UMdali wethu ulenhlakanipho edlula eyethu. Ulendaba lathi njengobaba olothando njalo wayevele engasidalelanga ukuthi sizibuse. (Jeremiya 10:23) Sonke siyakudinga ukuqondiswa nguNkulunkulu njengomntwana omncane odinga ukuqondiswa ngabazali bakhe. (Isaya 48:17, 18) Imithetho yeBhayibhili iyisipho esivela kuNkulunkulu futhi iyasiqondisa.​—Bala u-2 Thimothi 3:16.

Imithetho kaJehova isifundisa indlela engcono esingaphila ngayo khathesi njalo isitshengisa ukuthi singayithola njani imivuzo engapheliyo yekusasa. Njengoba uNkulunkulu wasidala, kumele sibonge ukuthi uyasiqondisa ngothando.​—Bala iHubo 19:7, 11; iSambulo 4:11.

Iqiniso eliyisisekelo eliseBhayibhilini lisitshengisa ukuthi uNkulunkulu ufuna senzeni ezimeni ezinengi. Eminye imithetho isebenza ezimeni ezikhanyayo. (Dutheronomi 22:8) Kumele sisebenzise ingqondo ukuze sizwisise ukuthi iqiniso eliseBhayibhilini lisitshela ukuthi senzeni. (Izaga 2:10-12) Ngokwesibonelo iBhayibhili lisifundisa ukuthi impilo iyisipho esivela kuNkulunkulu. Iqiniso lelo eliyisisekelo lingasiqondisa. Nxa singahlala sikhumbula iqiniso eliyisisekelo lokuthi impilo iyisipho sizaba leqiniso lokuthi asifaki impilo zethu kumbe ezabanye engozini.​—Bala iHubo 100:3.

UJesu wakhuluma ngemilayo emibili eqakatheke kakhulu. Owakuqala usitshela ngenjongo yokuphila kwabantu, okuyikwazi uNkulunkulu, ukumthanda lokumkhonza  ngokuthembeka. Lo mlayo wakuqala kumele siwusebenzise nxa sisenza izinqumo zethu zonke. (Izaga 3:6) Abawusebenzisayo ekuphileni kwabo baba ngabangane bakaNkulunkulu njalo bathola ukuphila okungapheliyo lenjabulo yeqiniso.​—Bala uMathewu 22:36-38.

Umlayo wesibili ungasiqondisa ukuthi sihlale ngokuthula labanye. (1 Khorinte 13:4-7) Ukulandela lo mlayo kugoqela ukulingisela indlela uJehova aphatha ngayo abantu.​—Bala uMathewu 7:12; 22:39, 40.

Imithetho yeBhayibhili ifundisa izimuli indlela ezingamanyana ngayo ngothando. (Kholose 3:12-14) ILizwi likaNkulunkulu livikela izimuli ngokuzifundisa elinye iqiniso eliyisisekelo elokuthi umtshado akumelanga uchithwe.​—Bala uGenesisi 2:24.

Singalandela izimfundiso zeBhayibhili sizavikela inhlalakahle yethu. Ngokwesibonelo, abaqhatshi bajayele ukuthanda izisebenzi ezilandela imithetho yeBhayibhili ephathelane lokuthembeka lokusebenza nzima. (Izaga 10:4, 26; Hebheru 13:18) Okunye esikufundiswa yiLizwi likaNkulunkulu yikuthi sisuthiseke ngezinto esilazo njalo siqakathekise ubungane bethu loNkulunkulu ukwedlula izinto zomhlaba.​—Bala uMathewu 6:24, 25, 33; u-1 Thimothi 6:8-10.

Ukulandela imithetho yeBhayibhili ekuphileni kwethu kungavikela impilakahle yethu. (Izaga 14:30; 22:24, 25) Ngokwesibonelo, ukulandela umthetho kaNkulunkulu omayelana lokudakwa kungasivikela emikhuhlaneni ebulalayo lasezingozini. (Izaga 23:20) UJehova uyasivumela ukuthi sinathe utshwala, kodwa akumelanga sidakwe. (Hubo 104:15; 1 Khorinte 6:10) Imithetho kaNkulunkulu isinceda ngokusifundisa ukuthi siqaphele hatshi izenzo zethu kuphela kodwa lemicabango yethu. (Hubo 119:97-100) Lanxa kunjalo amaKhristu eqiniso awahloniphi imithetho kaNkulunkulu ukuze asizakale kuphela. Ayihlonipha ngoba afuna ukudumisa uJehova.​—Bala uMathewu 5:14-16.