Tejuan timoyekanaj ika principios bíblicos ijkuak tikijtouaj tlen timokuayejyekouaj ijkuak ikaj kineki okachi momachtis. Sejse iTlaixpantijka Jehová kimachtia itlalnamikilis ika tlen kijtoua Biblia uan ijkon kipejpenaj tlen kichiuaskej. Iknon axkan tikitaskej seki principios bíblicos tlen ika timoyekanaj. a

•  ¿Momachtiskej telpochmej uan ichpochmej?

•  Kuali matikitakan kox moneki momachtiskej

•  Xamo kichiuaskej tlen amo kuali uan ayakmo tlaneltokaskej tla okachi momachtiskej

•  ¿Kinpiaj escuelas iTlaixpantijkauan Jehová kanin momachtiaj konemej?

 Ijkuak timomachtiaj, techpaleuia matiyetokan tiixtlamatkej uan kuali matimokuayejyekokan. Biblia amo kijtoua tlajtlakoli non tlamantli (Proverbios 2:10, 11; 3:21, 22). Noijki Jesús okinmilui imachtijkauan makinmachtikan oksekimej tlen ye okinnauati (Mateo 28:19, 20, TNM). Ikinon tikinmiluiaj akinmej pouij itech toreligión mamomachtikan ken uelis kitlajtoltiskej se amatl, mamomachtikan ken tlajkuiloskej uan makimatikan ken motlapouiskej inmiuan oksekimej. b Noijki makimatikan tlen kichiuaj okseki religiones uan tlen kichiuaj okseki altepemej (1 Corintios 9:20-22; 1 Timoteo 4:13).

 Tekiuajkej noijki kijtouaj moneki matimomachtikan primaria uan secundaria. Tejuan tikintlakamatij ninmej tlanauatilmej porque Biblia kijtoua: “Nochteh n tlakah moneki makintlakitakah n tekiwajkeh” (Romanos 13:1). Noijki tikinmiluiaj telpochmej uan ichpochmej mamochijchikauakan mamomachtikan. c Ijkon ken kijtoua Biblia: “Nochi tlan nonkichiwah, xikyekchiwakah, kemi nonkichiwilijtoskiah n Toteko Cristo Jesús iwa amo san para n tlakah” (Colosenses 3:​23).

 Akinmej momachtiaj kinpaleuia makimakakan infamilia tlen moneki. Biblia kijtoua: “Tla aka amo kimpalewia non ken kimita, iwa okachi tla amo kimpalewia non de icha, non tlakatl inewia kitenextia mach milák tlaneltoka iwa okachi amokuali kichijtok ke non amo kineltokah n Toteko Dios” (1 Timoteo 5:8). Akinmej momachtiaj kinpaleuis makimakakan infamilia tlen ika mopanoltiskej. Ijkon ken kijtoua se amochtli tlen itoka The World Book Encyclopedia. Ompa kijtoua “moneki timomachtiskej porque techpaleuis matikchiuakan san tlen technauatiskej”. Akin momachtia uan kimati ken tekipanos san niman kajsi tekitl para kimaluis ifamilia pero akin amo momachtia xamo oui kajsis tekitl (Proverbios 22:29).

 Noijki tetajmej kinmaluiaj inkoneuan ijkuak kinmixtlamachtiaj tlen kichiuaskej ijkuak moskaltiskej uan noijki kinpaleuis tla kintitlanij escuela (2 Corintios 12:14). Tikinmiluiaj tetajmej makinkalakikan escuela inkoneuan maski ualeua moneki kitlaxtlauaskej. Ualeua noijki oui kintitlaniskej escuela noso oksekimej kijtouaj amo moneki momachtiskej. d Noijki tikinmiluiaj tetajmej ken kinpaleuiskej inkoneuan kuali mamoixtlamachtikan. e

 Kuali matikitakan kanin uelis momachtiskej. Biblia kijtoua: “Akin amo ixtlamatki kineltoka nochi tlen kiluiaj pero akin ixtlamatki mokuayejyekoua itech sejse tlamantli tlen kichiua” (Proverbios 14:15). Timoyekanaj ika nin principio ijkuak tikitaj kox okachi momachtiskej tokoneuan ijkuak kitlamiskej secundaria uan kanin momachtiskej. Noijki tikitaj kox uelis tiktlaxtlauaskej kanin momachtiskej uan kox kinpaleuis. Ualeua itech universidades amo moneki miak xiuitl momachtiskej uan kuali kinmachtiaj.

