INDABA YOKUPHILA | ILANDISWA NGUHÅKAN DAVIDSSON
Ukuncedisa Ukusakaza Iqiniso EliseBhayibhilini
Ngazalelwa eSweden futhi ngakhulela lapho. Ngesikhathi ngikhula ngangingakholwa ukuthi kuloNkulunkulu, yikho kwathi ubaba lomama lomnawami oyinkazana beqalisa ukufunda iBhayibhili laboFakazi bakaJehova ngangingafuni lakuzwa.
Ubaba wayehlala engincenga ukuthi ngifunde iBhayibhili yikho ngacina ngivumile. Kwangithinta sibili ukubona ukuthi iBhayibhili kalikhuthi gatsha nxa likhuluma ngendaba zesayensi. Ngokuhamba kwesikhathi ngacina ngizibonela ukuthi iBhayibhili liLizwi likaNkulunkulu lokuthi oFakazi bakaJehova bafundisa iqiniso njalo bazama ngamandla abo wonke ukusebenzisa lokho abakufundayo. Mina lobaba sabhabhathizwa ngelanga elifananayo ngo-1970. Umama labanawami ababili abangamankazana bona babhabhathizwa eminyakeni eyalandelayo.
Abanengi engakhula labo babeziphilela impilo yamaphathi. Ngathi sengileminyaka engu-17 lami ngasengihawukela indlela ababephila ngayo. Kodwa oFakazi ababengifundisa iBhayibhili babekhanya bethokoza ngenxa yokuba ngamaphayona. Lokho kwangenza ngazimisela ukuthi lami ngelinye ilanga ngiphayone, lakanye ngenza njalo sengileminyaka engu-21.
Mina lobaba (osesandleni senxele) sabhabhathizwa ngelanga elifananayo
Ukuphayona kwakungenza ngithokoze sibili okokuthi ngacina ngizisola ukuthi kanti ngaphuzelani ukuqalisa. Ngangikukholisa kakhulu ukutshumayela endaweni efikela izikepe eGöteborg, lapho engangithola khona ithuba lokufundisa abantu abavela kwamanye amazwe ababesebenza ezikepeni ezithwala impahla.
Okweminyaka engu-50 edlulileyo, ngibe lesibusiso sokuncedisa ukuthi abantu abakhuluma indimi ezitshiyeneyo bazwe izindaba ezinhle. Wothini ngililandisele ukuthi kwaqalisa njani.
Ukulungisa Uhlelo Lwe-MEPS
Ukuze ngizisekele emsebenzini wokuba liphayona, ngamanye amalanga ngangike ngisebenze ekhampanini yokuphrinta ngingu-typographer. Ngaleyominyaka indlela zokuphrinta zazilokhu zithuthuka ngoba kulokuthi kusetshenziswe insimbi ezitshisayo nxa kuphrintwa, kwasekusetshenziswa amakhompiyutha ukuze kuhlanganiswe amabala lamapikitsha. Ngafundela ukusebenzisa indlela le entsha.
Ngelanga esatshada ngalo
Ngo-1980 ngatshada loHelene owayeliphayona lesikhathi sonke. Laye wayekuthanda ukuxoxa labantu abavela emazweni atshiyeneyo labalamasiko atshiyeneyo. Sasikufisa kakhulu ukungena iSikolo SeGiliyadi lokuba ngamamishinari.
Kodwa ngenxa yokuthi ngangilolwazi kwezokuphrinta, mina loHelene sacelwa ukuthi siyesebenza egatsheni leSweden. Inhlanganiso layo yayisifuna ukuphrinta ngendlela ezintsha ukuze kwenziwe umsebenzi omnengi ngesikhathi esincane. Yikho sacelwa ukuthi siye egatsheni leWallkill eNew York ngo-1983 ukuze siqeqetshwe ukusebenzisa uhlelo lwe-Multilanguage Electronic Phototypesetting System (MEPS) a olwalungiswa ngabafowethu.
