1. Kuyini okujayele ukunanzelelwa ngabantu abanengi nxa bebuya emihlanganweni yethu okokuqala? (Khangela lomfanekiso.)

 AKUBABONE ngelihlo lengqondo abantu abasanda kutshada befika okokuqala eWolu yoMbuso yaboFakazi BakaJehova. Basala betshe amathe nxa bebona indlela abamukelwe ngayo ngazo zombili lendlela oFakazi abathandana ngayo. Bathi sebebuyela endlini inkosikazi ibisisithi kumkayo, ‘Uyazi oFakazi bakaJehova abafanani labanye abantu, ngikukholisile ukuba labo.’

2. Kuyini okwenza abanye bekhalale ukukhonza uJehova?

² Indlela oFakazi bakaJehova abathandana ngayo iyamangalisa. Kodwa labo ngabantu abalesono. (1 Joh. 1:8) Yikho nxa siqhubeka sisibabazi abantu abasebandleni sizananzelela lezinto abaziphambanisayo. (Rom. 3:23) Kuyadanisa ukuthi abanye bacina bekhalala ukukhonza uJehova ngenxa yokuphanjaniswa ngabanye ebandleni.

3. Abafundi bakaJesu beqiniso bakhanya ngani? (UJohane 13:34, 35)

³ Ake sixoxe ngoMbhalo okusekelwe kuwo isihloko lesi. (Bala uJohane 13:34, 35.) UJesu wathi abalandeli bakhe beqiniso babezakhanya ngani? Babezakhanya ngokuba lothando. IBhayibhili alithi babezakhanya ngokungaphambanisi. Nanzelela ukuthi uJesu kazange athi: ‘Nxa lithandana lizakwazi ukuthi lingabafundi bami.’ Kodwa wathi: “Nxa lithandana abantu bonke bazakwazi ukuthi lingabafundi bami.” UJesu wakwenza kwacaca ukuthi abalandeli bakhe beqiniso ayisibo bodwa ababezabona ukuthi bayathandana kodwa labanye  abantu abangekho ebandleni kwakumele babone ukuthi abafundi bakhe bathandana ngenhliziyo yonke.

4. Kuyini abanye abangafisa ukukwazi ngamaKhristu eqiniso?

⁴ Abanye abangayisibo oFakazi bakaJehova bangabuza bathi: ‘Kungani uJesu wathi abafundi bakhe beqiniso babezakhanya ngokuthandana? UJesu watshengisa njani ukuthi wayebathanda abaphostoli bakhe? Kungenzakala yini ukuthi abantu balingisele uJesu namuhla?’ Kuhle ukuthi oFakazi bakaJehova bacabangisise ngezimpendulo zemibuzo le. Ukwenza njalo kuzasinceda ukuthi siqhubeke sithandana lanxa siyake siphambaniselane.—Efe. 5:2.

5. Atshoni amazwi kaJesu akuJohane 15:12, 13?

⁵ UJesu wathi abalandeli bakhe beqiniso babezakhanya ngothando olunjani? (Bala uJohane 15:12, 13.) Nanzelela ukuthi uJesu wabatshela wathi: “Thandanani njengoba nje lami ngilithandile.” Kutshoni lokhu? Amazwi kaJesu akuvesi 13 atshengisa ukuthi umuntu olothando lolu uze azimisele ukufela omunye akhonza laye nxa kumele enze njalo. b

6. Yiwaphi amanye amavesi aseBhayibhilini atshengisa ukuthi kuqakathekile ukuthi sibe lothando?

⁶ ILizwi likaNkulunkulu lisifundisa ukuthi uthando luqakatheke kakhulu. Nanka amanye amavesi athandwa ngabanengi akhuluma ngothando: “UNkulunkulu uluthando.” (1 Joh. 4:8) “Kumele uthande umakhelwane wakho ngendlela ozithanda ngayo.” (Mat. 22:39) “Uthando lusibekela izono ezinengi.” (1 Phet. 4:8) “Uthando alupheli.” (1 Khor. 13:8) Amavesi la kanye lamanye amanengi akwenza kucace sibili ukuthi kumele sisebenze nzima ukuthi sibe lothando lokuthi silutshengise abanye.

