1. Kuyini okungabangela ukuthi abantu bakaJehova babe lesizungu?

ABANENGI bethu siyake sibe lesizungu. Kwabanye siyaphangisa ukuphela kodwa kwabanye siyaphuza. Singaba lesizungu lanxa siphakathi kwabantu. Abanye bathwala nzima ukujayela ukuba sebandleni elitsha. Abanengi bakhulela ezimulini ezazisenza izinto ezinengi ndawonye, yikho baba lesizungu nxa bangathutha baye kwenye indawo. Abanye bona bakhumbula isihlobo kumbe umngane owabhubhayo. Kanti njalo amanye amaKhristu, ikakhulu lawo asanda kuba ngoFakazi aba lesizungu nxa amalunga emuli kumbe abangane bawo abangamkhonziyo uJehova bewaphikisa kumbe bewahlukuluza.

2. Yiphi imibuzo esizayiphendula?

² Akulanto uJehova angayaziyo futhi angayizwisisiyo ngathi. Uyazwisisa indlela esizizwa ngayo nxa silesizungu njalo uzimisele ukusincedisa ukuthi silwisane laso. Usincedisa njani? Thina kuyini esingakwenza? Singabancedisa njani abanye ebandleni abalesizungu? Asiphenduleni imibuzo le.

3. UJehova watshengisa njani ukuthi ulendaba lo-Elija?

³ UJehova ufuna zonke izinceku zakhe zithokoze. Useduze komunye lomunye wethu futhi uyabona nxa sidanile. (Hubo. 145:18, 19) Cabanga ngendlela atshengisa ngayo ukuthi ulendaba lomphrofethi u-Elija. Umphrofethi lo othembekileyo waphila ngesikhathi esinzima ko-Israyeli. Izinceku zikaJehova zazihlukuluzwa ngabantu ababesezikhundleni eziphezulu  ko-Israyeli futhi ababefuna ngabomvu ukumbulala ngu-Elija. (1 AmaKho. 19:1, 2) Okunye okwakungabe kukhathaza u-Elija yikucabanga ukuthi nguye yedwa umphrofethi owayesele ekhonza uJehova. (1 AmaKho. 19:10) UJehova kazange apholise amaseko, wahle wathumela ingilosi ukuthi imqinisekise ukuthi wayengayedwa. Manengi ama-Israyeli ayelokhu ethembekile kuJehova.—1 AmaKho. 19:5, 18.

4. UMakho 10:29, 30 utshengisa njani ukuthi uJehova ulendaba lalabo abangasancediswa ngabangakibo labangane?

⁴ UJehova uyakwazi ukuthi abanye abakhetha ukumkhonza batshiya izinto ezinengi. Lokhu kugoqela uncedo esingabe siluthola kumalunga emuli lakubangane abangamkhonziyo uJehova. UPhetro wayengabe ekhathazekile ngesikhathi ebuza uJesu esithi: “Sitshiye zonke izinto sakulandela, manje sizatholani?” (Mat. 19:27) UJesu waqinisekisa abafundi bakhe ukuthi babezathola imuli enkulu yabantu abakhonza uJehova. (Bala uMakho 10:29, 30.) Kanti njalo uJehova, oyinhloko yemuli le uthembisa ukuthi uzabasekela labo abafuna ukumkhonza. (Hubo. 9:10) Ake sixoxe ngezinye izinto ongazenza ukuze uJehova akuncedise ulwisane lesizungu.

5. Kunceda ngani ukucabangisisa ngendlela uJehova akuncedisa ngayo?

⁵ Cabangisisa ngendlela uJehova akuncedisa ngayo. (Hubo. 55:22) Lokhu kuzakunceda ubone ukuthi kawuwedwa. Udade ongatshadanga okuthiwa nguCarol * onguye yedwa uFakazi emulini yangakibo uthi: “Ukucabangisisa ngendlela uJehova angincedise ngayo ngesikhathi ngisebunzimeni kungincede ngabona ukuthi kangingedwa. Kanti njalo kwenza ngiqiniseke ukuthi kasoze angitshiye loba sekutheni.”

