1. Siyabe sisitshoni nxa sisithi iqiniso?

“WALITHOLA njani iqiniso?” “Wakhulela eqinisweni yini?” Mhlawumbe wake wayibuzwa imibuzo le kumbe lawe wake wayibuza abanye. Siyabe sisitshoni nxa sisithi iqiniso? Izikhathi ezinengi siyabe sikhuluma ngalokho esikukholwayo, esikwenzayo ekukhonzeni uNkulunkulu kanye lendlela esiphila ngayo. Abantu abaseqinisweni bayakwazi lokho iBhayibhili elikufundisayo futhi bayakusebenzisa empilweni zabo. Lokhu kwenza bakhululeke ezimfundisweni zenkolo yamanga njalo baphile impilo engcono lanxa bephila emhlabeni kaSathane.​—Joh. 8:32.

2. Ngokwalokho okutshiwo kuJohane 13:34, 35, kuyini okungenza umuntu athande iqiniso?

² Kuyini okwenza walithanda iqiniso? Engxenye wabona ukuziphatha okuhle kwabantu bakaJehova. (1 Phet. 2:12) Kungenzeka wabona indlela ababetshengisa ngayo uthando. Abanengi abaqalisa ukubuya emihlanganweni yebandla bayakubona lokho futhi yikho abakukhumbulayo ukwedlula loba yini eyabe ikhulunywe kuyo. Lokhu akumangalisi ngenxa yokuthi uJesu wathi abafundi bakhe babezabonakala ngokuthandana. (Bala uJohane 13:34, 35.) Kodwa kukhona okunye okumele sikwenze ukuze sibe lokholo oluqinileyo.

3. Kuyini okungenzakala nxa ukholo lwethu lusekelwe ethandweni olusebantwini bakaNkulunkulu kuphela?

³ Ukholo lwethu akumelanga lusekelwe ethandweni olusebantwini bakaNkulunkulu kuphela. Kungani sisitsho njalo? Sitsho njalo ngoba ukholo lwethu lungacina luxega nxa lusekelwe ethandweni lolu kuphela. Ngokwesibonelo, singatshiya ukukhonza uJehova nxa umfowethu loba udadewethu othile angenza isono kungelani lokuthi ungumdala kumbe iphayona. Kanti njalo singatshiya ukukhonza nxa umfowethu loba udadewethu  esizwise ubuhlungu kumbe ehlamukile esithi lokho esikukholwayo kungamanga. Yikho kumele sibe lobungane obuseduze loJehova ukuze ukholo lwethu luqine. Nxa ukholo lwakho lusekelwe kulokho okwenziwa ngabantu kuphela hatshi ekubeni ngumngane oseduze loJehova, luyabe lungaqinanga. Ukholo lwethu akumelanga lwakhiwe ngezinto ezingaqinanga ezinjengothando olusebantwini bakaNkulunkulu kuphela kodwa langezinto eziqinileyo. Kumele silitaditshe okuzwayo iBhayibhili, sikuzwisise esikufundayo futhi sichwayisise ukuze singathandabuzi ngitsho ukuthi sifunda okuliqiniso ngoJehova.​—Rom. 12:2.

4. Ngokwalokho okutshiwo kuMathewu 13:3-6, 20, 21, lubanjani ukholo lwabanye nxa kungaba lenhlupho?

⁴ UJesu wathi abanye babezalamukela “ngentokozo” iqiniso kodwa ukholo lwabo luxege nxa bangehlelwa zinhlupho. (Bala uMathewu 13:3-6, 20, 21.) Mhlawumbe babengakwazi ukuthi labo abamlandelayo bazahlupheka. (Mat. 16:24) Kumbe babecabanga ukuthi kabasoze bafa baba lenhlupho nxa bengaba ngamaKhristu kodwa bazathola izibusiso kuphela. Lanxa kunjalo inhlupho zikhona emhlabeni lo futhi izimo zingatshintsha sicine singasathokozi ngendlela esasithokoza ngayo.​—Hubo. 6:6; UmTshu. 9:11.

5. Kuyini okutshengisa ukuthi abafowethu labodadewethu abanengi kabathandabuzi ngitsho ukuthi abakukholwayo kuliqiniso?

⁵ Abafowethu labodadewethu abanengi kabathandabuzi ngitsho ukuthi abakukholwayo kuliqiniso. Kuyini okwenza sitsho njalo? Ukholo lwabo kaluxegi lanxa omunye umfowethu loba udadewethu ebakhuba kumbe esenza isono. (Hubo. 119:165) Uhlupho ngalunye olubehlelayo lwenza ukholo lwabo luqine kakhulu. (Jak. 1:2-4) Ungenzani ukuze ube lokholo olunjalo?

