UGenesisi 16:1-16
-
UHagari lo-Ishmayeli (1-16)
16 USarayi umka-Abrama wayengamzalelanga abantwana+ kodwa wayelencekukazi yakhe engumGibhithe okwakuthiwa nguHagari.+
2 Ngakho uSarayi wathi ku-Abrama: “UJehova ungenze ngaba yinyumba. Ngicela ulale lencekukazi yami, mhlawumbe ingangizalela abantwana.”+ Yikho u-Abrama wakulalela lokho okwakutshiwo nguSarayi.
3 U-Abrama wathi eseleminyaka elitshumi ehlala elizweni leKhenani, umkakhe uSarayi wathatha incekukazi yakhe uHagari engumGibhithe waseyinika u-Abrama ukuthi ibe ngumkakhe.
4 Yikho u-Abrama walala loHagari wazithwala. UHagari uthe esebona ukuthi usezithwele waseqalisa ukweyisa inkosikazi yalapha ekhaya.
5 USarayi wasesithi ku-Abrama: “Udubo lolu esengilalo lubangelwe nguwe. Yimi engabeka incekukazi yami ezandleni zakho,* kodwa ithe isibona ukuthi isizithwele yaqalisa ukungeyisa. UJehova kahlulele phakathi kwami lawe.”
6 Ngakho u-Abrama wathi kuSarayi: “Incekukazi yakho isezandleni zakho. Yenza kuyo loba yini oyibona ifanele.” USarayi wasemphatha kubi uHagari waze wambalekela.
7 Ngemva kwesikhathi ingilosi kaJehova yamthola emthonjeni wamanzi enkangala futhi umthombo lo wawusendleleni eya eShuri.+
8 Yathi kuye: “Hagari ncekukazi kaSarayi uvela ngaphi njalo uya ngaphi?” Waseyiphendula wathi: “Ngibalekela uSarayi.”
9 Ingilosi kaJehova yasisithi kuye: “Buyela kuSarayi, uzithobe kuye.”*
10 Ngemva kwalokho ingilosi kaJehova yathi: “Ngizakwenza inzalo yakho* yande, ibe nengi kakhulu okokuthi ngeke ibalwe.”+
11 Ingilosi kaJehova yaphinda yathi: “Njengoba uzithwele, uzabeletha umntwana ongumfana njalo kumele umnike ibizo uthi, ngu-Ishmayeli* ngoba uJehova usekuzwile ukuhlupheka kwakho.
12 Uzakuba yindoda engubabhemi weganga.* Isandla sakhe sizamelana labantu bonke njalo lesandla somuntu wonke sizamelana laye futhi uzahlala ehlukene labo* bonke abafowabo.”
13 UHagari wasebiza ibizo likaJehova owayekhuluma laye wathi: “UnguNkulunkulu obonayo,”+ ngoba wathi, “Kambe yimi lo osebone lowo ongibonayo kulindawo?”
14 Yikho umthombo lowo wabizwa ngokuthi yiBheri-lahayi-royi.* (Uphakathi kweKhadeshi leBheredi.)
15 UHagari wazalela u-Abrama umntwana ongumfana, u-Abrama wasenika umntwana lo ayemzalelwe nguHagari ibizo wathi ngu-Ishmayeli.+
16 U-Abrama wayeleminyaka engu-86 ngesikhathi uHagari emzalela u-Ishmayeli.
Amabala angaphansi
^ NgesiHebheru, “esifubeni sakho.”
^ NgesiHebheru, “uzehlise ngaphansi kwesandla sakhe.”
^ Kumbe, “isizukulwane sakho.”
^ Ibizo leli litsho ukuthi, “UNkulunkulu uyezwa.”
^ Abanye bacabanga ukuthi kutshiwo idube. Kukhanya kwakutshiwo ukuthi wayezabe engumuntu ozenzela okwakhe, engangenelani labanye.
^ Ezinye inguqulo zithi, “uzahlala engazwanani labo.”
^ Ibizo leli litsho ukuthi, “Umthombo walowo ophilayo ongibonayo.”
