WAKE waba phakathi kohlupho waze waswela ngitsho loyedwa ongakuncedisa yini? Izikhathi esiphila kuzo ‘zinzima’ kakhulu. Nxa siphakathi kohlupho singaphela amandla size siswele lokuthi silubikele bani. (2 Thim. 3:1) Nxa silezinto ezisikhathazayo, akumelanga sifele ngaphakathi kodwa kumele sikhumbule ukuthi kulabantu abangasincedisa. IBhayibhili liveza ukuthi abangane abaqotho bangasinceda “ngezikhathi zobunzima.”—Zaga. 17:17.

Umphostoli uPhawuli wayelabangane bakhe ababejayele ukumphelekezela nxa esiyatshumayela kwezinye izindawo futhi babemnceda ngezindlela ezitshiyeneyo. (Kol. 4:​7-11) Ngesikhathi uPhawuli ebotshiwe eRoma, abangane bakhe laba babemnceda ngokwenza eminye imisebenzi ayengenelisi ukuyenza. Ngokwesibonelo u-Ephafrodithu waphathela uPhawuli izinto ayeziphiwe ngabazalwane beFiliphi. (Flp. 4:18) UThikhikhu yena wahambisa izincwadi zikaPhawuli emabandleni atshiyeneyo. (Kol. 4:7; khangela umcijo wokutaditsha wevesi le ku-Nguqulo Yomhlaba Omutsha yesiNgisi okuthiwa yi-Study Bible.) Abangane bakaPhawuli bamncedisa ukuthi aqhubeke esenza inkonzo yakhe ngesikhathi ebotshiwe engavunyelwa ukuphuma endlini langesikhathi esejele. Wena ungenzani ukuze ube ngumngane oqotho?

Lanamuhla bakhona abafowethu labodadewethu abatshengisa ukuthi bangabangane abaqotho. Omunye udadewethu okuthiwa ngu-Elisabet ohlala eSpain futhi oliphayona lesikhathi sonke uyasitshela ukuthi omunye udadewethu wamtshengisa njani ukuthi ungumngane oqotho. Unina ka-Elisabet wathi esebanjwe umkhuhlane we-cancer udade lo wamthumezela amameseji amanengi ayelamavesi eBhayibhili akhuthazayo. U-Elisabet uthi, “Ngangithokoza nxa ngangibona amameseji la ngoba ngangibona ukuthi kulomuntu ocabanga ngami futhi ayenginika amandla okuthi ngenze lokho okumele ngikwenze.”—Zaga. 18:24.

Okunye okungasinceda ukuthi sibe ngabangane labafowethu labodadewethu yikubancedisa nxa bengenelisi ukuyatshumayela bodwa kumbe bengenelisi ukuzihambela emihlanganweni yebandla. Ngokwesibonelo ungacela ukuhambisa umfowethu kumbe udadewethu osekhulile emhlanganweni webandla kumbe ekutshumayeleni. Nxa ungenza njalo lizathola ithuba lokukhuthazana. (Rom. 1:12) Kodwa kulabanye abafowethu labodadewethu abangenelisiyo ukuphuma endlini. Ungatshengisa njani ukuthi ungumngane oqotho lakubo?

Abanye abafowethu labodadewethu abenelisi ukuya emihlanganweni yebandla ngenxa yokugula kumbe ezinye izimo. Omunye umfowethu okuthiwa nguDavid wabanjwa i-cancer njalo kwakumele elatshwe umkhuhlane lo okwenyanga ezedlula eziyisithupha. Okwesikhathi sonke lesi, yena lomkakhe uLidia babengenelisi ukuya emihlanganweni yebandla yikho babeyingena ngezempucuko.

 Abafowethu labodadewethu babakhuthaza njani? Kwakusithi nxa imihlangano isiphelile abanye ababeseWolu yoMbuso bazinike isikhathi sokukhuluma loDavid loLidia. UDavid loLidia babethi nxa bangaphendula emihlanganweni, abafowethu labodadewethu babathumezele amameseji bebabonga njalo bebakhuthaza. Kwabanceda ngani lokho? UDavid loLidia bakubona sibili ukuthi abafowethu labodadewethu bayabathanda.

Labo abangenelisi ukuphuma endlini singabancedisa njani ukuthi labo batshumayele? Singatshintsha inhlelo zethu kancane nje ukuze sitshumayele labo. Lokhu kuzenza babone ukuthi asibakhohlwanga. (Zaga. 3:27) Nxa kuvuma singahlela ukutshumayela labo ngefoni kumbe ukubhala izincwadi. Abadala bangahlela ukuthi labo abangenelisi ukuphuma endlini bangene imihlangano yokuya ekutshumayeleni ngezempucuko. Ebandleni likaDavid loLidia bakuhlela lokho futhi kwabanceda kakhulu. UDavid uthi, “Kwakusikhuthaza kakhulu ukungena umhlangano wokuya ekutshumayeleni leqembu lethu kanye lokuzwa umthandazo owawusenziwa lapho.” Ngezinye izikhathi nxa kuvuma ungahamba lomuntu omfundisa iBhayibhili endlini yommemezeli ongenelisi ukuphuma endlini liyefundela khona.

Nxa singazinika isikhathi sokuba labafowethu labodadewethu abangenelisi ukuphuma endlini sizabazi kuhle futhi sibe ngabangane babo. Ngokwesibonelo, nxa ungatshumayela labamemezeli labo ubusubona indlela abasebenzisa ngayo iLizwi likaNkulunkulu ukuze bathinte inhliziyo yomuntu abamfundisayo, uzabathanda kakhulu. Nxa ungakukhuthalela ukuncedisa abafowethu labodadewethu ukuthi batshumayele lokuthi baye emihlanganweni yebandla, uzakuba labangane abanengi.—2 Khor. 6:13.

UPhawuli wathi esebunzimeni, umngane wakhe uThithusi wabuya wazokuba laye futhi lokhu kwamduduza kakhulu. (2 Khor. 7:​5-7) Kuhle sibili ukutshela abafowethu labodadewethu amazwi akhuthazayo, kodwa esikufunda kuThithusi yikuthi singabaduduza langokuba labo kanye lokubancedisa ngalokhu lalokhuya.—1 Joh. 3:18.

Singafunda okunengi kubafowethu labodadewethu beRussia ngoba bayabasekela abanye nxa behlukuluzwa. Ake sixoxe ngokwenzakala kuSergey lomkakhe uTatyana. Amapholisa afika asetsha endlini yabo asehamba labo enkambeni. UTatyana nguye owakhululwa kuqala wasebuyela endlini. USergey uthi: “[UTatyana] wathi esanda ukufika endlini omunye udadewethu olesibindi wahle wabuya. Kwafika labanye futhi abafowethu labodadewethu basincedisa ukuklina lokulungisa endlini.”

USergey uthi: “UZaga 17:17 ngiyamthanda, uthi: ‘Umngane oqotho ulothando ngazo zonke izikhathi, njalo ungumfowenu ozalelwe ukukusiza ngezikhathi zobunzima.’ Amazwi la ngiwazwisise kakhulu ngesikhathi ngihlukuluzwa ngoba bengibadinga sibili abangane abangisekelayo. UJehova unginike abangane abalesibindi futhi abangisekelayo.” a

Siyakudinga ukusekelwa ngabangane abaqotho ngoba izinto zizaqhubeka zisiba nzima. Abangane abanjalo bazasinceda kakhulu ngesikhathi sokuhlupheka okukhulu. Kwangathi singenza konke okusemandleni ethu ukuze sibe ngabangane abaqotho.—1 Phet. 4:​7, 8.