1-2. Yiphi indlela engcono yokubala lokutaditsha iBhayibhili? Nika isibonelo.

 AKE sithi kulendlu ofuna ukuyithenga. Kuyini ongafuna ukukubona ungakayithengi? Ubungasuthiseka ngokuphongubona umfanekiso wayo waphambili yini? Akuthandabuzwa ukuthi ubungafuna ukuyibona mathupha, uyibhode uyikhangela njalo ungene laphakathi uyihlole ubone ukuthi injani. Mhlawumbe ubungafisa ukukhangela amaplani endlu leyo ukuze ubone ukuthi yakhiwe njani. Phela uyabe ufuna ukwazi konke ngendlu leyo oyabe ufuna ukuyithenga.

² Lathi yikho esingakwenza nxa sifunda njalo sitaditsha iBhayibhili. Elinye ibhuku lifanisa okufundiswa liBhayibhili “lesakhiwo esikhulu futhi eside kakhulu esilezisekelo ezitshonayo.” Manje ungenzani ukuze ukuzwisise kuhle konke okuseBhayibhilini? Nxa ungabala ugijima uzakukha phezulu ufunde izinto ezilula kuphela “eziphathelane lamazwi kaNkulunkulu angcwele.” (Heb. 5:12) Yikho njengomuntu ofuna ukuthenga indlu ongena phakathi ayihlole, lawe lihlolisise iBhayibhili ukuze uzwisise okunengi. Indlela engcono yokutaditsha iBhayibhili yikubona ukuthi elikukhulumayo kungenelana njani. Zama ukuzwisisa ukuthi yiliphi iqiniso olikholwayo lokuthi yindaba ulikholwa.

3. Umphostoli uPhawuli wakhuthaza amaKhristu ukuthi enzeni, njalo kungani? (U-Efesu 3:​14-19)

³ Kulezinto okumele sizifunde sijule nxa sifuna ukuzwisisa  iLizwi likaNkulunkulu. Umphostoli uPhawuli wakhuthaza abafowabo labodadewabo abangamaKhristu ukuthi balihlolisise iLizwi likaNkulunkulu ukuze ‘bazwisise ngokugcweleyo ububanzi, lobude, lokuphakama lokujula’ kweqiniso. Lokhu kwakuzakwenza ukholo lwabo ‘lugxile futhi luqine.’ (Bala u-Efesu 3:​14-19.) Lathi yikho okufanele sikwenze. Asiboneni ukuthi singenzani ukuze silizwisise ngokugcweleyo iLizwi likaNkulunkulu.

4. Singenzani ukuze sisondele eduze loJehova? Nika izibonelo.

⁴ AmaKhristu akufanelanga asuthiseke ngokwazi imfundiso zeBhayibhili eziyisisekelo kuphela. Umoya ongcwele kaNkulunkulu ungasinceda ukuthi sizwisise “lezinto ezijulileyo zikaNkulunkulu.” (1 Khor. 2:​9, 10) Chwayisisa eBhayibhilini ulenhloso yokusondela eduze loJehova. Ngokwesibonelo, ungadingisisa ukuthi wayetshengisa njani ukuthi uyazithanda izinceku zakhe zakudala lokuthi lokho kutshengisa njani ukuthi lawe uyakuthanda. Ungahlolisisa ukuthi uJehova wayefuna ama-Israyeli amkhonze njani ubusukhangela ukuthi indlela ababekhonza ngayo ihambelana njani lendlela esikhonza ngayo lamuhla. Okunye ongakwenza yikufunda ngeziphrofetho uJesu azigcwalisayo ngesikhathi esenza inkonzo yakhe.

5. Yiphi indaba ongafisa ukuchwayisisa ngayo nxa utaditsha iBhayibhili?

⁵ Abanye abathanda ukuchwayisisa ngalokho abakubala eBhayibhilini babuzwa ukuthi yiziphi izinto ezijulileyo eziseLizwini likaNkulunkulu abangafisa ukuchwayisisa ngazo. Okunye abakutshoyo kubhaliwe ebhokisini elithi “ Izihloko Ongachwayisisa Ngazo.” Ukutaditsha ngezihloko lezi usebenzisa iBhuku Lokuchwayisisa LaboFakazi BakaJehova kuzakwenza uthokoze kakhulu. Ukugebha ujule eLizwini likaNkulunkulu kuzaqinisa ukholo lwakho futhi kukuncede ‘uthole ulwazi olumayelana loNkulunkulu.’ (Zaga. 2:​4, 5) Asihloleni ezinye izinto ezijulileyo eziseBhayibhilini esingachwayisisa ngazo.

