Emavikini ambalwa azayo kuzakuba lokhetho emazweni atshiyeneyo. Abantu badla amathambo engqondo bezama ukubona ukuthi bazakhetha bani.

 IBhayibhili lona lithini?

 IBhayibhili lisitshela ukuthi abakhokheli abangabantu kabalamandla okwenza ezinye izinto.

•   “Ungathembeli ezikhulwini kumbe komunye umuntu ngoba kalamandla okusindisa. Nxa angama ukuphefumula, uyabuyela emhlabathini, ngalelolanga imicabango yakhe ihle itshabalale.”—IHubo 146:3, 4.

 Labakhokheli abenza kuhle labo bayafa. Yikho akulaqiniso lokuthi okuhle abangabe bekwenza kuzaqhubeka kusenziwa nxa bona bengasekho.—UmTshumayeli 2:18, 19.

 Iqiniso elicacileyo eliseBhayibhilini yikuthi umuntu kaphiwanga ilungelo lokuthi azibuse.

•   “Umuntu kaliphiwanga ilungelo lokuqondisa izinyathelo zakhe.”—UJeremiya 10:23.

 Manje ukhona yini owenelisayo ukukhokhela kuhle?

 IBhayibhili lisitshela ukuthi uNkulunkulu ubeke umkhokheli olamandla lesingamthemba. Umkhokheli lowo nguJesu Khristu. (IHubo 2:6) UJesu uyiNkosi yoMbuso kaNkulunkulu njalo lowo mbuso nguhulumende obusa esezulwini.—UMathewu 6:10.

 Wena uzamkhetha yini uJesu ukuthi abe nguMkhokheli wakho? IBhayibhili likubeka sobala ukuthi kuqakatheke ngani ukwenza njalo. Lithi:

•   “Hloniphani indodana [uJesu Khristu] ukuze uNkulunkulu angalithukutheleli beselitshabalala, ngoba ulaka lwakhe luyaphangisa ukuvutha. Bayathokoza bonke abaphephela kuye.”—IHubo 2:12.

 Lesi yiso kanye isikhathi sokukhetha ukuthi uzakwenzani. Iziphrofetho zeBhayibhili ziveza ukuthi uJesu waqalisa ukubusa ngo-1914 njalo sokusele isikhatshana nje ukuthi uMbuso kaNkulunkulu utshabalalise bonke ohulumende babantu.—UDanyeli 2:44.

 Nxa ufuna ukwazi ukuthi ungatshengisa njani ukuthi usukhethe ukukhokhelwa nguJesu, bala isihloko esithi “Khetha Ukusekela UMbuso KaNkulunkulu Khathesi!”