IPhasika lokucina uJesu ayezalinanza lalizabe liqakathekile. Wayesezakufa yikho wahlela ukuthi ananze iPhasika labaphostoli bakhe abesesungula umkhosi omutsha okuthiwa yiSidlo SeNkosi Sakusihlwa owawuzananzwa minyaka yonke. Yikho wathuma uPhetro loJohane ukuthi bayelungisa indlu ababezadlela kuyo. (Luk 22:7-13; khangela umfanekiso ongaphandle.) Lokhu kusikhumbuza ukuthi kumele sisilungiselele iSikhumbuzo esizakuba laso mhlaka 27 March. Kumele ukuthi amabandla asehlelile ukuthi ngubani ozakwenza inkulumo. Kanti njalo kumele ukuthi isinkwa lewayini sekukhona. Kodwa kuyini ngamunye angakwenza ukuze asilungele iSikhumbuzo?

Lungiselela inhliziyo yakho. Bala njalo ucabangisise ngokubalwa kweBhayibhili kwangesikhathi seSikhumbuzo. Uhlelo lwakhona ungaluthola ebhukwaneni elithi Ukuhlola IMibhalo Nsuku Zonke lakwelithi Ibhukwana Elisincedisa Ukufunda ILizwi LikaNkulunkulu, kusahluko 16. (Khangela lo-Gwalo Lomhlangano luka-April 2020.) Izimuli zingadinga izihloko ezimayelana lokuqakatheka kwenhlawulo ku-Watch Tower Publications Index lase-Bhukwini Lokuchwayisisa LaboFakazi BakaJehova besezixoxa ngazo ekukhonzeni kwemuli.

Nxusa abanye. Khuthala emkhankasweni wokunxusa abantu. Cabanga ngabantu ongabanxusa okugoqela impindela zakho, owake wafunda labo iBhayibhili, izihlobo kanye labanye obajayeleyo. Abadala bebandla kumele bakhumbule ukunxusa abangasayifezi inkonzo. Khumbula ukuthi nxa unxusa umuntu ongahlali ensimini yenu, ungathola lapho okuzakwenzelwa khona iSikhumbuzo lesikhathi esizakwenziwa ngaso endaweni ahlala kuyo ngokungena ku-jw.org, uhlabe lapho okuthiwa OKUMAYELANA LATHI, ubusuhlaba lapho okuthiwa “ISikhumbuzo.”

Kuyini okunye esingakwenza ukuze silungiselele?