1, 2. (a) Abantu abanengi bathi kuyini okungeke kwenzakale kodwa iBhayibhili lona lithini? (b) UJehova wayembona njani u-Abrahama futhi kungani wayembona njalo?

 UNGEZWA njani nxa uMdali wezulu lomhlaba engakubiza ngokuthi ungumngane wakhe? Abantu abanengi bangabona angani lokhu ngeke kwenzakale. Bakubona kungeke kwenzakale ukuthi umuntu olesono abe ngumngane kaJehova uNkulunkulu. Kodwa iBhayibhili lisitshela ukuthi singaba ngabangane bakhe.

² U-Abrahama wathola isibusiso leso. UJehova wathi u-Abrahama ‘ungumngane wakhe.’ (U-Isaya 41:8) Okwenza u-Abrahama waba ngumngane kaJehova yikuthi ‘wakholwa kuye.’ (UJakhobe 2:23) Lalamuhla uJehova uyafuna ukuba seduze lalabo abamthandayo futhi ufuna ukutshengisa ukuthi uyabathanda. (UDutheronomi 10:15) ILizwi lakhe lithi: “Sondelani kuNkulunkulu laye uzasondela kini.” (UJakhobe 4:8) Evesini le uJehova uyasinxusa ukuthi sisondele kuye futhi kukhona asithembisa khona.

3. UJehova usicela ukuthi senzeni njalo usithembisani?

³ UJehova usicela ukuthi sisondele kuye. Ulindele ukuthi sibe ngabangane bakhe njalo uzimisele ukusamukela. Usithembisa ukuthi nxa singasondela kuye, laye uzasondela kithi abe ‘ngumngane wethu omkhulu.’ (IHubo 25:14) Umngane oseduze ngumuntu okhululeka ukumthululela isifuba.

4. Ngonjani umngane oseduze futhi uJehova utshengisa njani ukuthi ungumngane onjalo?

⁴ Ulomngane oseduze yini ongamthululela isifuba?  Umngane onjalo ulendaba lawe futhi uyamthemba ngoba uyakwazi ukuthi uthembekile. Kuyakuthokozisa ukumxoxela izinto ozithandayo. Nxa ungamtshela inhlupho zakho uzwa wethulwe umthwalo osindayo. Lanxa kungakhanya angani abanye abakuzwisisi, yena uyakuzwisisa. UJehova laye ngumngane onjalo. Nxa ungasondela kuye uzakuba ngumngane wakho oseduze futhi okuqakathekisayo. Ulendaba lawe njalo uyakuzwisisa. (IHubo 103:14; 1 UPhetro 5:7) Ungakhululeka ukumtshela loba yini ngoba yena uqotho kulabo abaqotho kuye. (IHubo 18:25) Kodwa okwenza senelise ukuba ngabangane bakaNkulunkulu yikuthi yena uvule indlela yokuthi sisondele kuye.

5. Kuyini uJehova akwenzileyo ukuze senelise ukuba seduze laye?

⁵ Aluba uNkulunkulu kasincedisanga besingeke senelise ukusondela kuye ngoba silesono. (IHubo 5:4) Umphostoli uPhawuli wathi: “Nansi indlela uNkulunkulu atshengisa ngayo ukuthi uyasithanda: UKhristu wasifela siseseyizoni.” (KwabaseRoma 5:8) UJehova wathuma uJesu ukuthi ‘azonikela ngempilo yakhe ukuze ibe yinhlawulo yabanengi.’ (UMathewu 20:28) Nxa singatshengisa ukuthi siyakholwa ukuthi uJesu wasihlawulela sizakuba ngabangane bakaNkulunkulu. UNkulunkulu wavula indlela yokuthi sibe ngabangane bakhe ngoba “wasithanda kuqala.”—1 UJohane 4:19.

6, 7. (a) Sikwazi njani ukuthi uJehova ufuna simazi? (b) Kuyini uJehova akwenzileyo ukuze simazi?

