1-2. Nika izibonelo ezingenza sicine siqakathekisa amanye amavesi.

 NGELANGA labo lomtshado, ijaha lentombi bayalalelisisa nxa umdala webandla ekhuluma inkulumo yomtshado. Amavesi abalwa lapho bawajayele kodwa kusukela mhlalokho kuyabe sekumele bawaqakathekise kakhulu ngenxa yokuthi ayabe esesebenza kubo.

² Lalabo abasanda kuba ngabazali bangabe bezwa inkulumo ezinengi ezikhuluma ngokukhulisa abantwana kodwa khathesi sekumele bakuqakathekise kakhulu okwakhulunywa enkulumeni lezo njengoba labo sebelowabo umntwana. Sekumele basebenze nzima. Yikho nxa izimo zitshintsha sicina siyiqakathekisa kakhulu eminye imibhalo. Lokhu ngokunye okwenza inceku zikaJehova zibale iBhayibhili “zonke izinsuku” zokuphila kwazo njengalokho amakhosi ako-Israyeli atshelwa ukuthi akwenze njalo zicabangisise ngezikubalayo.—Dute. 17:19.

3. Sizaxoxa ngani esihlokweni lesi?

³ Bazali lilesibusiso esikhulu sokufundisa abantwabenu ngoJehova. Kodwa akumelanga liphongubafundisa ngaye. Kumele libancedise lokuthi bamthande ngenhliziyo yonke. Lingakwenza njani lokho? Esihlokweni lesi sizaxoxa ngezinto ezine ezingalinceda. (2 Tim. 3:16) Sizaphinda sibone ukuthi ukusebenzisa okutshiwo liBhayibhili kubancede njani abanye abazali.

4. Kuyini okungenziwa ngabazali ukuze bancedise abantwababo bathande uJehova? (UJakhobe 1:5)

⁴ Okokuqala: Cela uJehova akuncedise. Mcele akunike ukuhlakanipha ukuze uncedise abantwabakho bamthande. (Bala uJakhobe 1:5.) Akula ongakucebisa njengaye futhi kulezizatho ezinengi ezenza sitsho njalo. Nanzi ezimbili: Esokuqala, uJehova uselesikhathi eside engumzali. (Hubo. 36:9) Esesibili, amacebo asinika wona ahlala esinceda.—Isaya. 48:17.

5. (a) Inhlanganiso kaJehova ibanceda njani abazali? (b) Ufundeni kumfowethu lodade Amorim abakuvidiyo?

⁵ UJehova usebenzisa iLizwi lakhe lenhlanganiso yakhe ukuthi ancedise abazali bafundise abantwababo ukuthi bamthande. (Mat. 24:45) Ngokwesibonelo ungathola amacebo ancedayo ezihlokweni ezithi “Okunceda Imuli” ezazihlala ziphuma ku-Vukani! khathesi eseziphuma kuwebhusayithi yethu i-jw.org. Kanti njalo kuwebhusayithi le kulamavidiyo amanengi anganceda abazali ukuthi basebenzise amacebo abawaphiwa nguJehova nxa bekhulisa abantwababo. *—Zaga. 2:4-6.

6. UJoe lomkakhe bathini ngalokho abakuphiwa yinhlanganiso kaJehova?

⁶ Abazali abanengi bathi bayabonga ngendlela uJehova abancedisa ngayo esebenzisa inhlanganiso yakhe. Umzali okuthiwa nguJoe uthi: “Ukufundisa abantwana abathathu ukuthi bakhule bemthanda uJehova akulula. Mina lomkami sihlala sithandaza simcela ukuthi asincedise. Kanti njalo kukanengi kusiba lesihloko kumbe ividiyo ephuma ngesikhathi sidinga ukuncediswa ngento ethile. Sihlala sithemba uJehova ukuthi asincedise.” UJoe lomkakhe sebenanzelele ukuthi izihloko lezi lamavidiyo kunceda abantwababo basondele kuJehova.

7. Kungani kumele abazali bazame sibili ukuba yisibonelo esihle ebantwaneni babo? (KwabaseRoma 2:21)

⁷ Okwesibili: Bafundise ngalokho okwenzayo. Abantwana bayakunanzelela  okwenziwa ngabazali babo njalo bajayele ukubalingisela. Akulamzali ongelasono. (Rom. 3:23) Lanxa kunjalo abazali kumele bazame sibili ukuba yisibonelo esihle ebantwaneni babo. (Bala uRoma 2:21.) Omunye umzali wathi ekhuluma ngabantwana wathi: “Banjengesipontshi esimunya yonke into.” Uqhubeka esithi: “Bayasitshela nxa singasakwenzi esibafundisa khona.” Yikho nxa sifuna abantwabethu bamthande uJehova, lathi kumele simthande futhi izenzo zethu zitshengise ukuthi siyamthanda.

8-9. Ufundeni kulokho okwatshiwo ngu-Andrew lo-Emma?

