1. Kusinceda njani ukuxoxa ngendlela esathola ngayo iqiniso?

 “WALITHOLA njani iqiniso?” Akuthandabuzwa ukuthi lo ngumbuzo osewawubuzwa kanengi. Ngomunye wemibuzo yokuqala obuzwa ngumfowethu loba ngudadewethu ofuna ukukwazi. Siyakholisa ukuzwa abafowethu labodadewethu besixoxela ukuthi kuyini okwabanceda ukuthi bamazi uJehova lokuthi bamthande futhi lathi siyakholisa ukubatshela ukuthi kungani sikuthanda ukuba ngoFakazi. (Rom. 1:11) Ingxoxo ezinje zenza sibone ukuthi ukuba nguFakazi yisibusiso esikhulu. Kanti njalo zisinceda ukuthi ‘siqhubeke sihamba eqinisweni’ okutsho ukuphila ngendlela ethokozisa uJehova.—3 Joh. 4.

2. Sizaxoxa ngani esihlokweni lesi?

² Esihlokweni lesi sizaxoxa ngezizatho ezenza silithande iqiniso. Ngemva kwalokho sizaxoxa ngalokho esingakwenza ukuze siqhubeke sitshengisa ukuthi siyasibonga isipho lesi esiligugu. Akuthandabuzwa ukuthi ukufunda ngezinto lezi kuzakwenza simbonge sibili uJehova ngokusifundisa iqiniso. (Joh. 6:44) Kuzakwenza sizimisele lokutshela abanye iqiniso leli.

3. Yisiphi isizatho esiqakatheke kulazo zonke esenza silithande iqiniso?

³ Zinengi izizatho ezenza silithande iqiniso. Isizatho esiqakatheke kulazo zonke yikuthi siyamthanda uJehova uNkulunkulu ongumthombo weqiniso. Ukubala iLizwi lakhe iBhayibhili kwenze sabona ukuthi unguSomandla owadala amazulu lomhlaba lokuthi unguBaba osithandayo  futhi olendaba lathi. (1 Phet. 5:7) Siyakwazi ukuthi uNkulunkulu wethu ‘ulesihawu lomusa, uyaphuza ukuthukuthela, ugcwele uthando lobuqotho.’ (Eks. 34:6) UJehova uthanda ukwahlulela kuhle. (Isaya. 61:8) Uzwa ubuhlungu nxa esibona sihlupheka futhi ukulindele ukuqeda bonke ubuhlungu ngesikhathi sakhe esifaneleyo. (Jer. 29:11) Lathi sisilindele ngabomvu isikhathi lesi futhi lokho ngokunye okwenza simthande uJehova.

4-5. Kungani umphostoli uPhawuli wathi ithemba lethu linjengesikhonkwane?

⁴ Yisiphi esinye isizatho esenza silithande iqiniso? Iqiniso eliseBhayibhilini ligoqela ithemba lethu lesikhathi esizayo. Umphostoli uPhawuli wakucacisa ukuthi ithemba leli liqakatheke kangakanani lapho esithi: “Ithemba leli liyisikhonkwane semiphefumulo yethu, liyasinceda ukuthi singathandabuzi futhi siqine.” (Heb. 6:19) Ithemba lethu linjengesikhonkwane esibamba umkhumbi ngoba lenza sime siqine singanyikinyeki nxa sihlangana lenhlupho. Iqiniso liyasinceda sibili!

⁵ Lapha uPhawuli wayekhuluma ngethemba amaKhristu agcotshiweyo alalo elokuyabusa ezulwini kodwa amazwi akhe ayasebenza lakumaKhristu alethemba lokuphila emhlabeni olipharadayisi. (Joh. 3:16) Ukufunda ngethemba lokuthola ukuphila okungapheliyo kwenza siphile impilo ethokozisayo sibili.

6-7. Ukufunda iqiniso elimayelana lesikhathi esizayo kumncede njani uYvonne?

⁶ Ake sixoxe ngodadewethu okuthiwa nguYvonne. Kazange akhuliswe ngoFakazi njalo esesengumntwana wayekwesaba ukufa. Ukhumbula ebala omunye umutsho angazange awukhohlwe. Wawusithi: “Ngelinye ilanga sonke sizakufa.” UYvonne wathi: “Amazwi la ayengenza ngilale ngikhangele ngicabanga ngalokho okuzakwenzakala esikhathini esizayo. Ngangizibuza ngisithi, ‘Yindaba siphila iminyaka emilutshwana nje kube sekuphelile ngathi? Kanti siphilelani vele?’ Ngangingafuni ukufa.”

