ISAHLUKO 15
UJesu ‘Wenza Ukuthi Kube Lokulunga Emhlabeni’
1, 2. Kunini lapho uJesu azonda khona futhi kwakutheni?
UJESU wathi efika ethempelini likaJehova, wabona into eyamzondisa kakhulu. Kungaba nzima ukumcabanga ezondile ngoba wayeyindoda emnene kakhulu. (UMathewu 21:5) Lanxa wayezondile kazange adlulise amalawulo ngoba wayesenelisa ukuzithiba. a Kodwa kuyini okwakuzondise indoda le ethanda ukuthula? Yayizondiswe yizinto ezimbi eyayizibona zisenzakala endlini kaNkulunkulu.
2 UJesu wayelithanda kakhulu ithempeli elaliseJerusalema. Kwakuyiyo yodwa indawo emhlabeni wonke okwakukhonzwa khona uYise osezulwini. AmaJuda ayevela ezindaweni ezitshiyeneyo ayehamba umango omude ezokhonza ethempelini lelo. Lalabo ababengasiwo maJuda ababesesaba uNkulunkulu babebuya bezokhonza egcekeni lethempeli. Kodwa uJesu wathi esanda kuqalisa inkonzo yakhe, wangena ethempelini wabona okubi kakhulu okwakusenzakala lapho. Ithempeli laseliyimakethi kulokuthi libe yindlu yokukhonzela! Kwakulabantu abathengisayo kanye labatshintsha imali. Kwakukubi ngani lokho? Babengasalihloniphi ithempeli, sebelenza indawo yokuqilela abantu.—UJohane 2:14.
3, 4. Kuyini okwakusenzakala endlini kaJehova futhi uJesu wenzani?
3 Abakhokheli benkolo basebefake umthetho wokuthi umthelo wethempeli kwakumele ubhadalwe ngohlobo lwemali yesiliva olulodwa nje kuphela. Yikho izivakatshi kwakumele zitshintshe imali yazo ukuze zithole leyomali efunakalayo. Abatshintsha imali bafaka amatafula abo phakathi kwethempeli. Babesithi nxa betshintshela umuntu imali, bambhadalise imali enengi. Abanye babethengisa izifuyo ethempelini futhi labo babeyitshaya imali. Izivakatshi ezazifuna ukunikela imihlatshelo zazingathenga kuloba yiwuphi umthengisi owayekhona edolobheni, kodwa ababekhokhela ethempelini babengemukeli imihlatshelo enjalo. Babesamukela iminikelo eyayithengwa khona kanye ethempelini. Lokhu kwakusenza abathengisa ethempelini badulise kakhulu ngoba babesazi ukuthi abantu bazathenga kubo ngenkani. b Ababekwenza kwakukubi kakhulu ngoba kwasekufanana lokuthi batshontshela abantu imali yabo.
4 UJesu kazange atshone ephozisa amaseko. Wahle wenza isaswebhu waxotsha imihlambi yezinkomo leyezimvu ethempelini. Ngemva kwalokho waya kulabo ababetshintsha imali wagenqula amatafula abo, imali yesiliva yachitheka yagcwala phansi! Watshela amadoda ayethengisa amajuba wathi: “Susani izinto lezi lapha!” (UJohane 2:15, 16) Kukhanya akulamuntu owaba lesibindi sokuphikisana loJesu.
“Susani izinto lezi lapha!”
UJesu Wayelingisela UYise
5-7. (a) Kungani uJesu wayekuqakathekisa ukuthi abantu baphathwe kuhle futhi kuzasinceda ngani ukuhlola lokho ayekwenza? (b) UJesu wenzani ukuze kucace ukuthi uSathane wayeqamba amanga njalo uzakwenzani esikhathini esizayo?
5 Abantu ababethengisa ethempelini baphinda baphenduka ngoba ngemva kweminyaka engaba mithathu uJesu waphinda wabaxotsha ethempelini. Wakhuluma amazwi ayeke akhulunywa nguJehova ngesikhathi esola abantu ababesenza indlu yakhe “ubhalu lwamasela.” (UMathewu 21:13; UJeremiya 7:11) Kuyacaca ukuthi uJesu wathi ebona ukungcoliswa kwethempeli likaNkulunkulu kanye lokuqilwa kwabantu wazizwa ngendlela uYise azizwa ngayo. Akumangalisi lokhu ngenxa yokuthi uJesu wayefundiswe nguYise okweminyaka eminengi kakhulu bebonke ezulwini. Wafunda ukuthi uJehova uyakuzonda kakhulu ukubona abantu bephathwa kubi, yikho laye wayekuzonda. Ngakho nxa sifuna ukuzwisisa ukuthi uJehova ukuqakathekisa kangakanani ukwahlulela okuhle, kumele sihlole lokho uJesu Khristu ayekwenza.—UJohane 14:9, 10.
