UHezekheli 25:1-17
25 Ilizwi likaJehova laphinda lafika kimi lathi:
2 “Ndodana yomuntu, tshibilika ukhangele elizweni lama-Amoni+ uphrofethe ngawo.+
3 Kumele ukhulume lama-Amoni uthi, ‘Zwanini ilizwi leNkosi Enkulu uJehova. Nanku okutshiwo nguJehova iNkosi Enkulu: “Ngenxa yokuthi lahleka ngesikhathi indawo yami engcwele ingcoliswa, lelizwe lako-Israyeli litshabalaliswa futhi abantu bakoJuda bethunjwa,
4 sengilinikela ebantwini baseMpumalanga. Bazamisa inkamba zabo bagxumeke lamatende abo phakathi kwenu. Bazakudla izithelo zenu banathe lochago lwenu.
5 Ngizakwenza idolobho leRabha+ libe ngamadlelo amakamela, ilizwe lama-Amoni lona libe yindawo lapho izimvu ezizaphumula khona. Lapho-ke lizakwazi ukuthi mina nginguJehova.”’”
6 “Nanku okutshiwo yiNkosi Enkulu uJehova: ‘Ngenxa yokuthi laqakeza izandla+ leqayeqa lithokoziswa yilokho okwakwehlele ilizwe lako-Israyeli futhi labachothoza,+
7 ngizakwelulela isandla sami phezu kwenu ngilinikele ezizweni zilithumbe. Ngizaliqeda kuzo zonke izizwe, ngilitshabalalise kuwo wonke amazwe+ njalo ngizalitshaya ngilibhuqe. Lapho-ke lizakwazi ukuthi mina nginguJehova.’
8 “Nanku okutshiwo yiNkosi Enkulu uJehova: ‘Ngenxa yokuthi abantu bakoMowabi+ labaseSeyiri+ bathe, “Isizwe sakoJuda siyazifananela lezinye izizwe,”
9 sengisenza ukuthi amadolobho asemngceleni wakoMowabi ahlaselwe, kugoqele lamadolobho abo amahle kakhulu, iBhethi-jeshimothi leBhali-meyoni kuze kuyefika eKhiriyathayimi.+
10 Ngizanikela ilizwe lamaMowabi lelama-Amoni ebantwini baseMpumalanga+ njalo ama-Amoni awasoze aphinde akhunjulwe phakathi kwezizwe.+
11 Ngizakwahlulela abantu bakoMowabi+ futhi bazakwazi ukuthi mina nginguJehova.’
12 “Nanku okutshiwo yiNkosi Enkulu uJehova: ‘Abako-Edomi baphindisele ebantwini bakoJuda, bazidalela icala elikhulu.+
13 Ngakho iNkosi Enkulu uJehova ithi: “Ngizakwelulela isandla sami phezu kwelizwe lako-Edomi ngibulale abantu lezifuyo, ngilitshiye liyinkangala.+ Abantu bazabulawa ngenkemba kusukela eThemani kuze kuyefika eDedani.+
14 ‘Ngizaphindisela kwabako-Edomi ngisebenzisa abantu bami bako-Israyeli.+ Bazakwehlisela ulaka lwami lentukuthelo yami ko-Edomi ukuze abako-Edomi babuzwe ubuhlungu bokuphindisela kwami,’+ kutsho iNkosi Enkulu uJehova.”’
15 “Nanku okutshiwo yiNkosi Enkulu uJehova: ‘Ngenxa yenzondo yawo engapheliyo, amaFilisti aphindisele ngolunya futhi azama ukubatshabalalisa.+
16 Ngakho nanku okutshiwo yiNkosi Enkulu uJehova: “Sengiselulela isandla sami phezu kwamaFilisti.+ Ngizawabulala ngiwaqede wonke amaKherethi,+ ngitshabalalise labaseleyo abahlala ngasekhunjini lolwandle.+
17 Ngizaphindisela kubo ngesihluku esikhulu ngibajezise kabuhlungu. Nxa sengiphindisela kubo bazakwazi ukuthi mina nginguJehova.”’”