7. Kungani uSathane engenelisi ukunceda abantu ukuthi bathandane njalo bamanyane?

 ⁷ Abantu abanengi bayazibuza ukuthi kanti vele singayibona njani inkolo yeqiniso? Izinkolo zifundisa izinto ezitshiyeneyo lanxa zonke zisithi zifundisa iqiniso ngoNkulunkulu. USathane wenza ukuthi abantu bangakwazi ukuthi okuyikho yikuphi ngoba ubumba inkolo zamanga ezinengi. Kodwa ngeke enelise ukubumba inkolo elamaKhristu athandanayo emhlabeni wonke. UJehova nguye kuphela ongakwenza lokho ngoba uthando lweqiniso luvela kuye. Abantu abangaba lothando lolo ngabalomoya wakhe kanye lesibusiso sakhe. (1 Joh. 4:7) Yikho uJesu wathi abalandeli bakhe beqiniso yibo kuphela ababezathandana ngenhliziyo yonke.  

8-9. Abantu abanengi bathini ngothando abalubona phakathi kwaboFakazi bakaJehova?

⁸ Abanengi bayakunanzelela ukuthi yiwaphi amaKhristu eqiniso ngokubona uthando lweqiniso oluphakathi kwabo njengoba uJesu watsho. Ngokwesibonelo, omunye umfowethu okuthiwa ngu-Ian uyakhumbula umhlangano wakuqala awuhambayo owawusenzelwa enkundleni yemidlalo duze langakibo. Ezinyangeni ezazisanda kwedlula, u-Ian wayeke wahamba enkundleni leyi esiyabukela umdlalo. Uthi: “Abantu ababesemhlanganweni lo babetshiyene kakhulu labantu engangike ngababona enkundleni le. OFakazi laba babelobuntu, begqoke kuhle futhi abantwababo babelembeko.” Uphinda athi: “Okuhle kakhulu engakuthandayo yikuthi abantu laba babekhanya besuthisekile futhi belokuthula. Lokhu yikho engangikufuna empilweni yami. Angikhumbuli ngitsho leyodwa inkulumo eyakhulunywa ngalelolanga, kodwa ukuziphatha kwaboFakazi kwangithinta kakhulu.” c Siziphatha ngendlela le ngenxa yokuthi sithandana ngenhliziyo yonke. Siba lomusa kubafowethu labodadewethu futhi siyabahlonipha ngenxa yokuthi siyabathanda.

⁹ Omunye umfowethu okuthiwa nguJohn laye usitshela okwenzakalayo ngesikhathi eqalisa ukuya emihlanganweni yebandla. Uthi: ‘Engakuthandayo yikuthi wonke umuntu wayelomusa, babengani zingilosi. Uthando lwabo lwangenza ngabona ukuthi sengiyitholile inkolo yeqiniso.’ d Izibonelo lezi kanye lezinye ezinengi zitshengisa ukuthi abantu bakaJehova ngamaKhristu eqiniso sibili.

10. Kunini lapho esingathola khona ithuba lokutshengisa ukuthi siyabathanda abafowethu? (Khangela lamabala angaphansi.)

¹⁰ Njengoba sike satsho ekuqaliseni, sonke siyaphambanisa. Kwezinye izikhathi omunye ebandleni angakhuluma into esicaphulayo kumbe enze into esingayithandiyo. e (Jak. 3:2) Nxa lokho kungenzakala siyabe sesithole ithuba lokuthi sitshengise ukuthi siyamthanda umfowethu ngalokho esizakwenza kumbe esizakukhuluma. Kuyini esingakufunda kuJesu?—Joh. 13:15.

11. Kuyini okungaqondanga okwenziwa nguJakhobe loJohane? (Khangela lomfanekiso.)

¹¹ UJesu wayengakhangeleli ukuthi abafundi bakhe bangaphambanisi. Kodwa wabancedisa ngothando ukuthi balungisise lapho  ababephambanisa khona ukuze bathokozise uJehova. Ngelinye ilanga abaphostoli bakhe ababili uJakhobe loJohane bacela unina ukuthi acele uJesu ukuthi abanike izikhundla eziphezulu eMbusweni. (Mat. 20:20, 21) UJakhobe loJohane batshengisa ukuthi babeziphakamisa futhi befuna ukuba phezulu kulabanye.—Zaga. 16:18.