⁶ Okunye uJehova akwenzileyo ukuze sibe ngabangane bakhe yikuziveza kithi. Phela nxa ufuna ukuba ngumngane womunye umuntu kuyabe kumele uqale umazi futhi ubuthande lobuntu bakhe. Yikho aluba uJehova kazange asitshele ngaye besingeke sibe seduze laye. Kodwa kazifihli ngoba ufuna simazi. (U-Isaya 45:19) Unika bonke  abantu ithuba lokufunda ngaye lanxa kwabanye bengakhanya bengasibantu balutho.—UMathewu 11:25.

⁷ Kuyini uJehova akwenzileyo ukuze simazi? Izinto azidalileyo zenza sazi ubuntu bakhe okugoqela amandla akhe amakhulu, inhlakanipho yakhe ejulileyo kanye lothando lwakhe olukhulu. (KwabaseRoma 1:20) Kodwa kukhona okunye asipha khona ukuze simazi. Wasipha iLizwi lakhe iBhayibhili eliveza ukuthi yena unguNkulunkulu onjani.

8. Indlela iBhayibhili elibhalwe ngayo itshengisa njani ukuthi uJehova uyasithanda?

⁸ Indlela iBhayibhili elibhalwe ngayo itshengisa ukuthi uJehova uyasithanda. Nxa likhuluma ngoJehova limchaza ngendlela eyenza kube lula ukuthi simzwisise. Lokhu kutshengisa ukuthi uyasithanda futhi ufuna simazi njalo simthande. Esikubala eBhayibhilini kwenza senelise ukusondela eduze laye. (IHubo 1:1-3) Ake sixoxe ngezinye izindlela uJehova aziveza ngazo kithi esebenzisa iLizwi lakhe.

9. Qamba amanye amavesi asitshela ngobuntu bukaNkulunkulu.

⁹ EBhayibhilini kulamavesi amanengi akhuluma ngobuntu bukaNkulunkulu. Nanzi ezinye izibonelo: “UJehova uthanda ukwahlulela okuhle.” (IHubo 37:28) “Ulamandla amakhulu.” (UJobe 37:23) ‘Uqotho.’ (UJeremiya 3:12) “Uhlakaniphile.” (UJobe 9:4) ‘UnguNkulunkulu olozwelo lesihawu, ophuza ukuthukuthela, ogcwele uthando oluqotho kanye leqiniso.’ (U-Eksodusi 34:6) ‘UJehova muhle futhi uzimisele ukuthethelela.’ (IHubo 86:5) Njengoba sifundile esahlukweni esidlulileyo, “uNkulunkulu uluthando” futhi lobu yibuntu bakhe obuqakatheke kakhulu. (1 UJohane 4:8) Ukucabangisisa ngobuntu bukaNkulunkulu kuzakwenza sifune ukuba ngabangane bakhe.

10, 11. (a) ILizwi likaNkulunkulu lisinceda njani ukuthi sizwisise ubuntu bakhe? (b) Yisiphi isibonelo esiseBhayibhilini esisinceda sizwisise amandla kaJehova amangalisayo?

 ¹⁰ IBhayibhili liphinda libe lezindaba ezitshengisa ukuthi uJehova ulobuntu obunjani. Izindaba lezi ziveza ubuntu bukaNkulunkulu ngendlela ecacileyo. Lokhu kwenza sibazi ubuntu bakhe besesisondela kuye. Cabanga ngesibonelo esilandelayo.

¹¹ IBhayibhili lisitshela ukuthi uNkulunkulu ‘ulamandla amangalisayo.’ (U-Isaya 40:26) Kodwa lokhu sikuzwisisa ngcono nxa singabala ngendlela uNkulunkulu akhulula ngayo abako-Israyeli eLwandle Olubomvu langendlela anakekela ngayo isizwe leso enkangala okweminyaka engu-40. Ngokwesibonelo siyenelisa ukubona ngelihlo lengqondo ulwandle lusehlukana njalo isizwe sama-Israyeli esasingaba labantu abangu-3 miliyoni, sihamba emhlabathini owomileyo amanzi eseyimiduli emaceleni. (U-Eksodusi 14:21; 15:8) Lokho uJehova abenzela khona sebesenkangala kutshengisa ukuthi wayebanakekela. Ngokwesibonelo wenza amanzi aphuma edwaleni futhi kwaba lokudla okwakunjengentanga ezimhlophe phezu komhlabathi. (U-Eksodusi 16:31; AmaNani 20:11) Lapha uJehova kasitshengisi ukuthi ulamandla kuphela kodwa uphinde asitshengise ukuthi uwasebenzisa ukuze ancede abantu bakhe. Kuyaduduza kakhulu ukwazi ukuthi imithandazo yethu iya kuNkulunkulu olamandla ‘oyindawo yethu yokucatsha, ophangisa ukusinceda nxa sisebunzimeni.’—IHubo 46:1.