6. Ukholo lwabafundi lwalusekelwe ngaphi?

⁶ Ngesikhathi sabaphostoli, abafundi basekela ukholo lwabo elwazini lweMibhalo lasezimfundisweni zikaJesu Khristu, okutsho “iqiniso lezindaba ezinhle.” (Gal. 2:5) Iqiniso leli yikho konke esikukholwayo, okugoqela izinto ezimayelana lenhlawulo kaJesu kanye lokuvuswa kwakhe. Umphostoli uPhawuli wayengathandabuzi ukuthi izimfundiso lezo zaziliqiniso ngoba wayeyitaditshe okuzwayo iMibhalo njalo wayisebenzisa ukuze ‘atshengise ukuthi uKhristu kwakumele ahlupheke futhi avuke kwabafileyo.’ (ImiSeb. 17:2, 3) Abafundi bazamukela izimfundiso lezo njalo bathemba umoya ongcwele ukuthi ubancedise bazwisise iLizwi likaNkulunkulu. Bachwayisisa ukuze babeleqiniso lokuthi izimfundiso lezo zisekelwe eMibhalweni. (ImiSeb. 17:11, 12; Heb. 5:14) Abazange basekele ukholo lwabo ethandweni ababelubona ebandleni kuphela futhi abazange bakhonze uJehova ngoba bekholisa ukuba phakathi kwabazalwane. Kodwa ukholo lwabo lwalusekelwe “elwazini oluqondileyo ngoNkulunkulu.”​—Kol. 1:9, 10.

7. Kuyini okuzakwenzakala nxa sikukholwa lokho okufundiswa liBhayibhili?

⁷ Iqiniso eliseLizwini likaNkulunkulu kalitshintshi. (Hubo. 119:160) Ngokwesibonelo, kalitshintshi lanxa umfowethu kumbe udadewethu angasizwisa ubuhlungu loba angenza isono esikhulu. Kalitshintshi lanxa sisehlelwa zinhlupho. Ngakho kumele sizazi kuhle izimfundiso zeBhayibhili njalo singathandabuzi ukuthi ziliqiniso. Nxa sikukholwa sibili lokho okufundiswa liBhayibhili sizahlala sithembekile kuJehova lanxa siphakathi kwenhlupho. Kuyini ongakwenza ukuze ungathandabuzi ukuthi okukholwayo kuliqiniso?

8. Ngokwalokho okutshiwo ku-2 Thimothi 3:14, 15, kuyini okwanceda uThimothi wangathandabuzi ukuthi akukholwayo kuliqiniso?

⁸ UThimothi wayengathandabuzi ukuthi akukholwayo kuliqiniso. Kuyini okwamnceda ukuthi angathandabuzi? (Bala u-2 Thimothi 3:14, 15.) Unina logogo wakhe bamfundisa “imibhalo engcwele” eseselusane. Kodwa akuthandabuzwa ukuthi laye waphinda wazitaditshela eyedwa. Lokhu ‘kwamnceda ukuthi ayikholwe’ imibhalo leyo. Ngokuhamba kwesikhathi uThimothi lonina kanye logogo wakhe baba ngamaKhristu. Akuthandabuzwa ukuthi uThimothi wamangala ebona uthando abalandeli bakaJesu ababelalo futhi wayelesifiso esikhulu sokuba labafowabo labodadewabo ebandleni njalo abancedise. (Flp. 2:19, 20) Lanxa kunjalo ukholo lwakhe lwalungasekelwanga ethandweni ayelalo ngabantu, kodwa lwalusekelwe ezimfundisweni zeBhayibhili ayengathandabuzi ukuthi ziliqiniso futhi ezamenza wafuna ukuba ngumngane kaJehova. Lawe kumele utaditshe iBhayibhili uze ucine ungasakuthandabuzi lokho elikufundisayo ngoJehova.

9. Yiziphi izinto ezintathu okumele ubezazi mhlophe?

⁹ Nanzi izinto ezintathu okumele ubezazi mhlophe ukuze ungakuthandabuzi lokho okukholwayo. Okokuqala, kumele uqiniseke ukuthi uJehova uNkulunkulu unguMdali wezinto zonke. (Eks. 3:14, 15; Heb. 3:4; Isam. 4:11) Okwesibili, kumele wazi ukuthi kungani ukholwa ukuthi iBhayibhili lilomlayezo kaNkulunkulu oya ebantwini. (2 Tim. 3:16, 17) Okwesithathu, kumele wazi ukuthi uJehova uleqembu labantu elimkhonza lihlelekile, elikhokhelwa nguKhristu lokuthi iqembu lelo ngoFakazi bakaJehova. (Isaya. 43:10-12; Joh. 14:6; ImiSeb. 15:14) Akudingi ukuthi wazi konke okuseBhayibhilini ukuze uzazi kuhle izinto lezi ezintathu. Inhloso yakho kumele ibe ngeyokusebenzisa ‘amandla akho okucabanga’ ukuze ungathandabuzi ukuthi okukholwayo kuliqiniso.​—Rom. 12:1.

