Itech nin tlamachtil tikinnankiliskej ninmej tlajtlanilmej.

•  ¿Tleka ikaj kipejpena kipias inovio noso inovia?

•  ¿Yiuelis nikpias nonovio noso nonovia?

 Miakej kitemouaj innovio noso innovia san para moyolpaktiskej. Pero itech nin tlamachtil, ijkuak tikijtoskej ikaj kipia inovio noso inovia kijtosneki se tlakatl uan se siuatl peua moixmatij para kitaskej kox uelis monamiktiskej. Ikinon, ijkuak peuaj moixmatij, amo san para moyolpaktis.

 Ijkuak kuali yomoixmatkej kinpaleuis makimatikan kox uelis monamiktiskej noso amo. Ikinon ijkuak peuas iuan ikaj timoixmatis moneki non xikilnamikto.

 Nin kijtosneki: Uelis tikpias monovio noso monovia, tla timokuayejyekoua yiuelis timonamiktis.

 Tla ikaj iuan peua timoixmati uelis nanmonamiktiskej, ikinon moneki ximotlajtlani kox uelis tikpaleuis akin iuan timonamiktis, ximotlajtlani:

•   Ken timouika iuan mofamilia. ¿Tlen tikinmiluia mopapanuan uan mokniuan ijkuak timotekipachojtok? Ijkon ken tikintlapouia noijki ijkon tiktlapouis iuan monamik.

   Principio bíblico: “Amo san xikilnamiktokan tlen onamechtoktijkej, amo xikualanikan, amo xikualankamikikan, amo xitsatsajtsikan uan amo xiteyolkokokan. Noijki xikkauakan nochi tlen amo kuali” (Efesios 4:31).

   Ximotlajtlani: “¿Mokuayejyekouaj nopapanuan uan nokniuan nikintlakaita? Ijkuak amo nechpaktia tlen nechiluiaj, ¿kuali inuan nimotlapouia noso peua nikualani?”.

•   Xikchiua tlen oksekimej kinekij. Ijkuak yotimonamikti moneki tiktlajtlanis monamik tlen kineki kichiuas uan xamo moneki tikchiuas tlen ye kineki.

   Principio bíblico: “Nochipa xikchiuakan tlen kinpaleuis oksekimej uan amo san tlen namejuan namechpaleuis” (1 Corintios 10:24).

   Ximotlajtlani: “¿Nikneki oksekimej makichiuakan tlen ne nikijtoua? ¿Mokuayejyekouaj oksekimej nikinmajsikamati? ¿Ken yonikteititi nechtekipachoua tlen kinpanoua oksekimej uan amo san nechtekipachoua tlen nechpanoua?”.

•   Xiyeto yolyamanki. Se tlakatl noso siuatl tlen yomonamikti uan yolkuali kijtoua ijkuak omotlapololti uan kiluia inamik makitlapojpolui.

   Principio bíblico: “Porque tinochtin miak uelta timotlapololtiaj” (Santiago 3:2, nota).

   Ximotlajtlani: “¿San niman nikijtoua ijkuak nimotlapololtia noso nikijtoua amo notlajtlakol? Ijkuak ikaj nechilui itlaj okachi kuali manikchiua, ¿san niman nikualani?”.

•   Ken tikita motomin. Tla tikmati ken tikmaluis motomin amo nanmokualaniskej, porque miakej tlen yomonamiktijkej ika non mokualaniaj.

   Principio bíblico: “Tla ikaj kineki kichiuas se torre, ¿amo achto kitas kox kajxilis itomin tlen ika kichiuas?” (Lucas 14:28).

   Ximotlajtlani: “¿Nikmaluia notomin noso nochipa nitetlauikilijtok? ¿Yonikteititi nikkoua san tlen moneki?”.

•   Kuali ximouika iuan Jehová. Tla tiiTlaixpantijka Jehová moneki nochipa timajxilis timomachtis Biblia uan nochipa timonechikos.

   Principio bíblico: “Pakij akinmej kimatij moneki kixmatiskej toTajtsin Dios” (Mateo 5:3).

   Ximotlajtlani: “¿Nimochijchikaua okachi nitlaneltokas? ¿Nikpatioita okachi nimouikas iuan Jehová noso nikpatioita nikchiuas okseki tlamantli?”.

 Nin kijtosneki: Akin iuan timonamiktis kinekis yetos iuan ikaj yolyamanki uan yolkuali. Tla timochijchikaua tiyetos tiyolkuali, xamo tikajsis ikaj noijki ijkon.