AmaNani 21:1-35
21 Kwathi inkosi ye-Aradi engumKhenani+ eyayihlala eNegebhi isizwa ukuthi abako-Israyeli bayeza ngendlela eya e-Atharimi, yabahlasela njalo yathumba abanye babo.
2 Ngakho u-Israyeli wenza isifungo lesi kuJehova, wathi: “Nxa unganikela abantu laba esandleni sami, ngizatshabalalisa amadolobho abo loba sekutheni.”
3 Lakanye uJehova walilalela ilizwi labantu bako-Israyeli njalo wanikela amaKhenani kubo, bawatshaya bawabhuqa kanye lamadolobho awo. Ngakho banika indawo leyo ibizo bathi yiHoma.*+
4 Bathi beqhubeka ngohambo besuka entabeni iHori+ ngendlela eqonda eLwandle Olubomvu ukuze bakhekheleze ilizwe lako-Edomi,+ abantu badinwa ngenxa yalolohambo.
5 Ngakho baqhubeka bekhuluma kubi ngoNkulunkulu langoMosi+ besithi: “Kungani lasikhipha eGibhithe ukuthi sizofela lapha enkangala? Akulakudla lamanzi okunatha+ futhi sesisizonda* isinkwa lesi esingelancedo.”+
6 UJehova wasethumela inyoka eziyingozi* ebantwini njalo zaqhubeka zibaluma abantu bako-Israyeli kwafa abanengi.+
7 Ngakho abantu baya kuMosi bathi kuye: “Sonile ngokukhuluma kubi ngoJehova kanye lawe.+ Ncenga uJehova akhiphe inyoka lezi kithi.” UMosi wasebancengela abantu.+
8 UJehova wasesithi kuMosi: “Yenza umfanekiso wenyoka eyingozi,* uyifake phezu kwesigodo. Loba ngubani ozalunywa kuzamele ayikhangele ukuze aqhubeke ephila.”
9 UMosi wahle wenza inyoka yekhopha+ wayifaka phezu kwesigodo+ futhi kwakusithi loba ngubani angalunywa yinyoka akhangele inyoka yekhopha abesesila.+
10 Ngemva kwalokho abako-Israyeli basuka bayakhempa e-Obhothi.+
11 Basebesuka e-Obhothi bayakhempa e-Iye-abharimi+ enkangala ekhangelane lakoMowabi ngasempumalanga.
12 Basuka lapho baqhubeka ngohambo baze bayakhempa eduze kwesigodi seZeredi.+
13 Bathi besuka lapho bahamba baze bayakhempa esabelweni se-Arinoni+ esisenkangala esukela emngceleni wama-Amori, ngoba i-Arinoni isemngceleni wakoMowabi phakathi kwamaMowabi lama-Amori.
14 Yikho ibhuku lezimpi zikaJehova likhuluma “ngeWahebi eseSufa kanye lezigodi ze-Arinoni,
15 langeliwa elisezigodini elihamba lize liyefika emangweni we-Ari, litshaye lize liyehlangana lomngcele wakoMowabi.”
16 Ngemva kwalokho baya eBheri. Lo yiwo umthombo uJehova akhuluma ngawo kuMosi wathi: “Buthanisa abantu ukuze ngibanike amanzi.”
