AmaNani 14:1-45
14 Ngemva kwalokho bonke abantu bako-Israyeli bahlaba umkhosi njalo baqhubeka bekhala futhi belila ubusuku bonke.+
2 Bonke abako-Israyeli baqalisa ukukhonona ngoMosi lo-Aroni+ njalo bonke bakhuluma kubi ngabo besithi: “Ngabe sahle sazifela elizweni laseGibhithe kumbe ngabe sihle safela khonapha enkangala!
3 Kungani uJehova esilethe endaweni le ukuthi sizobulawa ngenkemba?+ Abantwabethu lamakhosikazi ethu bazathunjwa.+ Kungcono sizibuyelele eGibhithe.”+
4 Basebesithi komunye lomunye: “Asikhetheni umkhokheli sibuyele eGibhithe!”+
5 UMosi lo-Aroni bathi bekuzwa lokho baguqa bathi mbo phansi phambi kwebandla lonke lako-Israyeli elalibuthene.
6 UJoshuwa+ indodana kaNuni loKhalebhi+ indodana kaJefune, abanye balabo abahamba bayahlola ilizwe badabula izigqoko zabo
7 njalo bakhuluma labantu bonke bako-Israyeli bathi: “Ilizwe ebesiyelihlola lilizwe elihle okumangalisayo.+
8 Nxa uJehova ethokoza ngathi uzasingenisa elizweni leli loba sekutheni njalo uzasinika lona, ilizwe eligeleza uchago loluju.+
9 Kodwa akumelanga lihlamukele uJehova njalo lingabesabi abantu abaselizweni leli+ ngoba sizabatshaya sibabhuqe.* Isivikelo sabo sisusiwe kubo futhi uJehova ulathi.+ Lingabesabi.”
10 Lanxa kunjalo abantu bonke basebekhuluma ngokubakhanda ngamatshe.+ Kodwa inkazimulo kaJehova yabonakala etendeni lokuhlangana kubo bonke abantu bako-Israyeli.+
11 UJehova wasesithi kuMosi: “Kuzaze kube nini abantu laba bengangihloniphi?+ Kuze kube nini belokhu bengelakholo kimi lanxa ngenze izimangaliso ezinengi kangaka phakathi kwabo?+
12 Yekela ngibatshaye ngesifo esibuhlungu njalo ngibadudule, besengisenza wena ube yisizwe esikhulu futhi esilamandla kulabo.”+
13 Kodwa uMosi wathi kuJehova: “Wakhipha abantu bakho phakathi kwamaGibhithe ngamandla akho, yikho nxa ungenza njalo amaGibhithe azakuzwa okwenzileyo,+
14 abesekhuluma ngakho ebantwini abahlala elizweni leli. Abantu laba labo sebezwile ukuthi wena Jehova uphakathi kwabantu bakho+ lokuthi ubonakale kubo ubuso ngobuso.+ Wena unguJehova njalo iyezi lakho limi phezu kwabo. Emini uhamba phambi kwabo usensikeni yeyezi futhi lebusuku uhamba phambi kwabo usensikeni yomlilo.+
15 Nxa ungababulala abantu bonke laba ngasikhathi sinye, izizwe ezezwa ngodumo lwakho zizakuthi:
16 ‘UJehova wehlulekile ukuletha abantu laba elizweni ayefunge ukuthi uzabanika lona yikho ebabulalele enkangala.’+
17 Ngakho ngiyacela Jehova, kwangathi amandla akho angaba makhulu njengoba wathembisa wathi:
18 ‘UJehova uyaphuza ukuthukuthela njalo ugcwele uthando oluqotho,+ uxolela amacala leziphambeko. Kodwa kayekeli ukumjezisa umuntu olecala njalo ujezisa amadodana ngenxa yecala laboyise kuze kufike kusizukulwane sesithathu lesesine.’+
19 Ngicela uthethelele abantu laba isiphambeko sabo, ubatshengise uthando* lwakho oluqotho, njengoba nje ubuvele ubaxolela kusukela eGibhithe kuze kube khathesi.”+
20 UJehova wasesithi: “Sengibathethelela njengoba usitsho.+
21 Kodwa ngifunga ngokuphila kwami ngithi, umhlaba wonke uzagcwala inkazimulo kaJehova.+
22 Lanxa kunjalo kakho loyedwa umuntu obone inkazimulo yami lezimangaliso zami+ engizenze eGibhithe lengizenze enkangala kodwa waqhubeka engilinga+ izikhathi lezi ezilitshumi futhi engalilaleli ilizwi lami+
