajyo itech nin tlaltíkpaktli, iwa nochi tlan kipia weletílistli”. Tla Miguel uan Jesús yetoskiaj tlatlamantli uan toTajtsin Dios kintlaliskia ma kinyekanakan ángeles yejuan san mokualaniskiaj. Ik non, uelis tikijtoskej Jesús uan Miguel san se.

•   Miguel “moketsas” ijkuak panos “ueyi tlajyouilistli” (Daniel 12:1). Itech amochtli Daniel, tlajtoli “moketsas” kiteititia ijkuak se tekiua itlaj kichiuas (Daniel 11:2-4, 21). Jesucristo kitokayotiaj “Itlajtol Dios”, moketsas ken tekiua para kinpojpolos akinmej kikokoliaj toTajtsin Dios uan kipaleuis ialtepe (Apocalipsis 19:11-16). Ijkon kichiuas ijkuak “tlaijyowílistli yetos satlawel temojti non ayamaka ijkó okitak desde ijkuak omonexti n tlaltíkpaktli, iwa ayik oksepa ijkó tlamochiwas” (Mateo 24:21, 42).