Ngesikhathi silungisa imitshina yohlelo lwe-MEPS eyayisiya eHong Kong, eMexico, eNigeria laseSpain
Uhlelo lwe-MEPS lwenza kube lula ukuthi amabala lamapikitsha kuphume kuhle nxa sokuphrintiwe. Thina sasilomsebenzi wokuncedisa ekuthuthukiseni uhlelo lwe-MEPS ukuze lwenelise ukuphrinta ngendimi ezitshiyeneyo. Sokuleminyaka eminengi kakhulu oFakazi bakaJehova besakaza izindaba ezinhle ngendimi ezedlula 1 000!
Ngokuhamba kwesikhathi mina lomkami uHelene sacelwa ukuthi siyesebenzela e-Asia ukuze singezelele ezinye indimi ehlelweni lwe-MEPS. Siyambonga kakhulu uJehova ngokusinika isibusiso lesi sokuncedisa ukuthi abanengi bathole indaba ezinhle ngendimi zabo!
Ukujayela Indawo Lamasiko Amatsha
Mina loHelene safika e-India ngo-1986. Kwasokumele sijayele amasiko amatsha ngoba ayetshiyene sibili lawethu. Sathi sifika edolobheni okuthiwa yiBombay (eselibizwa ngokuthi yiMumbai) sahle sakuzwa sibili ukuthi sesisendaweni entsha. Phela amasiko abantu beSweden lawabe-India angani yimpumalanga lentshonalanga. Ngeviki yakuqala sise-India kwasala kancane ukuthi sibuyele kithi.
Ngikhumbula ingxoxo engaba layo loHelene ekupheleni kwaleyoviki. Sakhumbuzana ukuthi ngesikhathi sitshada sasifuna ukuba ngamamishinari, yikho njengoba sasesithole ithuba lokunambitha ukuthi kunjani ukusebenzela uJehova sikwelinye ilizwe, akumelanga sikhalale ngenxa yobunzima esihlangana labo.
Asizange siwubalekele umsebenzi wethu e-India kodwa sahle saqalisa ukufunda okunengi okwenziwa elizweni lelo ukuze sikholise ukuphila lapho. Kungakayi ngaphi sasesikuthanda kakhulu ukuba se-India, saze safunda lendimi ezimbili ezisetshenziswa ngabantu abanengi lapho, isiGujarati lesiPunjabi.
Ukuyasebenzela EMyanmar
Ngesikhathi siseWolu yoMbuso sigqoke ezomdabu ezaseMyanmar
Ngo-1988 sacelwa ukuthi siyesebenzela eMyanmar, ilizwe elingcelelane leChina, i-India leThailand. Izinto zazingamanga kuhle kwezombusazwe eMyanmar futhi amasotsha yiwo ayephethe intambo. Ngalezonsuku uhlelo lwe-MEPS lwalusebenzisa amabala alabonkamisa labongwaqa kuphela futhi kwakungela olunye uhlelo esasingalusebenzisa. Umsebenzi esasilawo wawungowokukhanda inhlamvu ezazizasekela lezi ezinye indimi ukuze zisebenze ohlelweni lwe-MEPS besekusithi umsebenzi esiwenzileyo siwuhambise eBhetheli yeWallkill.
Njengoba izinto zazingamanga kuhle kwezombusazwe eMyanmar, sasingabotshwa loba nini nxa sasingatholakala silamabhuku ethu ngolimi olusetshenziswa eMyanmar. Ngelinye ilanga sesihambisa inhlamvu lezi eWallkill, umkami wasetshwa. Okuhle yikuthi umsebenzi esasiwenzile wayewufake esikhwameni sakhe yikho waphonguphakamisa izandla bamsetsha, akulamuntu owasinanzelelayo isikhwama ayesithwele.
Uhlelo lwe-MEPS lwasinceda kakhulu ukuthi sithuthukise indlela esiphrinta ngayo
Abahumutshi ababesebenzela eMyanmar baphiwa amakhompiyutha lamaphrinta baphinda baqeqetshwa ukusebenzisa uhlelo lwe-MEPS. Abahumutshi abanengi babengakaze bayibone ngitsho ikhompiyutha kodwa babezimisele ukufunda ukuthi isebenza njani. Ababekuhumutsha kwakungasaphrintwa ngendlela zakudala kodwa kwasekusetshenziswa izindlela ezintsha zokuphrinta. Lokhu kwenza ukuthi amabhuku ethu abe lohlonzi.
