1. UJesu wenza siphi isithembiso kuMathewu 11:28-30?

UJESU wathembisa ixuku elalimlalele wathi: ‘Wozani kimi, ngizaliphumuza.’ (Bala uMathewu 11:28-30.) Lesi kwakungayisiso sithembiso samanga. Ngokwesibonelo, cabanga ngalokho akwenzela owesifazana owayelomkhuhlane owawusumhlukuluze kakhulu.

2. Kuyini uJesu akwenzayo kowesifazana owayegula?

² Owesifazana lo wayeludinga sibili uncedo. Wayesehambe kubodokotela abanengi elethemba lokuthi uzakwelatshwa. Kodwa kwadlula iminyaka engu-12 elokhu ehlupheka. UMthetho uJehova awunika uMosi wawusithi umuntu owayelomkhuhlane owesifazana lo ayelawo ungcolile. (Levi. 15:25) Owesifazana wathi esizwa ukuthi uJesu uyenelisa ukwelapha abagulayo wasuka wayamdinga. Uthe esemtholile wathinta umphetho wesembatho sakhe sangaphandle wahle wasila. UJesu kamelaphanga kuphela kodwa waphinda wamenza waba lesithunzi. Ngokwesibonelo, wathi ekhuluma laye watshengisa ukuthi uyamthanda ngokumbiza ngokuthi “ndodakazi.” Kumele ukuthi lokhu kwamvuselela futhi kwamqinisa owesifazana lo.​—Luk. 8:43-48.

3. Sizaphendula yiphi imibuzo?

³ Unanzelele yini ukuthi owesifazana lo nguye owaya kuJesu? Lathi lamuhla kumele siye kuJesu. Khathesi uJesu kabelaphi ngendlela eyisimangaliso labo abaya kuye. Kodwa ulokhu esinxusa esithi: ‘Wozani kimi, ngizaliphumuza.’ Esihlokweni lesi sizaphendula imibuzo elandelayo: Kumele senzeni ukuze siye kuJesu? UJesu wayesitshoni ngesikhathi esithi: “Thwalani ijogwe lami”? Sifundani kuye? Kungani umsebenzi asinike wona usivuselela? Singenzani ukuze siqhubeke sivuselelwa lijogwe lakhe?

4-5. Yiziphi ezinye indlela esiya ngazo kuJesu?

⁴ Enye indlela esiya ngayo kuJesu yikufunda okunengi ngalokho ayekutsho layekwenza. (Luk. 1:1-4) Akulamuntu ongasenzela lokhu. Kungumlandu wethu ukuthi sitaditshe lokho iBhayibhili elikutshoyo ngaye. Okunye esingakwenza ukuze siye kuJesu yikubhabhathizwa sibe ngabafundi bakhe.

⁵ Enye indlela esiya ngayo kuJesu yikucela ukuncediswa ngabadala bebandla. UJesu usebenzisa ‘izipho lezi ezingabantu’ ukuthi anakekele izimvu zakhe. (Efe. 4:7, 8, 11; Joh. 21:16; 1 Phet. 5:1-3) Yithi okumele siyedinga uncedo ebadaleni ngoba bona abenelisi ukubona esikucabangayo ukuze bazi esikudingayo. Umzalwane okuthiwa nguJulian uthi: “Ngasuka eBhetheli ngenxa yokugula yikho omunye umngane wami wangicebisa ukuthi ngicele abadala ukuthi bazengikhuthaza. Ekuqaliseni ngangibona angani angiludingi uncedo lwabo kodwa ngemva kwesikhathi ngacela ukuthi bangivakatshele. Lokhu kwaba yisipho esiligugu kimi.” Abadala abathembekileyo abanjengalaba ababili abavakatshela uJulian bangasinceda ukuthi siyazi “ingqondo kaKhristu,” okutsho ukuzwisisa lokulingisela indlela ayecabanga ngayo. (1 Khor. 2:16; 1 Phet. 2:21) Nxa besincedisa ngalindlela bayabe besinika isipho esiligugu sibili.

