1-2. Amazwi kaJehova aku-Isaya 65:16, 17 asinceda njani ukuthi singalahli ithemba?

UMHLANGANO wesabelo ka-2017 wawulesihloko esivusa usinga esithi, “Ungalahli Ithemba!” Umhlangano lo wasinceda sabona ukuthi singaqinisela njani nxa sisebunzimeni. Sekuleminyaka emine wadlula njalo silokhu sithwele amagabha avuzayo emhlabeni lo omubi.

² Yiziphi inhlupho ezisanda kukwehlela? Yikufelwa lilunga lemuli kumbe umngane omthandayo yini? Ngumkhuhlane omubi owubanjiweyo yini? Yibunzima obubangelwa yikuguga yini? Ngumonakalo wemvelo, ludlakela kumbe yikuhlukuluzwa yini? Uthwele nzima ngenxa yomkhuhlane wekhorona yini kumbe omunye nje umkhuhlane omubi? Sililindele ngabomvu ilanga lapho inhlupho lezi ezizaphela khona, zingaphindi zibe khona njalo sikhohlwe ngazo!—Bala u-Isaya 65:16, 17.

3. Kuyini okumele sikwenze khathesi futhi kungani?

³ Impilo emhlabeni lo ilukhuni njalo kungenzeka sithwale nzima kakhulu esikhathini esizayo. (Mat. 24:21) Yikho kumele siqhubeke sifunda ukuqinisela. Ngenxa yani? UJesu wathi: “Nxa lingaqinisela lizalondoloza impilo zenu.” (Luk. 21:19) Sizenelisa ukuqhubeka siqinisela nxa singacabanga ngendlela abanye abalenhlupho ezinjengezethu abaqinisela ngayo.

4. Kungani sisithi uJehova nguye obekezela ukwedlula bonke abantu?

⁴ Ngubani obekezela ukwedlula bonke abantu? NguJehova uNkulunkulu. Iyakumangalisa yini impendulo le? Ingakumangalisa, kodwa nxa ungacabangisisa ngayo uzazwisisa ukuthi kungani kunjalo. Umhlaba lo ubuswa nguDeveli yikho ugcwele inhlupho ezinengi kangaka. UJehova ulamandla okuqeda inhlupho lezo ngokucwayiza kwelihlo, kodwa umelele ilanga  alibekileyo ukuthi akwenze lokho. (Rom. 9:22) Uzaqhubeka ebekezela kuze kufike ilanga lelo. Ake sixoxe ngezinto eziyisitshiyagalolunye uJehova azibekezelelayo.

5. Ibizo likaNkulunkulu lingcoliswe njani futhi wena uzwa njani ngakho?

⁵ Ukungcoliswa kwebizo lakhe. UJehova uyalithanda ibizo lakhe futhi ufuna wonke umuntu alihloniphe. (Isaya. 42:8) Kodwa sekuleminyaka engaba ngu-6 000 ibizo lakhe lingcoliswa. (Hubo. 74:10, 18, 23) Lokhu kwaqalisela esivandeni se-Edeni ngesikhathi uDeveli (okutsho “uMnyundeli”) esola uNkulunkulu ngokuthi uncitsha u-Adamu lo-Eva into ethile abayidingayo ukuze bathokoze. (Gen. 3:1-5) Kusukela ngalesosikhathi, uJehova ubelokhu eqanjelwa amanga ngokuthi uncitsha abantu izinto eziqakathekileyo abazidingayo. UJesu wayekhathazekile ngokuthi ibizo likaYise lalingcoliswa. Yikho wafundisa abafundi bakhe ukuthi bathandaze besithi: “Baba wethu osezulwini, kalingcweliswe ibizo lakho.”—Mat. 6:9.

