1-2. Kumele wenzeni ungakabhabhathizwa?

 EMINYAKENI emihlanu edlulileyo kubhabhathizwe abantu abedlula imiliyoni baba ngoFakazi bakaJehova. Abanengi babefundiswe iqiniso kusukela ‘besesezinsane’ njengoThimothi. (2 Thim. 3:​14, 15) Abanye babo bafunda ngoJehova sebekhulile njalo abanye bafunda sebegugile. Eminyakeni eyadlulayo, omunye ugogo owafundiswa iBhayibhili ngoFakazi bakaJehova wabhabhathizwa eleminyaka engu-97.

² Nxa kuyikuthi ufundiswa iBhayibhili kumbe ukhuliswa ngabazali abangoFakazi uyake ucabange ngokubhabhathizwa yini? Kuhle kakhulu nxa uyake ucabange ngakho. Kodwa kumele uqale uzinikele kuJehova ungakabhabhathizwa. Esihlokweni lesi sizabona ukuthi kutshoni ukuzinikela kuNkulunkulu. Uzabona lokuthi kungani kungamelanga wesabe ukuzinikela kuNkulunkulu lokubhabhathizwa nxa kuyikuthi usukulungele ukwenza njalo.

KUTSHONI UKUZINIKELA KUNKULUNKULU?

3. Nika izibonelo zabantu ababezinikele kuJehova.

³ EBhayibhilini umuntu owayenikelwa kuNkulunkulu wayekhethwa ukuze enze inkonzo engcwele. Abako-Israyeli babeyisizwe esasizinikele kuJehova. Kodwa kulabanye phakathi kwabo ababenikelwa kuJehova ukuze benze imisebenzi eqakathekileyo. Ngokwesibonelo, u-Aroni wayegqoka iqhiye elecence legolide elicazimulayo phambi kwayo futhi lokho ‘kwakuluphawu lokuzinikela olungcwele.’ Icence legolide leli lalitshengisa ukuthi wayephiwe umsebenzi oqakatheke  kakhulu wokuba ngumphristi omkhulu wako-Israyeli. (Levi. 8:9) AmaNaziri lawo ayezinikela kuJehova ukuze enze umsebenzi oqakathekileyo. Ibala elithi “umNaziri” lihunyutshwe lisuka kwelesiHebheru elithi nazirʹ futhi litsho “onikelweyo” kumbe “owahlukaniswe labanye.” EMthethweni kaMosi, amaNaziri ayephiwa eminye imithetho okwakumele ayilandele.—Nani. 6:​2-8.

4. (a) Nxa uzinikela kuJehova uyabe ukhetha ukwenzani? (b) Kutshoni ‘ukuzidela’? (Khangela lomfanekiso.)

⁴ Nxa uzinikela kuJehova uyabe ukhetha ukuba ngumlandeli kaKhristu futhi uyabe uthembisa uNkulunkulu ukuthi uzaqakathekisa ukwenza intando yakhe ukwedlula loba yini empilweni yakho. Kutshoni lokho? UJesu wathi: “Loba ngubani ofuna ukungilandela kazidele.” (Mat. 16:24) Ibala lesiGrikhi elihunyutshwe ngokuthi “kazidele” lingahunyutshwa langokuthi “umuntu kangaphileli ukwenza intando yakhe.” Nxa usuzinikele kuJehova akumelanga wenze loba yini ephikisana lentando yakhe. (2 Khor. 5:​14, 15) Lokhu kugoqela ukuxwaya ukwenza “imisebenzi yenyama” enjengokufeba. (Gal. 5:​19-21; 1 Khor. 6:18) Ukulalela imithetho le kuzakwenza impilo yakho ibe nzima yini? Akusoze kukuthwalise nzima nxa umthanda uJehova futhi uqiniseka ukuthi imithetho yakhe iyakunceda. (Hubo. 119:97; Isaya. 48:​17, 18) Omunye umzalwane okuthiwa nguNicholas wathi: “Imithetho kaJehova ungayibona njengemiduli yejele ekuvimbela ukuthi wenze okufunayo kumbe njengefensi evalele isilwane ukuthi singakuhlaseli.”

5. (a) Umuntu uzinikela njani kuJehova? (b) Ukuzinikela lokubhabhathizwa kutshiyene njani? (Khangela lomfanekiso.)

