1. Kuyini obekusenziwa ngabantu bakaJehova kusukela kudala?

 UKUBONA kuligugu yini ukuthi ungumngane kaJehova? Akuthandabuzwa ukuthi uyabuqakathekisa ubungane bakho laye! Ayisuwe wedwa ngoba kusukela kudala banengi abantu ababekuqakathekisa ukuba ngabangane bakaJehova. (Hubo. 104:​33, 34) Abanengi badela ezinye izinto ukuze bakhonze uJehova. Lokhu yikho okwakusenziwa ngabantu okwakuthiwa ngamaNaziri ko-Israyeli wasendulo. Babengabantu abanjani futhi singafundani kubo?

2. (a) Ayengobani amaNaziri? (AmaNani 6:​1, 2) (b) Kuyini okwakusenza ukuthi amanye ama-Israyeli akhethe ukwenza isifungo sokuba ngamaNaziri?

² Ibala lesiHebheru elithi “umNaziri” litsho ukuthi “okhethiweyo,” “onikelweyo” kumbe “owahlukaniswe labanye.” AmaNaziri kwakungama-Israyeli akhutheleyo ayezidela ukuze akhonze uJehova ngendlela ehlukene leyabanye. UMthetho kaMosi wawuvumela ukuthi amadoda kumbe abesifazana benze isifungo esiqakathekileyo esokuba ngamaNaziri okwesikhathi esithile. a (Bala amaNani 6:​1, 2.) Um-Israyeli owayesenza isifungo leso kwakumele alandele eminye imithetho eyayitshiyene laleyo eyayilandelwa ngamanye ama-Israyeli. Manje kuyini okwakungenza um-Israyeli akhethe ukuba ngumNaziri? Kumele ukuthi wayeyabe efuqwa yikuthanda uJehova futhi efuna ukutshengisa ukuthi uyambonga ngezibusiso ezinengi amupha zona.—Dute. 6:5; 16:17.

3. Abantu bakaNkulunkulu lamuhla bafanana njani lamaNaziri?

³ Uhlelo lokuba ngumNaziri lwaphela ngesikhathi uMthetho kaMosi uthathelwa indawo ‘nguMthetho kaKhristu.’ (Gal. 6:2; Rom. 10:4) Lanxa kunjalo abantu bakaJehova lamuhla bayawalingisela  amaNaziri ngoba baqhubeka betshengisa ukuthi bafuna ukumkhonza ngenhliziyo yonke, ngomphefumulo wonke, ngengqondo yonke langamandla wonke. (Mak. 12:30) Nxa sizinikela kuJehova siyabe sisenza isifungo sokuthi sizimisele ukumkhonza. Ukwenza lokho esakufungayo kutsho ukwenza intando kaNkulunkulu lokuzidela ukuze siqhubeke simkhonza. Nxa singahlola lokho okwakusenziwa ngamaNaziri ukuze agcine izifungo zawo, singathola izifundo eziqakathekileyo ezingasinceda ukuthi lathi sigcine esethu isifungo. b (Mat. 16:24) Asixoxeni ngokunye okwakusenziwa ngamaNaziri.

ZIDELE

4. U-AmaNani 6:3, 4 uthi amaNaziri kwakumele azidele njani?

⁴ Bala amaNani 6:​3, 4. AmaNaziri kwakungamelanga anathe utshwala kumbe loba yini eyenziwe ngamagilebisi njalo kwakungamelanga adle amagilebisi amanzi loba awonyisiweyo. Amanye ama-Israyeli ayezinathela iwayini futhi ewadla lamagilebisi njengoba kwakungelalutho olubi ngezinto lezo. Phela iBhayibhili lithi iwayini yisipho esivela kuNkulunkulu njalo lithi ‘iwayini lithokozisa inhliziyo yomuntu’. (Hubo. 104:​14, 15) Lanxa izinto lezo zazimnandi, amaNaziri ayezidela akhethe ukungazidli. c

5. Yiziphi izinto uMadián loMarcela abazidelayo futhi kungani benza njalo?

⁵ Lathi silingisela amaNaziri ngokudela ezinye izinto ukuze senzele uJehova okunengi. Cabanga ngalokho okwenziwa nguMadián lomkakhe uMarcela. d Babeziphilela impilo emnandi bekhomba ngophakathi. UMadián wayelomsebenzi olemali yikho babehlala endlini enhle okwamagama. Kodwa baba lesifiso sokwenzela uJehova okunengi, yikho babona kungcono ukuthi batshintshe ezinye izinto empilweni yabo. Bathi: “Saqalisa ukungathengi izinto ezinenginengi futhi sasuka endlini esasihlala kuyo saya kwenye encane, sathengisa lemota yethu.” UMadián loMarcela kabazange babanjwe ngamandla ukuthi benze utshintsho lolo kodwa bakhetha ukuzidela ukuze benzele uJehova okunengi. Bayasuthiseka njalo bayathokoza kakhulu ngezinqumo lezi abazenzayo.