6 UJesu wayekhona lapho uSathane esithi uJehova uNkulunkulu ungumqambimanga futhi ubusa kubi. Lawa kwakungamanga aluhlaza tshoko! Ngokuhamba kwesikhathi wezwa uSathane esithi abantu bakhonza uNkulunkulu ngenxa yalokho abangakuthola kuye. Lokhu kwayizwisa ubuhlungu kakhulu iNdodana kaNkulunkulu. Kumele ukuthi uJesu wathokoza kakhulu esizwa ukuthi uJehova wayezasebenzisa yena ukuthi atshengise ukuthi uSathane uqamba amanga. (2 KwabaseKhorinte 1:20) Wayezakwenza njani lokhu?
7 ESahlukweni 14 sibonile ukuthi uJesu Khristu wahlala ethembekile kuNkulunkulu. Lokhu kwenza kwacaca ukuthi uSathane wayeqamba amanga lapho esithi izinceku zikaNkulunkulu zimkhonza ngenhloso ezingayisizo. Watshengisa lokuthi uSathane wayeqamba amanga lapho esithi uJehova ubusa kubi. Njengoba enguMmeli Omkhulu kaJehova, uzakwenza ukuthi wonke umuntu ezulwini lasemhlabeni alandele imithetho kaJehova. (ImiSebenzi 5:31) Lokho uJesu akwenzayo layekufundisa abantu ngesikhathi esemhlabeni kwatshengisa ukuthi laye uyakuthanda ukwahlulela kuhle njengoJehova. UJehova wathi ekhuluma ngeNdodana yakhe wathi: “Ngizafaka umoya wami kuyo njalo izacacisela izizwe ukuthi ukulunga kuyini.” (UMathewu 12:18) UJesu wakwenza njani lokho?
UJesu Wacacisa Ukuthi “Ukulunga Kuyini”
8-10. (a) Imithetho yabakhokheli benkolo abangamaJuda yayisenza ukuthi abesifazana labantu abangayisiwo maJuda baphathwe njani? (b) Abakhokheli benkolo benzani okwenza kwaba nzima ukugcina umthetho kaJehova weSabatha?
8 UJesu wayewuthanda uMthetho kaJehova futhi wayephila ngawo. Kodwa abakhokheli benkolo bona babewuphendulela uMthetho futhi bewusebenzisa kubi. UJesu wathi kubo: ‘Maye kini babhali labaFarisi, bazenzisi. Alizihluphi ngezindaba eziqakathekileyo zoMthetho eziphathelane lokwahlulela okuhle, ukuba lesihawu kanye lokuthembeka!’ (UMathewu 23:23) Kuyakhanya ukuthi babengacacisi ukuthi “ukulunga kuyini” lanxa kwakumele bafundise abantu uMthetho kaNkulunkulu. Cabanga ngezibonelo ezilandelayo.
9 UJehova watshela abantu bakhe ukuthi bangenzi imikhuba yezizwe ezazingomakhelwana babo. (1 AmaKhosi 11:1, 2) Kodwa abanye abakhokheli benkolo babekhuthaza abantu ukuthi benyanye abantu abangasiwo maJuda. Ibhuku elalilemithetho yabakhokheli bamaJuda lalisithi: “Inkomo akumelanga zitshiywe ezindlini zabantu abangasiwo maJuda ngoba kucatshangelwa ukuthi balala lezinyamazana.” Indlela ababebandlulula ngayo abantu abangayisiwo maJuda yayingalunganga futhi ingavumelani lalokho okwakutshiwo eMthethweni kaMosi. (ULevi 19:34) Eminye imithetho ababeyifakile yayiseyisa abesifazana. Babesithi owesifazana akumelanga ahambe eceleni komkakhe kodwa kumele ahambe ngemva kwakhe. Owesilisa kwakungamelanga akhulume lowesifazana phakathi kwabantu lanxa wayengumkakhe. Abesifazana babefanana lezigqili ngoba babengavunyelwa ukufakaza emthethwandaba. Kwakulomthandazo lapho amadoda ayebonga khona uNkulunkulu ngokuthi ayengayisibo bafazi.