⁵ Uzinikela njani kuJehova? Uyakhuleka kuye umthembisa ukuthi uzakhonza yena yedwa lokuthi uzaqakathekisa ukwenza intando yakhe ukwedlula loba yini empilweni yakho. Ngamanye amazwi uyabe uthembisa  uJehova ukuthi uzaqhubeka umthanda “ngenhliziyo yakho yonke, langomphefumulo wakho wonke, langengqondo yakho yonke, langamandla akho wonke.” (Mak. 12:30) Ukuzinikela ukwenza ukhuluma loJehova uwedwa. Kodwa nxa usubhabhathizwa kuyabe kulabantu. Lokho yikho okwenza babone ukuthi usuzinikele kuJehova. Ukuzinikela yikwenza isifungo esiqakatheke kakhulu. UJehova ukhangelele ukuthi usigcine isifungo sakho futhi akuthandabuzwa ukuthi lawe uyafuna ukwenza lokho oyabe umthembise khona.—Umtshu. 5:​4, 5.

KUYINI OKWENZA UMUNTU AZINIKELE KUJEHOVA?

6. Kuyini okwenza umuntu azinikele kuJehova?

⁶ Isizatho esikhulu esenza umuntu azinikele kuJehova yikumthanda. Uthando lolu awuphonguluzwa ngaphakathi nje kodwa lusekelwe ‘olwazini oluqondileyo kanye lasekuzwisiseni okuphiwa ngumoya kaNkulunkulu.’ (Kol. 1:9) Uyabe usumthanda kakhulu uJehova ngoba uyabe usufunde okunengi ngaye futhi usumazi kuhle. Ukufunda iBhayibhili kuyabe sekukuncede wazwisisa ukuthi (1) uJehova ukhona sibili, (2) lokuthi iBhayibhili liLizwi lakhe eliphefumulelweyo (3) kanye lokuthi usebenzisa inhlanganiso yakhe ukuze enze akuhlosileyo.

7. Kuyini okumele sikwenze singakazinikeli kuNkulunkulu?

⁷ Labo abazinikela kuJehova kumele babe sebezazi imfundiso eziqakathekileyo eziseLizwini lakhe. Kumele babe sebephila belandela izimiso ezikulo njalo besenza konke okusemandleni abo ukuthi batshele abanye lokho abayabe sebekufundile. (Mat. 28:​19, 20) Bayabe sebemthanda kakhulu uJehova futhi sebekufuna ngenhliziyo yonke ukukhonza yena yedwa.  Lawe uzizwa njalo yini? Nxa usumthanda ngenhliziyo yonke uJehova awusoze uzinikele futhi ubhabhathizwe ngenxa nje yokufuna ukuthabisa abazali bakho kumbe umuntu okufundisa iBhayibhili. Kanti njalo awusoze ukwenzele ukuthi abanye abangane bakho labo sebebhabhathiziwe.

8. Ukucabangisisa ngezinto uJehova akwenzele zona kuzakufuqa ukuthi wenzeni? (IHubo 116:​12-14)

⁸ Nxa ungacabangisisa ngazo zonke izinto ezinhle uJehova akwenzele zona uzafisa ukuzinikela kuye. (Bala iHubo 116:​12-14.) IBhayibhili lithi uJehova nguye osipha “zonke izipho ezinhle lazo zonke izipho ezipheleleyo.” (Jak. 1:17) Isipho esikhulu kulazo zonke asiphe sona ngumhlatshelo weNdodana yakhe uJesu. Cabanga ngokuthi siligugu kangakanani isipho leso. Inhlawulo yiyo eyenza ukuthi wenelise ukuba ngumngane kaJehova lokuthi ube lethemba lokuphila kuze kube nini lanini. (1 Joh. 4:​9, 10, 19) Ukuzinikela kuJehova yindlela eqakatheke kakhulu yokutshengisa ukuthi uyabonga ngothando olukhulu akutshengise lona kanye langazo zonke izibusiso uJehova akuphe zona. (Dute. 16:17; 2 Khor. 5:15) Indaba le kuxoxwa ngayo lakusifundo 46 kumcijo 4 ebhukwini elithi Ungathokoza Kuze Kube Nini Lanini! Esifundweni leso kulevidiyo yemizuzu emithathu ethi Ukupha UJehova Izipho.

USUKULUNGELE YINI UKUZINIKELA LOKUBHABHATHIZWA?