6. Kungani uJehova eyekele kwadlula isikhathi eside engakalungisi indaba yobukhosi?

⁶ Ukuphikiswa kobukhosi bakhe. UJehova nguye yedwa olelungelo lokubusa ezulwini lasemhlabeni futhi indlela abusa ngayo ingcono ukwedlula ekaloba ngubani. (Isam. 4:11) Kodwa uDeveli wazama ukudukisa izingilosi labantu ngokubenza bacabange ukuthi uNkulunkulu kalalo ilungelo lokubusa. Kwakuzathatha isikhathi ukuthi indaba yokuthi uJehova nguye ofanele ukubusa lokuthi unguMbusi ongcono kulabo bonke ilungiswe. UNkulunkulu watshengisa ukuhlakanipha ngokuyekela abantu bazibuse okwesikhathi eside ukuze babone ukuthi ngeke baphumelele ukwenza njalo nxa bengamlaleli yena uMdali wabo. (Jer. 10:23) Ukubekezela kukaNkulunkulu kuzenza wonke umuntu angathandabuzi ukuthi nguye olelungelo lokubusa ezulwini lasemhlabeni. Bonke bazakwazi ukuthi indlela uJehova abusa ngayo ingcono kulazo zonke lokuthi uMbuso wakhe yiwo kuphela ozaletha ukuthula lokuvikeleka emhlabeni.

7. Ngobani abahlamukela uJehova futhi uzabenzani?

⁷ Ukuhlamuka kwabanye abantwabakhe. UJehova wadala izingilosi labantwabakhe emhlabeni bephelele, bengela ngitsho isici. Kodwa enye ingilosi eyaba nguSathane (okutsho “uMphikisi”) yamhlamukela futhi yabangela ukuthi abantu abapheleleyo, u-Adamu lo-Eva labo bamhlamukele. Lezinye izingilosi labanye abantu labo bahlamuka. (Jud. 6) Ngokuhamba kwesikhathi amanye amalunga esizwe sako-Israyeli esasingabantu bakaNkulunkulu abakhethiweyo lawo ahlamuka aqalisa ukukhonza onkulunkulu bamanga. (Isaya. 63:8, 10) Amdanisa sibili uJehova. Lanxa kunjalo, wabekezela futhi uzaqhubeka esenza njalo kuze kufike isikhathi lapho azabatshabalalisa khona bonke abahlamuki. Ngemva kwalokho yena lalabo abaqotho kuye bazathokoza ngoba kuyabe kungaselasizatho sokuthi baqhubeke bebekezelela ububi obusemhlabeni lo.

8-9. Yiwaphi amanga akhulunywayo ngoJehova futhi thina singenzani?

⁸ Amanga kaDeveli. USathane wasola uJobe lazo zonke izinceku zikaJehova ezithembekileyo esithi zikhonza uJehova ngoba kulokuthile ezikufuna kuye. (Jobe. 1:8-11; 2:3-5) UDeveli ulokhu emangalela abantu lalamuhla. (Isam. 12:10) Singancedisa ekutshengiseni ukuthi uSathane ulamanga ngokuqinisela nxa siphakathi kobunzima langokuqhubeka siqotho kuJehova ngoba simthanda.  Lathi njengoJobe sizabusiswa nxa singaqinisela.—Jak. 5:11.

⁹ USathane usebenzisa abafundisi benkolo zamanga ukuthi athi uJehova ulolunya lokuthi nguye obangela ukuthi abantu bahlupheke. Abanye baze bathi nxa abantwana besifa, uNkulunkulu nguye oyabe ebathethe ngoba efuna ezinye izingilosi ezulwini. Lokhu yikuthuka uNkulunkulu sibili! Thina siyakwazi ukuthi uJehova unguBaba olothando. Nxa singabanjwa umkhuhlane omubi kumbe sifelwe ngumuntu esimthandayo, kasiqali ukusola uNkulunkulu. Kodwa silokholo lokuthi ngelinye ilanga uzasilisa abagulayo, avuse labafileyo. Singatshela loba ngubani ofuna ukulalela, ukuthi uJehova unguNkulunkulu olothando. Lokhu kwenza amphendule lowo omeyisayo.—Zaga. 27:11.

10. IHubo 22:23, 24 lisifundisani ngoJehova?

¹⁰ Ukuhlupheka kwezinceku zakhe azithandayo. UJehova nguNkulunkulu olesihawu. Uyadana kakhulu nxa esibona sihlupheka mhlawumbe ngenxa yokuhlukuluzwa, ukugula loba amaphutha esiwenzayo. (Bala iHubo 22:23, 24.) UJehova uzwa ubuhlungu nxa lathi siphakathi kobuhlungu futhi uyafuna ukubuqeda, lakanye uzakwenza lokho. (Khangela u-Eksodusi 3:7, 8 lo-Isaya 63:9.) Lizafika ilanga lapho ‘azakwesula khona izinyembezi emehlweni ethu, ukufa ngeke kusaba khona, loba ukulila loba ukukhala loba ubuhlungu, ngeke kusaba khona.’—Isam. 21:4.