12. UJehova usinceda njani ukuthi simzwisise?

 ¹² Asenelisi ukubona uJehova ngenxa yokuthi ungumoya kodwa kukhona akwenzileyo ukuze simazi. UNkulunkulu usichasisele ngendlela elula ukuthi yena unjani. Aluba kenzanga njalo bekungaba nzima ukumzwisisa njengoba nje kungaba nzima ukuthi umuntu owazalwa eyisiphofu azwisise ukuthi wena ukhangeleka njani lokuthi amehlo akho alombala onjani. Ngezinye izikhathi uJehova usebenzisa izifaniso lezinto esizaziyo ukuze asichasisele ukuthi yena unjani. Lanxa elomzimba womoya iBhayibhili limchasisa njengolomzimba ofanana lowethu abantu. a

13. U-Isaya 40:11 usitshelani ngoJehova futhi lokhu kusenza sizizwe njani?

¹³ Zwana ukuthi iBhayibhili lithini ngoJehova ku-Isaya 40:11. Lithi: “Uzakwelusa umhlambi wakhe njengomelusi, aqoqe imvana, azithwale esifubeni sakhe. Lezimvu ezimunyisayo uzazikhokhela kuhle.” Ivesi le ithi uJehova unjengomelusi othwala imvana “esifubeni sakhe.” Lokhu kutshengisa ukuthi uNkulunkulu uyenelisa ukuvikela lokusekela abantu bakhe, ngitsho lalabo ababuthakathaka. Nxa sithembekile kuye kasoze asitshiye, sizazizwa sivikelekile njengemvana esesifubeni sikamelusi. (KwabaseRoma 8:38, 39) Isembatho sikamelusi sasilesikhwama lapho ayengafaka khona imvana esanda kuzalwa ayiphathe esifubeni sakhe. Lokhu yikho kanye okwenziwa nguJehova uMelusi Omkhulu ngoba uyasiqakathekisa njalo  usinakekela kuhle. Kambe ngubani ongeke afune ukuthandwa ngalindlela?

14. Kungani uJehova esebenzise uJesu ukuze aziveze kithi ngendlela ecacileyo?

¹⁴ UJehova usivezela okunengi ngaye esebenzisa iNdodana yakhe uJesu. UJesu nguye kuphela ongalingisela uNkulunkulu ngendlela epheleleyo futhi nguye yedwa ongayiveza kuhle indlela acabanga ngayo lazizwa ngayo. Phela uJesu waphila loYise okweminyaka leminyaka ezinye izingilosi lakho konke okunye okwadalwayo kungakabi khona. (KwabaseKholose 1:15) UJesu wayemazi engamphumputhi uJehova, yikho wayengathi: “Akulamuntu okwaziyo ukuthi iNdodana ingubani ngaphandle kukaBaba, futhi kakho okwaziyo ukuthi uBaba ungubani ngaphandle kweNdodana lalowo iNdodana efuna ukumveza kuye.” (ULukha 10:22) Esesemhlabeni uJesu waveza ubuntu bukaYise ngezindlela ezimbili.

15, 16. Yiziphi izindlela uJesu aveza ngazo ubuntu bukaYise?