9. Kungani kungamelanga umuntu abone angathi usesalele nxa engakazinikeli?

⁹ Kungenzakala ukuthi ubona angani awukakulungeli ukuthi uzinikele futhi ubhabhathizwe. Mhlawumbe kukhona okusamele ukulungisise ukuze ulandele zonke izimiso zikaNkulunkulu kumbe usadinga isikhathi esinengi ukuze uqinise ukholo lwakho. (Kol. 2:​6, 7) Abantu abafundiswa iBhayibhili abathuthuki ngendlela efananayo njalo akulaminyaka ebekiweyo yokuthi abantwana bangayifikisa kumele babhabhathizwe. Zama ukubona ukuthi kungaphi lapho okumele uthuthukise khona ubususenza owenelisa ukukwenza njalo ungaziqathanisi lomunye umuntu.—Gal. 6:​4, 5.

10. Kumele wenzeni nxa ungananzelela ukuthi awukakulungeli ukuzinikela lokubhabhathizwa? (Khangela lebhokisi elithi “ Okunganceda Abantwana Abalabazali AbangoFakazi.”)

¹⁰ Lanxa ungananzelela ukuthi awukakulungeli ukuzinikela kuJehova qhubeka ucabangisisa ngakho. Thandaza kuye umcele ukuthi akuncede ulungisise lapho okumele ulungise khona. (Flp. 2:13; 3:16) Qiniseka ukuthi uzawuzwa umkhuleko wakho futhi uzakuncedisa.—1 Joh. 5:14.

KUYINI OKWENZA ABANYE BATHIKAZE?

11. UJehova uzasincedisa njani ukuthi sihlale sithembekile kuye?

¹¹ Abanye bayathikaza ukuzinikela lokubhabhathizwa lanxa bayabe sebekulungele. Bangabe besesaba ukuthi mhlawumbe ngemva kokubhabhathizwa bangenza isono esikhulu bacine sebesuswa. Nxa lawe usesaba qiniseka ukuthi uJehova uzakunika konke okuzakunceda ukuthi uqhubeke ‘uziphatha ngendlela efaneleyo phambi [kwakhe] ukuze umthokozise kukho konke.’ (Kol. 1:10) Uzakunika lamandla okuthi wenze okulungileyo. Kasoze ayekele ukukuncedisa ngoba banengi asebancedisile ukuthi bakwenze lokhu. (1 Khor. 10:13) Yikho bebalutshwana kakhulu abasuswayo ebandleni lobuKhristu. UJehova uyabancedisa sibili abantu bakhe ukuthi bahlale bethembekile.

12. Kuyini okuzakunceda ukuthi ubalekele ukwenza isono esikhulu?

¹² Sonke siyake silingeke ukwenza okubi ngoba sizelwe silesono. (Jak. 1:14) Lanxa  kunjalo uyazikhethela ukuthi uzakwenzani nxa ulingwa. Iqiniso elikhona yikuthi nguwe ozikhethelayo ukuthi uzakwenzani ngempilo yakho. Abanye abantu bathi ngeke senelise ukuphikisana lemizwa yethu kodwa lokhu kungamanga. Ungenelisa ukufunda ukuzibamba. Lanxa kwezinye izikhathi ungaba lezifiso ezimbi, ungakhetha ukungazilandeli. Ukukhuleka nsuku zonke kuzakunceda ukuthi unganqotshwa yisilingo. Woba lohlelo lokubala iLizwi likaNkulunkulu njalo ululandele. Zama ukuyingena yonke imihlangano yebandla. Tshela abanye lokho okukholwayo. Ukwenza izinto lezi kuzakunceda ukuthi uhlale uthembekile kuJehova futhi ugcine isifungo owasenza ngesikhathi uzinikela kuye. Kanti njalo ungakhohlwa lokuthi uzakuncedisa.—Gal. 5:16.

13. Ufundani kuJosefa?

¹³ Ukucabanga ngokuthi uzakwenzani nxa ungehlelwa yisilingo kuzakunceda ukuthi uhlale uthembekile kuJehova. EBhayibhilini kulabanengi okumele ukuthi bakwenza lokhu lanxa labo babelesono. Ngokwesibonelo, umkaPhothifa wayehlala encenga uJosefa ukuthi alale laye kodwa uJosefa kazange atshone ethikaza ezibuza ukuthi kumele enzeni. IBhayibhili lithi “wala” wasesithi: “Ngingayenzelani into embi kangaka, ngonele uNkulunkulu?” (Gen. 39:​8-10) Kuyacaca ukuthi uJosefa wayekwazi ayezakwenza engakalingwa ngumkaPhothifa, yikho kwaba lula ukuthi enze okulungileyo ngesikhathi eselingwa.