6. U-1 Phetro 5:9, 10 angabakhuthaza njani labo abalenhlupho?

⁶ Cabanga ngendlela uJehova ancedisa ngayo abafowethu labodadewethu abalenhlupho. (Bala u-1 Phetro 5:9, 10.) Umfowethu okuthiwa nguHiroshi osekuleminyaka enguye  yedwa uFakazi emulini yangakibo uthi: “Ebandleni kulula ukunanzelela ukuthi wonke umuntu ulenhlupho. Ukwazi ukuthi sonke senza okusemandleni ethu ekukhonzeni uJehova kungasikhuthaza thina okuyithi sodwa oFakazi emulini zethu.”

7. Ukuthandaza kukunceda njani?

⁷ Hlala uthandaza, ubala iBhayibhili futhi ungena imihlangano yebandla. Nxa uthandaza tshela uJehova yona kanye indlela ozizwa ngayo. (1 Phet. 5:7) Udade okuthiwa nguMassiel wakhetha ukukhonza uJehova futhi lokhu kwamenza waba lesizungu ngenxa yokuthi abangakibo babengamkhonzi. Uthi: “Ukuthandaza ngenhliziyo yonke kuJehova ngokunye okuqakatheke kakhulu okwanginceda ukuthi ngilwisane lesizungu. WayenguBaba sibili kimi futhi ngangithandaza kuye kanengi nsuku zonke ngimtshela indlela engizizwa ngayo.”

8. Ukubala iLizwi likaNkulunkulu lokucabangisisa ngokubala kulo kukunceda njani?

⁸ Bala iLizwi likaNkulunkulu nsuku zonke futhi ucabangisise ngendaba ezikulo ezitshengisa ukuthi uJehova uyakuthanda. Udade okuthiwa nguBianca ohlala etshelwa amazwi amqeda amandla ngabangakibo uthi: “Ukubala lokucabangisisa ngezindaba eziseBhayibhilini kanye lezindaba zokuphila zezinceku zikaJehova ezahlangana lobunzima obuhambelana lobami kuyanginceda sibili.” Amanye amaKhristu abamba ngekhanda amavesi aduduzayo njengeHubo 27:10 lo-Isaya 41:10. Abanye balalela okurekhodiweyo ngesikhathi belungiselela imihlangano yebandla kumbe bebala iBhayibhili. Bathi lokhu kwenza bangabi lesizungu kangako.

9. Ukungena imihlangano yebandla kukunceda njani?

⁹ Yenza konke ongakwenza ukuthi ungene imihlangano yebandla. Izakukhuthaza futhi izakunika ithuba lokwazi abafowenu labodadewenu. (Heb. 10:24, 25) UMassiel esike sakhuluma ngaye uthi: “Lanxa ngangilenhloni ngangizimisela ukungena yonke imihlangano yebandla lokuphendula kuyo. Lokhu kwanginceda ngaba seduze labafowethu labodadewethu ebandleni.”

10. Kungani kuqakathekile ukuthi sibe ngabangane babafowethu labodadewethu ebandleni?

¹⁰ Woba ngumngane wabafowethu labodadewethu. Dinga abangane ongafunda kubo ebandleni, kungaba ngabancane kumbe abadala kulawe loba abomunye umhlobo. IBhayibhili lisikhumbuza ukuthi ukuhlakanipha “kufunyanwa ebadaleni.” (Jobe. 12:12) Asebekhulile labo bangafunda okunengi kwabasakhulayo abathembekileyo. Ngokwesibonelo, lanxa uDavida wayemncane kakhulu kuloJonathani, baba ngabangane abaseduze.  (1 Sam. 18:1) Bancedisana ukuthi bakhonze uJehova lanxa babesehlelwa yibunzima obukhulu. (1 Sam. 23:16-18) U-Irina onguye yedwa uFakazi emulini yangakibo uthi: “Abafowethu labodadewethu bangaba njengabazali sibili kumbe njengalabo esizalwa labo. UJehova angabasebenzisa ukuthi basincedise nxa sidinga usizo.”

