1-3. (a) Kuyini okwethusa abafundi bakaJesu eLwandle lwaseGalile njalo uJesu wenzani? (b) Kungani kuqondile ukuthi “uKhristu ungamandla kaNkulunkulu”?

 ABAFUNDI bathi besahamba ngesikepe bechapha uLwandle lwaseGalile, kwaphonguqalisa isiphepho. Akuthandabuzwa ukuthi babeke babona iziphepho elwandle lolu ngoba vele abanye babo babengabagoli benhlanzi. a (UMathewu 4:18, 19) Kodwa lesi ‘sasisikhulu futhi silolaka.’ “Amagagasi ayelokhu etshaya isikepe” lamanzi ekhaphakela phakathi kwaze kwasala kancane ukuthi isikepe sicwile. Amadoda la asebenza nzima ezama ukuqondisa isikepe kodwa isiphepho sasilokhu sisiba lamandla. Kusenzakala lokhu uJesu wayelele ngemuva esikepeni. Wayetshone efundisa abantu yikho wayedinwe efile. Abafundi bamvusa ngenxa yokuthi babesesaba ukuthi sebezaphelela elwandle, bamncenga besithi: “Nkosi, sisindise sesisifa!”—UMakho 4:35-38; UMathewu 8:23-25.

² Kodwa uJesu yena wayengesabi. Wakhuluma ngesibindi wakhuza umoya lolwandle wathi: “Thula! Thula zwi!” Umoya lolwandle kwahle ‘kwathula cwaka,’ isiphepho saphela lamagagasi anyamalala. Abafundi bakhe besaba bathuthumela, baqalisa ukunyenyezelana besithi: “Ngubani sibili yenalo?” Kwakubamangalisa ukuthi kambe kulomuntu ongakhuza umoya lolwandle angathi ukhuza umntwana?—UMakho 4:39-41; UMathewu 8:26, 27.

 ³ Kodwa uJesu wayengasimuntu nje ofanana labanye. UJehova wanika uJesu amandla okwenza izimangaliso. Ngakho umphostoli uPhawuli wayeqondile lapho esithi “uKhristu ungamandla kaNkulunkulu.” (1 KwabaseKhorinte 1:24) Siwabona njani amandla kaNkulunkulu kuJesu? Indlela uJesu asebenzisa ngayo amandla akhe isinceda njani?

4, 5. (a) UJehova wanika iNdodana yakhe amandla okwenzani? (b) UJehova wayinikani iNdodana yakhe ukuze isebenze laye ukudala izinto?

⁴ Cabanga ngamandla uJesu ayelawo engakabuyi emhlabeni. UJehova wasebenzisa ‘amandla akhe angapheliyo’ ngesikhathi edala iNdodana yakhe eyiyo yodwa, eyacina isaziwa ngokuthi nguJesu Khristu. (KwabaseRoma 1:20; KwabaseKholose 1:15) UJehova wanika iNdodana yakhe amandla amakhulu ukuze isebenze laye ngesikhathi edala izinto. IBhayibhili lithi: “Zonke izinto zaba khona [ngoJesu] futhi akukho ngitsho lokukodwa okukhona okungazange kwenziwe ngaye.”—UJohane 1:3.

⁵ Kunzima ukuthi thina sizwisise ukuthi umsebenzi lo wawungakanani. Ubona angathi kwakudingakala amandla angakanani ukuze kudalwe amamiliyoni ezingilosi ezilamandla, lamabhiliyoni emithala lamaplanethi atshiyeneyo kanye lomhlaba lezinto eziphila kuwo? UJehova wanika iNdodana yakhe umoya ongcwele ukuze ibe lamandla okwenza konke lokhu. Yayiyisisebenzi esiyingcitshi futhi yayithokoza ngesikhathi isebenza loYise.—IZaga 8:22-31.