12. UJakhobe loJohane yibo bodwa abenza okungaqondanga yini? Chasisa.

¹² UJakhobe loJohane ayisibo bodwa ababenze into engaqondanga ngalelolanga. Khangela ukuthi abanye abaphostoli benzani: “Abalitshumi bathi bekuzwa lokhu bazicaphukela izelamani lezi ezimbili.” (Mat. 20:24) Kumele ukuthi kwathunqa uthuli uJakhobe loJohane labanye abaphostoli bephendulana. Mhlawumbe abanye babesithi: ‘Kanti lizenza obani lina licela izikhundla eziphezulu eMbusweni? Libona angani yini lodwa ebelisebenza nzima loJesu? Phela izikhundla esizitholayo kumele zifanane!’ Kungelani lokuthi babecabangani, abaphostoli laba bavumela indaba le yabenza bakhohlwa ukuthi kumele bahlale bethandana futhi belomusa komunye lomunye.

13. UJesu wenzani lapho abaphostoli bakhe bephambanisa? (UMathewu 20:25-28)

¹³ UJesu wenzani ngandaba le? Kazange abazondele njalo kazange athi ngizazidingela abanye abaphostoli abangcono abathobekileyo futhi abaphathana ngothando.  Kodwa wawabekezelela amadoda la wakhuluma lawo kuhle ngoba wayekwazi ukuthi afuna ukwenza okulungileyo. (Bala uMathewu 20:25-28.) Waqhubeka ebaphatha ngothando abaphostoli bakhe lanxa indaba le eyokuthi ngubani owayemkhulu phakathi kwabo yayilokhu ivuka.—Mak. 9:34; Luk. 22:24.

14. Abaphostoli babekhulele endaweni enjani?

¹⁴ Akuthandabuzwa ukuthi uJesu wayekhumbula ukuthi indaba le yayivele ihlupha endaweni abaphostoli laba ababekhulele kuyo. (Joh. 2:24, 25) Babekhulele endaweni lapho abakhokheli benkolo ababeqakathekisa khona izikhundla lokuba phezulu. (Mat. 23:6; bukela levidiyo ethi The Front Seats in the Synagogue eBhayibhilini lesikhiwa elokutaditsha kuMathewu 23:6.) Kanti njalo abakhokheli benkolo laba ababengamaJuda babezenza abalunge kakhulu. f (Luk. 18:9-12) Ngakho uJesu wakuzwisisa ukuthi lokhu kwakungenza ukuthi abaphostoli labo bacine becabanga njalo. (Zaga. 19:11) Wayengakhangelelanga ukuthi abafundi bakhe benze okungaphezu kwamandla abo futhi wayebabekezelela nxa bephambanisa. Wayekwazi ukuthi abaphostoli bakhe bafuna ukwenza okuhle yikho wababekezelela wabancedisa ukuthi babe ngabantu abalothando hatshi abazikhukhumezayo labathanda izikhundla.

15. Indaba kaJakhobe loJohane isifundisani?

¹⁵ Indaba kaJakhobe loJohane ingasifundisa okunengi. Kwakungaqondanga ukuthi bacele izikhundla eziphezulu eMbusweni. Kodwa labanye abaphostoli baphambanisa ngokuvumela ukuthi lokhu kuphambanise ukumanyana kwabo. Lanxa kunjalo, uJesu kazange ake ayekele ukuqhubeka esiba lomusa kubaphostoli bakhe abangu-12 njalo waqhubeka ebathanda. Kusifundisani lokho? Okuqakathekileyo ayisikho nje ukuthi umuntu wenzeni kodwa yikuthi thina senzani nxa umuntu esiphambanisile. Kuyini okungasinceda? Nxa umuntu engasizondisa nansi imibuzo esingazibuza yona: ‘Kanti yindaba okwenziwe ngumuntu lo kungicaphula kangaka? Kambe ukuthi kuveza obunye ubuntu bami okumele ngibulungisise? Umuntu lo ongicaphulileyo engabe elento emhluphayo yini? Lanxa ngikubona ukuthi umuntu lo ungiphambanisele sibili ngingatshengisa ukuthi ngiyamthanda yini ngokuyekela into yakhona idlule?’ Nxa siqhubeka sithanda abanye siyabe silokhu sitshengisa ukuthi singabalandeli bakaJesu beqiniso.

