UJehova ufuna abantu abatshadayo bathokoze futhi babe lobudlelwano obuseduze obungasoze buphele. (Mat. 19:4-6) Nxa ufuna ukutshada, ungamthola njani umuntu ofaneleyo ongatshada laye? UJehova uyakwazi lokho okumele sikwenze ukuze sithokoze emtshadweni njengoba kunguye owasidalayo. Yikho nxa ungasebenzisa lokho akutshela khona, uzathokoza sibili. Ake sixoxe ngokunye kwakhona.

Okokuqala, nanku okumele sikuzwisise ngathi: ‘Inhliziyo yethu iyakhohlisa okudlula izinto zonke njalo imbi kakhulu.’ (Jer. 17:9) Nxa abantu ababili abafuna ukutshada beqalisa ukwazana lokuthandana kuba lula ukuthi bavalwe luthando. Nxa sekunjalo, kuba nzima ukuthi benze izinqumo ezinhle. Nxa abantu bangakhetha ukutshada befuqwa yimizwa kuphela, bangadana ngokuhamba kwesikhathi. (Zaga. 28:26) Yikho kungakuhle ukuthi abantu ababili batshelane imizwa ejulileyo abalayo ngomunye lomunye kumbe benze izithembiso bengakazani okuyangaphi.

IZaga 22:3 zithi: “Umuntu olengqondo uthi ebona ingozi acatshe, kodwa isithutha siyaphikelela singena enkathazweni.” Kanti ingaphi ingozi ngokusebenzisa amawebhusayithi okudinga umuntu wokuthandana laye? Abanye abantu baqalise ukujayelana labantu abangabaziyo kumawebhusayithi la basebeqalisa ukuthandana labo, bazonanzelela sekule ukuthi bebeqilwa. Kanti njalo abantu abangamaqili bazitshintshe lokho abayikho khona ukuze bakhohlise abantu belibele njalo babatshontshele imali. Ngezinye izikhathi abantu labo bebesithi bangoFakazi.

Ake sixoxe ngenye ingozi engabakhona ngokusebenzisa amawebhusayithi la. Amanye awo asebenzisa inhlelo zamakhompiyutha ezenzelwe ukuqondanisa abantu abangathandana. Kodwa akulabufakazi bokuthi lokhu kuyasebenza sibili. Kambe kuyikuhlakanipha yini ukuthemba inhlelo zekhompiyutha ezenziwe ngumuntu ukuthi zisincedise ukwenza isinqumo esiqakathekileyo sokukhetha umuntu esingatshada laye? Inhlelo zamakhompiyutha ziyini nxa siziqathanisa lalokho esikutshelwa nguJehova esebenzisa iBhayibhili?—Zaga. 1:7; 3:5-7.

IZaga 14:15 zithi: “Umuntu oyisithutha ukholwa loba yini, kodwa olengqondo uyakucabangisisa konke akwenzayo.” Kumele uqale umazi kuhle umuntu ungakenzi isinqumo sokuthi uzatshada laye. Kodwa lokho kungaba nzima ukukwenza  nxa lihlangane kumawebhusayithi okuthandana. Lanxa lingabe libona izinto eziphathelane lomunye futhi lixoxa isikhathi eside, kambe lingatsho sibili ukuthi liyazana? Abanye ababecabanga ukuthi sebemtholile othandwa yinhliziyo yabo bethuka sebehlangane lomuntu lowo futhi sebenanzelela ukuthi unjani.

Umhubi wathi: “Kangidlelani labantu abakhohlisayo njalo kangiwelelani labazenzisi.” (Hubo. 26:4) Abantu abanengi kababoni lutho olubi ngokubhala izinto ezingamanga ezimayelana labo kumawebhusayithi la ukuze abantu bafune ukuthandana labo. Bangazifihla lokho abayikho khona kumbe ubuntu babo obubi bungakhanyi nxa bethumezela abanye amameseji. Lanxa abanye abantu bengazithi bangoFakazi bakaJehova, babhabhathiziwe yini? Baqinile yini ekukhonzeni? Bangabangane bakaJehova yini? Bayahlonitshwa yini ebandleni? Bayizibonelo esingazilingisela yini kumbe ‘bangabangane ababi’? (1 Khor. 15:33; 2 Tim. 2:20, 21) IMibhalo iyabavumela yini ukuthi batshade? Kumele sizazi impendulo zemibuzo le. Kodwa kungabanzima ukuthi sizazi nxa singazange sibuze abanye oFakazi ababazi kuhle. (Zaga. 15:22) Kanti njalo inceku kaJehova ethembekileyo ngeke vele icabange ngokuthandana lomuntu ongakhonziyo ‘ibisibotshelwa ejogweni linye’ lomuntu lowo.—2 Khor. 6:14; 1 Khor. 7:39.

Kuyingozi sibili ukudinga umuntu wokuthandana laye kumawebhusayithi okuthandana. Kodwa kulendlela ezingcono ongamthola futhi umazi kuhle ngazo umuntu ongatshada laye. Ungamthola ngaphi? Nxa ukuhlangana ndawonye kuvunyelwa, singazana labanye emihlanganweni yebandla, eyeziqinti, eyezabelo lakweminye imibuthano.

Nxa ukuhlangana ndawonye kungavunyelwa njengesikhathi lesi kulekhorona, singasebenzisa ezempucuko ukungena imihlangano yebandla futhi lokho kungasinika amathuba okuthi sazane labanye oFakazi abangatshadanga. Ungabezwa besenza izinkulumo futhi beveza ukholo lwabo nxa bephendula. (1 Tim. 6:11, 12) Kanti njalo lingenelisa ukuxoxa kuma-breakout rooms imihlangano isiphelile nxa ibandla lenu lisebenzisa ezempucuko ezilawo. Imibuthano le esiba layo kwezempucuko labanye oFakazi ingakunceda ubone ukuthi umuntu ofuna ukuthandana laye uxoxa njani labanye futhi lokho kungaveza lokho ayikho khona. (1 Phet. 3:4) Ngokuhamba kwesikhathi nxa lilokhu lijayelana, ungabona ukuthi lifuna ukwenza izinto ezifananayo yini empilweni lokuthi lingenelisa yini ukuphilisana nxa lingatshada.

Nxa abantu abangatshadanga bangalalela lokho esikutshelwa nguJehova eLizwini lakhe lapho bedinga umuntu abangatshada laye bangathokoza emitshadweni yabo. Kunjengoba nje iZaga zisitsho, zithi: “Othole umfazi owenza okuhle [kumbe indoda] uthole igugu, njalo uthola umusa kuJehova.”—Zaga. 18:22, NWT.