1-2. (a) Abaphostoli bakaJesu abathathu batshelwa ukuthi benzeni futhi benzani? (b) Sizaxoxa ngani esihlokweni lesi?

NGEMVA kwePhasika ka-32 C.E., umphostoli uPhetro loJakhobe loJohane babona umbono omangalisayo besentabeni ende okungenzakala ukuthi kwakuyintaba iHemoni. UJesu waguquka isimo phambi kwabo. “Ubuso bakhe bakhazimula njengelanga, lezembatho zakhe zangaphandle zacazimula njengokukhanya.” (Mat. 17:1-4) Umbono lo wathi usuphela abaphostoli bezwa uNkulunkulu esithi: “Le yiNdodana yami engiyithandayo futhi engiyamukelayo. Yilaleleni.” (Mat. 17:5) Okwenziwa ngabaphostoli laba abathathu ngemva kwalokho kwatshengisa ukuthi bamlalela uJesu. Lathi sifuna ukubalingisela.

² Esihlokweni esidlulileyo sifundile ukuthi ukulalela ilizwi likaJesu kutsho ukuyekela ukwenza ezinye izinto. Esihlokweni lesi sizaxoxa ngezinto ezimbili uJesu athi sizenze.

3. UMathewu 7:13, 14 uthi kumele senzeni?

³ Bala uMathewu 7:13, 14. Nanzelela ukuthi uJesu wakhuluma ngamasango amabili ayisa endleleni ezimbili, enye ‘ibanzi’ futhi enye ‘incinyane.’ Akulandlela yesithathu. Kumele sikhethe ukuthi sizahamba ngayiphi indlela. Lesi yisinqumo esiqakatheke kulazo zonke esingazenza ngoba ngeyodwa kuphela indlela eyisa ekuphileni okungapheliyo.

4. Chasisa indlela “ebanzi.”

⁴ Kumele sikhumbule umehluko okhona phakathi kwendlela lezi ezimbili. Abantu abanengi basendleleni “ebanzi” ngoba kulula ukuhamba kuyo. Okudanisayo yikuthi abanengi bakhetha ukuqhubeka besendleleni le lokwenza okwenziwa ngumuntu wonke ohamba kuyo. Abananzeleli ukuthi uSathane uDeveli nguye ozama ukwenza ukuthi  abantu bahambe kuyo lokuthi indlela yakhe iyisa ekufeni.—1 Khor. 6:9, 10; 1 Joh. 5:19.

5. Abanye benzeni ukuze bathole indlela “encinyane” futhi baqalise ukuhamba kuyo?

⁵ Kodwa enye indlela ‘incinyane’ njalo uJesu wathi balutshwana abayitholayo. Kungani ilabantu abalutshwana? Evesini elandelayo uJesu utshela abalandeli bakhe ukuthi baqaphele abaphrofethi bamanga. (Mat. 7:15) Ukuhlola okwenziwayo kutshengisa ukuthi kulezinkulungwane zamatshetshi futhi amanengi awo athi afundisa iqiniso. Abantu abanengi baphithene amakhanda ngenxa yobunengi bamatshetshi okokuthi abasazihluphi ngokudinga indlela eya ekuphileni. Kodwa bangayithola indlela le. UJesu wathi: “Nxa lingahlala liselizwini lami, liyabe lingabafundi bami sibili, futhi lizalazi iqiniso, njalo iqiniso lizalikhulula.” (Joh. 8:31, 32) Siyakuncoma ngokuthi awuzange wenze okwenziwa ngabanengi kodwa walidinga iqiniso. Walitaditsha okuzwayo iLizwi likaNkulunkulu ukuze ufunde ngalokho akhangelele ukuthi sikwenze njalo walalela lokho uJesu akufundisayo. Okunye owakufundayo yikuthi uJehova kafuni sikholwe lokho okufundiswa enkolweni zamanga lokuthi ufuna siyekele ukunanza imikhosi lamaholideyi okwaqaliswa ngamahedeni. Wafunda lokuthi ukwenza lokho uJehova afuna sikwenze lokutshiya izinto angazithandiyo kungaba nzima. (Mat. 10:34-36) Kungenzeka kwakungalula ukutshintsha indlela owawuphila ngayo kodwa waphikelela ngoba uyamthanda uYihlo osezulwini njalo ufuna ukumthokozisa. Kumele ukuthi uJehova uyazigqaja sibili ngawe!—Zaga. 27:11.