6. UJesu wayesitshoni lapho esithi: “Thwalani ijogwe lami”?

⁶ Lapho uJesu esithi: “Thwalani ijogwe lami,” wayengabe esitsho ukuthi “Vumani ukuthi ngilikhokhele.” Kanti njalo wayengabe esitsho ukuthi, “Asithwalisaneni ijogwe, sisebenzele uJehova ndawonye.” Kuyakhanya-ke ukuthi ukuthwala ijogwe * kutshengisa ukuthi kumele sisebenzele iNkosi yethu.

7. Yiwuphi umsebenzi esiwuphiweyo okukhulunywa ngawo kuMathewu 28:18-20 njalo kuyini esileqiniso lakho?

⁷ Nxa sizinikela kuJehova futhi sibhabhathizwa siyabe sivuma ukunxuswa nguJesu. UJesu unxusa bonke abantu ukuthi baze kuye njalo kasoze abaxotshe labo abafuna ukukhonza uNkulunkulu ngeqiniso. (Joh. 6:37, 38) Bonke abalandeli bakaKhristu baphiwe umsebenzi uJehova athume uJesu ukuthi awuqondise njalo kuyisibusiso ukuwenza. Sileqiniso lokuthi uJesu uzahlala elathi ukuze asincedise emsebenzini lo.​—Bala uMathewu 28:18-20.

8-9. Kungani abantu abathobekileyo babekuthanda ukuba loJesu futhi yiphi imibuzo okumele sizibuze yona?

⁸ Abantu abathobekileyo babekuthanda ukuba loJesu. (Mat. 19:13, 14; Luk. 7:37, 38) Kungani babekuthanda? Cabanga ngomehluko owawukhona phakathi kukaJesu labaFarisi. Abakhokheli benkolo laba babengelathando futhi bezikhukhumeza. (Mat. 12:9-14) Kodwa uJesu wayelothando futhi ethobekile. AbaFarisi babethanda ukuba ngabadumileyo emphakathini njalo babezigqaja ngezikhundla ababelazo. UJesu watshela abafundi bakhe ukuthi kwakungamelanga babe njalo. Wabafundisa ukuthi bathobeke lokuthi bazibone bezinceku. (Mat. 23:2, 6-11) AbaFarisi babewasebenzisa kubi amandla abo futhi lokhu kwakusenza abantu babalalele ngoba  besesaba lokho okwakuzabehlela nxa bengalaleli. (Joh. 9:13, 22) UJesu waphumuza abanye ngokubatshengisa uthando langokukhuluma labo ngomusa.

⁹ Wena uyamlingisela yini uJesu? Zibuze: ‘Ngaziwa ngingumuntu omnene lothobekileyo yini? Ngiyazimisela yini ukwenzela abanye imisebenzi ekhangelelwa phansi? Ngilomusa yini?’

12-14. Kungani umsebenzi uJesu asinike wona usivuselela?

¹² Kungani umsebenzi uJesu asinike wona usivuselela? Zona zinengi sibili izizatho, kodwa sizaxoxa ngezilutshwana.

¹³ Silabakhokheli abahle kakhulu. UJehova uMkhokheli wethu omkhulu kalasihluku futhi uyawuqakathekisa umsebenzi owenziwa yizinceku zakhe. (Heb. 6:10) Uyasinika amandla esiwadingayo ukuze sithwale umlandu wethu. (2 Khor. 4:7; Gal. 6:5, amabala angaphansi) INkosi yethu uJesu yasitshiyela isibonelo esihle sendlela okumele siphathe ngayo abanye. (Joh. 13:15) Kanti njalo abadala bebandla abaselusayo bayazama ukulingisela uJesu ‘umelusi omkhulu.’ (Heb. 13:20; 1 Phet. 5:2) Benza konke okusemandleni abo ukuthi babe lomusa, basikhuthaze njalo babe lesibindi sokusinakekela lokusivikela.

¹⁴ Silabangane abahle kakhulu. Akulamuntu olabangane abalothando njengalabo esilabo kumbe olomsebenzi osuthisa njengowethu. Ngokwesibonelo, sisebenza labafowethu labodadewethu abaziphethe kuhle kodwa abangaziboni bengcono kulabanye. Baleziphiwo kodwa kabazikhukhumezi futhi babona abanye bengcono kulabo. Kabasiboni singabantu abasebenza labo kuphela kodwa baphinda basibone singabangane babo. Kanti njalo basithanda okokuthi bazimisele ukusifela!