⁸ Kunengi okungenziwa ngabazali ukuze bafundise abantwababo ukuthi bathande uJehova. U-Andrew oleminyaka engu-17 uthi: “Abazali bami babehlala bengifundisa ukuthi kuqakathekile ukuthandaza. Nsuku zonke ebusuku ubaba wayethandaza lami lanxa ngangiyabe sengithandazile ngingedwa. Abazali bami babehlala besikhumbuza ukuthi singakhuluma loJehova loba kangaki ngelanga. Lokhu kwenza ngiqakathekise ukuthandaza njalo ngikhululeke ukukhuluma loJehova futhi ngimbone enguBaba ongithandayo.” Bazali hlalani likhumbula ukuthi nxa limthanda uJehova lizanceda abantwabenu ukuthi labo bamthande.

⁹ Ake sixoxe ngo-Emma. Uyise wabatshiya bodwa njalo wayelezikwelede ezesabekayo okwasekumele unina asale ezibhadala. U-Emma uthi: “Izikhathi ezinengi umama wayethwala nzima endabeni zemali kodwa wayehlala ekhuluma ngendlela uJehova anakekela ngayo izinceku zakhe. Ngangibona ngalokho ayekwenza ukuthi wayekukholwa sibili lokho. Umama wayekwenza ayengifundisa khona.” Sifundani? Abazali bangenelisa ukufundisa abantwababo ngalokho abakwenzayo lanxa izimo zinzima.—Gal. 6:9.

10. Abazali abangama-Israyeli babengaxoxa nini labantwababo? (UDutheronomi 6:6, 7)

¹⁰ Okwesithathu: Hlala uxoxa labantwabakho. UJehova walaya ama-Israyeli ukuthi ahlale efundisa abantwabawo ngaye. (Bala uDutheronomi 6:6, 7.) Abazali labo babetshona labantwababo yikho babelamathuba amanengi okuxoxa labo lokubafundisa ukuthi bathande uJehova. Ngokwesibonelo, umfana ongum-Israyeli wayengaqeda isikhathi esinengi encedisa uyise ukuhlanyela loba ukuvuna emasimini. Udadewabo yena wayengaqeda isikhathi esinengi encedisa unina ukuthunga lokweluka lokwenza eminye imisebenzi yangekhaya. Abazali labantwana babengaxoxa ngezinto ezinengi eziqakathekileyo ngesikhathi besebenza bonke. Ngokwesibonelo babengaxoxa ngobuhle bukaJehova langendlela ayebancedisa ngayo.

11. Abazali bangaxoxa nini labantwababo?

¹¹ Izikhathi sezitshintshile. Emazweni amanengi abazali labantwana abasatshoni bonke. Abazali bengabe besemsebenzini, abantwana bona besesikolo. Yikho abazali kumele bazame ukudinga isikhathi sokuxoxa labantwababo. (Efe. 5:15, 16; Flp. 1:10) Esinye isikhathi abangasisebenzisa ngesokukhonza kwemuli. Umfowethu osesemutsha okuthiwa ngu-Alexander uthi: “Ubaba uba leqiniso lokuthi siba lokukhonza kwemuli maviki wonke njalo kavumeli loba yini isiphambanise  sicine singafundanga. Nxa sesiqedile siyazixoxela nje.”

12. Inhloko yemuli ingenzani ukuze ukukhonza kwemuli kube mnandi?

¹² Nxa uyinhloko yemuli ungenzani ukuze abantwabakho bakukholise ukukhonza kwemuli? Ungafunda labo usebenzisa ibhuku elitsha elithi Ungathokoza Kuze Kube Nini Lanini! Ibhuku leli lenza kube lula ukuthi libe lengxoxo ezimnandi. Inhloso yakho ngeyokuthi abantwabakho bakutshele abakucabangayo lendlela abazizwa ngayo, yikho ungasebenzisi isikhathi lesi ukubasola kumbe ukubakhuza. Kanti njalo zama ukungazondi nxa besitsho izinto eziphikisana lalokho okutshiwo liBhayibhili. Bonga ukuthi bakutshele yona kanye indlela abazizwa ngayo njalo yenza kube lula ukuthi baqhubeke bekwenza lokho. Kuba lula ukuthi ubancedise abantwabakho nxa ukwazi ukuthi bazizwa njani.

13. Yiwaphi amanye amathuba abazali abalawo okuncedisa abantwababo ukuthi basondele kuJehova?

¹³ Bazali dingani amathuba okuncedisa abantwabenu ukuthi basondele kuJehova. Akumelanga lilinde kuze kube yisikhathi sokufunda iBhayibhili ukuze libafundise ngoNkulunkulu wethu osithandayo. Umzali okuthiwa nguLisa uthi: “Sasixoxa ngezinto ezidaliweyo ukuze sifundise abantwabethu ngoJehova. Ngokwesibonelo kwakusithi nxa inja yethu ingenza izinto ezibahlekisayo sibatshele ukuthi lokhu kwakutshengisa ukuthi uJehova nguNkulunkulu othokozayo ofuna lathi sithokoze njalo sihleke.”