11. UJehova uzwa njani ngezinceku zakhe ezafayo?

¹¹ Ukufelwa ngabangane bakhe. UJehova uzwa njani ngamadoda labesifazana abathembekileyo asebafayo? Uyafisa kakhulu ukuphinda ababone! (Jobe. 14:15) Akucabange ukuthi uJehova ukufisa njani ukuphinda abone umngane wakhe u-Abrahama. (Jak. 2:23) Kumbe uMosi lowo ayekhuluma laye  “ubuso ngobuso.” (Eks. 33:11) Kumele ukuthi ukhangelele phambili ukuphinda azwe uDavida labanye abahubi behlabela ingoma ezimnandi zokumdumisa! (Hubo. 104:33) UJehova kabakhohlwanga abangane bakhe laba lanxa sebafa. (Isaya. 49:15) Uyakukhumbula konke okumayelana labo. IBhayibhili lithi, “kuye bonke bayaphila.” (Luk. 20:38) Ngelinye ilanga uzabavusa futhi uzaphinda azwe imithandazo yabo esuka enhliziyweni, amukele lokukhonza kwabo. Sengathi lokhu kungakududuza nxa ufelwe yisihlobo kumbe ngumngane.

12. Kuyini okumkhathaza kakhulu uJehova ngezinsuku lezi zokucina ezimbi?

¹² Ukucindezelwa kwabantu yilabo abenza okubi. Ngesikhathi kusiba lokuhlamuka esivandeni se-Edeni, uJehova wayekwazi ukuthi izinto zizaqala zibe zimbi kakhulu zingakalungi. Uyabuzonda ububi, ukungaphathwa kuhle kwabantu lodlakela okugcwele emhlabeni lamuhla. Uhlala etshengisa ukuthi ulendaba lalabo abangelabani, ngokwesibonelo labo ababuthakathaka labangenelisi ukuzivikela njengezintandane labafelokazi. (Zek. 7:9, 10) Kodwa ukhathazeka kakhulu nxa ebona izinceku zakhe ezithembekileyo zicindezelwa futhi zibotshwa. Lingathandabuzi ukuthi uyalithanda lina lonke elibekezela kanye laye.

13. Yiziphi izinto ezenyanyekayo ezenziwa ngabantu uNkulunkulu azibonayo futhi uzakwenzani ngazo?

¹³ Ukuziphatha kubi kwezemacansini okulokhu kusanda. USathane uyakuthanda ukwenza ukuthi abantu abadalwa ngomfanekiso kaNkulunkulu baziphathe kubi. Ngesikhathi uNkulunkulu ‘ebona ukuthi ukuxhwala kwabantu kwasekukukhulu kanganani’ ngesikhathi sikaNowa, “wadabuka ngokuthi wayemenzile umuntu emhlabeni, ngakho inhliziyo yakhe yagcwala ubuhlungu.” (Gen. 6:5, 6, 11) Khathesi izinto sezingcono yini? Ngitsho lakancane! UDeveli uyathokoza kakhulu nxa ebona yonke imihlobo yokuziphatha kubi kwezemacansini isibhahile. Igoqela ukungaziphathi phakathi kwamadoda labesifazana lobutabane. (Efe. 4:18, 19) Okumthokozisa okwamagama yikubona abantu abakhonza uJehova besenza isono esikhulu. Nxa uJehova esebekezele kwanela, uzatshengisa ukuthi uyakuzonda konke ukungaziphathi ngokususa abantu abaziphatha kubi abangafuni ukutshintsha.

14. Abantu bawuphambanisa njani umhlaba lezinyamazana?

¹⁴ Ukubhujiswa komhlaba awudalayo. Umuntu kapheleli nje ‘ekubuseni omunye amlimaze’ kodwa uyehluleka lokunakekela umhlaba lezinyamazana uJehova atshela abantu ukuthi bazinakekele. (UmTshu. 8:9, NWT; Gen. 1:28) Abanye abezesayensi bathi okwenziwa ngabantu kungabangela ukuthi imihlobo yezinyamazana lezimila engu-1 miliyoni itshabalale eminyakeni emilutshwana ezayo. Yikho abantu bekhathazeke kangaka ngemvelo. Kodwa siyambonga uJehova ngoba usithembise ukuthi ‘uzababhubhisa ababhubhisa umhlaba’ lokuthi uzawutshintsha ube lipharadayisi.—Isam. 11:18; Isaya. 35:1.

