1, 2. UJehova uzwa njani nxa sithembekile?

KWELINYE ilanga umfana othile uthi evela esikolo adobhe isikhwama esilemali. Uzasigcina yini? Kulokuthi enze njalo, uyasibisela kumnikazi. Unina uyazigqaja ngomntanakhe lapho esizwa okwenzakeleyo.

² Abazali abanengi bayajabula nxa abantwababo bethembekile. UBaba wethu osezulwini uJehova uyathokoza nxa sithembekile ngoba ‘unguNkulunkulu weqiniso.’ (IHubo 31:5) Sifuna ukumthokozisa ‘ngokuhlala siqotho ngezindlela zonke.’ (KumaHebheru 13:18) Ake sixoxe ngokuthi kungaphi lapho esingatshengisa khona ukuthi sithembekile. Sizaxoxa langokuthi kusinceda ngani ukuthembeka.

3-5. (a) Singazikhohlisa njani? (b) Kuyini okungasinceda ukuthi singazikhohlisi?

³ Okungasinceda ukuthi sithembeke kwabanye yikuthi singazikhohlisi. Lokhu akulula. Ngesikhathi samaKhristu okuqala, abazalwane  baseLawodikheya babezikhohlisa becabanga ukuthi bayamthokozisa uNkulunkulu kodwa iqiniso yikuthi babengamthokozisi. (ISambulo 3:17) Lathi singazikhohlisa ngokucabanga ukuthi silobuntu obuhle thina singelabo.

⁴ Umfundi uJakhobe wathi: “Uma umuntu ecabanga ukuthi uyakholwa kodwa engabambi ulimi lwakhe okuqinileyo, uyazikhohlisa njalo lokholo lwakhe luyize.” (UJakhobe 1:26) Akumelanga sicabange ukuthi ukwenza izinto ezinhle kwenza uNkulunkulu angabi lendaba lokuthi sikhuluma amazwi ahlabayo, sithanda ukuhleka abanye lokuthi sikhuluma amanga. Kuyini okungasinceda ukuthi singazikhohlisi?

⁵ Isibuko sisinceda sibone lokho esiyikho ngaphandle. Ikanti iBhayibhili lisinceda sizibone lokho esiyikho ngaphakathi. Liyasisiza sazi ubuntu bethu lokuthi kuyini okumele sikulungise endleleni esicabanga ngayo, esenza ngayo lesikhuluma ngayo. (Bala uJakhobe 1:23-25.) Kodwa asisoze silungise lutho nxa singazitshela ukuthi kasiphambanisi. Yikho kumele silisebenzise iBhayibhili ukuze sizihlole. (IZililo 3:40; UHagayi 1:5) Umthandazo lawo uyasisiza ukuthi singazikhohlisi. Kumele sithandaze kuJehova simcela ukuthi asisize sibone amaphutha ethu njalo siwalungise. (IHubo 139:23, 24) Kumele sihlale sikhumbula ukuthi “uJehova uyamenyanya umuntu oxhwalileyo kodwa oqotho umbeka ekhwapheni lakhe.”​—IZaga 3:32.

6. Kungani kumele indoda lomkayo bathembeke?

⁶ Kuqakathekile ukuthi sithembeke emulini. Indoda lomfazi bayakhululeka futhi bathembane nxa bengafihlelani lutho. Zinengi izinto ezingenza umuntu angathembeki kulowo atshade laye. Ngokwesibonelo, angadlala ngemizwa yabanye kumbe abukele iphonografi loba athandane lomunye umuntu. Umhubi wathi: “Kangidlelani labantu abakhohlisayo njalo kangiwelelani labazenzisi.” (IHubo 26:4) Ungaqali ukuba lemicabango yokungathembeki kumkakho ngoba ingenza libe lenhlupho.

7, 8. Ungalisebenzisa njani iBhayibhili ukuthi ufundise abantwana ukuqakatheka kokuthembeka?

 ⁷ Abazali kumele basebenzise iBhayibhili ukuze bafundise abantwababo ukuthi ukuthembeka kuqakathekile. IBhayibhili lilezibonelo zabantu ababengathembekanga. Lisitshela ngo-Akhani owaba lisela; uGehazi owaqamba amanga ukuze athole imali; uJudasi owantshontsha imali futhi wathengisa uJesu ngenhlamvu zesiliva ezingu-30.​—UJoshua 6:17-19; 7:11-25; 2 AmaKhosi 5:14-16, 20-27; UMathewu 26:14, 15; UJohane 12:6.