 ¹⁵ Okokuqala, izimfundiso zikaJesu zisinceda ukuthi simazi uYise. UJesu wachasisa ubuntu bukaJehova ngendlela esithinta inhliziyo. Ngokwesibonelo, ukuze atshengise ukuthi uNkulunkulu ulesihawu lokuthi uyazamukela izoni eziphendukayo, uJesu wasebenzisa umzekeliso wendodana yolahleko. Uyise wendodana le wathokoza kakhulu ngesikhathi eyibona isiza, yikho wayigijimela wafika wayigona wayiqabuza. (ULukha 15:11-24) UJesu wenza kwacaca ukuthi uJehova uthanda umuntu ngamunye ngoba wathi uYise ‘udonsela’ abantu kuye. (UJohane 6:44) Waphinda wathi uJehova unanzelela ngitsho lentaka eyodwa ewela phansi. UJesu wathi: “Lingesabi, lina liqakatheke kakhulu kulentaka ezinengi.” (UMathewu 10:29, 31) Sonke siyafuna sibili ukusondela kuNkulunkulu osinakekela kuhle kangaka.

¹⁶ Okwesibili okungasinceda simazi ngcono uJehova yikuhlolisisa lokho okwenziwa nguJesu. UJesu wamlingisela kuhle kakhulu uYise, yikho wayengathi: “Loba ngubani ongibonileyo usembonile loBaba.” (UJohane 14:9) Ngakho nxa sifunda ngendlela uJesu ayesenza ngayo layephatha ngayo abantu, kuyabe kungani sibona uJehova ngokwakhe. Le yindlela engcono kulazo zonke uJehova ayisebenzisileyo ukuthi asifundise ngaye. Kungani sisitsho njalo?

17. UJehova wenzeni ukuze simazi ngcono? Nika umzekeliso.

¹⁷ Ake sithi uzama ukuchasisela omunye umuntu ukuthi umusa kuyini. Ubungazama ukumchasisela ngamazwi kodwa ubengazwisisa ngcono nxa ungakhombela umuntu owenzela omunye umusa ubususithi, “Khonokho akwenzayo yiwo umusa.” UJehova laye usichasisele ngamazwi ukuthi yena unjani futhi wasitshengisa lesibonelo seNdodana yakhe ukuze simzwisise ngcono. Ukufunda  ngalokho uJesu akwenzayo kuzasinceda sibuzwisise ngcono ubuntu bukaJehova. Nxa sibala ngoJesu emaVangelini kuyabe kungathi uJehova ukhuluma lathi esithi: “Mina nginje.” Manje amaVangeli asitshelani ngoJesu?

18. UJesu watshengisa njani ukuthi ulamandla, uthanda ukwahlulela kuhle lokuthi ulenhlakanipho?

¹⁸ UJesu wamlingisela ngendlela epheleleyo uNkulunkulu. Wayelothando, lamandla, lenhlakanipho njalo esahlulela kuhle. Kazange awasebenzise kubi amandla akhe njengalokho okwenziwa ngabanye. (UMathewu 4:2-4) Wawasebenzisa ukwelapha imikhuhlane, ukunika abantu ukudla lokuvusa abafileyo. Wayekuthanda ukwahlulela kuhle. Wazonda kakhulu lapho ebona abathengisi beqila abantu. (UMathewu 21:12, 13) Kazange ababandlulule abayanga lababehlupheka kodwa wabancedisa wabaduduza. (UMathewu 11:4, 5, 28-30) Inhlakanipho kaJesu yayisedlula ekaSolomoni kodwa kazange azigqaje ngayo kumbe afune ukubukwa ngabantu. (UMathewu 12:42) Wayefundisa ngendlela elula, lecacileyo njalo ethinta inhliziyo.

19, 20. (a) UJesu watshengisa njani ukuthi uyabathanda abantu? (b) Kuyini okumele sikukhumbule nxa sifunda ngoJesu?

¹⁹ UJesu wayebathanda kakhulu abantu. Kwakumzwisa ubuhlungu ukubabona behlupheka ngoba wayebathanda. Kwakumalela ukuthi angabona umuntu ohluphekayo ayekele ukumncedisa. (UMathewu 14:14) Welapha abagulayo futhi wanika ababelambile ukudla. Kodwa kulendlela eqakatheke kakhulu uJesu atshengisa ngayo ukuthi ulesihawu. Wafundisa abantu ngoMbuso kaNkulunkulu, wabanceda ukuthi bawuthande lokuthi bawamukele. Phela uMbuso lo yiwo ozaletha izibusiso ezingapheliyo ebantwini. (UMakho 6:34; ULukha 4:43) Lanxa uJesu wenza konke lokhu, into eqakatheke kulazo zonke ayenzayo etshengisa ukuthi uyasithanda yikuvuma  ukunikela ngokuphila kwakhe ngenxa yethu.—UJohane 15:13.