Ukuyasebenzela ENepal
Ngo-1991 mina loHelene sacelwa ukuthi siyencedisa elizweni leNepal. Ilizwe leli liseningizimu yezintaba zeHimalayas. Ngalesosikhathi kwakulebandla elilodwa zwi elizweni lonke njalo kulamabhuku amalutshwane kakhulu ayetholakala ngolimi lwesiNepali.
Kodwa kungakayi ngaphi kwaqalisa ukuhunyutshwa amabhuku amanengi ngolimi lolu ayesesetshenziswa ekutshumayeleni. Lamuhla kulaboFakazi abangafika 3 000 eNepal abasemabandleni adlula 40. Kanti njalo ngomnyaka ka-2022 abantu abedlula 7 500 bangena iSikhumbuzo Sokufa KukaKhristu!
Ibhukwana Ngolimi LwesiLahu
Eminyakeni yabo-1990 amamishinari ayehlala edolobheni leChiang Mai, eThailand aqalisa ukutshumayeza abantu ababehlala emaqaqeni aseLahu. IsiLahu sikhulunywa ngabantu abahlala emngceleni weChina, oweLaos, oweMyanmar, oweThailand loweVietnam. Kodwa sasingela ngitsho lebhuku elilodwa ngolimi lolu.
Elinye ijaha elalifunda iBhayibhili lamamishinari lahumutsha ibhukwana elithi “Bheka, Ngenza Konke Kube Kusha” lisusela elimini lwesiThai lifaka kusiLahu. Ngemva kwalokho ijaha lelo labanye abahlala eLahu baqoqa imadlana basebethumela lokho ababekuhumutshile kanye lemali ewofisini yegatsha. Encwadini abayibhalayo batshela igatsha ukuthi balesifiso sokuthi abantu abakhuluma isiLahu labo bazwe iqiniso elisebhukwaneni leli.
Ngemva kweminyaka ethile, mina loHelene saba lesibusiso sokuqeqetsha abahumutshi abakhuluma ulimi lolu ukuthi basebenzise uhlelo lwe-MEPS. Omunye walabo bahumutshi ababesebenzela ewofisini yokuhumutsha eseChiang Mai kwakungumzalwane owayesanda kubhabhathizwa. Kwasithokozisa ukuzwa ukuthi umzalwane lo nguye lwana owayehumutshe ibhukwana elithi “Bheka!” ngolimi lwesiLahu!
Ngo-1995 mina loHelene sabuyela e-India lapho esafika sasebenza khona labahumutshi egatsheni sibancedisa ukuthi benelise ukusebenzisa i-MEPS emsebenzini wabo. Sikhuluma nje sokulamabhuku eneleyo ngendimi ezitshiyeneyo ezikhulunywa elizweni leli ukuze kuncediswe abantu ukuthi bafunde iqiniso futhi babhabhathizwe.
Impilo Ethokozisayo
Kusukela ngo-1999 kuze kube lamuhla, mina lomkami uHelene besilokhu sisebenza egatsheni leBritain. Sisebenza labafowethu abaku-MEPS Programming emawofisini ethu amakhulu. Siyawukholisa kakhulu umsebenzi wokutshumayela lapha eLondon sixoxa labantu abakhuluma isiGujarati lesiPunjabi. Kungavele kube lolimi olutsha olungezelelwa kuwebhusayithi yethu, sihle sidinge amabhuku olimi lolo besesidinga labantu abalukhulumayo abahlala ensimini yethu sibatshumayeze.
Ngiyathokoza kakhulu ukuthi ngisakhula ngahle ngahlela engangifuna ukukwenza ekukhonzeni kulokuthatheka ngokwakusenziwa ngabentanga yami. Mina lomkami asizisoli ngitsho ngesinqumo esasenzayo sokuba senkonzweni yesikhathi sonke. Umsebenzi lo usincede ukuthi sifike emazweni adlula 30 futhi sizibonele ngawethu izindaba ezinhle zifika kuzo zonke izizwe lezizwana lezindimi.—ISambulo 14:6.
a Khathesi isibizwa ngokuthi yi-Multilanguage Electronic Publishing System. Uhlelo lwe-MEPS luphinda lusetshenziswe nxa kulungiswa amabhuku atholakala kwezempucuko.