⁸ IBhayibhili liphinde libe lezibonelo ezinengi zabantu ababethembekile. Lisitshela ngoJakhobe owatshela abantwabakhe ukuthi babuyisele imali ababeyitholile; uJefitha lendodakazi yakhe abagcina isithembiso sabo kuNkulunkulu; uJesu owathembeka lalapho esebunzimeni. (UGenesisi 43:12; Abahluleli 11:30-40; uJohane 18:3-11) Izibonelo lezi zinganceda abantwana bazwisise ukuthi ukuthembeka kuqakatheke kangakanani.

9. Isibonelo sabazali singabasiza njani abantwana?

⁹ Abazali akumelanga bakhohlwe isimiso seBhayibhili esithi: “Wena ofundisa abanye, kambe lawe kawuzifundisi na? Wena otshumayela ngokungebi, uyeba na?” (KwabaseRoma 2:21) Abantwana bayananzelela nxa abazali besenza okutshiyene lalokho ababafundisa khona. Abazali kumele bafundise abantwababo ngezenzo ngoba abantwana benza lokho ababona abazali bekwenza. Nxa abantwana bengezwa abazali babo beqamba amanga lasezintweni ezincane,  labo bazakwenza njalo. (Bala uLukha 16:10.) Nxa bangababona bethembekile, labo bazakuba ngabazali abathembekileyo.​—IZaga 22:6; U-Efesu 6:4.

10. Singatshengisa njani ukuthembeka nxa sixoxa labafowethu labodadewethu?

¹⁰ Kuqakathekile ukuthi sithembeke ebandleni. Kulula ukuthi ingxoxo intshintshe ibe yikunyeya kumbe ukunyundela. Ukuhamba sikhuluma into esingakwaziyo ukuthi ingamanga kumbe iliqiniso kungenza sifafaze amanga indawo yonke. Yikho kuhle ukuthi ‘sigcine ulimi lwethu.’ (IZaga 10:19) Ukuthembeka akutsho ukuthi sokumele sikhulume yonke into esiyicabangayo, esiyaziyo kumbe esayizwayo. Lanxa into esifuna ukuyikhuluma ingabe iliqiniso, kungenzakala ukuthi akusiwo msebenzi wethu ukukhuluma ngayo kumbe akulasidingo sokuthi senze njalo. (1 KwabaseThesalonika 4:11) Abanye abantu bakhuluma amazwi ahlabayo besebevala ngokuthi, ‘Mina ngikhuluma iqiniso njengoba linjalo.’ Kodwa thina sifuna amazwi ethu ahlale elomusa.​—Bala uKholose 4:6.

11, 12. (a) Kuyini umuntu owenze isono esikhulu okungamelanga akwenze? (b) Kuyini okumele ukwenze nxa umngane wakho engenza isono, futhi ngani? (c) Singatshengisa njani ukuthi sithembekile enhlanganisweni kaJehova?

¹¹ UJehova unike abadala umsebenzi wokunakekela ibandla. Kodwa ukuze benelise ukwenza njalo kumele sithembeke kubo. Kungani kuqakathekile? Ake sithi uyagula ubususiya kudokotela ukuze uthole uncedo, uzamfihlela yini indlela ozwa  ngayo? Nxa ungenza njalo, angakunceda yini udokotela? Kuyafanana lasebandleni, nxa singenza isono esikhulu kumele sitshele abadala iqiniso, singabafihleli lutho. (IHubo 12:2; ImiSebenzi 5:1-11) Kodwa uzakwenzani nxa ungabakwazi ukuthi umngane wakho wenze isono esikhulu? (ULevi 5:1) Uzahamba uyetshela abadala ukuze bamsize alungise ubuhlobo bakhe loJehova yini kumbe uzacabanga ukuthi kumele ufihle ngoba ngumngane wakho?​—KumaHebheru 13:17; UJakhobe 5:14, 15.

¹² Kumele sithembeke lasenhlanganisweni kaJehova. Ngokwesibonelo akumelanga siqambe amanga nxa sigcwalisa imibiko yenkonzo yasensimini, amafomu okuphayona kumbe aweminye imisebenzi yenkonzo.​—Bala iZaga 6:16-19.

13. Singatshengisa njani ukuthi sithembekile nxa sisenza ibhizimusi lesikhonza labo?

¹³ Akumelanga sihlanganise ezebhizimusi lokukhonza. Ngokwesibonelo, akumelanga senze kumbe sixoxe ngezebhizimusi nxa siseWolu yoMbuso kumbe sisenkonzweni. Okunye okungamelanga sikwenze yikuqila esikhonza labo nxa sisenza ibhizimusi. Nxa ungaqhatsha oFakazi, kumele ubaholise ngesikhathi futhi ubaholise imali elayivumelanayo. (1 KuThimothi 5:18; UJakhobe 5:1-4) Nxa uqhatshwe nguFakazi ungalindeli ukuthi akuphathe ngcono kulezinye izisebenzi. (Kwabase-Efesu 6:5-8) Kumele ube leqiniso lokuthi usebenza amahora okumele uwasebenze.​—2 KwabaseThesalonika 3:10.