6. Kuyini okwenza amaKhristu azidele? (Khangela lomfanekiso.)

 ⁶ Lamuhla amaKhristu ayathokoza nxa edela ezinye izinto ukuze abe lesikhathi esinengi sokwenza imisebenzi yenkonzo. (1 Khor. 9:​3-6) UJehova kasibambi ngamandla ukuthi sizidele futhi lezinto esiyabe sizitshiya nxa sizidela ziyabe zingazimbi. Ngokwesibonelo abanye batshiya imisebenzi abayithandayo lezindlu zabo lezifuyo. Abanye bakhetha ukuthi bahlale isikhathi eside bengatshadanga kumbe ukuthi bangabi labantwana. Abanye bakhetha ukuyancedisa lapho okulabamemezeli abalutshwana khona lanxa kuyabe kusitsho ukuhlala khatshana lezihlobo zabo. Okwenza sizidele kangaka yikuthi siyabe sifuna ukwenzela uJehova okunengi. Qiniseka ukuthi uJehova uyakuqakathekisa kakhulu konke okhetha ukutshiya ukukwenza ukuze umkhonze kungelani lokuthi kuncane kumbe kukhulu.—Heb. 6:10.

ZIMISELE UKUNGAFANANI LABANYE

7. Kuyini okungabe kwakusenza kube nzima ukuthi amaNaziri agcine isifungo sawo? (AmaNani 6:5) (Khangela lomfanekiso.)

⁷ Bala amaNani 6:5. AmaNaziri ayefunga ukuthi ayengasoze agele inwele zawo. Lokho kwakutshengisa ukuthi ayazehlisa kuJehova. Nxa um-Israyeli wayengaba ngumNaziri okwesikhathi eside, inwele zakhe zazikhula zibe zinde futhi kwakusiba lula ukuthi abantu bamnanzelele. Nxa abanye babesekela isinqumo sakhe sokuba ngumNaziri kwakungaba lula ukuthi abambelele esifungweni sakhe. Kodwa kuyadanisa ukuthi esizweni sako-Israyeli kulezikhathi lapho abantu ababengawaqakathekisi khona amaNaziri futhi engawasekeli. Ngesikhathi somphrofethi u-Amosi, ama-Israyeli ayehlamukile ‘ayelokhu enika amaNaziri iwayini ukuthi anathe.’ Mhlawumbe ayefuna amaNaziri angasigcini isifungo sawo sokunganathi iwayini. (Amos. 2:12) Ngezinye izikhathi kwakungabe kudinga isibindi ukuthi umNaziri agcine isifungo sakhe futhi azimisele ukungafanani labanye.

8. Lokho okwenziwa nguBenjamin kukukhuthaza njani?

⁸ UJehova angasincedisa ukuthi sibe lesibindi sokwenza okutshiyene lokwenziwa ngabanye lanxa silenhloni kumbe sisesaba. Cabanga ngalokho okwenzakala kuBenjamin, uFakazi oleminyaka elitshumi ohlala eNorway. Esikolo afunda kuso kwaba lombuthano lapho ababetshengisa khona ukuthi basekela abantu be-Ukraine njengoba kulempi elizweni lelo. Kwathiwa abantwana bahlabele ingoma begqoke izigqoko ezilemibala yefulegi ye-Ukraine. UBenjamin wamela khatshana lalapho umbuthano lo owawusenzelwa khona ngoba wayengafuni ukuba kuwo. Kodwa omunye umbalisi  wambona wasememeza esithi: “Wena buya ngapha simelele wena!” UBenjamin waqunga isibindi walanda umbalisi wafika wamtshela wathi: “Mina angingeni kwezombusazwe njalo angizisekeli. OFakazi bakaJehova abanengi basemajele ngoba bayala ukuya empini.” Umbalisi wakuzwisisa okwakutshiwo nguBenjamin wasesithi angazihambela. Kodwa abanye ayefunda labo baqalisa ukumbuza ukuthi kungani engabuyanga embuthanweni. UBenjamin wayesesaba kakhulu futhi wayesefuna ukukhala. Lanxa kunjalo waqunga isibindi wabatshela lokho ayekutshele umbalisi. UBenjamin watshela abazali bakhe ukuthi ubona sengathi uJehova nguye owayemncedisile ukuthi alwele ukholo lwakhe.