11. Kumele senzeni ukuze sibe labangane abaseduze?

¹¹ Nxa ulenhloni kungaba nzima kakhulu ukuthi ube labangane. Udadewethu olenhloni okuthiwa nguRatna owafunda iqiniso lanxa wayephikiswa uthi: “Kwakumele ngivume ukuthi ngiyaludinga uncedo lwabafowethu labodadewethu ebandleni.” Kungaba nzima ukutshela omunye umuntu indlela ozizwa ngayo. Kodwa nxa ungakwenza umuntu lowo angaba ngumngane wakho oseduze. Abangane bakho bayafuna ukukukhuthaza lokukusekela, kodwa kumele ubatshele indlela ozizwa ngayo ukuze benelise ukwenza njalo.

12. Ukutshumayela kungakunceda njani?

¹² Enye indlela engcono kakhulu yokuthola abangane yikutshumayela labafowethu labodadewethu. UCarol esike sakhuluma ngaye uthi: “Ukuphuma ekutshumayeleni labodadewethu lokwenza labo ezinye izinto eziphathelane lokukhonza kungincede ngaba labangane abanengi abahle. Sekuleminyaka eminengi uJehova engincedisa esebenzisa abangane labo.” Ukuba labangane abangamaKhristu athembekileyo kuhlala kunceda sibili. Yibo uJehova abasebenzisayo ukuze asikhuthaze nxa sidanile, ngokwesibonelo nxa silesizungu.—Zaga. 17:17.

13. Yiwuphi umlandu sonke esilawo ebandleni?

¹³ Sonke silomlandu wokwenza ibandla libe yindawo elokuthula lowokuthanda abanye ukuze kungabi lomuntu ozizwa elahliwe. (Joh. 13:35) Esikutshoyo lesikwenzayo kungabakhuthaza kakhulu abanye. Zwana ukuthi omunye udadewethu wathini: “Ngesikhathi ngisafunda iBhayibhili, ibandla laba njengemuli kimi. Ngangingeke ngibe nguFakazi kaJehova aluba abafowethu labodadewethu abazange bangisekele.” Ungenzani ukuze uncedise labo abayibo bodwa oFakazi emulini yangakibo ukuze babone ukuthi abafowethu labodadewethu bayabathanda?

14. Ungenzani ukuze ube ngumngane walabo abasanda kufika ebandleni?

¹⁴ Zama ukuba labangane abasanda kufika ebandleni. Singamukela ngazo zombili izifundo zeBhayibhili eseziqalisa ukungena imihlangano yebandla, abazalwane abathuthele ebandleni lethu kumbe labo abasanda kuba ngoFakazi. (Rom. 15:7) Kodwa akumelanga siphelele ekubabingeleleni ngendlela elomusa nje kuphela. Sifuna ukuthi ngokuhamba kwesikhathi sibe ngabangane babo abaseduze. Yikho kumele ube lomusa njalo utshengise ukuthi ulendaba labo sibili. Zama ukuzwisisa inhlupho abahlangana lazo kodwa ungababuzi imibuzo ezabenza babe lenhloni. Abanye bangathwala nzima ukutsho indlela abazizwa ngayo, yikho ungababambi ngamandla ukuthi bakhulume. Kodwa kumele ube lomusa, ubabuze imibuzo ezenza baveze indlela abazizwa ngayo futhi nxa usubuzile lalela ngesineke impendulo zabo. Ngokwesibonelo, ungababuza ukuthi balifunda njani iqiniso.

15. AmaKhristu alokholo oluqinileyo angabanceda njani abanye ebandleni?

¹⁵ Ibandla lonke lizaqina ekukhonzeni nxa amaKhristu alokholo oluqinileyo ikakhulu abadala, etshengisa ukuthi alendaba lommemezeli ngamunye. UMelissa  owakhuliswa ngunina onguFakazi uthi: “Ngiswele ukuthi ngibabonge njani abazalwane ababenjengobaba kimi, bezinika isikhathi sokuba lami futhi betshengisa ukuthi balendaba lami. Loba nini lapho engizwa kulokuthile engifuna ukukukhuluma ngiyakwazi ukuthi ukhona ozangilalela.” Omunye umfowethu osakhulayo okuthiwa nguMauricio wadana futhi wasala elesizungu lapho lowo owayemfundise iBhayibhili engasayifezi inkonzo. Uthi: “Abadala batshengisa ukuthi balendaba lami futhi lokho kwanginceda kakhulu. Babehlala bekhuluma lami, bephuma lami ekutshumayeleni, bengixoxela amagugu abawathole ngesikhathi betaditsha njalo bedlala lami imidlalo.” Khathesi uMelissa loMauricio basenkonzweni yesikhathi sonke.