6. (a) Yiwuphi umehluko okhona phakathi kohlelo lenhloso? (b) Kungani singathi inhloso kaJehova ngabantu langomhlaba ‘ngeyaphakade’? (U-Efesu 3:11)

⁶ Okunye ongacabanga ngakho yikuthi iBhayibhili lithini ngenhloso kaNkulunkulu. Kulomehluko omkhulu phakathi kohlelo lenhloso. Uhlelo lunjengokudweba phansi indlela ozayisebenzisa nxa usiya endaweni ethile. Kodwa nxa kungaba lento engakuphambanisa endleleni leyo ungehluleka ukuyafika lapho oyakhona. Kodwa inhloso singayifanisa lendawo lapho oyabe usiya khona. Singasebenzisa indlela ezitshiyeneyo ukuze sifike lapho esiya khona. Nxa indlela esifuna ukuyisebenzisa ivaliwe singatshintsha sihambe ngeyinye. Kuyasithokozisa ukuthi uJehova uqhubeka esivezela ‘injongo yakhe yaphakade’ esebenzisa iBhayibhili. (Efe. 3:11.) UJehova usebenzisa indlela ezitshiyeneyo “ukuze agcwalise injongo yakhe.” (Zaga. 16:4) Konke uJehova akwenzayo kuzahlala kuze kube nini lanini. Iyini inhloso kaJehova futhi yiziphi indlela azisebenzisileyo ukuze ayigcwalise?

7. UJehova watshintsha njani indlela yokugcwalisa injongo yakhe ngemva kokuhlamuka kuka-Adamu lo-Eva? (UMathewu 25:34)

⁷ UNkulunkulu watshela u-Adamu lo-Eva ukuthi wayehloseni ngabo. Wayefuna ‘bazale bande bagcwalise umhlaba bawubuse njalo babuse phezu kwazo zonke izidalwa eziphilayo ezihamba’ emhlabeni. (Gen. 1:28) U-Adamu lo-Eva bahlamuka futhi lokho kwabangela ukuthi abantu bonke babe lesono. Lanxa kunjalo lokho akuzange kwenze uJehova ehluleke ukwenza lokho ayekuhlosile. Watshintsha indlela ayesezagcwalisa ngayo inhloso yakhe. Wabeka uMbuso ezulwini ozagcwalisa inhloso yakhe ngabantu langomhlaba. (Bala uMathewu 25:34.) UJehova wathuma iNdodana yakhe ayithandayo ukuthi ibuye emhlabeni ngesikhathi esifaneleyo izofundisa abantu ngoMbuso wakhe njalo isikhulule esonweni lasekufeni. UJesu wavuswa wabuyela ezulwini wayakuba yiNkosi yoMbuso kaNkulunkulu. Kulokunye esingakufunda ngenhloso kaNkulunkulu.

8. (a) Yiwuphi umlayezo oqakathekileyo oseBhayibhilini? (b) Kuyini okunye uJehova azakwenza okukhulunywa ngakho ku-Efesu 1:​8-11? (Khangela umfanekiso ongaphandle.)

⁸ Umlayezo oqakathekileyo oseBhayibhilini ngowokungcweliswa kwebizo likaJehova kanye lokuthi uzayigcwalisa njani inhloso yakhe ngomhlaba esebenzisa uMbuso wakhe obuswa nguKhristu. Lokho uNkulunkulu akuhlosileyo akutshintshi. Uthembise ukuthi akukhulumileyo kuzagcwaliseka. (Isaya. 46:​10, 11; Heb. 6:​17, 18) Sekuseduze ukuthi umhlaba utshintshwe ube lipharadayisi lapho okuzahlala khona abantu abangelasono ‘bekholisa impilo kuze kube nini lanini.’ (Hubo. 22:26) Kulokunye futhi uJehova azakwenza. Uzakwenza ukuthi kube lokumanyana phakathi kwezinceku zakhe ezisemhlabeni lezisezulwini. Lokhu kuzakwenza ukuthi bonke bazithobe ngaphansi kokubusa kwakhe. (Bala u-Efesu 1:​8-11.) Indlela uJehova agcwalisa ngayo inhloso yakhe ayikuthinti kwamancane yini?