6. IHubo 119:9, 10, 45, lo-133 lithi kuyini okuzasinceda ukuthi sihlale sisendleleni encinyane?

⁶ Kuyini okungasinceda ukuthi siqhubeke sisendleleni encinyane nxa besesiqalisile ukuhamba kuyo? Cabanga ngomzekeliso lo. Kwamanye amazwe kulensimbi ezisathango eziba seceleni komgwaqo omncinyane osentabeni. Insimbi lezi zinceda abatshayeli ukuthi bangasondeli kakhulu lapho umgwaqo ophelela khona kumbe ukuthi bangaweli eliweni. Akulamtshayeli ongathi insimbi lezo ziyamcindezela. Imithetho lezimiso zikaJehova okutholakala eBhayibhilini kunjengensimbi lezo. Kusinceda ukuthi sihlale sisendleleni encinyane.—Bala iHubo 119:9, 10, 45, 133.

7. Abasakhulayo kumele bayibone njani indlela encinyane?

⁷ Lina elisakhulayo, liyake libone angani ukulandela lokho uJehova akutshoyo kuyalicindezela? Lokho yikho kanye uSathane afuna likucabange. Ufuna lihawukele okwenziwa yilabo abahamba endleleni ebanzi abakhanya angani bayakholisa. Angasebenzisa okwenziwa ngabanye bakho esikolo kumbe lokho okubona ku-inthanethi ukuze akwenze ucabange ukuthi uyasalela. USathane ufuna ucabange ukuthi ukulandela lokho okutshiwo nguJehova kuyakuvimba ukuthi ukholise impilo. * Kodwa khumbula ukuthi uSathane kafuni ukuthi labo abahamba endleleni yakhe bakwazi ukuthi ibasa  ngaphi. UJehova yena ukwenze kwacaca ukuthi uzatholani nxa ungaqhubeka usendleleni eya ekuphileni.—Hubo. 37:29; Isaya. 35:5, 6; 65:21-23.

8. Abasakhulayo bangafundani ku-Olaf?

⁸ Abasakhulayo bangafunda kulokho okwenzakala kumfowethu osakhulayo okuthiwa ngu-Olaf. * Afunda labo bazama ukumyenga ukuthi aye labo emacansini. Wathi esebachasisele ukuthi oFakazi bakaJehova balandela lokho iBhayibhili elikutshoyo mayelana lokuya emacansini, amanye amankazana afunda lawo azama ngamandla ukumyenga ukuthi alale lawo. Kodwa u-Olaf kazange avume. Wayezimisele ukwenza okulungileyo. Lobo ayisibo bodwa ubunzima ahlangana labo. Uthi: “Ababalisi bami babehlala bengitshela ukuthi kumele ngiye eyunivesithi ukuze ngibe ngumuntu ebantwini. Bangitshela ukuthi nxa ngingayekela ukuya eyunivesithi angisoze ngithole umsebenzi olemali njalo angisoze ngithokoze empilweni.” Kuyini okwamncedayo  u-Olaf? Uthi: “Ngaba labangane abaseduze ebandleni. Baba yimuli kimi. Ngaqalisa lokulitaditsha okuzwayo iBhayibhili. Ukuqhubeka ngitaditsha kwenza ngaqiniseka sibili ukuthi engangikukholwa kuliqiniso. Lokhu kwenza ngazimisela ukukhonza uJehova.”

9. Kuyini okumele kwenziwe yilabo abafuna ukuqhubeka behamba endleleni encinyane?

⁹ USathane uzama ukukwenza utshiye indlela eya ekuphileni. Ufuna wenze okwenziwa ngabantu abanengi, uhambe endleleni ebanzi ‘eyisa ekubhujisweni.’ (Mat. 7:13) Kodwa sizahlala sisendleleni encinyane nxa singaqhubeka silalela uJesu njalo sinanzelela ukuthi indlela leyo iyasivikela. Khathesi asixoxeni ngokunye uJesu athi kumele sikwenze.

