1. Kuyini owakufundiswayo ngoMdali wethu?

NXA wakhuliswa ngoFakazi bakaJehova, kumele ukuthi wafunda ngoJehova usesemncane. Wafundiswa ukuthi unguMdali, ukuthi ulobuntu obuhle lokuthi ufuna ukwenza umhlaba ube lipharadayisi.—Gen. 1:1; ImiSeb. 17:24-27.

2. Abanye abantu bababona njani labo abakholwa ukuthi kuloMdali?

² Abantu abanengi abakholwa ukuthi uNkulunkulu ukhona kumbe ukuthi nguye owadala zonke izinto. Kodwa bakholwa ukuthi izinto eziphilayo zazenzakalela njalo zatshintsha kancane kancane zaze zaba yizinto ezimangalisayo esizibona lamuhla. Abanye abantu abakholwa lokhu bafundile okuzwayo. Bangathi isayensi iyatshengisa ukuthi lokho okutshiwo liBhayibhili kungamanga lokuthi labo abakholwa ukuthi kuloMdali ngabantu abangafundanga, abangakhaliphanga kumbe abaqileka lula.

3. Kungani kuqakathekile ukuthi siqinise ukholo lwethu?

³ Lokho okutshiwo ngabanye abantu abafundileyo kuzaluxegisa yini ukholo lwethu lokuthi uJehova nguMdali wethu olothando? Lokhu kuzakuya ngokuthi yisiphi isizatho esenza sikholwe ukuthi uJehova unguMdali. Kambe okwenza sikholwe yikuthi satshelwa ukuthi sikukholwe lokho kumbe yikuthi sazinika isikhathi sokuhlola ubufakazi sisodwa? (1 Khor. 3:12-15) Sonke kumele siqhubeke siqinisa ukholo lwethu kungelani lokuthi silesikhathi esinganani singoFakazi bakaJehova. Nxa singenza njalo, kasisoze sikhohliswe ‘yikuhlakanipha komhlaba lo langobuqili obuyize’ obufundiswa ngabantu abaphikisana leLizwi likaNkulunkulu. (Kol. 2:8; Heb. 11:6) Esihlokweni lesi sizaxoxa ngokuthi kungani abanengi bengakholwa ukuthi kuloMdali. Sizaphinda sixoxe ngalokho ongakwenza ukuze ube lokholo kuJehova  uMdali wakho lokuthi ungenzani ukuze uqhubeke ulokholo oluqinileyo.

4. Ngokwalokho okutshiwo kuHebheru 11:1 lamabala angaphansi, luyini ukholo?

⁴ Abanye abantu bacabanga ukuthi ukuba lokholo kutsho ukuqiniseka ngento ongelabufakazi ngayo. Kodwa iBhayibhili lithi lolo kayisilokholo lweqiniso. (Bala uHebheru 11:1 lamabala angaphansi.) Liveza ukuthi ukuba lokholo kutsho ukuqiniseka ngento olobufakazi ngayo. Ngakho lanxa singamboni uJehova loJesu silobufakazi obusuthisayo bokuthi bakhona sibili. Kanti njalo silobufakazi obusuthisayo bokuthi uMbuso osezulwini ukhona sibili lanxa singawuboni. (Heb. 11:3) Omunye owezesayensi owaba nguFakazi uthi: “Silobufakazi balokho esikukholwayo futhi siyavumelana leqiniso elitshiwo yisayensi.”

5. Kungani abantu abanengi bekholwa ukuthi izinto eziphilayo zazenzakalela?

⁵ Nxa kulobufakazi obusuthisayo bokuthi uNkulunkulu nguye owadala zonke izinto, kungani abantu abanengi bengakukholwa lokho? Abanye abakaze bahlole lobobufakazi. URobert osenguFakazi kaJehova uthi: “Esikolo akuzange kuke kukhulunywe ngokuthi izinto zadalwa yikho ngazitshela ukuthi akulanto enjalo. Kodwa ngathi sengileminyaka engu-22 ngaxoxa laboFakazi bakaJehova futhi bangitshengisa ubufakazi obulengqondo njalo obusuthisayo obuseBhayibhilini bokuthi izinto zadalwa.” *—Khangela ibhokisi elithi, “ Umlayezo Oqakathekileyo Oya Kubazali.”