6. Ngemva kokuvuswa kwakhe uJesu wanikwa amandla okwenzani?

⁶ UJehova wayengamnika yini uJesu amanye amandla adlula lawa ayemnike wona? Ngemva kokuvuswa kwakhe uJesu wathi: “Sengiphiwe amandla wonke ezulwini lasemhlabeni.” (UMathewu 28:18) Ivesi le itshengisa ukuthi uJesu waphiwa amandla okubusa konke okudaliweyo. Njengoba ‘enguMbusi wababusi leNkosi yamakhosi’ unikwe amandla okuthi ‘atshabalalise bonke ohulumende kanye lalabo abalamandla’  abaphikisana loYise, kungelani lokuthi basezulwini kumbe emhlabeni. (ISambulo 19:16; 1 KwabaseKhorinte 15:24-26) Akulalutho uNkulunkulu ‘angalubekanga ngaphansi’ kukaJesu. UNkulunkulu nguye yedwa ongekho ngaphansi kukaJesu.—KumaHebheru 2:8; 1 KwabaseKhorinte 15:27.

7. Kungani singaba leqiniso lokuthi uJesu kasoze awasebenzise kubi amandla awaphiwe nguJehova?

⁷ Kumele sikhathazeke yini ngokuthi uJesu angawasebenzisa kubi amandla akhe? Hatshi! UJesu uyamthanda kakhulu uYise njalo ngeke enze loba yini engamdanisa. (UJohane 8:29; 14:31) Ukwazi mhlophe ukuthi uJehova kakaze awasebenzise kubi amandla akhe amakhulu. Uzibonele ngawakhe ukuthi uJehova udinga amathuba ‘okutshengisa amandla akhe ngokunceda labo abazinikele kuye ngenhliziyo yonke.’ (2 ImiLando 16:9) Uyabathanda abantu ngendlela uYise abathanda ngayo, ngakho singamthemba ukuthi uzahlala ewasebenzisa kuhle amandla akhe. (UJohane 13:1) UJesu kakaze awasebenzise kubi amandla akhe. Kasiboneni ukuthi wawasebenzisa njani amandla akhe ngesikhathi esesemhlabeni lokuthi kuyini okwakumenza awasebenzise.

8. Ngemva kokugcotshwa kwakhe, uJesu waphiwa amandla okwenzani njalo wawasebenzisa njani?

⁸ Akula lapho iBhayibhili elisitshela khona ukuthi uJesu wenza izimangaliso ngesikhathi esakhula. Kodwa lokhu kwatshintsha ngesikhathi ebhabhathizwa ngo-29 C.E., eleminyaka engaba ngu-30. (ULukha 3:21-23) IBhayibhili lithi: ‘Wagcotshwa nguNkulunkulu ngomoya ongcwele langamandla, wahamba esenza okuhle kulo lonke ilizwe futhi esilisa bonke ababecindezelwe nguDeveli.’ (ImiSebenzi 10:38) Amazwi athi “esenza okuhle” atshengisa ukuthi wawasebenzisa kuhle amandla akhe. Wathi esegcotshiwe ‘watshengisa ngezenzo langamazwi phambi kukaNkulunkulu labantu bonke ukuthi ungumphrofethi olamandla.’—ULukha 24:19.

9-11. (a) UJesu wayejayele ukufundisela ngaphi njalo kungani kwakungaba nzima ukuthi abantu bamlalele? (b) Kungani abantu bamangaliswa yindlela uJesu ayefundisa ngayo?

 ⁹ Sikwazi njani ukuthi amazwi kaJesu ayelamandla? Wayejayele ukufundisela ezindaweni ezisegcekeni, njengasekhunjini lolwandle, eceleni kwentaba lasezindaweni zokuthengisela. (UMakho 6:53-56; ULukha 5:1-3; 13:26) Ababemlalele babengazihambela aluba amazwi akhe ayengakhangi. Kwakumele bagcine amazwi akhe ezingqondweni lasezinhliziyweni ngenxa yokuthi ngalesosikhathi kwakungelamabhuku. Ngakho uJesu kwakumele afundise ngendlela ekhangayo, ezwisisekayo futhi ezakwenza kube lula ukuthi abantu bakhumbule ababekufundisiwe. UJesu wayesenelisa ukufundisa ngendlela enjalo. Siyakubona lokho eNtshumayelweni yakhe yaseNtabeni.