10 Abakhokheli benkolo bagqibela uMthetho kaNkulunkulu ngemithetho eminengi ababeyifakile. Ngokwesibonelo, umthetho weSabatha wawungavumeli ukuthi umuntu asebenze ngeSabatha. Ilanga lelo lalibekelwe ukukhonza kanye lokuphumula. Kodwa abaFarisi babesenza umthetho lowo usinde. Babesithi balelungelo lokutsho ukuthi umsebenzi okwakungamelanga wenziwe ngeSabatha yiwuphi. Baqamba imisebenzi engu-39 eyehlukeneyo, enjengokuvuna lokuzingela. Lokhu kwenza kwaba lemibuzo eminengi enjengokuthi nxa umuntu wayengabulala umkhaza ngelanga leSabatha, kwakungathiwa uyazingela yini? Nxa wayengakha izikhwebu zamabele ezilutshwana edlula nje, uyabe evuna yini? Nxa wayengelapha umuntu ogulayo, uyabe esebenza yini? Imibuzo enjengale yayiphendulwa ngokufaka eminye imithetho eminenginengi eyayithwalisa abantu nzima.
11, 12. UJesu watshengisa njani ukuthi kavumelani lamasiko abaFarisi ayengekho eMibhalweni?
11 UJesu wabancedisa njani abantu labo ukuthi bazwisise ukuthi kutshoni ukwenza okulungileyo? Ayekwenza layekufundisa kwenza kwacaca ukuthi okwakutshiwo ngabakhokheli benkolo kwakungamanga. Ngokwesibonelo wabatshela ukuthi imithetho eminenginengi ababeyifakile yayingaqondanga. Wathi: ‘Lenza ukuthi ilizwi likaNkulunkulu libe yinto engelancedo ngenxa yesiko lenu elilidlulisela kwabanye.’—UMakho 7:13.
12 UJesu wathi abaFarisi babekhuluma amanga ngomthetho weSabatha lokuthi babengazwisisi ukuthi umthetho lo wawufakelweni. Wachasisa ukuthi ulelungelo lokwelapha abantu ngelanga leSabatha ngoba ‘uyiNkosi yeSabatha.’ (UMathewu 12:8) Ukuze lokhu kucace welapha abagulayo ngelanga leSabatha ebonwa yibo bonke abantu. (ULukha 6:7-10) Lokhu kwakutshengisa azakwenzela abantu emhlabeni wonke ngesikhathi esebusa okweminyaka eyinkulungwane. Iminyaka le izakuba liSabatha lokucina lapho abantu bonke abathembekileyo abazaphumula khona ebunzimeni besono lokufa osekuleminyaka eminengi kuhlupha abantu.
13. UJesu wanika abalandeli bakhe wuphi umthetho futhi wawehlukene njani lokaMosi?
13 UJesu waphinda wacacisa ukuthi ukulunga kuyini ngokunika abalandeli bakhe umthetho omutsha obizwa ngokuthi ‘ngumthetho kaKhristu.’ Umthetho lo waqalisa ukusebenza eseqede inkonzo yakhe yasemhlabeni. (KwabaseGalathiya 6:2) Wawungafanani loMthetho kaMosi ngoba wona wawusekelwe ezimisweni hatshi emilayweni ebhaliweyo. Kodwa wawulayo imilayo ecacileyo. UJesu wabiza omunye wemilayo le ngokuthi ‘ngumlayo omutsha.’ Wafundisa abalandeli bakhe bonke ukuthi bathandane njengoba nje laye wayebathanda. (UJohane 13:34, 35) Kuyacaca ukuthi uthando yilo okwakumele lube luphawu lwabo bonke abaphila ‘ngomthetho kaKhristu.’
UJesu Wayesenza Okulungileyo
14, 15. UJesu watshengisa njani ukuthi uyazithoba futhi kungani lokhu kududuza?
14 UJesu kacinanga ngokufundisa ngothando kuphela, kodwa waphila ‘ngomthetho kaKhristu.’ Wawulandela kukho konke akwenzayo. Ake sixoxe ngezindlela ezintathu uJesu atshengisa ngazo ukuthi ukulunga kuyini.
15 Okokuqala, uJesu wazama ngamandla wonke ukwenza okulungileyo. Izikhathi ezinengi okwenza abantu benze izinto ezingalunganga yikuzigqaja baze bacine besenza izinto abangelamvumo yokuzenza. UJesu kazange enze njalo. Ngelinye ilanga kulendoda eyafika kuJesu yathi: “Mfundisi, tshela umfowethu ukuthi angabele lami ilifa.” UJesu waphendula wathini? Wathi: “Ndoda, ngubani ongibeke ukuthi ngibe ngumahluleli loba umlamuli wenu lobabili?” (ULukha 12:13, 14) Lokhu kusifundisani ngoJesu? Lanxa uJesu wayekhaliphe ukwedlula bonke abantu futhi elamandla ayewaphiwe nguNkulunkulu, kazange ayingene indaba yamadoda la. Wayesazi ukuthi uNkulunkulu wayengamphanga imvumo yokulungisa indaba le. Langesikhathi esezulwini uJesu wayethobekile, wayengenzi lutho angalutshelwanga nguYise. (UJuda 9) Konke lokhu kutshengisa ukuthi uJesu ulobuntu obuhle ngoba uyazithoba avume ukuthi uJehova amtshele okumele akwenze.