10. KuMathewu 5:23, 24 uJesu wathi kumele senzeni?

¹⁰ Bala uMathewu 5:23, 24. UJesu wakhuluma ngokunye okwakuqakathekiswa kakhulu ngamaJuda ayemlalele. Ake sithi omunye umJuda usethempelini futhi usezaqhubela umphristi inyamazana ezakuba ngumhlatshelo, abesekhumbula ngalesosikhathi ukuthi umfowabo umzondele. Kumele atshiye inyamazana leyo ‘ahambe.’ Kungani kumele enze njalo? Ngoba kukhona okuqakatheke kakhulu okumele akwenze engakanikeli ngesipho sakhe kuJehova. UJesu wakucacisa lokho. Wathi: “Qala wenze kube lokuthula phakathi kwakho lomfowenu.”

11. UJakhobe wenzani ukuze kube lokuthula phakathi kwakhe lo-Esawu?

¹¹ Sizathola izifundo eziqakathekileyo ezimayelana lokwenza ukuthi kube lokuthula nxa singahlola okunye okwenzakala kuJakhobe. Ngemva kweminyaka engaba ngu-20 esuke elizweni lakibo, uNkulunkulu wasebenzisa ingilosi ukuthi imtshele ukuthi abuyele. (Gen. 31:11, 13, 38) Kodwa kwakungalula ukuthi enze njalo. Umnewabo u-Esawu wayefuna ukumbulala. (Gen. 27:41) UJakhobe ‘wayesesaba njalo ekhathazeke kakhulu’ ecabanga ukuthi umnewabo wayengabe elokhu embambele isikhwili. (Gen. 32:7) Wenzani ukuze kube lokuthula phakathi kwakhe lomnewabo? Waqala wathandaza ngenhliziyo yonke ngendaba le wasethumela isipho esikhulu ku-Esawu. (Gen. 32:9-15) Kanti njalo wathi embona waqala yena ukutshengisa inhlonipho ngokukhothama phambi kwakhe, hatshi kanye kumbe kabili kuphela kodwa kasikhombisa. UJakhobe wenelisa ukwenza ukuthi kube lokuthula phakathi kwakhe lomnewabo ngenxa yokuthi wazithoba kuye njalo wamhlonipha.—Gen. 33:3, 4.

12. Sifundani kuJakhobe?

¹² Kukhona esikufundayo kulokho uJakhobe akwenzayo ngesikhathi elungiselela ukuyahlangana lomnewabo langesikhathi behlangana. UJakhobe wazithoba wacela ukuthi uJehova amncedise. Esekhulekile wenza konke ayengakwenza ukuthi kube lokuthula phakathi kwakhe lomnewabo. Ngesikhathi behlangana kazange aphikisane laye ngokuthi ngubani owayephambanisile phakathi kwabo. Ayekufuna yikwenza ukuthi kube lokuthula phakathi kwakhe lomnewabo. Singamlingisela njani uJakhobe?

13-14. Kumele senzeni nxa singacaphula umfowethu kumbe udadewethu?

¹³ Nxa sifuna ukuhamba endleleni eya ekuphileni kumele sihlale ngokuthula  labafowethu labodadewethu. (Rom. 12:18) Kumele senzeni nxa singananzelela ukuthi sicaphule esikhonza laye? Kumele sithandaze ngenhliziyo yonke njengoJakhobe sicele uJehova ukuthi asincedise senze kube lokuthula phakathi kwethu lomfowethu.

¹⁴ Okunye okumele sikwenze yikuzihlola. Singazibuza imibuzo le: ‘Ngiyavuma yini ukuthi ngiphambanisile, ngixolise futhi ngenze ukuthi kube lokuthula? UJehova loJesu bazezwa njani nxa kungaba yimi engiqalayo ukwenza ukuthi kube lokuthula phakathi kwami lomfowethu kumbe lodadewethu?’ Indlela esizaphendula ngayo imibuzo le izasinceda ukuthi silalele uJesu lokuthi sithobeke, sikhulume lomfowethu kumbe udadewethu ukuze senze ukuthi kube lokuthula phakathi kwethu. Nxa singenza njalo siyabe silingisela uJakhobe.