14. Kuyini okuzasinceda senelise ukunqoba isilingo?

¹⁴ Ungamlingisela njani uJosefa ukuze lawe uhlale uthembekile nxa ulingwa? Cabanga khathesi ukuthi uzakwenzani nxa usulingwa. Zijayeze ukwala masinyane ukwenza izinto ezizondwa nguJehova futhi ungacabangi langazo. (Hubo. 97:10; 119:165) Nxa ungenza njalo kawusoze wenze isono nxa usulingwa njengoba uyabe uvele ukwazi okumele ukwenze.

15. Ungatshengisa njani ukuthi ‘umdinga ngeqiniso’ uJehova? (UHebheru 11:6)

¹⁵ Kungenzakala ukuthi kulokunye okukubambayo ukuthi uzinikele kuJehova njalo ubhabhathizwe lanxa usulitholile iqiniso futhi ufisa ukumkhonza ngenhliziyo yonke. Ungalingisela iNkosi uDavida uncenge uJehova usithi: “Ngihlola awu Nkulunkulu uyazi inhliziyo yami. Ngihlola ukuze uyazi imicabango yami engikhathazayo. Ngikhangela ubone ukuthi kukhona yini kimi okungenza ngihambe  endleleni embi, ungikhokhele endleleni ezahlala kuze kube phakade.” (Hubo. 139:​23, 24) UJehova uyababusisa labo “abamdinga ngeqiniso.” Nxa usenza konke okusemandleni akho ukuthi ukulungele ukuzinikela kuJehova lokubhabhathizwa uyabe umtshengisa ukuthi umdinga ngenhliziyo yonke.—Bala uHebheru 11:6.

QHUBEKA USONDELA KUJEHOVA

16-17. UJehova ubadonsa njani labo abalabazali abangoFakazi? (UJohane 6:44)

¹⁶ UJesu wathi abantu ababa ngabafundi bakhe bayabe bedonswa nguJehova. (Bala uJohane 6:44.) Uzwa njani ngalokho? Kuyamangalisa sibili ngoba kutsho ukuthi uJehova ubona okuhle emuntwini ngamunye amdonsela kuye. Ubona umuntu ngamunye ‘eyimpahla yakhe eqakathekileyo’ kumbe ‘eyinotho yakhe eligugu.’ (Dute. 7:6; amabala angaphansi.) Lawe uligugu kakhulu kuye.

¹⁷ Nxa ungosakhulayo olabazali abangoFakazi bakaJehova kulula ukuthi ubone angathi ukhonza uJehova ngenxa nje yokuthi abazali bakho bayakhonza hatshi ngenxa yokuthi yena ukudonsele kuye. Lanxa uzibona njalo, iBhayibhili lithi: “Sondelani kuNkulunkulu laye uzasondela kini.” (Jak. 4:8; 1 Imilan. 28:9) Nxa wena ungaqalisa ukusondela kuJehova laye uzasondela kuwe. UJehova kasidonsi siliqembu kodwa udonsa umuntu munye ngamunye. Lalabo abakhuliswe ngabazali abangoFakazi ubadonsa njalo. Nxa umuntu okhuliswe ngabazali abangoFakazi esenza konke okusemandleni akhe ukuze asondele kuJehova, uJehova laye uyasondela kuye njengoba kutshiwo kuJakhobe 4:8.—Khangela lo-2 Thesalonika 2:13.

18. Sizaxoxa ngani esihlokweni esilandelayo? (IHubo 40:8)

¹⁸ Nxa ungazinikela kuJehova ubusubhabhathizwa uyabe ulingisela uJesu. Wazinikela kuYise ukuze enze loba yini uYise ayeyifuna. (Bala iHubo 40:8; Heb. 10:7) Esihlokweni esilandelayo sizaxoxa ngokuthi kuyini okuzakunceda ukuthi uqhubeke ukhonza uJehova uthembekile ngemva kokubhabhathizwa kwakho.