²⁰ UJesu wayebathanda kakhulu abantu futhi elozwelo, yikho labo babemthanda futhi bezizwa bekhululekile nxa belaye kungelani lokuthi bangobani. (UMakho 10:13-16) Yikho nxa ufunda ngoJesu futhi ucabangisisa ngobuntu bakhe, khumbula ukuthi lokho kufanana lokuthi ufunda ngoYise uJehova.—KumaHebheru 1:3.

21, 22. Singamdinga njani uJehova futhi ibhuku leli lizasinceda njani?

²¹ Indlela uJehova aziveza ngayo eLizwini lakhe yenza singathandabuzi ukuthi ufuna sibe seduze laye. Kodwa kasibambi ngamandla ukuthi sibe ngabangane bakhe. Siyazikhethela ukuthi siyafuna yini ukumdinga “esatholakala.” (U-Isaya 55:6) Ukudinga uJehova kugoqela ukufunda ngobuntu bakhe kanye lezindlela zakhe. Ibhuku leli olibalayo khathesi lizakuncedisa ukuthi umazi kuhle.

²² Uzananzelela ukuthi ibhuku leli lehlukanisiwe laba zingxenye ezine. Enye ikhuluma ngamandla kaJehova, eyinye ngokwahlulela kwakhe okuhle, eyinye ngenhlakanipho  yakhe. Eyokucina ikhuluma ngothando lwakhe. Ingxenye ngayinye ilesethulo esichasisa ubuntu bukaJehova okuzaxoxwa ngabo. Izahluko zokuqala zengxenye ngayinye ziveza ukuthi uJehova utshengise njani ukuthi ulobuntu lobo. Kuphinda kube lesahluko esixoxa ngendlela uJesu amlingisela ngayo uJehova, lesahluko esinceda thina sibone ukuthi singamlingisela njani.

23, 24. (a) Chasisa ukuthi ibhokisi elithi “Imibuzo Ongacabangisisa Ngayo” ngelani. (b) Ukucabangisisa ngalokho esikufundayo kusinceda njani ukuthi sisondele eduze loNkulunkulu?

²³ Kusukela esahlukweni lesi kulebhokisi elilesihloko esithi “Imibuzo Ongacabangisisa Ngayo.” Ngokwesibonelo, khangela  ibhokisi elisekhasini 24. Imibhalo lemibuzo elapho ayenzelwanga ukuhlola lokho okufundwe esahlukweni, kodwa ngeyokukunceda ukuthi ucabangisise ngemicijo eqakathekileyo. Ungalisebenzisa njani ibhokisi lelo? Qala ngokubala amavesi ubusuphendula umbuzo, ucabangisise ngezimpendulo zakhona. Ungachwayisisa okunengi ngalolodaba. Zibuze eminye imibuzo enjengale: ‘Engikubalileyo kungifundisani ngoJehova? Kunginceda njani? Ngingakusebenzisa njani ukunceda abanye?’

²⁴ Ukucabangisisa kuyasinceda siqhubeke sisondela kuJehova. Kungani sisitsho njalo? IBhayibhili litshengisa ukuthi ukucabangisisa kuyayibumba inhliziyo yomuntu. (IHubo 19:14) Nxa singacabangisisa, lokho esiyabe sikufundile ngoNkulunkulu kuyathophela ezinhliziyweni zethu, kutshintshe indlela esicabanga ngayo lesiziphatha ngayo. Kwenza simthande kakhulu uNkulunkulu besesizimisela ukumthokozisa. Uyabe esengumngane wethu esimthanda ukwedlula bonke. (1 UJohane 5:3) Okungasinceda ukuthi sibe ngabangane bakaJehova yikwazi ubuntu bakhe lezindlela zakhe. Kasiqaleni ngokuxoxa ngobungcwele bukaNkulunkulu ukuze sibone ukuthi ubuntu lobu businceda njani ukuthi sisondele kuye.