15. Kumele sizwe njani ngomsebenzi esiwenzayo?

¹⁵ Silomsebenzi omuhle kakhulu. Sifundisa abantu iqiniso ngoJehova njalo sichaye egcekeni amanga akhulunywa nguDeveli. (Joh. 8:44) USathane ucindezela abantu ngamanga abenza basale bengelathemba. Ngokwesibonelo, ufuna sicabange ukuthi uJehova ngeke asithethelele lokuthi ngeke asithande. La ngamanga amabi kakhulu aqeda abantu amandla. Nxa singaya kuKhristu izono zethu ziyathethelelwa. Kanti njalo iqiniso yikuthi uJehova uyasithanda kakhulu sonke. (Rom. 8:32, 38, 39)  Kuyathokozisa kakhulu ukuncedisa abantu ukuthi bafunde ukuthemba uJehova lokubabona bentshintsha indlela akade bephila ngayo.

16. Umthwalo uJesu athi siwuthwale utshiyene njani leminye?

¹⁶ Umthwalo uJesu athi siwuthwale utshiyene leminye imithwalo. Ngokwesibonelo, abanengi nxa betshayisa emisebenzini yokuziphilisa bayabe bedinwe befile futhi bengathokozi. Kodwa nxa sitshone sisebenzela uJehova loKhristu sizwa sisuthisekile sibili. Singabe sidiniwe sivela emsebenzini wokuziphilisa njalo sekumele sizibambe ngamandla ukuthi siye emihlanganweni yebandla eyenziwa ntambama. Kodwa izikhathi ezinengi nxa sesivela khona siyabe sesivuselelwe futhi sesiqinisiwe. Lokhu kuyenzakala lalapho sisenza konke okusemandleni ethu ukuthi siye ekutshumayeleni njalo sitaditshe iBhayibhili.

17. Kuyini okumele sikukhumbule njalo kufanele sinanzeleleni?

¹⁷ Kumele sikhumbule ukuthi kulalapho amandla ethu aphelela khona. Yikho kumele sinanzelele esikhetha ukukwenza. Ngokwesibonelo, siyabe sidlalisa amandla ethu nxa sizama ukubuthelela inotho. Nanzelela ukuthi uJesu waliphendula njani ijaha elalinothile elambuza lathi: “Kumele ngenzeni ukuze ngizuze ilifa lokuphila okungapheliyo?” Ijaha leli laselivele liwulandela uMthetho. Kumele ukuthi lalisenza kuhle ngoba iVangeli likaMakho lithi uJesu ‘walithanda.’ UJesu walitshela wathi: ‘Hamba uyethengisa zonke izinto olazo. Ngemva kwalokho usungabuya uzokuba ngumlandeli wami.’ Ijaha leli lalikufuna sibili ukulandela uJesu kodwa kwakunzima ukuthi litshiyane ‘lempahla yalo enengi.’ (Mak. 10:17-22) Yikho lacina liyalile ukuthwala ijogwe likaJesu futhi laqhubeka liyisigqili ‘seNotho.’ (Mat. 6:24) Kunguwe wawuzakhethani?

18. Kuyini okumele sikwenze futhi kungani kumele senze njalo?

¹⁸ Kumele sibe sizihlola ukuze sibone ukuthi kuyini esikufaka kuqala ezimpilweni zethu. Kungani kumele senze njalo? Lokhu kuzasinceda sibe leqiniso lokuthi siwasebenzisa kuhle amandla ethu. Elinye ijaha okuthiwa nguMark lithi: “Okweminyaka eminengi ngangizitshela ukuthi ngiphila impilo elula. Lanxa ngangiphayona ngangichitha isikhathi esinengi futhi ngisebenza nzima ngidinga imali ukuze impilo yami ibe ntofontofo. Ngangizibuza ukuthi yindaba ngingasuthiseki. Ngananzelela ukuthi ngangiqakathekisa kakhulu engikufunayo besenginika uJehova isikhathi esincane esiseleyo.” UMark wantshintsha indlela ayecabanga ngayo layephila ngayo ukuze enze okunengi enkonzweni kaJehova. Uthi: “Kwesinye isikhathi ngiyake ngikhathazeke ngokuthi ngizayithola ngaphi imali kodwa uJehova loJesu bayangincedisa futhi lokhu kwenza ngenelise ukwenzela uJehova okunengi.”

