AmaNani 5:1-31
5 UJehova waqhubeka ekhuluma loMosi wathi:
2 “Tshela abako-Israyeli ukuthi bakhiphele phandle kwezihonqo wonke umuntu olobulephero+ laye wonke umuntu ophuma ubomvu+ kanye laye wonke umuntu ongcoliswe yisidumbu somuntu.+
3 Bakhipheleni ngaphandle kungelani lokuthi ngumuntu wesilisa kumbe owesifazana. Kumele libakhiphele ngaphandle ukuze bangangcolisi+ izihonqo zalabo engihlala phakathi kwabo.”+
4 Ngakho abako-Israyeli bakwenza ababekutsheliwe babakhiphela phandle kwezihonqo. Benza lokho uJehova ayekutshilo kuMosi.
5 UJehova waqhubeka ekhuluma loMosi wathi:
6 “Tshela abako-Israyeli uthi, ‘Nxa umuntu wesilisa loba owesifazana angenza loba yisiphi isono esijayelekileyo ebantwini, enze ukungathembeki kuJehova, lowomuntu uyabe eselecala.+
7 Kumele avume+ isono asenzileyo njalo alethe imbadalo elingana lecala alenzileyo futhi angezelele amaphesenti angu-20 kuyo.+ Imbadalo leyo kumele ayinike lowo amoneleyo.
8 Kodwa nxa owonelweyo engelaso isihlobo esiseduze esingemukela imbadalo leyo, kumele ibuyiselwe kuJehova njalo izakuba ngeyomphristi, ngaphandle kwenqama azahlawulela ngayo lowo owonileyo.+
9 “‘Yonke iminikelo engcwele+ elethwa ngabantu bako-Israyeli kumphristi kumele ibe ngeyakhe.+
10 Izinto ezingcwele ezilethwa ngumuntu ngamunye zizaqhubeka zingezakhe.* Loba yini umuntu ayinika umphristi, izakuba ngeyomphristi.’”
11 UJehova waqhubeka ekhuluma loMosi wathi:
12 “Khuluma labantu bako-Israyeli uthi kubo, ‘Nxa owesifazana angaphambuka angathembeki kumkakhe,
13 alale lenye indoda+ njalo indoda yakhe ingaze yakwazi akwenzileyo futhi kuhlale kuyimfihlo, nxa ezingcolisile kodwa kungelabufakazi bokuthi ukwenzile lokho njalo engazange abanjwe, nanku okumele kwenziwe:
14 Kungelani lokuthi indoda yakhe ibe lobukhwele yamcabangela ukuthi kathembekanga yena ezingcolisile kumbe nxa ibe lobukhwele yamcabangela ukuthi kathembekanga yena engazange azingcolise,
15 indoda leyo kumele ilethe umkayo kumphristi kanye lomnikelo wakhe wefulawa yebhali, oyingxenye yetshumi ye-efa.* Akumelanga ithele amafutha kuwo kumbe ifake inhlaka yokwenza impepha kuwo ngoba ngumnikelo wamabele wobukhwele, umnikelo wamabele wokukhumbuza ukuthi kulecala elenziweyo.
16 “‘Umphristi uzamsondeza phambili, ammise phambi kukaJehova.+
17 Umphristi uzathatha amanzi angcwele ngembiza yebumba njalo uzacupha inhlabathi phansi ethabanikeli ayifake emanzini lawo.
18 Umphristi uzamisa owesifazana lowo phambi kukaJehova, abesemthukulula inwele njalo afake umnikelo wamabele wesikhumbuzo ezandleni zakhe, okutsho umnikelo wamabele wobukhwele,+ umphristi yena uzathwala amanzi ababayo aletha isiqalekiso.+
19 “‘Umphristi uzamfungisa owesifazana lo athi kuye: “Nxa ungazange ulale lenye indoda wena ulomkakho+ njalo ungaphambukanga wazingcolisa, amanzi la ababayo aletha isiqalekiso kawangakulimazi.
20 Kodwa nxa uphambukile wazingcolisa wena ulomkakho njalo walala lenye indoda+ ngaphandle komkakho—”
21 Umphristi uzakuthi owesifazana lowo afunge isifungo esilesiqalekiso njalo uzakuthi kuye: “Sengathi uJehova angenza ukuthi ibizo lakho lisetshenziswe nxa kuqalekiswa lanxa kufungwa phakathi kwabantu bakini, njengoba uJehova esenza ukuthi ithangazi* lakho liwe* lokuthi isisu sakho sikhukhumale.
22 Amanzi la aletha isiqalekiso azangena emathunjini akho enze ukuthi isisu sakho sikhukhumale lokuthi ithangazi* lakho liwe.”* Lapho-ke owesifazana kumele athi: “Ameni! Ameni!”*
23 “‘Umphristi kumele abhale iziqalekiso lezi ebhukwini njalo agezise iziqalekiso lezo ngamanzi ababayo.
24 Ngemva kwalokho uzanathisa owesifazana lowo amanzi ababayo aletha isiqalekiso futhi amanzi lawo aletha isiqalekiso azangena kuye abangele ubuhlungu.
25 Umphristi kumele athathe umnikelo wamabele wobukhwele+ esandleni sowesifazana awuzunguze phambi kukaJehova njalo uzawusondeza eduze kwe-alithare.
26 Umphristi uzathatha umnikelo wamabele ogcwala isandla ube yingxenye emela wonke umnikelo lowo, abesewutshisa uthunqe phezu kwe-alithare.+ Ngemva kwalokho uzanathisa owesifazana lowo amanzi.
27 Nxa kuyikuthi owesifazana lowo uzingcolisile, wangathembeki endodeni yakhe, umphristi uzakuthi esemnathisa amanzi aletha isiqalekiso, amanzi lawo azangena kuye abangele ubuhlungu njalo isisu sakhe sizakhukhumala lethangazi* lakhe liwe* futhi ibizo lowesifazana lowo lizasetshenziswa nxa kuqalekiswa ebantwini bakibo.
28 Kodwa nxa owesifazana lowo ehlanzekile, engazange azingcolise, uzakhululeka esijezisweni esinjalo futhi uzakwenelisa ukuzithwala abe labantwana.
29 “‘Lo yiwo-ke umthetho ophathelane lobukhwele+ ozasebenza nxa owesifazana angaphambuka azingcolise yena elendoda,
30 loba nxa indoda ingaba lobukhwele icabangele ukuthi umkayo wenze ukungathembeki. Kumele imlethe phambi kukaJehova njalo umphristi kufanele enze konke okusemthethweni lo kuye.
31 Indoda ayisoze ibe lecala kodwa umfazi wayo uzajeziswa ngenxa yecala lakhe alenzileyo.’”
Amabala angaphansi
^ Lapha kungabe kutshiwo umphristi.
^ Ingxenye yetshumi ye-efa ilingana lamalitha angu-2,2. Khangela iSengezo ku-B14.
^ Lapha kungabe kutshiwo isitho sokuzala.
^ Lokhu kungabe kusitsho ukuswela inzalo.
^ Lapha kungabe kutshiwo isitho sokuzala.
^ Lokhu kungabe kusitsho ukuswela inzalo.
^ Kumbe, “Akube njalo! Akube njalo!”
^ Lapha kungabe kutshiwo isitho sokuzala.
^ Lokhu kungabe kusitsho ukuswela inzalo.