⁷ UYvonne uthe esekhulakhulile waqalisa ukufunda iBhayibhili laboFakazi bakaJehova. Wathi: “Ngaqalisa ukukholwa ukuthi ngingaba lethemba lokuphila phakade emhlabeni olipharadayisi.” Ukufunda iqiniso leli kumncede njani udadewethu? Waqhubeka wathi: “Khathesi angisalali ngikhangele ngikhathazeka ngekusasa kumbe ngokufa.” Kusegcekeni ukuthi iqiniso eliseBhayibhilini liligugu kuYvonne futhi uyakuthanda ukuxoxela abanye ngethemba alalo lesikhathi esizayo.—1 Tim. 4:16.

8-9. (a) Indoda esemzekelisweni kaJesu yatshengisa njani ukuthi iyaliqakathekisa igugu eyayilitholile? (b) Iqiniso liqakatheke kangakanani kuwe?

⁸ Iqiniso eliseBhayibhilini ligoqela lendaba ezinhle ezimayelana loMbuso kaNkulunkulu. UJesu wathi iqiniso elimayelana loMbuso linjengegugu elifihliweyo. KuMathewu 13:44 sithola amazwi athi: “UMbuso wamazulu unjengegugu elifihlwe ensimini, elatholwa ngumuntu walifihla. Wathokoza okokuthi wahamba wayathengisa konke ayelakho, wathenga insimu leyo.” Umuntu lo wayengalidingi igugu lelo kodwa wathi eselitholile wathengisa konke ayelakho ukuze athenge insimu eyayilegugu leli. Wayekwenzelani lokho? Wayekwazi ukuthi igugu lelo ledlula khatshana loba yini ayelayo.

⁹ Akuthandabuzwa ukuthi uliqakathekisa ngalindlela iqiniso. Akula loba yini  esemhlabeni lo eligugu ukwedlula intokozo esiyithola ngokukhonza uJehova kumbe ithemba lokuthola ukuphila okungapheliyo nxa sesibuswa nguMbuso kaNkulunkulu. Sizimisele ukutshiya loba yini ukuze sibe lesibusiso sokuba ngabangane bakaJehova abaseduze. Esikufunayo ‘yikumthokozisa kukho konke.’—Kol. 1:10.

10-11. Kuyini okwenza uMichael watshintsha indlela ayephila ngayo?

¹⁰ Abanengi bethu sitshiye izinto ezinkulu ukuze sithokozise uJehova. Abanye batshiye imisebenzi elemali. Abanengi bayekele ukuxotshana lenotho. Abanye bathe sebefunde ngoJehova batshintsha indlela ababephila ngayo. Lokhu yikho kanye okwenziwa nguMichael. Kakhuliswanga ngabazali abangoFakazi. Eseselijaha wafundela umdlalo wokulwa okuthiwa yi-karate. Wathi: “Ngangikuqakathekisa kakhulu ukuhlala ngiqinile emzimbeni. Ngezinye izikhathi ngangize ngibone angathi akulamuntu ongamisana lami.” Kodwa uMichael wathi eseqalise ukufunda iBhayibhili wabona ukuthi uJehova uthini ngodlakela. (Hubo. 11:5) Nanku akutshoyo ngomfowethu lomkakhe abafunda laye iBhayibhili: “Abazange bangitshele ukuthi ngitshiye i-karate kodwa baqhubeka bengifundisa iqiniso eliseBhayibhilini.”

¹¹ Waqhubeka efunda futhi lokhu kwenza wamthanda kakhulu uJehova. Okwamthinta kakhulu yikufunda ukuthi uJehova ulendaba lezinceku zakhe. Ngokuhamba kwesikhathi uMichael wananzelela ukuthi kwasekumele enze isinqumo esiqakathekileyo. Wathi: “Ngangikwazi ukuthi ukutshiya i-karate kuzakuba nzima kodwa ngangikwazi lokuthi lokhu kwakuzathokozisa uJehova futhi ngangingathandabuzi ukuthi akula loba yini engingayitshiya eligugu ukwedlula ukumkhonza.” UMichael wananzelela ukuthi iqiniso ayelitholile laliligugu sibili futhi lokhu kwamnceda ukuthi enze utshintsho olukhulu empilweni yakhe.—Jak. 1:25.

12-13. Iqiniso eliseBhayibhilini lamkhanyisela njani uMayli?

¹² IBhayibhili lithi iqiniso linjengesibane esikhanyisa emnyameni futhi lokhu kwenza kucace ukuthi liligugu kangakanani. (Hubo. 119:105; Efe. 5:8) UMayli ohlala e-Azerbaijan uyabonga kakhulu ngendlela iLizwi likaNkulunkulu elamkhanyisela ngayo. Uyise wanguMuslim, unina engumJuda. UMayli wathi: “Ngangingakaze ngithandabuze ukuthi uNkulunkulu ukhona kodwa kulemibuzo eminengi engangizibuza yona. Ngangizibuza ukuthi uNkulunkulu wasidalelani lokuthi umuntu uhluphekelani okwempilo yakhe yonke abesephinda ahlupheke phakade esihogweni. Abantu babesithi konke okwenzakalayo kuyintando kaNkulunkulu. Yikho ngangizibuza ukuthi kambe abantu bangodoli yini uNkulunkulu abenzisa intando yakhe abesekholisa ukubabona behlupheka.”