9. Singenzani ukuze sithokozise inhliziyo kaJehova?

⁹ Kasifanani labantu bomhlaba lo ngoba sikhetha ukwenza intando kaJehova. Emsebenzini kumbe esikolo kumele sibe lesibindi ukuze sitshele abanye ukuthi singoFakazi bakaJehova. Njengoba abantu bomhlaba lo beqhubeka besiba babi kakhulu, kufanele ukuthi kuzabe kulokhu kusiba nzima ukuthi silandele izimiso eziseBhayibhilini futhi sitshele abanye izindaba ezinhle. (2 Thim. 1:8; 3:13) Kodwa hlala ukhumbula ukuthi siyabe ‘sithokozisa inhliziyo [kaJehova]’ nxa sisiba lesibindi sokwenza okutshiyene lalokho okwenziwa ngabantu abangamkhonziyo.—Zaga. 27:11; Mal. 3:18.

QAKATHEKISA UJEHOVA UKWEDLULA LOBA YINI

10. Yibuphi ubunzima amaNaziri ayengabe ehlangana labo nxa elandela umthetho okumaNani 6:​6, 7?

¹⁰ Bala amaNani 6:​6, 7. AmaNaziri kwakungamelanga asondele duzane kwesidumbu somuntu. Lokhu kwakungakhanya angathi yinto encane nje. Kodwa kwakungaba nzima ukuthi umNaziri awulalele umthetho lo nxa efelwe yisihlobo sakhe esiseduze. Amasiko ayesenziwa ngalesosikhathi nxa kufiwe ayefuna ukuthi umuntu asondele duzane lesidumbu. (Joh. 19:​39, 40; Imiseb. 9:​36-40) Kodwa isifungo esasisenziwa ngumNaziri sasingavumi ukuthi akwenze lokhu. UmNaziri wayetshengisa ukuthi lokholo oluqinileyo ngokunamathela esifungweni sakhe lanxa eyabe efelwe. Kufanele ukuthi uJehova wayeziqinisa izinceku zakhe lezi ezazizidela ukuze zimelane lobunzima ezazihlangana labo.

11. Kuyini umKhristu okumele azimisele ukukwenza nxa esenza izinqumo ezimayelana lezindaba zemuli? (Khangela lomfanekiso.)

¹¹ Isifungo sethu sokuzinikela kuJehova siyasiqakathekisa  kakhulu. Lokho kutsho ukuthi kumele sibe leqiniso lokuthi izinqumo zethu lalokho esikwenzayo ezindabeni zezimuli akuphambanisi isifungo sethu. Siyenza kuhle yonke imisebenzi iMibhalo ethi kumele siyenze ezimulini zethu. Lanxa kunjalo asiqali ukuqakathekisa lokho okufunwa ngamalunga ezimuli zethu ukwedlula lokho okufunwa nguJehova. (Mat. 10:​35-37; 1 Thim. 5:8) Kwezinye izikhathi kuyabe kumele senze izinqumo ezithokozisa uJehova lanxa lokho kuzatshiya izihlobo zethu zizondile.

12. U-Alexandru wenzani ngesikhathi umkakhe engafuni ukuthi afunde njalo kuyini angazange akwenze?

¹² U-Alexandru lomkakhe uDorina bathi sebefunde iBhayibhili okomnyaka, uDorina wacabanga ukuyekela ukufunda njalo wayefuna lo-Alexandru ayekele. Kodwa u-Alexandru wamtshela kuhle ukuthi yena ufuna ukuqhubeka efunda. UDorina kwamcaphula lokho futhi wazama ukumbamba ngamandla ukuthi ayekele ukufunda. U-Alexandru uthi wazama ukuzwisisa ukuthi kuyini okwakusenza uDorina angafuni ukuthi afunde kodwa kwakunzima. Uthi kwezinye izikhathi wayesizwa kusithi ayekele ukufunda nxa uDorina wayemchothoza futhi emphendula kubi. Lanxa kunjalo waqhubeka esenza okwakufunwa nguJehova futhi wayelokhu etshengisa umkakhe ukuthi uyamthanda kakhulu lokuthi uyamhlonipha. Indlela ayeziphatha ngayo yenza ukuthi ngokuhamba kwesikhathi umkakhe aphinde aqalise ukufunda iBhayibhili njalo wacina esebhabhathiziwe.—Yana ku-jw.org ubukele ividiyo ethi, UAlexandru loDorina Vacar: Uthando Luyabekezela Njalo Lulomusa ngaphansi kwengxenye ethi “Iqiniso Liyamntshintsha Umuntu.”

