AmaNani 8:1-26
8 UJehova wakhuluma loMosi wathi:
2 “Khuluma lo-Aroni uthi kuye, ‘Nxa ulayitha izibane, izibane eziyisikhombisa kumele zikhanyise indawo ephambi koluthi lwesibane.’”+
3 Ngakho u-Aroni wakwenza lokho. Walayitha izibane ukuze zikhanyise indawo ephambi koluthi lwesibane+ njengoba nje uJehova wayetshilo kuMosi.
4 Nansi indlela uluthi lwesibane olwalwenziwe ngayo: Lwalwenziwe ngegolide elikhandiweyo,+ kusukela emqwayini walo kuze kuyefika engatsheni zalo. Uluthi lwesibane lwalwenziwe kulandelwa umbono+ uMosi ayewutshengiswe nguJehova.
5 UJehova waphinda wakhuluma loMosi wathi:
6 “Thatha amaLevi phakathi kwabantu bako-Israyeli uwahlambulule.+
7 Nansi indlela okumele uwahlambulule ngayo: Wafafaze ngamanzi okuhlambulula isono njalo kumele aphuce imizimba yawo ngereza, awatshe lempahla zawo futhi azihlambulule.+
8 Ngemva kwalokho kumele athathe ijongosi+ kanye lomnikelo walo wamabele+ wefulawa ecolekileyo ehlanganiswe lamafutha njalo kumele uthathe elinye ijongosi elizakuba ngumnikelo wesono.+
9 Kumele ulethe amaLevi phambi kwetende lokuhlangana njalo ubuthanise bonke abantu bako-Israyeli.+
10 Nxa ususethula amaLevi phambi kukaJehova, abantu bako-Israyeli kufanele babeke izandla zabo phezu kwawo.+
11 U-Aroni kumele anikele* amaLevi phambi kukaJehova njengomnikelo wokuzunguzwa+ ovela ebantwini bako-Israyeli njalo azakwenza umsebenzi kaJehova.+
12 “Ngemva kwalokho amaLevi azabeka izandla zawo phezu kwamakhanda enkunzi lezo+ njalo enye kumele inikelwe kuJehova ibe ngumnikelo wesono, enye ibe ngumnikelo wokutshiswa ukuze amaLevi athethelelwe.*+
13 Kumele ulethe amaLevi uwamise phambi kuka-Aroni lamadodana akhe njalo uwanikele* kuJehova njengomnikelo wokuzunguzwa.
14 Kumele wehlukanise amaLevi phakathi kwabantu bako-Israyeli njalo amaLevi azakuba ngawami.+
15 Ngemva kwalokho amaLevi azabuya azosebenza etendeni lokuhlangana. Le yiyo indlela okufanele uwahlambulule ngayo futhi uwanikele* njengomnikelo wokuzunguzwa.
16 AmaLevi ayizipho engiziphiweyo ezivela ebantwini bako-Israyeli. Ngizawathatha abe ngawami, esikhundleni sawo wonke amazibulo ako-Israyeli.+
17 Phela wonke amazibulo ako-Israyeli ngawami kungelani lokuthi ngawabantu kumbe ngawezifuyo.+ Ngazehlukanisela* wona ukuthi abe ngawami ngelanga engabulala ngalo wonke amazibulo elizweni laseGibhithe.+
18 Ngizathatha amaLevi esikhundleni sawo wonke amazibulo ako-Israyeli.
19 U-Aroni lamadodana akhe ngizabanika amaLevi njengezipho ezivela ebantwini bako-Israyeli. Azakwenza umsebenzi etendeni lokuhlangana+ emele abako-Israyeli njalo abahlawulele ukuze abantu bako-Israyeli bangehlelwa luhlupho+ ngenxa yokusondela endaweni engcwele.”
20 UMosi lo-Aroni kanye labo bonke abako-Israyeli bakwenza lokhu kumaLevi. Bakwenza belandela konke uJehova ayekutshele uMosi mayelana lamaLevi, lokhu yikho kanye abako-Israyeli abakwenzayo kuwo.
21 Ngakho amaLevi azihlambulula awatsha lempahla zawo,+ u-Aroni wasewanikela* njengomnikelo wokuzunguzwa phambi kukaJehova,+ wawahlawulela ukuze awahlambulule.+
22 Ngemva kwalokho amaLevi angena ukuze enze umsebenzi wawo etendeni lokuhlangana phambi kuka-Aroni lamadodana akhe. Benza khona kanye uJehova ayekutshilo kuMosi mayelana lamaLevi.
23 UJehova wasekhuluma loMosi wathi,
24 “Nanku okufanele kwenzakale kumaLevi: Loba yiphi indoda eleminyaka engu-25 kusiya phezulu kumele ingene eqenjini lalabo abasebenza etendeni lokuhlangana.
25 Kodwa ingedlulisa iminyaka engu-50 kumele iphume eqenjini lelo futhi ngeke isayenza inkonzo.
26 Engakwenza nje yikuncedisa abafowabo nxa besenza imisebenzi etendeni lokuhlangana kodwa akumelanga yenze inkonzo kuleyondawo. Lokhu yikho okufanele ukwenze mayelana lamaLevi kanye lemisebenzi yawo.”+
Amabala angaphansi
^ NgesiHebheru, “azunguze.”
^ Kumbe, “enzelwe ukubuyisana.”
^ NgesiHebheru, “uwazunguze.”
^ NgesiHebheru, “uwazunguze.”
^ Kumbe, “Ngazingcwelisela.”
^ NgesiHebheru, “wawazunguza.”
