Tlen kijtouaj: ITlaixpantijkauan Jehová amo kichiuaj Navidad porque amo kineltokaj Jesús.

 Tlen melauak: Titlaneltokaj itech Cristo uan tikmatij san ika Cristo uelis timomakixtiskej (Hechos 4:12).

 Tlen kijtouaj: Kinxelouaj familias uan kinmiluiaj amo makichiuakan Navidad.

 Tlen melauak: Familia miak ipati uan tikinpaleuiaj ika Biblia.

 Tlen kijtouaj: Amo moyolpaktiaj itech “Navidad”, kanin tlatetliokoliaj, onka yolseuilistli uan nochtin kuali katej.

 Tlen melauak: Timochijchikauaj nochipa tiktetliokoliskej itlaj uan kuali tiyetoskej inmiuan oksekimej (Proverbios 11:25; Romanos 12:18). Se neskayotl, amo tikintlajtlaniliaj tomin ijkuak monechikouaj touan, nion amo tiknekij matechtlaxtlauikan ijkuak titetlapouiaj, porque Jesús otlanauati: “San ijki ononkiselijkeh, san ijki xiktemakakah” (Mateo 10:8). Noijki titetlapouiaj san iTekiuajkayo toTajtsin Dios uelis techmakas melauak yolseuilistli (Mateo 10:7).

•   Jesús otlanauati matikilnamikikan tonal ijkuak omikik, amo ijkuak oneski (Lucas 22:19, 20).

•   Nion idiscípulos Jesús nion akinmej achto opejkej kichiuaj ken ye, amo oiluichiuayaj itech Navidad. Diccionario del cristianismo, kijtoua nin iluitl “opejki Roma kanaj itech xiuitl 330”, kanaj 200 xiuitl satepan ijkuak omikik saiktlami idiscípulo Jesús.

•   Amo kanaj moijtoua kox Jesús oneski itech 25 de diciembre; nion itech Biblia amo kijtoua tlen tonal oneski.

•   Tikajsikamatij toTajtsin Dios amo kipaktia matikchiuakan Navidad, porque nin iluitl opejki itech costumbres uan itech religión tlen amo melauak (2 Corintios 6:17).

 Maski kimatij Navidad amo kisa itech Biblia uan kisa itech religión tlen amo melauak, miakej kichiuaj Navidad porque kijtouaj amo se ueyi tlajtlakoli, uan moneki tikchiuaskej ken nochtin.

 Biblia techiluia kuali matimokuayejyekokan para kuali tikpejpenaskej tlen tikchiuaskej (Romanos 12:1, 2). Noijki techmachtia matikpatioitakan tlen melauak (Juan 4:23, 24). Nin amo kijtosneki amo techtekipachoua tlen oksekimej uelis kijtoskej, pero amo tikixtopeuaskej principios bíblicos san para tiknekiskej kuali matechitakan oksekimej.

 Tejuan tikpejpenaj amo tikchiuaskej Navidad, pero oksekimej uelis kipejpenaskej tlen kichiuaskej. Ikinon amikaj tikiluiaj amo mailuichiua.