UHabakhukhi 2:1-20
2 Ngizaqhubeka ngimi endaweni yami yokulinda,+Ngimi phezu komduli wokuvikela idolobho.
Ngizaqhubeka ngilindele ukuzwa ukuthi uzathi ngithini,Ngicabange ngokuthi ngizathini nxa sengikhuzwa.
2 UJehova wasengiphendula wathi:
“Bhala phansi umbono lo, uwubhale ematsheni ucace+Ukuze lowo obalela abantu awubale lula.*+
3 Umbono uzagcwaliseka ngesikhathi sawo esibekiweyo,Njalo lesosikhathi silokhu sisondela ngokuphangisa, sizafika loba sekutheni.
Lanxa singaphuza,* hlala usilindele!*+
Ngoba umbono uzagcwaliseka loba sekutheni.
Kawusoze uphuze!
4 Khangela umuntu ozigqajayo,Kakho qotho enhliziyweni yakhe.
Kodwa olungileyo uzaphila ngenxa yokuthembeka kwakhe.*+
5 Iwayini liyakhohlisa sibili,Yikho umuntu ozikhukhumezayo engasoze aphumelele.
Ulambe angathi lingcwaba,Njalo kasuthi njengokufa.
Uqhubeka eqoqa zonke izizwe,Eqoqela bonke abantu kuye.+
6 Bonke laba bazakhuluma isaga bahlekisane ngaye bemeyisa+Besithi:
‘Maye kulowo obuthelela okungasikwakhe,Ozidalela izikwelede ezinkulu!
Kuzaze kube nini?
7 Labo olezikwelede zabo abasoze bakuvukele ulibele yini?
Bazavuka bakudlukudlukuze ngolaka,Bathathe yonke impahla yakho.+
8 Bonke abantu bazathatha impahla yakho+
Ngoba wathumba impahla yezizwe ezinengi,Wabulala abantu abanengi,Wadala umonakalo emhlabeni,Emadolobheni lasebantwini abahlala kuwo.+
9 Maye kulowo owenza okubi ukuze atholele abendlu yakhe inzuzo,Efuna ukwakha isidleke sakhe khonale esiqongweniUkuze abalekele umonakalo ongamehlela!
10 Amacebo owakhileyo aletha ihlazo endlini yakho.
Nxa uchitha izizwe ezinengi uyabe uzilimaza wena.+
11 Ilitshe lizamemeza lisemdulini,Liphendulwe luthungo olusephahleni.
12 Maye kulowo owakha idolobho ngokubulala abantu,Alimise liqine ngokwenza okungalunganga!
13 UJehova wamabutho uzakwenza ukuthi lokho abantu abakusebenzele nzima kuphelele emlilweni.
Enze lezizwe zisebenzele ize.+
14 Umhlaba uzagcwala ulwazi lwenkazimulo kaJehova,Njengolwandle lugcwele amanzi.+
15 Maye kulowo onika abangane bakhe okunathwayo,Angezelele kukho ulaka lenzondo ukuze abadakise,Esenzela ukubona ubunqunu babo!
16 Wena uzasibekelwa lihlazo kulokuthi uphiwe udumo.
Lawe natha uveze ukuthi awusokwanga.*
Inkomitsho esesandleni sokudla sikaJehova izafika lakuwe,+Udumo lwakho luzacwila phakathi kwehlazo,
17 Ngoba isihluku owasenza iLebhanoni sizakwenziwa lakuwe.
Umonakalo owethusa izilo zeganga uzakwehlelaNgenxa yokuthi wabulala abantu abanengi,Wadala umonakalo emhlabeni,Emadolobheni lasebantwini abahlala kuwo.+
18 Sinceda ngani isithombe esibaziweyo,Njengoba sibazwe ngumuntu nje?
Sinceda ngani isithombe sensimbi lomfundisi wamangaLanxa owasenzayo ethembele kuso,Njalo esenza izithombe ezingelancedo lezingakhulumiyo?+
19 Maye kulowo othi esithombeni esenziwe ngesigodo, “Vuka!”
Kumbe othi elitsheni elingakhulumiyo, “Vuka usifundise!”
Izithombe lezi zihuqwe ngegolide langesiliva+Njalo kaziphefumuli ngitsho.+
20 Kodwa uJehova usethempelini lakhe elingcwele.+
Wonke umhlaba kawuthule phambi kwakhe!’”+
Amabala angaphansi
^ Kumbe, “awubale kuhle.”
^ Kumbe, “Lanxa singakhanya siphuza.”
^ Kumbe, “silindele ngamehlo abomvu.”
^ Ezinye inguqulo zithi, “ngenxa yokholo lwakhe.”
^ Ezinye inguqulo zithi, “natha udiyazele.”