13. Singatshengisa njani ukuthi siyamthanda uJehova lokuthi siyazithanda izimuli zethu?

¹³ UJehova nguye owenza kwaba lezimuli futhi ufuna zithokoze. (Efe. 3:​14, 15) Nxa sifuna ukuthokoza kumele senze izinto ngendlela uJehova afuna senze ngayo. Ungathandabuzi ukuthi uJehova ukubona kuligugu konke ukuzidela okwenzayo ukuze umkhonze ngapha unakekela imuli yakho futhi uyiphatha ngendlela etshengisa ukuthi uyayithanda lokuthi uyayihlonipha.—Rom. 12:10.

KHUTHAZA ABANYE UKUTHI BALINGISELE AMANAZIRI

14. Ngobani okumele sizimisele ukubakhuthaza?

¹⁴ Bonke abakhonza uJehova lamuhla kumele bazimisele ukuzidela ngenxa yokuthi bayamthanda. Kodwa ngezinye izikhathi lokhu akulula. Singancedisana njani ukuthi sizidele? Ngokukhuluma amazwi akhuthazayo.  (Jobe. 16:5) Ebandleni lakho bakhona yini abazama ukuphila bengelazinto ezinenginengi ukuze benze okunengi ekukhonzeni uJehova? Bakhona yini abasakhulayo obaziyo ababa lesibindi sokwenza okutshiyene lokwenziwa ngabanye esikolo lanxa lokho kungaba nzima? Bakhona yini abantu abafunda iBhayibhili kumbe abanye oFakazi abenza konke okusemandleni abo ukuthi baqhubeke bethembekile lanxa bethwaliswe nzima ezimulini zabo? Asizimiseleni ukwenza konke esingakwenza ukuze sibakhuthaze futhi sibatshele ukuthi siyababonga ngokuthi bayazidela lokuthi balesibindi.—Filim. 4, 5, 7.

15. Abanye babancedise njani abasenkonzweni yesikhathi sonke?

¹⁵ Kwezinye izikhathi singancedisa abafowethu labodadewethu abasenkonzweni yesikhathi sonke. (Zaga. 19:17; Heb. 13:16) Omunye udadewethu oseluphele ohlala eSri Lanka wayelesifiso sokuncedisa abantu abasenkonzweni yesikhathi sonke. Imali yakhe yepentsheni yathi isikhweziwe wabona kungcono ukuthi ancedise odadewethu ababili abangamaphayona ukuthi baqhubeke ngenkonzo yabo lanxa kwakunzima. Wayebanika imali nyanga zonke ukuze abancedise ukubhadala indleko zefoni. Udade lo watshengisa ukuthi uyaphana sibili.

16. Sifundani kumaNaziri akudala?

¹⁶ Zinengi sibili izifundo esizithola kumaNaziri akudala ayezinikela ukukhonza uJehova. Kodwa ukuhlola indaba yamaNaziri kuphinda kusifundise okunye ngoBaba wethu osezulwini uJehova. Kathandabuzi ukuthi siyafuna ukumthokozisa lokuthi sizimisele ukuzidela ukuze sigcine isifungo sethu sokuzinikela kuye. Utshengisa ukuthi uyasihlonipha ngokusivumela ukuthi sizikhethele indlela esingatshengisa ngayo ukuthi siyamthanda. (Zaga. 23:​15, 16; Mak. 10:​28-30; 1 Joh. 4:19) Isifungo esasisenziwa ngamaNaziri sitshengisa ukuthi uJehova uyakunanzelela lokho esikwenzayo ukuze simkhonze futhi uyakuqakathekisa. Kwangathi singazimisela ukuqhubeka sikhonza uJehova, simnika okuhle kakhulu esilakho.