 Okachi miak ipati mamomachtikan Biblia. Miak ipati tokoneuan mayakan escuela pero okachi ipati mamomachtikan Biblia porque non kinpaleuis makixmatikan toTajtsin Dios uan mamomakixtikan (Juan 17:3). Noijki Biblia techpaleuia matikchiuakan tlen kuali uan nochi ika melajkayotl (Proverbios 2:9). Apóstol Pablo noijki sapanoua omomachti, pero ye okijto: “Yonikixma Noteko Cristo Jesús Akin kipanawia nochi tlan onikmoliaya ipati” (Filipenses 3:8; Hechos 22:3). Noijki axkan miakej telpochmej uan ichpochmej tlen iTlaixpantijkauan Jehová omomachtijkej itech universidades pero yejuan okachi kipatioitaj tlen tlamachtia Biblia. f

 Biblia kijtoua: “Akin ixtlamatki kita ouijkayotl uan motlatia” (Proverbios 22:3). TiiTlaixpantijkauan Jehová tikmatij itech seki universidades kichiuaj tlen amo kuali uan uelis kichiuas tokoneuan ayakmo matlaneltokakan. Ikinon miakej iTlaixpantijkauan Jehová amo kinekij inkoneuan mayakan universidades porque ompa kinmijtlakoskej. Matikitakan seki tlamantli tlen ualeua kinmiluiaj:

•   Kinmiluiaj tomin kinpaleuis mayolpakikan uan kuali mayetokan

   Seki universidades san kinmiluiaj telpochmej uan ichpochmej mamomachtikan uan ijkon kajsiskej se kuali tekitl uan kuali kintlaxtlauiskej. Ikinon miakej okachi momachtiaj universidad. Miakej kineltokaj kuali yetoskej tla kipiaskej tomin uan ijkon yolpakiskej. Pero Biblia kijtoua non amitlaj ipati (Eclesiastés 5:10). Biblia noijki kijtoua: “Keman se kitlalia iyolo itech tomi, pewa kichiwa nochi tlan amokuali” uan ayakmo kineltoka toTajtsin Dios (1 Timoteo 6:10). Tejuan timomaluiaj amo matechkajkayauakan ijkuak sekimej kijtouaj tiyolpakiskej tla tikpiaskej miak tomin (Mateo 13:22).

•   Kinmiluiaj okachi kinmixmatiskej tla momachtiskej

   Ma tikitakan tlen okipanok Nika Gilauri. Ye okatka achto ministro itech altepetl Georgia uan okijto tlen mokuayejyekouaj itech ialtepe: “Ompa Georgia kinekij nochtin mamomachtikan universidad porque kijtouaj ijkon miakej kinmixmatiskej”. Noijki okijto: “Yiuejkika san okinpinauiayaj infamilias telpochmej uan ichpochmej tla amo oayayaj universidad”. g Pero Biblia kijtoua amo matiktemokan tlen onka itech nin tlaltikpak. Ijkuak Jesús okatka nikan tlaltikpak, okinmilui teopixkej: “¿Kenijki weletis nontlaneltokaskeh, tla san nonkitemojtinemih manomechweyilikah [...]?” (Juan 5:44). Akinmej yauij universidades uelis moueyinekiskej uan non amo kipaktia toTajtsin Dios (Proverbios 6:16, 17; 1 Pedro 5:5).

•   Kijtouaj toneuian moneki tikitaskej tlen kuali uan tlen amo kuali

   Tejuan tiiTlaixpantijkauan Jehová tiktlakamatij toTajtsin Dios porque san ye kijtoua tlen kuali uan tlen amo kuali (Isaías 5:​20). Pero se revista okijtouaya: “Akinmej momachtiaj kinchiualtiaj makichiuakan tlen amo kuali maski kimatij tlen amo moneki kichiuaskej”. h Non revista kiteititia tlen kijtoua Biblia, ompa kijtoua: “Tla nonnemiskeh iwa akimeh kichiwah tlan amokuali, kipatlaskeh nomotlayejyekolis iwa nomechijtlakoskeh” (1 Corintios 15:33). Itech universidades kinmiluiaj makichiuakan miak tlamantli tlen toTajtsin Dios kitlajyaltia. Porque sekimej tlauanaj, kintekitiltiaj drogas uan auilnemij (1 Corintios 6:9, 10; 2 Corintios 7:1).

•   Kijtouaj okachi kuali yetoskej tla okachi momachtiskej

   Amo nochtin momachtiaj para kipiaskej miak tomin, okachi makinmixmatikan noso okachi yolpakiskej. Miakej kinekij okachi kuali yetoskej uan kinpaleuiskej oksekimej. Kuali ijkon kinekij kichiuaskej pero tiiTlaixpantijkauan Jehová okse tlamantli tikneltokaj. Tikneltokaj san iTekiuajkayo toTajtsin Dios kichiuas kuali matiyetokan ijkon ken Jesús okineltokaya (Mateo 6:9, 10). Pero amo san tikchixtokej matlayektlali iTekiuajkayo toTajtsin Dios. Tejuan titetlapouiaj ipan nochi tlaltikpak ijkon ken okichi Jesús uan sapanoua miakej tikinpaleuiaj sejse xiuitl (Mateo 24:14, TNM). i