10. Kuyini okunye okumele sikwenze nxa sesilazi iqiniso?

¹⁰ Nxa usuzazi mhlophe izimfundiso ezintathu ezimayelana loNkulunkulu, iBhayibhili kanye labantu bakhe, sekumele ufunde ukusebenzisa iMibhalo ukuze uncedise abanye ukuthi labo babezazi. Kumele wenze njalo ngoba singabafundi bakaKhristu. Umlandu wethu ngowokufundisa labo abazasilalela. * (1 Tim. 4:16) Nxa sizama ukuncedisa abanye ukuthi bazi izimfundiso zeBhayibhili siyabe siqinisa lolwethu ukholo.

11. Umphostoli uPhawuli wayebafundisa njani abantu futhi singamlingisela njani?

¹¹ Umphostoli uPhawuli wayesithi nxa efundisa abantu “abancede bakholwe kuJesu esebenzisa uMthetho kaMosi labaPhrofethi.” (ImiSeb. 28:23) Singamlingisela njani nxa sifundisa abanye iqiniso? Kumele sibancedise bataditshe njalo bacabangisise ngabakufundayo ukuze basondele kuJehova kulokuthi siphongubatshela ukuthi iBhayibhili lifundisani. Phela asifuni bamukele iqiniso ngenxa yokuthi bayasihlonipha kodwa kumele balamukele ngoba sebezibonele ukuthi lokho abakufundayo ngoNkulunkulu wethu osithandayo kuliqiniso.

12-13. Abazali bangabancedisa njani abantwababo ukuthi bahlale beseqinisweni?

¹² Bazali, asithandabuzi ukuthi lifuna abantwabenu bahlale beseqinisweni. Lingacabanga ukuthi nxa bengaba labangane abahle ebandleni bazakuba lokholo oluqinileyo. Kodwa nxa lifuna abantwabenu bangathandabuzi ukuthi lokho okufundiswa liBhayibhili kuliqiniso, kukhona okumele babelakho okwedlula ukuba labangane abahle. Kumele babe ngabangane bakaNkulunkulu futhi bangathandabuzi ukuthi iBhayibhili lifundisa iqiniso.

¹³ Nxa abazali befuna ukufundisa abantwababo iqiniso ngoNkulunkulu kumele bona baqale babe ngabafundi abakhutheleyo beBhayibhili. Kufanele babe lesikhathi sokucabangisisa ngabakufundayo. Nxa bangakwenza lokhu kuzabalula ukuthi bafundise abantwababo ukuthi labo benze njalo. Kanti njalo kumele bafundise abantwababo ukuthi kuchwayisiswa njani njengoba besenza ezifundweni zabo zeBhayibhili. Ukwenza njalo kuzanceda abantwababo ukuthi bathande uJehova futhi bathembe ‘inceku ethembekileyo lehlakaniphileyo’ ngoba yiyo ayisebenzisayo ukuthi asinike ukudla okusiqinisa ukholo. (Mat. 24:45-47) Bazali, lingapheleli ekufundiseni abantwabenu izimfundiso zeBhayibhili eziyisisekelo kodwa bancediseni babe lokholo oluqinileyo ngokubafundisa ‘izinto ezijulileyo zikaNkulunkulu’ kusiya ngeminyaka yabo lokuzwisisa kwabo.​—1 Khor. 2:10.

14. Kungani kumele sitaditshe iziphrofetho zeBhayibhili? (Khangela lebhokisi elithi “ Ungazichasisa Yini Iziphrofetho Lezi?”)

¹⁴ Iziphrofetho zeBhayibhili ziqakathekile ngoba lazo ziyasinceda siqinise ukholo lwethu kuJehova. Yiziphi iziphrofetho eziqinise ukholo lwakho? Mhlawumbe ungathi yiziphrofetho ezimayelana ‘lezinsuku zokucina.’ (2 Tim. 3:1-5; Mat. 24:3, 7) Kodwa yiziphi ezinye iziphrofetho ezagcwalisekayo ezingaqinisa ukholo lwakho? Ngokwesibonelo, ungenelisa yini ukuchasisa isiphrofetho esikuDanyeli isahluko 2 kumbe esikusahluko 11 ukuthi sagcwaliseka njani kudala lokuthi sigcwaliseka njani lamuhla? * Nxa ukholo lwakho lusekelwe ngokupheleleyo kulokho okutshiwo liBhayibhili kalusoze luxege. Cabanga ngabafowethu labodadewethu abahlukuluzwa kakhulu ngesikhathi seMpi Yomhlaba Yesibili eGermany. Lanxa babengazizwisisi ngokugcweleyo iziphrofetho ezimayelana lezinsuku zokucina babelokholo oluqinileyo eLizwini likaNkulunkulu.

