Zonke izidalwa zomoya ezadalwa nguJehova zazilungile. Enye ingilosi yasihlamuka. InguSathane uDeveli. USathane wayefuna abantu bakhonze yena kulokuthi bakhonze uJehova. Nanku okwenzakalayo:

Ensimini yase-Edeni kwakulezihlahla ezinengi ezazilezithelo ezimnandi. UJehova watshela u-Adamu lonkosikazi wakhe u-Eva ukuthi babengazidlela izihlahla lezi bekhululekile. Kodwa kulesihlahla esisodwa uNkulunkulu ayethe bangasidli. Wathi nxa babezasidla babezakufa ngempela.​—Genesisi 2:9, 16, 17.

Ngelinye ilanga u-Eva eyedwa inyoka yakhuluma laye. Kwakungayisiyo nyoka eyakhulumayo, kwakunguSathane uDeveli owenza kwabonakala angani inyoka yayikhuluma. USathane watshela u-Eva ukuthi engadla isithelo ababesalisiwe, wayezahlakanipha njengoNkulunkulu. Wathi u-Eva wayengeke afe. Konke lokhu kwakungamanga. Loba kunjalo u-Eva wakukholwa okwakutshiwo nguSathane wasesidla isithelo. Ngemva kwesikhathi wasenika u-Adamu, laye wadla.​—Genesisi 3:1-6.

Indaba le eliqiniso isifundisa ukuthi uSathane ulamanga njalo ungumhlamuki. Watshela u-Eva ukuthi engekela ukulalela uNkulunkulu, ngeke afe. Lokhu kwakungamanga. U-Eva wafa kanye lo-Adamu. USathane kazange afe ngalesosikhathi, lanxa kunjalo uzakufa kuphela ngoba wawona. Okwakhathesi usaphila njalo uqhubeka eduhisa abantu. Ulokhu esaqamba amanga njalo uzama ukwenza abantu bephule imithetho kaNkulunkulu.​—Johane 8:44.

Ngemva kwesikhathi ezinye izingilosi zahlamuka. Izingilosi lezi zahawukela abesifazana abahle ababesemhlabeni zafuna ukulala labo. Yikho-ke zabuya emhlabeni zantshintsha imizimba yazo yaba ngeyabantu. Zasezizithathela abafazi. Lokhu kwakungahambelani lenjongo kaNkulunkulu.​—Genesisi 6:1, 2; Juda 6.

Kwabangela uhlupho olukhulu ebantwini. Abafazi balezi zingilosi bazala abantwana abangajayelekanga. Bakhula baba yimidondotshiya elesihluku lodlakela. Ngemva kwesikhathi umhlaba wagcwala udlakela uJehova waze wakhetha ukubhubhisa abantu ababi ngozamcolo. UNowa owayelungile lemuli yakhe yibo kuphela abasinda kuZamcolo.​—Genesisi 6:4, 11; 7:23.

Izingilosi lezi ezimbi zabuyela endaweni yomoya, kazizange zife. Kodwa zajeziswa. Kazizange zivunyelwe ukubuyela emulini kaNkulunkulu yezingilosi ezilungileyo. Njalo uJehova kazange azivumele futhi ukuthi zintshintshe imizimba yazo ibe ngeyabantu. Ngemva kwesikhathi zizabhujiswa okwahlulelweni okukhulu.​—2 Phetro 2:4; Juda 6.

Engxenyeni yokuqala yekhulu lethu kwaba lempi ezulwini. IBhayibhili liyachasisa okwenzakalayo kuSambulo: “Kwaba lempi ezulwini. UMikhayeli [uJesu Khristu ovusiweyo] lezingilosi zakhe [ezilungileyo] balwa lomgobho [uSathane], kwathi umgobho kanye lezingilosi zawo [ezimbi] lawo walwa labo. Kodwa wawungela mandla kangako, njalo wona lezingilosi zawo balahlekelwa yindawo yabo ezulwini. Umgobho omkhulu waphoselwa phansi​—inyoka leyana endala ethiwa ngomubi loba uSathane, odukisa umhlaba wonke. Waphoselwa emhlabeni, ekanye lezingilosi zakhe [ezimbi].”

Kwaphetha ngani? Indaba iyaqhubeka: “Ngakho-ke thokozani, lina mazulu kanye lani elihlala kuwo!” Izingilosi ezilungileyo zazingajabula ngoba uSathane lezingilosi ezimbi noma imimoya babengasekho ezulwini. Kodwa kuthiwani ngabantu abasemhlabeni? IBhayibhili lithi: “Maye kuwo umhlaba lolwandle ngoba omubi useze phansi kini! Ugcwele intukuthelo, ngoba uyakwazi ukuthi isikhathi sakhe sifitshane.”​—ISambulo 12:7-9, 12.

Yebo, uSathane lezingilosi zakhe ezimbi baduhisa abantu njalo babangele ukuthi kube loMaye emhlabeni. Izingilosi lezi ezimbi zibizwa kuthiwa ngamadimoni. Ziyizitha zikaNkulunkulu. Zonke zimbi.