9. Yiziphi izinto ezizakwenzakala esikhathini esizayo iBhayibhili elisitshela ngazo?

⁹ Cabanga ngesiphrofetho uJehova asikhuluma ensimini yase-Edeni esibhalwe kuGenesisi 3:15. b Sikhuluma ngendlela uJehova ayezagcwalisa ngayo inhloso yakhe. Kodwa esikutshoyo kwakuzagcwaliseka ngemva kweminyaka eminengi. UJehova watshela u-Abrahama okunye okwakuzakwenzakala  ngemva kweminyaka eminengi ukuze kugcwaliseke isiphrofetho leso. Omunye wezizukulwane zakhe wayezakuba nguKhristu. (Gen. 22:​15-18) Njengoba kwakuphrofethiwe, uJesu walinyazwa isithende ngo-33 C.E. (Imiseb. 3:​13-15) Ingxenye yokucina yesiphrofetho lesi izagcwaliseka eminyakeni engaphezu kwengu-1 000 ezayo lapho uSathane azacobodiswa khona ikhanda. (Isam. 20:​7-10) Njengoba kulenzondano phakathi komumo wezinto kaSathane lenhlanganiso kaJehova, iBhayibhili liphinda lisitshele ngalokho okuzenzakala nxa lokho sekusiya komlindi uyacina.

10. (a) Yiziphi izinto esezizakwenzakala? (b) Singakulungiselela njani osekuzenzakala? (Khangela amabala angaphansi.)

¹⁰ Cabanga ngezinto lezi ezimangalisayo iBhayibhili elithi zizakwenzakala. Okokuqala, amazwe azamemezela ukuthi ‘sekulokuthula lokuvikeleka!’ (1 Thes. 5:​2, 3) “Masinyane” nje ngemva kwalokho ukuhlupheka okukhulu kuzaqalisa lapho izizwe sezihlasela inkolo yamanga. (Isam. 17:16) Ngemva kwalokho kuzakuba lesibonakaliso ‘seNdodana yomuntu isiza ngamayezi ezulu ilamandla lenkazimulo enkulu.’ (Mat. 24:30) UJesu uzakwahlulela abantu ehlukanise izimvu lembuzi. (Mat. 25:​31-33, 46) Konke lokhu kusenzakala uSathane uyabe engagoqanga izandla. Uzazonda kakhulu abesebangela ukuthi izizwe ezimanyeneyo, lezo iBhayibhili elizibiza ngokuthi nguGogi waselizweni laseMagogi, zihlasele abantu bakaNkulunkulu. (Hez. 38:​2, 10, 11) Phakathi kokuhlupheka okukhulu, abagcotshiweyo abazabe besasele emhlabeni bazaqoqwa bayehlangana loKhristu kanye lamabutho akhe ezulwini ukuze balwe empini ye-Amagedoni ezaqeda ukuhlupheka okukhulu. c (Mat. 24:31; Isam. 16:​14, 16) Ngemva kwalokho ukubusa kukaKhristu kweminyaka eyinkulungwane kuzaqalisa.—Isam. 20:6.

11. Kuzabe kunjani ukuphila phakade? (Khangela lomfanekiso.)

¹¹ Akucabange ukuthi impilo izabe isinjani sekudlule iminyaka engu-1 000 uJesu ebusa. IBhayibhili lithi uMdali wethu ‘wenza abantu baba lesifiso sokuphila kuze kube nini lanini.’ (Umtshu. 3:11) Cabanga ukuthi ubungane  bakho loJehova buzabe sebunjani. Ibhuku elithi Sondela KuJehova kukhasi 319 lithi: ‘Ngemva kokuthi sesiphile iminyaka leminyaka kungaba engamakhulu, izinkulungwane, izigidi loba amabhiliyoni, sizenelisa ukwazi okunengi kakhulu ngoJehova uNkulunkulu ukwedlula khathesi. Lanxa kunjalo, kuzaqhubeka kulokhu kulezinto ezinhle ezinengi okuyabe kumele sifunde ngazo. Impilo engapheliyo izasenza sisuthiseke kakhulu futhi kuzabe kulokunengi okokwenza njalo ukusondela kuJehova kuzahlala kuyikho okuthokozisa kakhulu.’ Njengoba siqhubeka sitaditsha iLizwi likaNkulunkulu, kuyini okunye esingadingisisa ngakho kulo?