6. Kungani abanye bengakholwa ukuthi kuloMdali?

⁶ Abanye kabakholwa ukuthi kuloMdali  ngenxa yokuthi bathi bakholwa lokho abakubonayo kuphela. Kodwa iqiniso yikuthi bayakholwa ukuthi izinto abangaziboniyo zikhona, ngokwesibonelo, umoya ovunguzayo, ngenxa yokuthi balobufakazi bokuthi ukhona. Ukholo okukhulunywa ngalo eBhayibhilini lugoqela ubufakazi bokuthi lokunye “okungabonakaliyo kukhona sibili.” (Heb. 11:1) Kudinga isikhathi lokuzimisela ukuthi sihlole sisodwa ubufakazi bakhona kodwa abantu abanengi abazimiselanga ukwenza njalo. Umuntu ongafuniyo ukuhlola ubufakazi angaphetha ngokuthi akulaNkulunkulu.

7. Yibo bonke yini abantu abafundileyo abangakholwa ukuthi uNkulunkulu wadala zonke izinto? Chasisa.

⁷ Abanye abezesayensi bathi sebehlole ubufakazi bacina bekholwa ukuthi uNkulunkulu wadala zonke izinto. * Abanye abanjengoRobert  esike sakhuluma ngaye bangabe bazitshela ukuthi akulaMdali ngenxa yokuthi eyunivesithi abazange bake bafundiswe ukuthi izinto zadalwa. Kodwa abanengi abezesayensi sebemazi futhi sebemthanda uJehova. Lathi sonke kumele siqinise ukholo lwethu kuNkulunkulu kungelani lalokho esakufundiswa esikolo. Akula omunye umuntu ongasenzela lokhu.

8-9. (a) Yiwuphi umbuzo esizaxoxa ngawo khathesi? (b) Ukufunda ngezinto ezidaliweyo kuzakunceda njani?

⁸ Ungenzani ukuze ube lokholo lokuthi uNkulunkulu wadala zonke izinto? Asixoxeni ngezinto ezine.

⁹ Funda ngezinto ezidaliweyo. Ukuhlolisisa izinyamazana, izimila lezinkanyezi kuzakunceda ukuthi ube lokholo lokuthi kuloMdali. (Hubo. 19:1; Isaya. 40:26) Ungaqhubeka ufunda ngezinto ezinjengalezi, uzaqiniseka kakhulu ukuthi uJehova nguye uMdali. Amabhuku ethu ajayele ukuba lezihloko ezichasisa okunengi ngezinto ezidaliweyo. Ungazeqi izihloko lezi lanxa ubona angani kunzima ukuzizwisisa. Funda owenelisa ukukufunda. Ungakhohlwa lokubukela amavidiyo amayelana lezinto ezidaliweyo esawabukela emihlanganweni yesabelo esanda kwedlula, atholakala kuwebhusayithi yethu i-jw.org.

10. Nika isibonelo esitshengisa ukuthi uMdali ukhona sibili. (URoma 1:20)

¹⁰ Ngesikhathi uhlola izinto ezidaliweyo nanzelela ukuthi zikufundisani ngoMdali wethu. (Bala uRoma 1:20.) Ngokwesibonelo, ilanga likhipha ukutshisa lokukhanya okwenza izinto ziphile emhlabeni. Kodwa eminye imisebe yalo ingaba yingozi. Sidinga ukuvikelwa emisebeni le. Pho kuyini okusivikelayo? Emkhathini kulegasi okuthiwa yi-ozone esivikelayo emisebeni le eyingozi. Nxa imisebe le evela elangeni ilokhu isiba lamandla, i-ozone layo ibanengi. Lokho akutshengisi yini ukuthi kulomuntu owenza izinto lezi lokuthi umuntu lowo unguMdali olothando njalo okhaliphileyo?

11. Ungazithola ngaphi izinto ezizakwenza ukholwe sibili ukuthi kuloMdali? (Khangela ibhokisi elithi, “ Okungaqinisa Ukholo Lwakho.”)

¹¹ Ungathola okunengi okuzakunceda ukholwe sibili ukuthi kuloMdali nxa ungakhangela e-Bhukwini Lokuchwayisisa LaboFakazi BakaJehova njalo uchwayisise ku-jw.org. Ungaqala ngezihloko lamavidiyo asengxenyeni ethi, “Kwazenzakalela Yini?” Izihloko lezi lamavidiyo la kufitshane njalo kukhuluma ngezinto ezimangalisayo ezimayelana lezinyamazana lezimila. Kuphinda kukhulume ngokuthi abesayensi bazame njani ukulingisela izinto ezidaliweyo.