14. Kuyini okumele amaKhristu akwenze nxa esenza ibhizimusi?

 ¹⁴ Kuyini okumele ukwenze nxa wena lomzalwane othile lisenza ibhizimusi ndawonye kumbe libolekana imali? Esimeni esinjalo kumele lilandele isimiso seBhayibhili esithi: Bhalani konke elikuvumeleneyo. Ngesikhathi umphrofethi uJeremiya ethenga insimu, wabhala izivumelwano ezimbili zokuthenga futhi esinye sasayinwa ngofakazi. Ngemva kwalokho zombili izivumelwano zathathwa zagcinwa ukuze kuhlale kulobufakazi. (UJeremiya 32:9-12; khangela loGenesisi 23:16-20.) Abanye bangacabanga ukuthi ukubhala phansi kutshengisa ukuthi ababathembi abazalwane. Kodwa iqiniso yikuthi ukubhala phansi kwenza kube lokuzwanana, lingadanisani njalo lilandele lokho elikuvumeleneyo. Nxa lisenza ibhizimusi kumele lihlale likhumbula ukuthi ukuthula kwebandla kuqakathekile kulemali.​—1 KwabaseKhorinte 6:1-8; khangela Amabala Asekucineni 30.

15. UJehova uzwa njani nxa ebona abantu abangathembekanga kwezamabhizimusi?

¹⁵ Kumele sithembeke emuntwini wonke, okugoqela lakulabo abangayisibo Fakazi. UJehova ukhangelele ukuthi sikwenze lokhu. ILizwi lakhe lithi: “UJehova uyazenyanya izilinganiso zokudlelezela, kodwa uthokoza ngezilinganiso eziqondileyo.” (IZaga 11:1; 20:10, 23) Endulo izilinganiso zazisetshenziswa kwezokuthengiselana. Kodwa abanye babeqila ababebathengisela ngokubanika okuncane kumbe  ukubabhadalisa imali enengi kakhulu. Lanamuhla abantu abanengi abathembekanga kwezamabhizimusi. UJehova lokhu ekwenyanya ukungathembeki.

16, 17. Kunini lapho okumele sixwaye khona ukungathembeki?

¹⁶ Sonke siyake sibe sezimeni ezingenza singathembeki. Ngokwesibonelo nxa sigcwalisa amafomu okudinga umsebenzi kumbe sibhala imihloliso esikolo. Abantu abanengi bacabanga ukuthi akukubi ukuqamba amanga. Lokhu akumelanga kusimangalise ngoba iBhayibhili lakhuluma kudala ukuthi ezinsukwini zokucina kuzakuba labantu ‘abazithandayo, abathanda imali . . . labangakuthandiyo okuhle.’​—2 KuThimothi 3:1-5.

¹⁷ Kwezinye izikhathi kungakhanya angani abantu abangathembekanga yibo abaphumelelayo. (IHubo 73:1-8) UmKhristu angalahlekelwa ngumsebenzi lemali kumbe aphathwe kubi emsebenzini ngenxa yokuthi uthembekile. Lanxa kunjalo kumele sihlale sithembekile. Ngenxa yani?

18. Kungani ukuthembeka kuqakathekile?

¹⁸ Abantu abanengi lamuhla abathembekanga. Kodwa thina kumele sihlale sithembekile. (UMikha 7:2) Abanye abantu bangacabanga ukuthi siyizithutha futhi baze basihleke ngenxa yokuthi sithembekile. Kodwa akumelanga sikhohlwe ukuthi abanye bayakubona ukuthembeka kwethu futhi kwenza basithembe. Emhlabeni jikelele oFakazi bakaJehova baziwa ngokuthembeka njalo lokho yikho okwenza abaqhatshi abanengi bakhethe ukusetshenzelwa  yibo. Nxa ezinye izisebenzi zixotshwa ngenxa yokungathembeki, oFakazi bajayele ukusala.

19. UJehova uzwa njani nxa sithembekile?

¹⁹ Ukuthembeka ezintweni zonke kuzakwenza sibe lomzwangedwa omuhle futhi sihlaliseke. Lathi singatsho amazwi la athi: “Sifisa ukuhlala ngobuqotho ngezindlela zonke.” (KumaHebheru 13:18) Isizatho esiqakatheke kakhulu sokuthembeka yikuthi kuyamthokozisa uJehova.​—Bala iHubo 15:1, 2; iZaga 22:1.