Kwabase-Efesu 3:1-21
3 Yikho mina Phawuli ngiyisibotshwa+ sikaKhristu uJesu ngenxa yokunceda lina bantu bezinye izizwe.
2 Selizwile ukuthi nganikwa+ umsebenzi wokulincedisa ukuthi lamukele umusa omkhulu kaNkulunkulu.
3 Imfihlo engcwele yavezwa kimi ngesambulo njengoba nje ngike ngalibhalela ngamafitshane.
4 Ngakho nxa selibala incwadi le, lizananzelela ukuthi ngiyayizwisisa imfihlo engcwele+ kaKhristu.
5 Kwezinye izizukulwane imfihlo le kayizange ivezwe ebantwini ngendlela esivezwe ngayo ngomoya kubaphostoli abangcwele lakubaphrofethi.+
6 Imfihlo le ngeyokuthi nxa abantu bezinye izizwe bangathola izindaba ezinhle futhi bamanyane loKhristu uJesu, bazakuba zindlalifa kanye laye, babe yizitho zomzimba munye+ njalo bamukele izinto lathi esazithenjiswa nguNkulunkulu.
7 Ngaba yinceku yalokhu ngenxa yesipho samahala somusa omkhulu uNkulunkulu angenzela wona lapho enginika amandla akhe.+
8 Mina engimncane kulomncane kulabo bonke abangcwele+ ngenzelwa umusa omkhulu+ ukuze ngitshumayele ebantwini bezinye izizwe izindaba ezinhle eziphathelane lenotho kaKhristu engeke ilinganiswe,
9 ngiphinde ngenze lokuthi wonke umuntu abone ukuthi iphathwa njani imfihlo engcwele+ ebifihlwe kuNkulunkulu kusukela kudaladala, kuye yena owadala zonke izinto.
10 Lokhu kwenzelwa ukuthi khathesi, kusetshenziswa ibandla,+ ohulumende leziphathamandla ezisezulwini bakwazi ukuhlakanipha kukaNkulunkulu okutshengiswa ngezindlela ezinengi ezitshiyeneyo.+
11 Kuvumelana lenjongo yakhe yaphakade ayisungulayo emayelana loKhristu+ uJesu iNkosi yethu,
12 osenza sibe lenkululeko yokukhuluma leyokusondela kuNkulunkulu+ singathandabuzi ngenxa yokuthi silokholo kuye.
13 Ngiyalicela-ke ukuthi lingalahli ithemba nxa libona inhlupho ezingehlelayo ngenxa yokulinceda ngoba zenza lithole inkazimulo.+
14 Ngenxa yalokho, ngiguqa kuBaba,
15 onguye owanika zonke izimuli ezulwini lasemhlabeni amabizo azo.
16 Ngikhulekela ukuthi ngobukhulu benkazimulo yakhe alenze libe lamandla emuntwini elinguye ngaphakathi,+ esebenzisa amandla omoya wakhe.
17 Ngikhulekela lokuthi ngokholo lwenu lenze uKhristu ahlale ezinhliziyweni zenu futhi libe lothando.+ Sengathi lingama liqine phezu kwesisekelo+ futhi ligxile kuso libe lempande,+
18 ukuze njengabo bonke abangcwele libuzwisise ngokugcweleyo ububanzi, lobude, lokuphakama, lokujula kweqiniso
19 njalo lilwazi uthando lukaKhristu+ oluqakatheke kakhulu ukwedlula ulwazi. Lokhu kuzakwenza ukuthi uNkulunkulu alenze libe labo bonke ubuntu bakhe.
20 Yena uyenelisa ukwenza izinto ezinkulu kakhulu ukwedlula lezo esizicelayo kumbe esizicabangayo,+ ezenza ngamandla akhe asebenza kithi.+
21 Ngakho kumele akhazinyuliswe ngebandla langoKhristu uJesu kuzo zonke izizukulwane kuze kube nini lanini. Ameni.