12. Yiziphi ezinye izinto okumele sizinanzelele nxa sitaditsha iBhayibhili?

¹² Taditsha iBhayibhili. Owezesayensi esikhulume ngaye kundima 4 waqalisa engakholwa ukuthi kuloMdali. Kodwa wacina ekukholwa lokhu. Uthi: “Ukholo lwami lwalungasekelwanga kulokho engangikufunde kusayensi kuphela kodwa lwalusekelwe lakulokhu engakufunda eBhayibhilini.” Engxenye vele usulazi iBhayibhili. Lanxa kunjalo kumele uqhubeke ulitaditsha ukuze ukholwe sibili ukuthi kuloMdali. (Josh. 1:8; Hubo. 119:97) Ngokwesibonelo, cabanga ngokuthi nxa iBhayibhili likhuluma ngezinto ezenzakala kudala lizibeka zinjengoba zinjalo. Phinda ucabange ngeziphrofetho ezikulo ezagcwalisekayo lokuthi elikutshoyo kuyavumelana. Nxa ungenza njalo awusoze uthandabuze ukuthi uMdali olothando lohlakaniphileyo nguye owasidalayo njalo waphefumulela iBhayibhili. *—2 Tim. 3:14; 2 Phet. 1:21.

13. Yisiphi isibonelo esitshengisa ukuthi okutshiwo liLizwi likaNkulunkulu kuyanceda?

 ¹³ Ngesikhathi utaditsha iLizwi likaNkulunkulu, nanzelela ukuthi elikutshoyo kunceda njani. Ngokwesibonelo, laxwayisa kudala ukuthi ukuthanda imali kuyingozi njalo kubangela ‘izinhlungu ezinengi.’ (1 Tim. 6:9, 10; Zaga. 28:20; Mat. 6:24) Isixwayiso lesi sisasebenza yini lalamuhla? Elinye ibhuku elikhuluma ngesimo sabantu balamuhla lithi: “Abantu abanengi abacabanga ukuthi ukuba lemali yikho okuqakatheke kakhulu empilweni abathokozi futhi bayakhathazeka kakhulu. Lalabo abafuna ukuba lemali enengi abathokozi futhi baba lemikhuhlane eminengi.” Lokhu kutshengisa ukuthi isixwayiso esiseBhayibhilini sokuthi singathandi imali siyanceda sibili. Kukhona yini okunye okutshiwo liBhayibhili okukuncedileyo? Nxa singacabanga ngazo zonke izeluleko ezinhle eziseBhayibhilini, sizabona lokuthi uMdali wethu olothando uyakwazi okusincedayo futhi sizahlala sithembele kuye ukuthi aseluleke. (Jak. 1:5) Lokhu kuzakwenza sithokoze kakhulu empilweni.—Isaya. 48:17, 18.

14. Ukutaditsha iBhayibhili kuzakufundisani ngoJehova?

¹⁴ Taditsha iBhayibhili ulenhloso yokumazi kuhle uJehova. (Joh. 17:3) Uzafunda ngobuntu bakhe obuhle futhi ubuntu lobo buyafanana lowafunda ngabo ngesikhathi uhlola izinto ezidaliweyo. Ukufunda ngobuntu bukaJehova kwenza sikholwe ukuthi ukhona sibili. (Eks. 34:6, 7; Hubo. 145:8, 9) Nxa ungaqhubeka usibamazi kuhle uJehova, ukholo lwakho luzaqina, umthande kakhulu njalo ube ngumngane wakhe oseduze.

15. Ukutshela abanye ngoNkulunkulu kuzakunceda njani?

¹⁵ Tshela abanye ngoNkulunkulu. Nxa ungenza njalo ukholo lwakho luzaqina. Kodwa kuthiwani nxa ungakwazi ukuthi umphendule njani umuntu othandabuzayo ukuthi uNkulunkulu ukhona? Zama ukudinga ukuthi amabhuku ethu ayichasisa njani indaba le ubusuxoxa laye ngakho. (1 Phet. 3:15) Ungacela omunye umfowethu kumbe udadewethu akuncedise. Ukuchwayisisa kuzakunceda kungelani lokuthi umuntu omtshumayezayo uyakwamukela lokho okutshiwo liBhayibhili loba hatshi. Kuzaqinisa ukholo lwakho njalo awusoze ubakholwe abantu bomhlaba lo abahlakaniphileyo kumbe abafundileyo abathi akulaMdali.