¹⁰ Ngelinye ilanga ekuseni ngo-31 C.E., ixuku labantu labuthana eceleni kwentaba eseduze loLwandle lwaseGalile. Abanye abantu babevela eJudiya, abanye bevela eJerusalema okwakungaba ngamakhilomitha angu-100 kusiya kwangu-110. Abanye bona babevela eThire leSidoni. Abanengi ababegula basondela kuJesu ukuze bamthinte njalo wabasilisa bonke. Wathi esebelaphe bonke, waqalisa ukubafundisa. (ULukha 6:17-19) Bonke abantu ababemlalele efundisa bamangaliswa yilokho ababekuzwa. Kungani?

¹¹ Ngemva kweminyaka ethile omunye owayezwe intshumayelo leyo wathi: “Abantu basala bebambe owangaphansi bemangaliswa yindlela ayefundisa ngayo ngoba wayefundisa njengomuntu olamandla.” (UMathewu 7:28, 29) UJesu wafundisa ngendlela ethinta inhliziyo. Wayekhuluma lokho ayekuthunywe nguNkulunkulu njalo konke ayekufundisa wayekuthatha eLizwini likaNkulunkulu. (UJohane 7:16) Wayefundisa ngendlela elula eyayisenza abantu bafise ukwenza lokho ayebatshela khona futhi akulamuntu owayengamphikisa. Wayebanceda bazwisise ukuthi inhlupho zidalwa kuyini njalo  bazihlole ukuthi bangabantu abanjani. Wabafundisa indlela yokuthola intokozo leyokuthandaza kanye lokuthi bangenzani ukuze baqakathekise uMbuso kaNkulunkulu futhi babe lekusasa elihle. (UMathewu 5:3–7:27) Amazwi akhe ayesenza labo abalenhliziyo ezilambele iqiniso bafise ukwenza okulungileyo. Babezimisele ngitsho ‘lokuzidela’ balahle konke ukuze bamlandele. (UMathewu 16:24; ULukha 5:10, 11) Lokhu kutshengisa ukuthi amazwi kaJesu ayelamandla.

12, 13. UJesu watshengisa njani ukuthi ulamandla njalo yiwuphi umehluko owawukhona ezimangalisweni ayezenza?

¹² UJesu waphinda ‘watshengisa langezenzo ukuthi ulamandla.’ (ULukha 24:19) AmaVangeli asitshela ngezimangaliso ezingu-30 ezenziwa nguJesu esebenzisa ‘amandla ayewanikwe nguJehova.’ b (ULukha 5:17) Izimangaliso ezenziwa nguJesu zanceda izinkulungwane zabantu. Ngokwesibonelo wanika abantu abanengi ukudla. Ixuku lokuqala lalilamadoda angu-5 000 njalo elesibili lilamadoda angu-4 000, singasabali abantwana labesifazana.—UMathewu 14:13-21; 15:32-38.

¹³ UJesu wenza izimangaliso ezitshiyeneyo. Wayesenelisa ukukhipha amadimoni lula nje. (ULukha 9:37-43) Wayelamandla phezu kwemvelo yikho wenelisa ukutshintsha amanzi aba liwayini. (UJohane 2:1-11) Ngelinye ilanga abafundi bamangala ‘bembona ehamba phezu kolwandle’ lanxa kwakulesiphepho. (UJohane 6:18, 19) Wayelamandla okusilisa abagogekileyo lawokwelapha imikhuhlane engelaphekiyo. (UMakho 3:1-5; UJohane 4:46-54) Welapha abantu ngezindlela ezitshiyeneyo. Abanye wabelapha ekhatshana ikanti abanye wayebelapha ngokubathinta. (UMathewu 8:2, 3, 5-13) Abanye babehle  basile masinyane kodwa abanye babesila kancane kancane.—UMakho 8:22-25; ULukha 8:43, 44.

