¿Ken omotaya Jesús?
Biblia kijtoua
Biblia amo kiyekijtoua ken omotaya Jesús, ik non, amikaj kimati ken omotaya. Nin kiteititia amo ipati ken omotaya. Biblia techiluia san seki tlamantli tlen techpaleuia ma tikmatikan ken omotaya.
Ken omotaya: Inantsin Jesús okatka judía, ik non, xamo omotaya ken judíos (Hebreos 7:14). Ijkuak okitayaj amo okimatiayaj kanin ialtepe. Se tonal okiski Galilea uan oyajki Jerusalén uan amikaj okixmatki (Juan 7:10, 11). Xamo noijki omotaya ken sekimej imachtijkauan. Ma tikilnamikikan, ijkuak okinekiayaj kitsakuaskej, Judas Iscariote okinmititi akin Jesús (Mateo 26:47-49).
Itsonkal: Jesús amo okipiaya ueyak itsonkal, porque Biblia kijtoua “tepinati tla se tlakatl nemis ika itsonkal weyak” (1 Corintios 11:14).
Ibarba: Jesús okipiaya ibarba. Ye okitlakamatiaya intlanauatil judíos uan tlanauatil amo okinkauiliaya tlakamej ma kiximakaj inbarba (Levítico 19:27; Gálatas 4:4). Noijki, se profecía kijtoua tlen kichiuiliskiaj ibarba ijkuak kitlajyouiltiskiaj (Isaías 50:6).
Itlalnakayo: Jesús okatka chikauak porque sapanoua uejka onejnemiaya ijkuak otetlapouiaya (Mateo 9:35). Jesús ome uelta okinkixti akinmej otlanemakayaj itech teokali, okintlamochili mesas uan ika se mekatl okinkixti ichkamej uan vacas tlen ompa okatkaj (Lucas 19:45, 46; Juan 2:14, 15). Se amochtli kijtoua: “Nochi Evangelios kijtouaj [Jesús okatka] chikauak” (Cyclopedia de M’Clintock y Strong, volumen IV, página 884).
Ixko: Jesús otetlasojtlaya, oteiknomatiayaj uan ijkon omotayaj itech ixko (Mateo 11:28, 29). Miakej okitemouayaj para ma kinyolseui uan ma kinpaleui (Lucas 5:12, 13; 7:37, 38). Konemej noijki oyolpakiayaj ijkuak okatkaj iuan Jesús (Mateo 19:13-15; Marcos 9:35-37).
Seki tlamantli tlen amo melauak
Sekimej kijtouaj: Sekimej mokuayejyekouaj Jesús okatka tliliuik porque amochtli Apocalipsis kijtoua itsonkal okatka ken tsojmitl uan ikxiuan “opetlaniaya ken bronce” (Revelación 1:14, 15, Biblia del Peregrino).
Tlen melauak: Itech Apocalipsis kijtoua ken okinmonextili (Apocalipsis 1:1). Itsonkal uan ikxiuan Jesús itlaj kineskayotiaj uan tlen ompa kijtoua techpaleuia ma tikmatikan tlen okichi Jesús ijkuak okiyolitijkej. Pero amo ijkon omotaya ijkuak ouala tlaltikpak. Itech Apocalipsis 1:14 kijtoua: “Itsonkal istaktik kemi ichkatl noso kemi nieve”, nikan kiyekijtoua itsonkal istak kiteititia Jesús ixtlamatki (Apocalipsis 3:14). Nin amo kijtosneki itsonkal Jesús okatka ken ichkatsojmitl nion ken nieve.
Juan okitak “ikxiwah [Jesús] otsotlaniah [opetlaniayaj] kemi tépostli de bronse ijkuak xoxotlatok ijtik orno” (Apocalipsis 1:15). Uan noijki “ixko chikawak otsotlania [opetlaniaya] kemi n tonati” (Apocalipsis 1:16). Tlen ye okijto san okineskayoti ken omotaya Jesús porque amikaj ijkon mota ixko, itsonkal, noso ikxiuan. Ninmej textos kijtouaj ken mota Jesús ijkuak yokiyolitijkej porque “kajki ijtik tlawilnextílistli” (1 Timoteo 6:16).
Sekimej kijtouaj: Jesús amo chikauak okatka.
Tlen melauak: Jesús okatka chikauak uan amo omomojtiaya. Ijkon okiteititi ijkuak miakej okinekiayaj kikitskiskej (Juan 18:4-8). Jesús okatka chikauak ijkon tikijtouaj porque ijkuak otekipanouayaj ken kuajxinki omonekiaya yetos chikauak (Marcos 6:3).
Pero, ¿tleka okipaleuijkej Jesús ijkuak okimama kuauitl? ¿Tleka ye achto oixpoliuik uan amo akinmej iuan okatkaj? (Lucas 23:26; Juan 19:31-33). Achto kimiktiskiaj sapanoua osotlajtoka, omotekipachojtoka non youak, ik non, amo okochki (Lucas 22:42-44). Judíos okitlajyouiltijkej non youak uan ijkuak otlaneski romanos okiuitekej (Mateo 26:67, 68; Juan 19:1-3). Ik non, san niman oixpoliuik.
Sekimej kijtouaj: Jesús amo oyolpakiayaj uan nochipa omoyolkokouaya.
Tlen melauak: Biblia kijtoua “toTajtsin Dios akin yolpaki” uan Jesús noijki oyolpakiaya (1 Timoteo 1:11, TNM; Juan 14:9). Jesús otlamachti ken uelis yolpakiskej (Mateo 5:3-9; Lucas 11:28). Omotaya itech ixko, oyolpakiaya ijkuak itlaj okichiuaya.
Xamo noijki mitspaktis
TLEN OKACHI IPATI TLAMACHTIA BIBLIA
¿Uelis tikneltokaskej Biblia kijtoa tlen melauak?
Tla Biblia okijkuilo toTajtsin Dios, Biblia amo ken okseki amochmej.
ITECH TEJUAN
Xiktlajtlani ikaj ma mitstlajpaloti
Xikita tlen technankilia Biblia noso xikita ken titlamachtiaj Biblia.