12. Singenzani ukuze sizwisise lokho okwenzakala ezulwini? Nika isibonelo.

¹² ILizwi likaNkulunkulu liyasitshela okulutshwana ngokuthi kunjani lapho uJehova ahlala khona, “endaweni ephakemeyo.” (Isaya. 33:5) Lisitshela izinto ezimangalisayo ezimayelana loJehova kanye lengxenye yenhlanganiso yakhe esezulwini. (Isaya. 6:​1-4; Dan. 7:​9, 10; Isam. 4:​1-6) Ngokwesibonelo, singabala ngezinto ezimangalisayo ezabonwa nguHezekheli ngesikhathi ‘amazulu evuleka futhi eqala ukubona imibono kaNkulunkulu.’—Hez. 1:1.

13. Kuyini okuthandayo ngoJesu okubhalwe kuHebheru 4:​14-16?

¹³ Cabanga ngalokho uJesu asenzela khona khathesi esezulwini njengoba eyiNkosi yethu futhi enguMphristi Omkhulu olozwelo. Ngaye singathandaza sisondele kuNkulunkulu “esihlalweni sobukhosi somusa omkhulu” sicela ukuthi asincedise “ngesikhathi esifaneleyo” lokuthi abe lesihawu kithi. (Bala uHebheru 4:​14-16.) Nsuku zonke kumele sihlale sicabanga ngalokho uJehova loJesu abasenzela khona besezulwini. Uthando abasitshengisa lona kumele lusifuqe ukuthi sikhuthale  ekukhonzeni uJehova.—2 Khor. 5:​14, 15.

14. Singatshengisa njani ukuthi siyambonga uJehova loJesu? (Khangela lemifanekiso.)

¹⁴ Eyinye indlela esingatshengisa ngayo ukuthi siyambonga uNkulunkulu leNdodana yakhe yikuncedisa abanye ukuthi babe ngoFakazi bakaJehova futhi babe ngabafundi bakaJesu. (Mat. 28:​19, 20) Lokhu yikho kanye umphostoli uPhawuli akwenzayo ukuze atshengise ukuthi uyabonga akwenzelwe nguNkulunkulu loKhristu. Wayekwazi ukuthi intando kaJehova yikuthi “abantu bemihlobo yonke basindiswe njalo bathole ulwazi oluqondileyo lweqiniso.” (1 Thim. 2:​3, 4) Wasebenza nzima etshumayela futhi ‘wenza konke okusemandleni akhe ukuze asindise abanye.’—1 Khor. 9:​22, 23.

15. Kuyini okuzasenza sithokoze okutshiwo kuHubo 1:2?

¹⁵ Umhubi wathi umuntu ojabulayo futhi ophumelelayo empilweni ngothokoziswa “ngumthetho kaJehova” njalo ‘ngocabangisisa ngomthetho kaNkulunkulu ngelizwi eliphansi ubusuku lemini.’ (Hubo. 1:​1-3; amabala angaphansi) Omunye umhumutshi weBhayibhili okuthiwa nguJoseph Rotherham owabhala ibhuku elithi Studies in the Psalms wathi echasisa amavesi la wathi umuntu kumele “adinge ukuqondiswa nguNkulunkulu ngokubala iBhayibhili, ukulitaditsha kanye lokucabangisisa ngalo.” Waphinda wathi “nxa ilanga lingadlula umuntu engazange abale iBhayibhili uyabe elidlalisile ilanga lakhe.” Okunye okuzakuthokozisa yikutaditsha iBhayibhili ufunde ngezinto ezimangalisayo ezikulo futhi uzame ukubona ukuthi okufundayo kungenelana njani. Uzathokoza kakhulu nxa ungalizwisisa ngokugcweleyo iLizwi likaNkulunkulu!

16. Sizaxoxa ngani esihlokweni esilandelayo?

¹⁶ Iqiniso uJehova asifundisa lona esebenzisa iLizwi lakhe iBhayibhili alinzima ukuthi silizwisise. Esihlokweni esilandelayo sizaxoxa ngethempeli likaJehova uPhawuli akhuluma ngalo encwadini ayibhalela amaKhristu angamaHebheru. Silethemba lokuthi ukufunda ngendaba le kuzaqinisa ukholo lwakho.