14. UJesu watshengisa njani ukuthi ulamandla okuvusa abafileyo?

¹⁴ Okunye okumangalisayo yikuthi uJesu wayelamandla okuvusa abantu abafileyo. IBhayibhili lisitshela ngabantu abathathu abavusayo. Wavusa intombazana eleminyaka engu-12 wayibuyisela kubazali bayo, wavusa lendodana yomunye umfelokazi eyayiyiyo yodwa kunina. Waphinda wavusa loLazaro. (ULukha 7:11-15; 8:49-56; UJohane 11:38-44) Akulalutho olwalunzima kuJesu. Intombazana eleminyaka engu-12 wayivusa isanda kufa, kwathi indodana yomfelokazi wayivusa isisiyangcwatshwa. Kukhanya indodana le yavuswa ngelanga eyafa ngalo. ULazaro yena wavuswa eselamalanga amane engcwatshiwe.

15, 16. Kuyini okutshengisa ukuthi uJesu kazange asebenzise amandla akhe ukuthi enze okunceda yena kuphela?

¹⁵ Ubona angani kungenzakalani nxa amandla kaJesu engaphiwa umbusi olesono? Angasetshenziswa kubi. Phela izikhathi ezinengi ababusi abalandaba labanye, bayazigqaja futhi balobuhwaba. Yikho besebenzisa amandla abo ngendlela elimaza abanye. Kodwa uJesu kanjalo ngoba kalasono.—U-1 Phetro 2:22.

¹⁶ UJesu wasebenzisa amandla akhe ukuze ancede abanye, hatshi ukuthi enze izinto ezifunwa nguye. Ngesikhathi elambile wala ukutshintsha amatshe abe yisinkwa. (UMathewu 4:1-4) Wayengelampahla enengi futhi lokhu kutshengisa ukuthi kazange asebenzise amandla akhe ukuthi athole inotho. (UMathewu 8:20) Kulokunye futhi okutshengisa ukuthi uJesu kazange asebenzise amandla akhe ukuthi enze okunceda yena kuphela. Ngesikhathi eselapha abagulayo wayesizwa amandla ephuma kuye, ngitsho lalapho eselapha umuntu oyedwa kuphela. (UMakho 5:25-34) Lanxa kunjalo wavumela ukuthi abantu abanengi bamthinte ukuze basile. (ULukha 6:19) Lokhu kwakutshengisa ukuthi ulendaba labanye!

17. UJesu watshengisa njani ukuthi uwasebenzisa kuhle amandla akhe?

 ¹⁷ UJesu wayewasebenzisa kuhle amandla akhe. Kazange enze izimangaliso esenzela ukubukwa ngabantu. (UMathewu 4:5-7) Ngokwesibonelo wala ngitsho lokwenza izimangaliso ukuze athokozise uHerodi. (ULukha 23:8, 9) Kulokuthi abukise ngamandla akhe, uJesu wayejayele ukutshela labo ayebelapha ukuthi bangatsheli muntu. (UMakho 5:43; 7:36) Wayengafuni ukuthi abantu bakholwe ukuthi unguMesiya ngenxa nje yokuthi bazwe abanye bekhuluma ngezimangaliso ayezenza.—UMathewu 12:15-19.

18-20. (a) Kuyini okwenza uJesu wasebenzisa amandla akhe ukunceda abanye? (b) Indlela uJesu elapha ngayo indoda eyayiyisacuthe ikufundisani?

¹⁸ UJesu wayengafanani lababusi abangabazweliyo abantu abahluphekayo. Yena wayelendaba labantu. Wayesizwa ubuhlungu nxa ebona behlupheka futhi lokhu kwakusenza abancede. (UMathewu 14:14) Wayelendaba lokuthi bezwa njani lokuthi kuyini abakuswelayo, yikho wasebenzisa amandla akhe ukuze abancede. Lokho siyakubona kuMakho 7:31-37.

¹⁹ Emavesini la ixuku labantu lathi libona uJesu laletha abantu abanengi ababegula, uJesu wasebelapha bonke. (UMathewu 15:29, 30) Kodwa wananzelela ukuthi kulenye indoda eyayiyisacuthe futhi ingenelisi ukukhuluma. Kungenzakala ukuthi uJesu wananzelela ukuthi indoda le yayilenhloni futhi ingakhululeki ukuba phakathi kwabantu. Ngakho wayithatha indoda le wayisusa ebantwini ukuze ayelaphe bebodwa, wasesebenzisa izandla ukuthi ayichasisele lokho ayesezakwenza. “Wafaka iminwe yakhe endlebeni zayo, wasekhafula wathinta ulimi lwayo.” c (UMakho 7:33) Esenze njalo uJesu wakhangela  ezulwini wehlisa iphika. Lokhu kwenza indoda le yabona ukuthi uNkulunkulu nguye owayephe uJesu amandla okwelapha. Ngemva kwalokho uJesu wathi: “Vuleka.” (UMakho 7:34) Indlebe zayo zahle zavuleka yaqalisa ukuzwa lokukhuluma kuhle.