15-16. Kuyini okumele kusifuqe ukuthi sibekezele kanye loJehova? Nika umzekeliso.

¹⁵ Akucabange ngazo zonke izinto uBaba wethu osezulwini abezibekezelela okwezinkulungwane zeminyaka. (Khangela ibhokisi elithi “ Yiziphi Izinto UJehova Azibekezelelayo?”) UJehova angaqeda umumo lo wezinto omubi loba nini. Kodwa ukubekezela kwakhe kuyasinceda kakhulu. Kubone ngale indlela. Ake sithi indoda lomkayo batshelwa ukuthi umntanabo ongakazalwa kaphilanga kuhle lokuthi nxa esezelwe impilo yakhe izaba nzima futhi afe esesemncane. Loba kunjalo, bayathokoza  nxa umntanabo esezelwe lanxa kuzaba nzima ukuthi bamnakekele. Bazaqinisela kuloba yibuphi ubunzima ukuze umntanabo athole impilo engcono ngoba bemthanda.

¹⁶ Zonke izizukulwane zika-Adamu lo-Eva lazo zizalwa zilesono. Lanxa kunjalo, uJehova uyazithanda futhi uyazinakekela. (1 Joh. 4:19) Kafanani labazali esikhulume ngabo emzekelisweni ngoba yena uyenelisa ukuqeda ukuhlupheka kwabantwabakhe. Uselibekile ilanga lapho azaqeda khona konke ukuhlupheka kwabantu. (Mat. 24:36) Indlela asithanda ngayo kumele isifuqe ukuthi sibekezele kanye laye ingqe nje kusadingeka senze njalo.

17. Kungani lokho okukhulunywa mayelana loJesu kuHebheru 12:2, 3 kungasinceda ukuthi siqhubeke siqinisela?

¹⁷ UJehova usibekela isibonelo esipheleleyo sokubekezela. UJesu wenelisa ukulingisela uYise endabeni yokubekezela. Esasemhlabeni, waqinisela ngesikhathi ephikiswa, eyangiswa langesikhathi ebethelwa esigodweni sokuhlutshwa ngenxa yethu. (Bala uHebheru 12:2, 3.) Akuthandabuzwa ukuthi isibonelo sikaJehova sanika uJesu amandla okuthi aqinisele. Lathi singasinceda.

18. U-2 Phetro 3:9 uveza ukuthi ukubekezela kukaJehova kubancede njani abantu?

¹⁸ Bala u-2 Phetro 3:9. UJehova uyasazi isikhathi esifaneleyo sokubhubhisa abantu ababi. Ukubekezela kwakhe kwenze abantu abanengi bamazi futhi khathesi ixuku elikhulu lamamiliyoni abantu liyamkhonza njalo liyamdumisa. Bonke abexuku leli bayathokoza ngokuthi uJehova wabekezela baze bazalwa, bafunda ngaye, bamthanda futhi bazinikela kuye. Kuzakhanya ukuthi isinqumo sikaJehova sokubekezela sasiqondile lapho amamiliyoni abantu eqinisela kuze kube sekucineni.

19. Kumele sizimisele ukwenzani njalo sizatholani?

¹⁹ Isibonelo sikaJehova siyasinceda sibone ukuthi singaqinisela ngapha sithokoza. Kungelani lokudana lokuhlupheka uSathane akubangeleyo, uJehova uqhubeka ‘enguNkulunkulu othokozayo.’ (1 Tim. 1:11) Lathi singenelisa ukuqhubeka sithokoza sisalindele uJehova ukuthi angcwelise ibizo lakhe, alwele ubukhosi bakhe, njalo aqede bonke ububi kanye lenhlupho ezisehlelayo. Ngakho kasizimiseleni ukuqhubeka sibekezela sisazi ukuthi uBaba wethu osezulwini laye uyabekezela. Singenza njalo, amazwi la azagcwaliseka komunye lomunye wethu: “Uyathokoza umuntu oqhubeka eqinisela nxa elingwa ngoba uzathi esemukelwe athole umqhele wokuphila, lowo uJehova awuthembisa labo abaqhubeka bemthanda.”—Jak. 1:12.