UDutheronomi 16:1-22
16 “Khumbulani inyanga ka-Abhibhi* njalo linanze iPhasika likaJehova uNkulunkulu wenu,+ ngoba ngenyanga ka-Abhibhi uJehova uNkulunkulu wenu walikhipha eGibhithe ebusuku.+
2 Kumele lihlabele uJehova uNkulunkulu wenu umhlatshelo wePhasika+ eliwuthethe emihlambini yenu yezimvu leyembuzi kanye leyenkomo,+ endaweni uJehova azayikhetha ukuthi ibizo lakhe lihlale kuyo.+
3 Akumelanga liwudle laloba yini elemvubelo,+ kumele lidle isinkwa esingelamvubelo okwamalanga ayisikhombisa, isinkwa sokuhlupheka ngoba laphuma elizweni laseGibhithe ngesiphangiphangi.+ Qhubekani likwenza lokhu nxa nje lisaphila ukuze likhumbule ilanga elaphuma ngalo elizweni laseGibhithe.+
4 Okwamalanga ayisikhombisa akumelanga kutholakale ifulawa elemvubelo kuzo zonke indawo elihlala kuzo+ futhi inyama elizakwenza ngayo umhlatshelo ngelanga lokuqala kusihlwa, akumelanga ilale ubusuku bonke kuze kuse.+
5 Alisoze livunyelwe ukuhlaba umhlatshelo wePhasika kuloba yiliphi idolobho uJehova uNkulunkulu wenu alinika lona.
6 Kodwa kumele liwuhlabe endaweni uJehova uNkulunkulu wenu azakhetha ukuthi ibizo lakhe lihlale kuyo. Kumele lihlabe umhlatshelo wePhasika kusihlwa, ilanga lisanda kutshona,+ ngesikhathi esibekiweyo elaphuma ngaso eGibhithe.
7 Kumele liwupheke njalo liwudlele+ endaweni uJehova uNkulunkulu wenu azayikhetha,+ besekusithi ekuseni libuyele ematendeni enu.
8 Lizakudla isinkwa esingelamvubelo okwamalanga ayisithupha besekusithi ngelanga lesikhombisa lenzele uJehova uNkulunkulu wenu umhlangano ongcwele. Akumelanga lisebenze ngalelolanga.+
9 “Kumele libale amaviki ayisikhombisa. Kufanele liqalise ukubala amaviki ayisikhombisa kusukela ngesikhathi elizaqala ngaso ukuvuna amabele emasimini.+
10 Ngemva kwalokho, kumele linanze uMkhosi Wamaviki lisenzela uJehova uNkulunkulu wenu,+ liphethe umnikelo wokuzithandela ovela esandleni senu eliwukhiphe kuhambelana lesibusiso uJehova uNkulunkulu wenu alinike sona. +
11 Kumele lithokoze phambi kukaJehova uNkulunkulu wenu, lina kanye lamadodana enu, lamadodakazi enu, lezigqili lezigqilikazi zenu, lamaLevi aphakathi kwamadolobho* enu, lowesinye isizwe, lezintandane kanye labafelokazi abaphakathi kwenu, endaweni uJehova uNkulunkulu wenu azakhetha ukuthi ibizo lakhe lihlale kuyo.+
12 Khumbulani ukuthi laliyizigqili eGibhithe.+ Gcinani njalo lilandele imilayo le.
13 “Nxa selibutha lokho okusezizeni zenu lasezikhamelweni zenu zamafutha lezewayini kumele linanze uMkhosi Wezihonqo*+ okwamalanga ayisikhombisa.
14 Kumele lithokoze ngesikhathi somkhosi wenu,+ lina kanye lamadodana enu, lamadodakazi enu, lezigqili lezigqilikazi zenu, lamaLevi, lowesinye isizwe, lezintandane kanye labafelokazi abaphakathi kwamadolobho enu.
15 Kufanele lenzele uJehova uNkulunkulu wenu umkhosi okwamalanga ayisikhombisa+ endaweni uJehova azayikhetha. Phela uJehova uNkulunkulu wenu uzabusisa sonke isivuno senu lakho konke elikwenzayo+ futhi kuzakuba yintokozo yodwa kini.+
16 “Kathathu ngomnyaka, wonke amadoda aphakathi kwenu kumele abuye azokuma phambi kukaJehova uNkulunkulu wenu endaweni azayikhetha, ngesikhathi soMkhosi Wesinkwa Esingelamvubelo,+ loMkhosi Wamaviki+ kanye loMkhosi Wezihonqo*+ futhi kakho phakathi kwawo okumele azokuma phambi kukaJehova elengise izandla.
17 Isipho ngamunye azasiletha kumele sihambelane lesibusiso uJehova uNkulunkulu wenu amnike sona.+
18 “Kumele likhethe abahluleli+ kanye labaphathi esizwaneni ngasinye kuwo wonke amadolobho* uJehova uNkulunkulu wenu alinika wona futhi kumele bahlulele abantu ngokulunga.
19 Akumelanga lahlulele kubi,+ libe lobandlululo+ kumbe livume ukufunjathiswa* ngoba ukufunjathiswa kwenza abahlakaniphileyo babe angathi yiziphofu+ njalo kuyawatshintsha amazwi abalungileyo.
20 Kubambeni likugagadlele ukwahlulela okuhle+ ukuze liqhubeke liphila njalo lilithathe ilizwe uJehova uNkulunkulu wenu alinika lona.
21 “Lingahlanyeli loba yisiphi isihlahla ukuze sibe lugodo olungcwele*+ eduze kwe-alithare likaJehova uNkulunkulu wenu, elizazenzela lona.
22 “Lingamisi insika engcwele elizayikhonza+ ngoba uJehova uNkulunkulu wenu uyakuzonda lokho.
Amabala angaphansi
^ Khangela iSengezo ku-B15.
^ NgesiHebheru, “kwamagedi.”
^ Kumbe, “Wamadumba.”
^ Kumbe, “Wamadumba.”
^ NgesiHebheru, “phakathi kwawo wonke amagedi enu.”
^ Kumbe, “ukudizwa.”
^ Khangela iNgcazelo Yamabala.