14. Kungani kuqakathekile ukuthi abazali bancedise abantwababo ukuthi bakhethe kuhle abangane? (IZaga 13:20)

¹⁴ Okwesine: Ncedisa abantwabakho ukuthi bakhethe kuhle abangane. ILizwi likaNkulunkulu lenza kucace ukuthi abangane bethu bangasinceda kumbe basilimaze. (Bala iZaga 13:20.) Bazali liyabazi yini abangane babantwabenu? Selake lababona njalo lenza okuthile lilabo? Lingenzani ukuze lincede abantwabenu bakhethe abangane abamthandayo uJehova? (1 Khor. 15:33)  Linganxusa abafowethu labodadewethu abaqinileyo ekukhonzeni ukuthi benze ezinye izinto lemuli yenu ukuze lincede abantwabenu bathole abangane abahle.—Hubo. 119:63.

15. Abazali bangenzani ukuze bancede abantwababo babe labangane abahle?

¹⁵ Umzali okuthiwa nguTony uyasitshela lokho yena lomkakhe ababekwenza ukuze bancede abantwababo bakhethe abangane abahle. Uthi: “Okweminyaka eminengi mina lomkami besinxusa abafowethu labodadewethu abadala labancane emzini wethu ukuthi bazokudla lathi njalo babe khona ekukhonzeni kwethu kwemuli. Le yindlela enhle kakhulu yokwazi labo abathanda uJehova njalo abamkhonza bethokoza. Sibe lesibusiso sokuhlala lababonisi besiqinti labanali kanye labanye. Lokho abasixoxela khona lentshiseko yabo kanye lokuzinikela kwabo kwanceda abantwabethu ukuthi basondele kuJehova.” Bazali, yenzani konke elingakwenza ukuthi lincede abantwabenu babe labangane abahle.

16. Kuyini okungamelanga ukwenze nxa umntanakho angathi kafuni ukukhonza uJehova?

¹⁶ Ake sithi umntanakho athi kafuni ukukhonza uJehova lanxa wenze konke ongakwenza ukuthi umfundise ngaye. Ungazitsheli ukuthi wehlulekile. Sonke siphiwe inkululeko yokuzikhethela ukuthi sizamkhonza yini uNkulunkulu loba hatshi. Yikho nxa umntanakho ekhetha ukutshiya uJehova ungalahli ithemba lokuthi ngelinye ilanga uzaphenduka. Khumbula umzekeliso kaJesu wendodana yolahleko. (Luk. 15:11-19, 22-24) Indodana le yenza izinto ezinengi ezimbi kodwa yacina iphendukile. Abanye bangathi, “Phela lo ngumzekeliso, kambe ukuthi lokho kungenzakala?” Ye kungenzakala sibili futhi yikho kanye okwenzakala kumzalwane okuthiwa ngu-Elie.

17. Ufundani kulokho okwenzakala ku-Elie?

¹⁷ U-Elie usitshela ngalokho okwenziwa ngabazali bakhe. Uthi: “Benza konke abangakwenza ukuthi bangincedise  ngithande uJehova kanye leLizwi lakhe iBhayibhili. Kodwa ngathi sengileminyaka engu-15 ngaqalisa ukuba lihlongandlebe.” U-Elie waqalisa ukwenza izinto ezimbi efihla. Abazali bakhe bazama ukumncedisa ukuthi angatshiyi uJehova kodwa kazange alalele. Wathi esesukile ngekhaya waqalisa ukuziphatha butshapha. Lanxa kunjalo, ngezinye izikhathi wayexoxela umngane wakhe lokho okutshiwo liBhayibhili. U-Elie uthi: “Ukuqhubeka ngixoxela umngane wami ngoJehova kwakusenza lami ngicabange ngaye. Kancane kancane inhlanyelo yeqiniso abazali bami ababesebenze nzima ukuthi bayihlanyele yaqalisa ukumila enhliziyweni.” Ngokuhamba kwesikhathi u-Elie wabuyela kuJehova. * Kumele ukuthi abazali bakhe bathokoza sibili ngokuthi benza konke abangakwenza ukuthi bamfundise ukuthanda uJehova kusukela esesemncane.—2 Tim. 3:14, 15.

18. Uzwa njani ngabazali abasebenza nzima befundisa abantwababo ukuthi bathande uJehova?

¹⁸ Bazali lilesibusiso esimangalisayo sokukhulisa abantwabenu ukuthi babe zinceku zikaJehova zesikhathi esizayo. (Hubo. 78:4-6) Lo awusimsebenzi omncane futhi siyalincoma ngakho konke elikwenzayo ukuthi lincedise abantwabenu. Nxa lingaqhubeka lisebenza nzima ukuthi libancedise bathande uJehova njalo libafundise ukuthi bamlalele, uBaba wethu osithandayo uzathokoza.—Efe. 6:4.