15. U-Efesu 4:2, 3 angasinceda njani ukuthi senze kube lokuthula phakathi kwethu lomfowethu?

¹⁵ Cabanga ukuthi kwakuzakwenzakalani ngabe uJakhobe waphikisana lo-Esawu ngokuthi ngubani owayephambanisile. Izinto zazizakonakala. Kumele sithobeke ngesikhathi sikhuluma lomfowethu esimcaphulileyo. (Bala u-Efesu 4:2, 3.) UZaga 18:19 uthi: “Umzalwane owoniweyo uba lukhuni kulomuzi ohonqolozelweyo, lezingxabano zinjengamasango enqaba avaliweyo.” Ukuxolisa kuzasinceda ukuthi singene ‘enqabeni’ le.

16. Kuyini okunye okumele sicabange ngakho njalo kungani kumele senze njalo?

¹⁶ Kumele sicabangisise ngalokho esizakutsho kumfowethu esimzwise ubuhlungu langendlela esizakukhuluma ngayo. Ngemva kwalokho, kumele sikhulume laye ukuze sizame ukumnceda asibone ngendlela ayesibona ngayo kuqala. Angaqalisa ekhuluma izinto ezisizwisa ubuhlungu. Kodwa akumelanga sizonde kumbe sizame ukuzigeza ngoba lokho akusoze kwenze ukuthi kube lokuthula. Khumbula ukuthi ukwenza kube lokuthula phakathi kwakho lomfowenu yikho okuqakatheke kakhulu kulokudinga ukuthi ngubani ophambanisileyo.—1 Khor. 6:7.

17. Kuyini ongakufunda kuGilbert?

¹⁷ Umzalwane okuthiwa nguGilbert wasebenza nzima ukuze enze ukuthi kube lokuthula. Uthi: “Kwakunzima sibili ukuthi  mina lendodakazi yami sibe lobudlelwano obuhle. Okweminyaka engaphezu kwemibili ngangizama ukukhuluma laye kuhle ukuze siphinde sizwanane.” Kuyini okunye okwenziwa nguGilbert? Uphinda athi: “Ngingakakhulumi laye, ngangiqala ngithandaze futhi ngizikhumbuze ukuthi kwakungamelanga ngizonde lanxa engakhuluma amazwi abuhlungu. Kwakumele ngizimisele ukumthethelela. Ngafunda ukuthi kwakumele ngizame ukwenza ukuthi kube lokuthula kulokuthi ngizame ukumtshengisa ukuthi ngangingaphambanisanga lutho.” Lokhu kwanceda yini? UGilbert uthi: “Khathesi sengihlalisekile ngoba sengizwanana lawo wonke amalunga emuli yami.”

18-19. Kumele sizimisele ukwenzani nxa singacaphula omunye futhi kungani kumele senze njalo?

¹⁸ Kuyini okumele uzimisele ukukwenza nxa ungananzelela ukuthi ucaphule umfowenu kumbe udadewenu? Landela lokho uJesu akutshoyo mayelana lokwenza ukuthi kube lokuthula. Thandaza kuJehova umtshela ngendaba le njalo ucele ukuthi akunike umoya ongcwele ozakuncedisa ukuthi wenze kube lokuthula. Nxa ungenza njalo, uzathokoza futhi uyabe utshengisa ukuthi uyamlalela uJesu.—Mat. 5:9.

¹⁹ Siyambonga uJehova ngendlela asikhokhela ngayo esebenzisa uJesu Khristu ‘inhloko yebandla.’ (Efe. 5:23) Asizimiseleni ‘ukumlalela’ njengomphostoli uPhetro loJakhobe loJohane. (Mat. 17:5) Sixoxe ngokuthi singamlalela ngokwenza kube lokuthula phakathi kwethu lomfowethu esimcaphulileyo. Nxa singakwenza lokho, futhi sihlale sisendleleni encinyane eya ekuphileni sizathola izibusiso ezinengi khathesi futhi esikhathini esizayo sizathokoza kuze kube nini lanini.