19. Kungani kuqakathekile ukwenza izinto ngendlela eqondileyo?

¹⁹ Sizaqhubeka sivuselelwa lijogwe likaJesu nxa sisenza izinto ezintathu. Okokuqala, yenza izinto ngendlela eqondileyo. Senza umsebenzi kaJehova yikho kumele siwenze ngendlela yakhe. Thina siyizisebenzi, uJehova nguye iNkosi. (Luk. 17:10) Nxa singazama ukwenza umsebenzi wakhe ngendlela yethu siyabe sizithwalisa nzima kakhulu. Lenkomo elamandla esejogweni ingazilimaza futhi idinwe nxa ilokhu  izama ukuya lapho efuna khona njalo iphikisana lalokho okufunwa ngumnikazi wayo. Kodwa nxa singenza umsebenzi kaJehova ngendlela yakhe sizenelisa ukwenza izinto ebesicabanga ukuthi ngeke senelise ukuzenza njalo sinqobe lobunzima ebesibona angani ngeke sibunqobe. Khumbula ukuthi akulamuntu ongavimba ukuthi intando kaNkulunkulu igcwaliseke.​—Rom. 8:31; 1 Joh. 4:4.

20. Kuyini okumele kusifuqe ukuthi sithwale ijogwe likaJesu?

²⁰ Okwesibili, sebenza ulenhloso enhle. Sifuna ukudumisa uBaba wethu osithandayo uJehova. Ngesikhathi uJesu elapha emhlabeni abantu ababeyizihwaba kumbe ababezifunela okwabo bacina bengathokozi futhi batshiya ijogwe likaJesu. (Joh. 6:25-27, 51, 60, 66; Flp. 3:18, 19) Kodwa labo ababethanda uNkulunkulu labomakhelwane bazimisela ukulithwala okwempilo yabo yonke besemhlabeni, belethemba lokuyabusa loKhristu ezulwini. Nxa singabalingisela sizahlala sithokoza ngoba siyabe sithwala ijogwe likaJesu silenhloso enhle.

21. UMathewu 6:31-33 uthi uJehova uzasinikani?

²¹ Okwesithathu, hlala ukholwa ukuthi uJehova uzakuncedisa. Sikhethe ukuphila impilo yokuzinikela kuJehova leyokusebenza nzima futhi uJesu wathi sizahlukuluzwa. Kodwa siyakholwa ukuthi uJehova uzasinika amandla okuqinisela kungelani lobunzima obusehlelayo. Nxa singaqhubeka siqinisela ukholo lwethu luzaqina kakhulu. (Jak. 1:2-4) Kanti njalo siyakholwa ukuthi uJehova uzasinika esikudingayo lokuthi uJesu uzaselusa lokuthi abafowethu labodadewethu bazasikhuthaza. (Bala uMathewu 6:31-33; Mat. 6:31-33; Joh. 10:14; 1 Thes. 5:11) Kambe siyabe sisafunani?

22. Kuyini okusithokozisayo?

²² Owesifazana owelatshwa nguJesu wahle wavuselelwa ngelanga lelo. Kodwa wayezavuselelwa kuze kube nini lanini nxa wayengaqhubeka engumfundi kaKhristu othembekileyo. Ubona angani wenzani? Nxa wakhetha ukuthwala ijogwe likaJesu wayezathola umvuzo wokuyabusa laye ezulwini. Konke ayengakudela ukuze abe ngumlandeli kaKhristu kwakuyabe kukuncane kakhulu nxa kuqathaniswa lomvuzo lo. Ngakho kungelani lokuthi silethemba lokuphila ezulwini loba emhlabeni kuze kube nini lanini siyathokoza ngokuthi savuma ukunxuswa nguJesu esithi: “Wozani kimi.”