16, 17. (a) UJesu wakucacisa njani ukulunga ngesikhathi etshumayela? (b) UJesu watshengisa njani ukuthi ulesihawu?
16 Okwesibili, uJesu waphinda wacacisa ukuthi ukulunga kuyini ngokutshumayela izindaba ezinhle zoMbuso kaNkulunkulu. Wayengakhethi kodwa wazimisela ukuthi atshumayeze yonke imihlobo yabantu, kungelani lokuthi banothile kumbe bangabayanga. AbaFarisi bona babebakhangelela phansi abayanga labantu abangafundanga. Babebabiza ngebizo lokweyisa elithi ʽam-ha·ʼaʹrets okutsho ukuthi “abantu bomhlaba.” UJesu watshengisa ukuthi lokho ababekwenza kwakungaqondanga. Walingisela uNkulunkulu wethu owahlulela kuhle ngokutshumayeza “abantu bemihlobo yonke.” Kanti njalo wayesidla labo, ebanika ukudla, ebelapha, waze wavusa labafileyo. c—1 KuThimothi 2:4.
17 Okwesithathu, uJesu wayelesihawu ebantwini. Wayebamukela abantu abayizoni. (UMathewu 9:11-13) Wayehlala ezimisele ukunceda abantu ababengelamandla okuzivikela. Ngokwesibonelo, wayengavumelani labakhokheli benkolo ababefundisa abantu ukuthi bangabathembi abantu abangayisiwo maJuda. Wabatshengisa isihawu wabafundisa lanxa yena wayevele ethunywe kumaJuda. Wavuma lokusilisa inceku yenduna yebutho lamaRoma, waze wathi: “Kulo lonke elako-Israyeli angikamtholi umuntu olokholo olukhulu kangaka.”—UMathewu 8:5-13.
18, 19. (a) UJesu watshengisa njani ukuthi uyabahlonipha abesifazana? (b) Isibonelo sikaJesu sikuveza njani ukuthi ukulunga lesibindi kuhamba ndawonye?
18 UJesu wayengavumelani lemibono abantu abanengi ababelayo ngabesifazana. Yena wazimisela ukwenza okulungileyo. Abesifazana abangamaSamariya labo kwakuthiwa bangcolile njengabantu abangayisiwo maJuda. Kodwa uJesu kazange ayekele ukutshumayeza owesifazana ongumSamariya emthonjeni waseSikhari. Owesifazana lo waba ngumuntu wokuqala uJesu amtshela ukuthi unguMesiya owayethenjisiwe. (UJohane 4:6, 25, 26) AbaFarisi babesithi abesifazana akumelanga bafundiswe uMthetho kaNkulunkulu kodwa uJesu wasebenzisa isikhathi sakhe esinengi ebafundisa. (ULukha 10:38-42) Abesifazana babengathenjwa ukuthi bafakaze kodwa uJesu watshengisa ukuthi uyabahlonipha ngokubanika isibusiso sokuthi babe ngabokuqala ukumbona esevusiwe. Wabatshela ukuthi bayebikela abaphostoli bakhe indaba le eyayiqakatheke kakhulu.—UMathewu 28:1-10.
19 Kuyakhanya-ke ukuthi uJesu wenza kwacaca sibili ukuthi ukulunga kuyini lanxa izikhathi ezinengi lokhu kwakungamfaka engozini. Isibonelo sikaJesu sisifundisa ukuthi kumele sibe lesibindi nxa sifuna ukwenza okulungileyo. Yikho wayebizwa ngokuthi ‘yisilwane sakoJuda.’ (ISambulo 5:5) Khumbula ukuthi isilwane simela isibindi. Ngakho esikhathini esizayo uJesu ‘uzakwenza ukuthi kube lokulunga emhlabeni’ wonke.—U-Isaya 42:4.
INkosi EnguMesiya ‘Yenza Ukuthi Kube Lokulunga Emhlabeni’
20, 21. INkosi enguMesiya ibancedise njani abantu ukuthi benze okulungileyo?