²⁰ Kuyasithokozisa ukubona indlela uJesu asebenzisa ngayo amandla ayewaphiwe nguNkulunkulu. Ukubona ukuthi uJesu wayelendaba labantu ayebelapha kwenza singathandabuzi ukuthi uzakuba nguMbusi olomusa futhi olothando. Phela uJehova ukhethe yena ukuthi abe yiNkosi yoMbuso wakhe.

21, 22. (a) Izimangaliso zikaJesu zazitshengisani? (b) UJesu uzakwenzani nxa esebusa?

²¹ Izimangaliso uJesu azenza esesemhlabeni zaziyinzwisa yalokho azakwenza ngesikhathi esebusa umhlaba. EPharadayisi uzaphinda enze izimangaliso kodwa uzabe esezenza emhlabeni wonke. Yiziphi ezinye izinto ezizakwenziwa nguJesu?

²² UJesu uzalungisa wonke umonakalo odalwe ngabantu emhlabeni. Khumbula ukuthi wake wathulisa isiphepho elwandle. Lokhu kutshengisa ukuthi ulamandla phezu kwemvelo. Ngakho nxa esebusa, abantu abasoze bahlaselwe yiziphepho loba kube lokuzamazama komhlaba kumbe ezinye ingozi zemvelo. Njengoba uJesu wasebenza loJehova ngesikhathi edala umhlaba, ukuzwisisa kuhle ukuthi umhlaba wenziwe njani. Uyakwazi ukuthi angazisebenzisa njani izinto zemvelo ezisemhlabeni. Uzatshintsha umhlaba wonke ube liPharadayisi.—ULukha 23:43.

23. UJesu uzakwenelisa yini ukunakekela abantu nxa eseyiNkosi?

²³ UJesu uzakwenelisa yini ukunika abantu ukudla lezinye izinto abazidingayo empilweni? Ye uzakwenelisa. Phela esesemhlabeni wake wathatha ukudla okulutshwana nje  wapha abantu abanengi badla basutha. Isimangaliso lesi senza sibe leqiniso lokuthi uzayiqeda indlala. Bonke abantu bazathola ukudla okweneleyo. (IHubo 72:16) Kanti njalo uJesu wayeselapha abagulayo okutshengisa ukuthi uzaqeda yonke imikhuhlane. Uzasilisa iziphofu lezacuthe kanye labagogekileyo. (U-Isaya 33:24; 35:5, 6) Khumbula lokuthi uJesu wavusa labafileyo. Ngakho siyaqiniseka ukuthi uzavusa abantu abanengi kakhulu abafayo.—UJohane 5:28, 29.

24. Kuyini okumele sikukhumbule nxa sifunda ngamandla kaJesu futhi kungani?

²⁴ Sesibonile ukuthi uJesu ulamandla amangalisayo. Kodwa khumbula ukuthi ulingisela uYise ngokupheleleyo. (UJohane 14:9) Indlela uJesu asebenzisa ngayo amandla yenza sizwisise ukuthi uJehova uwasebenzisa njani amandla akhe. Ngokwesibonelo, uJesu wathi esilisa indoda eyayilobulephero watshengisa ukuthi uyayizwela. Wayithinta wathi: “Ngiyafuna, hlambuluka.” (UMakho 1:40-42) Ngakho nxa sibala izindaba ezinjengalezi, kuba angathi uJehova usitshengisa indlela awasebenzisa ngayo amandla akhe. Siyambonga kakhulu uNkulunkulu wethu olamandla ngokuthi usebenzisa amandla akhe ngendlela elothando!