16-17. Kuyini okunye esingakwenza ukuze sincede abanye?

¹⁶ Nceda abanye ngalokho abakudingayo. (Gal. 6:10) ULeo ongumnali elizweni elikhatshana lakibo uthi: “Izikhathi ezinengi oyabe ukudinga yikuthi umuntu atshengise ukuthi ulendaba lawe ngaso kanye isikhathi odinga ngaso uncedo. Ngikhumbula ngize ngibe sengozini yemota. Ngemva kwesikhathi, ngacina ngifikile endlini futhi ngangikhathazeke kakhulu. Kodwa omunye umfowethu lomkakhe banginxusa emzini wabo ukuthi ngizokudla labo. Angisakhumbuli ukuthi sadlani kodwa engilokhu ngikukhumbula yikuthi bangilalela ngesineke. Ngasala ngisizwa ngcono.”

¹⁷ Siyakholisa ukuba labafowethu labodadewethu lokuxoxa ngenkulumo esizizwayo emibuthanweni yethu, ngokwesibonelo emihlanganweni yeziqinti leyezabelo. Kodwa uCarol esike sakhuluma ngaye uthi: “Ngiba lesizungu ikakhulu nxa ngisemihlanganweni yeziqinti leyezabelo.” Kungani esiba lesizungu? Uthi: “Lanxa kuyabe kulabafowethu labodadewethu abanengi kakhulu, izikhathi ezinengi bayabe behlezi lezimuli zabo. Ngiba lesizungu nxa ngikubona lokhu.” Abanye bathwala nzima ukungena umhlangano wesiqinti kumbe owesabelo owokuqala ngemva kokufelwa ngomkabo. Ukhona yini omaziyo ophakathi kwezimo ezinje? Ungamnxusa ukuthi azohlala lawe lemuli yangakini emhlanganweni omkhulu olandelayo.

18. Singakusebenzisa njani lokhu okutshiwo ku-2 Khorinte 6:11-13?

 ¹⁸ Zinike isikhathi sokuba labanye. Zama ukuzinika isikhathi sokuba labafowethu labodadewethu abatshiyeneyo ikakhulu labo abalesizungu. Kumele ‘sizivule ngokupheleleyo izinhliziyo zethu’ ikakhulu kwabalesizungu. (Bala u-2 Khorinte 6:11-13.) UMelissa esike sakhuluma ngaye uthi: “Sasithokoza nxa abafowethu labodadewethu besibiza ukuthi sizokwejisa labo kumbe ukuthi sivakatshe labo.” Ukhona yini ebandleni ongazinika isikhathi sokuba laye?

19. Kunini lapho abafowethu labodadewethu abangaludinga khona kakhulu uncedo lwethu?

¹⁹ Kulezikhathi lapho abafowethu labodadewethu abangathokoza khona kakhulu nxa singaba labo. Abanye bangathwala nzima ukuba lezihlobo zabo ezingayisibo oFakazi nxa zinanza imikhosi yenkolo yamanga kumbe eyesizwe. Abanye bona bangadana kakhulu ngamalanga athile, ngokwesibonelo, ngelanga abafelwa ngalo yisihlobo kumbe ngumngane oseduze. Nxa sizinika isikhathi sokuba labafowethu labodadewethu abaphakathi kobunzima obunje siyabe sitshengisa ukuthi ‘silendaba labo ngenhliziyo yonke.’—Flp. 2:20.

20. Amazwi kaJesu akuMathewu 12:48-50 angasinceda njani nxa silesizungu?

²⁰ Zinengi izinto ezingabangela ukuthi umKhristu abe lesizungu. Kodwa akumelanga sikhohlwe ukuthi uJehova uyazi mhlophe indlela esizizwa ngayo futhi izikhathi ezinengi usincedisa esebenzisa abafowethu labodadewethu. (Bala uMathewu 12:48-50.) Kumele sitshengise ukuthi siyambonga uJehova ngabafowethu labodadewethu laba ngokwenza konke okusemandleni ethu ukuthi sibasekele. Kungelani lokuthi sizizwa njani kumele sikhumbule ukuthi kasisodwa, uJehova uhlala elathi.