16. Kuyini okuzakwenzakala nxa singahlali siqinisa ukholo lwethu?

¹⁶ Kumele siqhubeke siqinisa ukholo lwethu kungelani lokuthi silesikhathi esinganani sikhonza uJehova. Singekela ukwenza njalo ukholo lwethu luzaxega. Njengoba sibonile, ukholo lugoqela ubufakazi bokuthi okungabonakaliyo kukhona sibili. Kulula ukuthi sikhohlwe ngento esingayiboniyo. Yikho uPhawuli wathi ukuba lokholo oluxegayo lokungabi lokholo ‘yisono esisithandela lula.’ (Heb. 12:1) Manje singenzani ukuze siqhubeke silokholo oluqinileyo?—2 Thes. 1:3.

17. Kuyini okungasinceda ukuthi sihlale silokholo oluqinileyo?

¹⁷ Okokuqala, hlala ucela uJehova ukuthi akunike umoya ongcwele. Kumele senze njalo ngoba ukholo ngesinye sezithelo zomoya ongcwele. (Gal. 5:22, 23) Asingeke sibe lokholo kuMdali wethu njalo sihlale silalo nxa engasinikanga umoya wakhe ongcwele. Uzasinika wona nxa singaqhubeka siwucela. (Luk. 11:13) Singakhuleka sisithi: “Sincedise ukuthi sibe lokholo oluqinileyo.”—Luk. 17:5.

18. Ngokwalokho okutshiwo kuHubo 1:2, 3, yisiphi isibusiso esilaso?

¹⁸ Okwesibili, hlala utaditsha iLizwi likaNkulunkulu. (Bala iHubo 1:2, 3.) Ngesikhathi  kubhalwa ihubo leli, malutshwana ama-Israyeli ayelemibhalo yoMthetho kaNkulunkulu egcweleyo. Kodwa inkosi labaphristi babelayo futhi kwakusithi ngemva kweminyaka eyisikhombisa kubuthaniswe “amadoda, abafazi labantwana” kanye labezizweni ababehlala ko-Israyeli ukuze balalele ngesikhathi kubalwa uMthetho kaNkulunkulu. (Dute. 31:10-12) Ngesikhathi uJesu esemhlabeni, balutshwana abantu ababelezincwadimgoqwa zeMibhalo njalo ezinye zazigcinwa esinagogi. Kodwa lamuhla abantu abanengi bayenelisa ukubala iLizwi likaNkulunkulu, kungaba ngeligcweleyo kumbe ingxenye zalo. Lokhu kuyisibusiso esikhulu sibili. Singatshengisa njani ukuthi siyasiqakathekisa isibusiso lesi?

19. Kumele senzeni ukuze ukholo lwethu luhlale luqinile?

¹⁹ Sitshengisa ukuthi siyasiqakathekisa isibusiso sokuba leLizwi likaNkulunkulu ngokulibala nsuku zonke. Kumele sibe lesikhathi esihleliweyo sokutaditsha iBhayibhili, kungabi yisivukampunzane. Nxa singalitaditsha nsuku zonke ukholo lwethu luzahlala luqinile.

20. Kumele sizimisele ukwenzani?

²⁰ Thina asifanani labantu “abahlakaniphileyo labafundileyo” bomhlaba lo ngoba olwethu ukholo lusekelwe eLizwini likaNkulunkulu. (Mat. 11:25, 26) Ukubala iBhayibhili kusincede sakwazi ukuthi kungani izinto emhlabeni ziqhubeka zisiba zimbi lokuthi uJehova uzakwenzani ngakho. Yikho asizimiseleni ukuqinisa ukholo lwethu lokuncedisa abantu abanengi ukuthi bakholwe kuMdali wethu. (1 Tim. 2:3, 4) Kanti njalo asiqhubekeni silindele isikhathi lapho bonke abantu emhlabeni bezadumisa uJehova ngamazwi akuSambulo 4:11 athi: ‘Ufanele Jehova Nkulunkulu wethu ukwamukela inkazimulo ngoba wadala zonke izinto.’