20 Kusukela uJesu esiba yiNkosi enguMesiya ngo-1914, uncede abantu ukuthi benze okulungileyo. Njani? Wenze ukuthi isiphrofetho sakhe esikuMathewu 24:14 sigcwaliseke. Abalandeli bakaJesu bafundisa abantu emazweni wonke iqiniso ngoMbuso kaJehova. Batshumayeza yonke imihlobo yabantu njengoJesu. Kabakhethi ukuthi umuntu mncane kumbe mdala, unothile loba ungumyanga kumbe ukuthi ngowesilisa loba owesifazana. Banika wonke umuntu ithuba lofunda ngoJehova uNkulunkulu wethu owahlulela kuhle.
21 UJesu uncedisa labasebandleni ukuthi benze okulungileyo ngoba uyinhloko yebandla. Ubeke abadala abathembekileyo ebandleni ukuze balikhokhele. IBhayibhili libabiza ngokuthi ‘yizipho ezingabantu.’ (Kwabase-Efesu 4:8-12) Amadoda la alingisela uJesu Khristu ngokwelusa kuhle umhlambi kaNkulunkulu oligugu. Ahlala ekhumbula ukuthi uJesu ufuna zonke izimvu zakhe ziphathwe kuhle kungelani lokuthi zenza msebenzi bani ebandleni loba ukuthi zilani empilweni.
22. UJehova uzwa njani nxa ebona abantu bephathwa kubi futhi unike iNdodana yakhe umsebenzi wokwenzani?
22 Sekuseduze ukuthi uJesu enze ukuthi kube lokulunga emhlabeni wonke. Kunengi okubi okwenzakalayo. Abantwana abancane bayafa ngendlala ngenxa yokuthi imali obekumele isetshenziswe ukubanakekela isetshenziswa ukuthenga izikhali ezidulayo lokwenza ezinye izinto zokuzithokozisa. Amamiliyoni abantu ayafa umnyaka ngamunye ngenxa yezinto ezenziwa ngabantu ngabomu. Lokhu kwenza uJehova athukuthele kakhulu. Unike iNdodana yakhe umsebenzi wokuqeda konke ukuphathwa kubi kwabantu emhlabeni kungaphindi kube khona.—ISambulo 16:14, 16; 19:11-15.
23. UKhristu uzakwenzani ngemva kwe-Amagedoni?
23 Kodwa ukubhubhisa abantu ababi ayisikho kodwa okutshengisa ukuthi uJehova ulungile. Uphinde wabeka iNdodana yakhe ukuthi ibe “nguMbusi Wokuthula.” Ngemva kwempi ye-Amagedoni uJesu uzabusa “ngokulunga,” enze ukuthi kube lokuthula emhlabeni wonke. (U-Isaya 9:6, 7) Uzasusa konke okungalunganga okwenze umhlaba waba lokuhlupheka losizi. Uzaqhubeka esahlulela kuhle njengoJehova kuze kube nini lanini. Ngakho kuqakathekile ukuthi lathi silingisele uJehova ngokwenza okulungileyo. Manje singakwenza njani lokhu? Sizaxoxa ngakho esahlukweni esilandelayo.
a UJehova “ukulungele ukutshengisa ulaka lwakhe” nxa ebona kusenzakala izinto ezimbi, yikho nxa uJesu wayeyabe ethukuthele wayelingisela uYise. (UNahume 1:2) Ngokwesibonelo, ngemva kokutshela abantu bakhe ababengalaleli ukuthi sebenze indlu yakhe yaba ‘lubhalu lwamasela,’ uJehova wathi: “Ngizathululela intukuthelo yami lolaka lwami endaweni le.”—UJeremiya 7:11, 20.
b Elinye ibhuku elikhuluma ngembali yamaJuda lithi kulesikhathi lapho abantu abazonda kakhulu ngenxa yokuthi amajuba ayethengiswa ethempelini ayesedula kakhulu. Intengo yamajuba yahle yehliswa ngamaphesenti angu-99! Kanti yayisiya kubani imali yonke le? Abanye abalobi bembali bathi imakethi yethempeli yayingeyemuli yoMphristi Omkhulu u-Anasi, yikho imuli le yayinothe kakhulu.—UJohane 18:13.
c AbaFarisi babesithi abantu abangafundanga, ababengawazi uMthetho, “baqalekisiwe.” (UJohane 7:49) Babesithi umuntu akumelanga afundise abantu abanjalo, enze labo ibhizimusi, adle labo kumbe akhuleke labo. Babengavumi ukuthi umuntu onjalo atshade lendodakazi yabo. Kubo ukwenza njalo kwakukubi ukwedlula ukuyiyekela idliwa zinyamazana. Babesithi abantu abanjalo abasoze bavuswe.