17 Ngalesosikhathi abako-Israyeli bahlabela ingoma ethi:
“Gobhoza we mthombo!—Wuhlabeleleni!*
18 Umthombo owagejwa yiziphathamandla, owembiwa ngabahlonitshwa babantu,Ngentonga yomlawuli langentonga zabo.”
Bathi besuka enkangala baya eMathana,
19 basuka eMathana baya eNahaliyeli, basebesuka eNahaliyeli baya eBhamothi.+
20 Basuka eBhamothi baqhubeka baze bayafika esigodini esisemangweni* wakoMowabi+ esiqongweni sePhisiga+ esikhangelane leJeshimoni.*+
21 Abako-Israyeli basebethuma izithunywa kuSihoni inkosi yama-Amori besithi:+
22 “Sicela usivumele siqume phakathi kwelizwe lakho. Asisoze siphambukele kuloba yiphi insimu kumbe insimu yamagilebisi njalo asisoze sinathe amanzi kuloba yiwuphi umgodi. Sizahamba ngoMgwaqo Wenkosi size siphume elizweni lakho.”+
23 Kodwa uSihoni kazange avume ukuthi abako-Israyeli badlule phakathi kwelizwe lakhe. Waqoqa bonke abantu bakhe waphuma wayahlasela abantu bako-Israyeli enkangala njalo wafika eJahazi waqala ukulwa lama-Israyeli.+
24 Lanxa kunjalo abako-Israyeli bamnqoba ngenkemba,+ basebethatha ilizwe lakhe+ kusukela e-Arinoni+ kuze kuyefika eJabhokhi+ eduze kwama-Amoni ngoba iJazeri+ isemngceleni welizwe lama-Amoni.+
25 Ngakho abako-Israyeli bawathatha wonke amadolobho la njalo baqalisa ukuhlala kuwo wonke amadolobho ama-Amori,+ eHeshibhoni lakuwo wonke amadolobho akhelane layo.*
26 Phela iHeshibhoni yayilidolobho likaSihoni inkosi yama-Amori, eyalwa lenkosi yamaMowabi yayithathela lonke ilizwe layo kwaze kwayafika e-Arinoni.
27 Lapha yikho okwavela khona inkondlo yokuchothoza ethi:
“Wozani eHeshibhoni.
Idolobho likaSihoni kalakhiwe njalo limiswe liqine.
28 Phela kuphume umlilo eHeshibhoni, ilangabi elivela edolobheni likaSihoni.
Watshisa walobisa i-Ari yakoMowabi, amakhosi ezindawo eziphakemeyo ze-Arinoni.
29 Maye kuwe Mowabi! Awu bantu bakaKhemoshi lizatshabalaliswa!+
Wenza ukuthi amadodana akhe abe yiziphepheli lokuthi amadodakazi akhe athunjwe nguSihoni inkosi yama-Amori.
30 Asibahlaseleni!
IHeshibhoni izatshabalaliswa kuze kuyefika eDibhoni,+Asiyitshayeni siyibhuqe size siyefika eNofa,Umlilo uzamemetheka uze uyefika eMedebha.”+
31 Ngakho abantu bako-Israyeli baqalisa ukuhlala elizweni lama-Amori.
32 UMosi wasethuma amanye amadoda ukuthi ayehlola iJazeri.+ Bathumba amadolobho akhelane layo,* baxotsha lama-Amori ayehlala khona.
33 Ngemva kwalokho baphenduka bangena indlela eya eBhashani. U-Ogi+ inkosi yaseBhashani wasephuma lalo lonke ibutho lakhe ukuze ayekulwa labo e-Edreyi.+
34 UJehova wathi kuMosi: “Ungamesabi+ ngoba ngizamnikela esandleni sakho yena labo bonke abantu bakhe kanye lelizwe lakhe+ futhi uzamenza khona kanye okwenze kuSihoni inkosi yama-Amori ebihlala eHeshibhoni.”+
35 Ngakho baqhubeka besilwa laye lamadodana akhe labo bonke abantu bakhe, baze bababulala bonke baphela du+ basebethatha ilizwe lakhe.+
Amabala angaphansi
^ Ibizo leli litsho ukuthi, “Ukutshaya utshabalalise.”
^ Kumbe, “sesisenyanya.”
^ Kumbe, “ezilobuhlungu obubulalayo.”
^ Kumbe, “elobuhlungu obubulalayo.”
^ Kumbe, “Wuvumeleni ngengoma!”
^ Ezinye inguqulo zithi, “lenkangala; lendawo elugwadule.”
^ NgesiHebheru, “eguswini lakoMowabi.”
^ Kumbe, “ayigombolozeleyo.”
^ Kumbe, “ayeyigombolozele.”