23 ozalibona ilizwe engafunga ngalo kubokhokho babo. Kakho loyedwa ongangihloniphiyo ozalibona.+
24 Kodwa ngenxa yokuthi inceku yami uKhalebhi+ itshengise ukuthi itshiyene labanye njalo ibilokhu ingilandela ngenhliziyo yonke, ngizayingenisa elizweni ehambe kulo futhi abantwabayo bazalithatha libe ngelabo.+
25 Njengoba ama-Amaleki lamaKhenani+ ehlala esigodini, kusasa kumele libuyele emuva, liqonde enkangala ngendlela eya eLwandle Olubomvu.”+
26 UJehova wasesithi kuMosi lo-Aroni:
27 “Kuzaze kube nini abantu laba abangalunganga belokhu bekhonona bengisola?+ Ngibazwile abantu bako-Israyeli bekhonona ngami.+
28 Batshele uthi, ‘“Ngifunga ngokuphila kwami,” kutsho uJehova, “Ngizalenza khona kanye engizwe likukhuluma!+
29 Lizafela khonapha enkangala,+ lonke elabhaliswayo kusukela kwabaleminyaka engu-20 kusiya phezulu, lonke nje ebelikhonona ngami.+
30 Kakho phakathi kwenu ozangena elizweni engafunga ngathi* lizahlala kulo+ ngaphandle kukaKhalebhi indodana kaJefune loJoshuwa indodana kaNuni.+
31 “‘“Abantwabenu ebelisithi bazathunjwa+ yibo engizabangenisa kulo njalo bazalazi ilizwe lelo elilalileyo.+
32 Kodwa lina lizafela khonapha enkangala.
33 Amadodana enu azakuba ngabelusi okweminyaka engu-40+ enkangala njalo azahlawula ngenxa yezenzo zenu zokungathembeki, lize life lonke enkangala.+
34 Lizathwala nzima okweminyaka engu-40+ ngenxa yamaphutha enu, okwesikhathi esihambelana lamalanga angu-40+ elahlola ngawo ilizwe, ilanga elilodwa limela umnyaka, lelanga elilodwa limela umnyaka ukuze likwazi ukuthi kutshoni ukuphikisana lami.
35 “‘“Mina Jehova sengikhulumile. Lokhu yikho engizakwenza ebantwini bonke laba abangalunganga ababuthane ndawonye ukuze bamelane lami: Bazafela khonapha baphelele kuyonale inkangala.+
36 Amadoda abethunywe nguMosi ukuthi ayehlola ilizwe njalo abangele ukuthi bonke abantu bakhonone ngaye ngokubika umbiko omubi mayelana lalelolizwe,+
37 wona kanye amadoda abuye lombiko omubi mayelana lelizwe azatshaywa afe phambi kukaJehova.+
38 Kodwa uJoshuwa indodana kaNuni loKhalebhi indodana kaJefune abanye balabo abahambe bayahlola ilizwe bazaqhubeka bephila.”’”+
39 UMosi wathi etshela bonke abantu bako-Israyeli amazwi la baqalisa ukukhala kakhulu.
40 Kanti njalo bavuka ekuseni kakhulu bazama ukuya esiqongweni sentaba bathi: “Sonile, kodwa khathesi sesizimisele ukuya endaweni uJehova akhulume ngayo.”+
41 UMosi wabaphendula wathi: “Kungani lisephula umthetho kaJehova? Elikwenzayo akusoze kuphumelele.
42 Lingahambi ngoba uJehova kakho phakathi kwenu futhi lizanqotshwa yizitha zenu.+
43 Ama-Amaleki lamaKhenani alilindele ukuze alihlasele+ njalo lizabulawa ngenkemba. UJehova kasoze abe lani ngoba limhlamukele uJehova.”+
44 Lanxa kunjalo baqinisa amakhanda bakhwela entabeni+ kodwa ibhokisi lesivumelwano sikaJehova alizange lisuke phakathi laphakathi kwezihonqo futhi loMosi kasukanga.+
45 Ama-Amaleki lamaKhenani ayehlala kuleyontaba asesehla abahlasela njalo abaxotshanisa basabalala baze bayafika eHoma.+
Amabala angaphansi
^ NgesiHebheru, “bayisinkwa kithi.”
^ Kumbe, “ubukhulu bothando.”
^ NgesiHebheru, “engaphakamisa isandla sami ngisithi.”
