IBhayibhili likubeka kucace ukuthi uJehova uyenelisa ukukhuluma okuzakwenzakala esikhathini esizayo. (Isaya. 45:21) Kodwa alisilandiseli konke mayelana lokuthi lokhu ukwenza njani kumbe nini loba ukuthi kunengi kangakanani akhetha ukubakwazi mayelana lekusasa. Iqiniso yikuthi asikwazi konke ngendaba le. Lanxa kunjalo kulokulutshwana esingakuzwisisa.

UJehova uyenelisa ukwenza zonke izinto kodwa ngezinye izikhathi uyakhetha ukungenzi ezinye. UJehova ulenhlakanipho enkulu yikho uyenelisa ukukhuluma loba yini ingakenzakali. (Rom. 11:33) Kanti njalo kazihluphi ngakho konke okuzakwenzakala ngenxa yokuthi uyenelisa ukuzibamba kuzo zonke izinto.—Khangela lo-Isaya 42:14.

UJehova wenza ukuthi intando yakhe yenzakale. Lokhu kusinceda njani sizwisise ukuthi uyenelisa ukukhuluma izinto ezizakwenzakala esikhathini esizayo? U-Isaya 46:10 uthi: “Kusukela ekuqaleni ngihle ngibike lokho okuzakwenzakala ekucineni, kusukela endulo ngimemezela izinto ezingakenzakali. Ngithi, ‘Inhloso yami izaphumelela, ngizakwenza loba yini engiyifunayo.’”

Esinye isizatho esenza uJehova enelise ukukhuluma izinto ezizakwenzakala esikhathini esizayo yikuthi ulamandla okwenza ukuthi izinto zenzakale. Akulasidingo sokuthi uJehova alunguze phambili ukuze abone ukuthi kuzahamba njani esikhathini esizayo. Kenzi njengomuntu othi nxa ebala ibhuku eqe amanye amapheji ukuze abone ukuthi kuzahamba njani phambili. UJehova angakhetha ukuthi into ethile yenzakale ngesikhathi esithile besekusithi nxa lesosikhathi singafika enze ukuthi into leyo yenzakale.—Eks. 9:​5, 6; Mat. 24:36; Imiseb. 17:31.

Yikho iBhayibhili lisebenzisa amabala athi “ngakulungiselela” “ngakubumba” “sengilibumbile icebo lami” ukuze lichaze lokho uJehova akwenzayo mayelana lezinto ezizakwenzakala esikhathini esizayo. (2 Amakho. 19:25; amabala angaphansi; Isaya. 46:11) Amazwi la ahunyutshwe esuka ebaleni lesiHebheru elihambelana lelithi ‘umbumbi.’ (Jer. 18:4) Njengoba nje umbumbi oyingcitshi esenelisa ukuthatha udaka abumbe udiwo oluhle, loJehova uyenelisa ukulungisa kumbe ukutshintsha izinto ukuze intando yakhe igcwaliseke.—Efe. 1:11.

UJehova uyabavumela abantu ukuthi bazikhethele abafuna ukukwenza. Kakhetheli umuntu ukuthi impilo yakhe izakuba njani. Kanti njalo kabangeli ukuthi abalungileyo benze izinto ezingabenza babhujiswe. Uyabavumela abantu bonke ukuthi bazikhethele ukuthi bafuna ukuphila njani futhi ubakhuthaza ukuthi bakhethe ukwenza okuhle.

Ake sixoxe ngezibonelo lezi ezimbili. Esokuqala simayelana labantu ababehlala eNiniva. UJehova wabatshela ukuthi wayezalibhubhisa idolobho labo ngenxa yokuthi babesenza okubi. Kodwa abantu laba bathi sebephendukile uJehova “watshintsha ingqondo, kasazange abehlisele umonakalo ayethe uzabehlisela wona.” (Jona. 3:​1-10) UJehova watshintsha ingqondo mayelana lalokho ayethe kuzakwenzakala ngenxa yokuthi abantu baseNiniva bakhetha ukuphenduka ngemva kokuzwa isixwayiso esasivela kuye.

Isibonelo sesibili yisiphrofetho esimayelana leqhawe okwakuthiwa nguKhoresi. UKhoresi wayezakhulula amaJuda ebugqilini futhi akhiphe lomthetho wokuthi ithempeli likaJehova lakhiwe kutsha. (Isaya. 44:26–45:4) Inkosi yePhesiya uKhoresi yasigcwalisa isiphrofetho lesi. (Ezra. 1:​1-4) UKhoresi wayengamazi uNkulunkulu weqiniso. Lanxa kunjalo uJehova wamsebenzisa ukuthi agcwalise isiphrofetho sakhe kodwa kazange ambambe ngamandla ukuthi amkhonze.—Zaga. 21:1.

Lezi yizibonelo ezilutshwana nje ezitshengisa indlela uJehova asebenzisa ngayo amandla akhe okwazi lokho okuzakwenzakala esikhathini esizayo. Akulamuntu ongazizwisisa zonke izindlela zikaJehova. (Isaya. 55:​8, 9) Lanxa kunjalo lokho asitshela khona kwenza singathandabuzi ukuthi uhlala esenza okuqondileyo. Siyathemba ukuthi konke asitshela khona mayelana lekusasa kuliqiniso ngazo zonke izikhathi.