9 de junio 2023, okiski Traducción del Nuevo Mundo de las Escrituras Griegas Cristianas ika tlajtoli náhuatl del centro uan purépecha. Ninmej Biblias okintemakakej tonal viernes itech ueyi nechikol regional tlen omotokayoti “Ximochiakan”. Nikan uelis tiktlajtoltis tlen opanok non tonal.

Tokni Sean Scribner, akin tlayekana itech kali Betel ompa Centroamérica, okiteititi traducción de las Escrituras Griegas Cristianas ika náhuatl del centro. Nin ueyi nechikol omochi itech altepetl Puebla (México). Ompa omonechikojkej 1.474. Itech altepetl México kanaj 500,000 tlajtouaj náhuatl del centro. Okachi itech chikome altepemej tlen katej ik centro uan sur ompa México.

Akinmej tlajtolkopaj okitemojkej tlajtoli tlen amo oui kajsikamatiskej akinmej tlajtouaj náhuatl del centro. Noijki Traducción del Nuevo Mundo de las Escrituras Griegas Cristianas kipia notas ika tlatlamantli tlajtolmej para nochtin akinmej tlajtouaj náhuatl del centro makajsikamatikan. Pero okachi miak ipati nin Biblia porque okitlalijkej itoka toTajtsin Dios, Jehová, kanin moneki mayeto.

Tokni Curtis Mills tlen tlayekana Betel tlen kajki Centroamérica okiteititi traducción de las Escrituras Griegas Cristianas ika tlajtoli purépecha. Nin ueyi nechikol omochi itech altepetl Michoacán tlen poui México. Ompa omonechikojkej 662 uan xamo kanaj 175,000 tlen tlajtouaj purépecha chantij altepetl México uan kanaj 60,000 chantij Estados Unidos.

Maski yokitlajtolkopkej Escrituras Griegas Cristianas amo okachi moajsikamati porque kipia tlajtolmej ijkon ken yiuejkika otlajtouayaj. Noijki ualeua amo tlamachtia tlen melauak. Itech se Biblia tlen okitlajtolkopkej kijtoua itech Juan 10:30: “Ne uan toTajtsin Dios tisetitokej”. Pero Traducción del Nuevo Mundo de las Escrituras Griegas Cristianas ika tlajtoli purépecha kijtoua: “Ne uan noTajtsin san sekan tikatej”. Ijkon kiteititia Jehová uan Jesús amo san se pero yejuan mopaleuiaj.

Tiktlatlaujtiaj Jehová ninmej Biblias makinpaleui oksekimej makixmatikan uan makiueyichiuakan (Isaías 2:3).