15-17. Ukutaditsha iBhayibhili kwabanceda njani abafowethu labodadewethu ngesikhathi behlukuluzwa ngamaNazi?

¹⁵ Ngesikhathi kubusa uhulumende wamaNazi eGermany abafowethu labodadewethu abanengi kakhulu bahanjiswa ezinkambeni zokuhlukuluzwa. UHitler lesinye isiphathamandla okuthiwa nguHeinrich Himmler babengafuni lakubabona oFakazi bakaJehova. Omunye udade walandisa ngalokho okwatshiwo nguHimmler kwabanye odade ababesenkambeni yokuhlukuluzwa: “UJehova wenu angabusa ezulwini kodwa lapha emhlabeni yithi esibusayo! Sizalitshengisa ukuthi ngubani ozahlala isikhathi eside, lina kumbe thina!” Kuyini okwanceda abantu bakaJehova ukuthi bahlale bethembekile?

¹⁶ ABafundi beBhayibhili laba babekwazi ukuthi uMbuso kaNkulunkulu wawuqale ukubusa ngo-1914. Yikho kwakungabamangalisi ukuhlukuluzwa kangaka. Babeleqiniso lokuthi akulahulumende wabantu ozamisa injongo kaNkulunkulu ukuthi igcwaliseke.  UHitler wayengasoze akuqede ukukhonza kweqiniso kumbe afake uhulumende olamandla kuloMbuso kaNkulunkulu. Abafowethu labodadewethu babengakuthandabuzi ukuthi ngelinye ilanga umbuso kaHitler uzaphela.

¹⁷ Lokho abafowethu labodadewethu ababekukholwa kwakuliqiniso. Ngemva kweminyaka emilutshwana, uhulumende wamaNazi wadilika futhi uHeinrich Himmler, indoda eyayithe “lapha emhlabeni yithi esibusayo” yayisibaleka ukuze ingabulawa. Ngesikhathi lesi yahlangana lomfowethu uLübke owayeke wabotshwa. Edane kakhulu uHimmler wabuza umfowethu uLübke wathi: “Akungitshele mfundi weBhayibhili, sekuzakwenzakalani khathesi?” Umfowethu uLübke wamchasisela ukuthi oFakazi bakaJehova bebevele bekwazi ukuthi umbuso wamaNazi uzaphela lokuthi bona bazakhululwa. UHimmler waphelelwa esizwa lokhu lanxa wayehlala ekhuluma izinto ezimbi ngoFakazi bakaJehova. Kungakayi ngaphi wazibulala. Sifundani? Ukutaditsha iBhayibhili kanye leziphrofetho ezikulo kuzasinceda ukuthi sibe lokholo oluqinileyo kuNkulunkulu futhi sime siqine nxa sihlukuluzwa.​—2 Phet. 1:19-21.

18. Ngokwalokho okutshiwo kuJohane 6:67, 68, kungani kumele sibe “lolwazi oluqondileyo lokuqedisisa konke” uPhawuli akhuluma ngalo kuFiliphi 1:9?

¹⁸ Sonke kumele sibe lothando ukuze kukhanye ukuthi singamaKhristu eqiniso. Kodwa kumele siphinde sibe “lolwazi oluqondileyo lokuqedisisa konke.” (Flp. 1:9) Singayekela ukwenza njalo singaphanjulwa “yimimoya yonke yemfundiso, ngobuqili babantu” okugoqela abahlamuki. (Efe. 4:14) Ngesikhathi sabaphostoli, abafundi abanengi batshiya ukulandela uJesu kodwa umphostoli uPhetro watshengisa ukuthi kathandabuzi ukuthi uJesu “ulamazwi okuphila okungapheliyo.” (Bala uJohane 6:67, 68.) Lanxa ngalesosikhathi uPhetro wayengakuzwisisi konke okwakutshiwo ngamazwi lawo, wahlala eqotho ngoba wayenanzelela ukuthi uJesu nguye uKhristu. Lawe qhubeka utaditsha iBhayibhili ukuze ungathandabuzi ukuthi lokho elikutshoyo kuliqiniso. Nxa ungenza njalo, ukholo lwakho luzahlala luqinile kungelani lokuthi kuyini okukwehlelayo futhi uzancedisa labanye ukuthi baqinise ukholo lwabo.​—2 Joh. 1, 2.