¹³ UMayli waqhubeka edinga izimpendulo zemibuzo yakhe. Ngokuhamba kwesikhathi wavuma ukufunda iBhayibhili njalo waba nguFakazi. Wathi: “Indlela iBhayibhili elicace ngayo yenza ngaqalisa ukubona izinto ngelinye ilihlo futhi lokhu kwenza ngathokoza. Indlela ezwisisekayo iLizwi likaNkulunkulu elichasisa ngayo izinto yenza ngahlaliseka.” Sonke njengoMayli siyamdumisa uJehova ‘owasibiza sisebumnyameni wasiletha ekukhanyeni kwakhe okukhazimulayo.’—1 Phet. 2:9.

14. Singenzani ukuze silithande kakhulu iqiniso? (Khangela lebhokisi elithi, “ Ezinye Izinto Iqiniso EliseBhayibhilini Elingafaniswa Lazo.”)

 ¹⁴ Sesixoxe ngokulutshwana okutshengisa ukuthi iqiniso liligugu kangakanani. Akuthandabuzwa ukuthi bunengi obunye ubufakazi olabo. Ngesikhathi utaditsha uwedwa, zama ukudinga ezinye izizatho ezenza silithande iqiniso. Nxa silithanda sibili iqiniso sizazimisela ukudinga indlela zokukutshengisa lokho.

15. Singatshengisa njani ukuthi siyalithanda iqiniso?

¹⁵ Sitshengisa ukuthi siyalithanda iqiniso ngokuhlala sitaditsha iBhayibhili kanye lamabhuku asekelwe kulo. Phela ukufunda akupheli kungelani lokuthi silesikhathi esingakanani singoFakazi. INqabayokulinda yokuqala eyadindwayo yathi: ‘Kunzima ukuthola iqiniso emhlabeni lo ogcwele amanga. Kumele usebenze nzima ukuze ulithole. Ungasuthiseki ngelilodwa nje osulifundile. Phela ukufunda akupheli.’ Akulula ukutaditsha kodwa kuyanceda sibili.

16. Yiphi indlela yokutaditsha ekusebenzelayo? (IZaga 2:4-6)

¹⁶ Abanye bethu asikuthandi ukubala lokutaditsha. Kodwa uJehova usicela ukuthi  siqhubeke ‘sidingisisa’ futhi ‘siphenya’ ukuze silizwisise kuhle iqiniso. (Bala iZaga 2:4-6.) Ukuzimisela okunjalo kuzasinceda. Umfowethu okuthiwa nguCorey wathi nxa etaditsha iBhayibhili uyazama ukuthola okunengi evesini ngayinye ayibalayo. Wathi: ‘Ngibala wonke amabala angaphansi akhona, ngikhangele wonke amavesi afakiweyo ahambelana levesi engiyibalayo futhi ngichwayisise. Ngithola into ezinengi nxa ngitaditsha ngalindlela.’ Siyabe sitshengisa ukuthi siyaliqakathekisa iqiniso nxa sizimisele ukusebenza nzima ukuze silifunde kungelani lokuthi sisebenzisa yiphi indlela nxa sitaditsha.—Hubo. 1:1-3.

17. Kumele senzeni ngeqiniso esesilifundile? (UJakhobe 1:25)

¹⁷ Kodwa kukhona okunye okumele sikwenze ngaphandle nje kokufunda iqiniso. Kumele sikusebenzise esikufundayo. Sizathokoza nxa singakwenza lokhu. (Bala uJakhobe 1:25.) Singenzani ukuze sibone ukuthi siyakusebenzisa yini lokho esikufundayo? Omunye umfowethu uthi kumele sizihlole ukuze sibone lapho esenza kuhle khona lalapho esidinga ukulungisisa khona. Umphostoli uPhawuli yena wathi: “Njengoba sesithuthukile safika kulelibanga, kasiqhubekeni sihamba ngokuhleleka endleleni yonale.”—Flp. 3:16.

18. Kusinceda njani ukwenza konke esingakwenza ukuze ‘siqhubeke sihamba eqinisweni’?

¹⁸ Siyancedakala sibili nxa sisenza konke esingakwenza ukuze ‘siqhubeke sihamba eqinisweni.’ Siphila impilo ethokozisayo njalo senza uJehova labafowethu labodadewethu bathokoze. (Zaga. 27:11; 3 Joh. 4) Lezi yizizatho eziqakatheke kakhulu ezenza silithande iqiniso njalo senze lokho elikutshoyo.