16. Kuyini okunye esingakufunda kulokho okwenziwa nguJesu?

¹⁶ Okwenziwa nguJesu kuphinde kusifundise ukuthi kumele sizame ukuzwisisa abafowethu labodadewethu. (Zaga. 20:5) UJesu wayesenelisa ukubona okusenhliziyweni kodwa thina kasenelisi. Lanxa kunjalo, singenelisa ukubekezelela abafowethu labodadewethu nxa bengasiphambanisa. (Efe. 4:1, 2; 1 Phet. 3:8) Kulula ukuthi senze njalo nxa sibazi kuhle. Ake sixoxe ngesinye isibonelo.

17. Kwamnceda njani omunye umbonisi wesiqinti ukumazi ngcono omunye umzalwane?

¹⁷ Omunye umbonisi wesiqinti owayehambela amabandla ase-East Africa ukhumbula omunye umfowethu ambona kwelinye ibandla owayekhanya angathi kalamusa. Umbonisi wesiqinti lo wamphatha njani umzalwane lo? Uthi: “Kulokuthi ngimninele khatshana, ngazinika isikhathi sokuthi  ngimazi ngcono.” Lokhu kwanceda umbonisi wesiqinti ukuthi azwisise ukuthi indlela umzalwane lo ayekhuliswe ngayo yiyo eyayimenza abe lobuntu lobo. Uqhubeka esithi: “Ngananzelela ukuthi umfowethu lo wayesebenze nzima ukuze atshintshe ubuntu bakhe abe lobuntu obuhle obabuthandwa ngabanye abantu. Sacina sesingabangane sibili.” Yikho singazimisela ukubazwisisa abafowethu labodadewethu, kuzaba lula ukuthi sibathande.   

18. Yiphi imibuzo esingazibuza yona nxa omunye esikhonza laye esiphambanisele? (IZaga 26:20)

¹⁸ Uyake uzwe kusithi ulande umfowenu kumbe udadewenu okuphambanisileyo yini? Singakakwenzi lokho, kuhle ukuthi sizibuze imibuzo enjengale: ‘Ngikwazi konke yini okuphathelane lendaba le?’ (Zaga. 18:13) ‘Kungenzeka yini ukuthi umuntu lo ubengahlosanga ukuthi angizwise ubuhlungu kumbe ukuthi angicaphule?’ (Umtshu. 7:20) ‘Mina angikaze ngikwenze yini lokho?’ (Umtshu. 7:21, 22) ‘Ngingamlanda umuntu lo ngiyabe ngibhula umlilo yini kumbe ngiyabe ngiwukhwezela?’ (Bala iZaga 26:20.) Nxa singama kancane sizibuze imibuzo le sizananzelela ukuthi nxa simthanda umfowethu singakhetha ukutshiyana layo indaba le.

19. Kuyini ozimisele ukukwenza?

¹⁹ OFakazi bakaJehova batshengisa ukuthi bangabalandeli bakaJesu beqiniso ngoba bayathandana. Nxa ngamunye wethu angaqhubeka ethanda abantu abasebandleni lanxa bephambanisa, uyabe etshengisa ukuthi ungumlandeli kaKhristu weqiniso. Nxa singaqhubeka sithandana siyabe sitshengisa abanye abantu ukuthi sikhonza uJehova ngendlela ayamukelayo futhi lokhu kuzabanceda ukuthi labo bamanyane lathi ekukhonzeni uNkulunkulu olothando. Kwangathi sonke singazimisela ukuqhubeka sithandana ngoba lokho kutshengisa ukuthi singamaKhristu eqiniso.